Tü sümakat tü Wiwüliakat süchiki ooʼulaajirawaa otta akatajirawaa

Nücheküin Jeʼwaa nekeraajüin na kaʼwayuuseshiikana tü namakat sümüin naʼwayuuse wanaa sümaa kasaalüin naya. Müshi Jeʼwaa wanaa sümaa kasaalüin nutuma Adán sümaa Eva: ‹Müshijeseʼe waneeshinjachin wanee wayuu sünain saʼaniraain nukuwaʼipa sümaa nuʼwayuuse süpüla paaʼinwajiraain naya›. Kakalia süchikijee tia, nüküjüin Jesucristo pütchikat tia otta müsü nünüiki sooʼomüin: ‹Saʼaniraapa nukuaippa wane wayuu sümaa wane jierü nütüma Maleiwa, nnojotsü anain süpüla sükatajiraanüin sütüma wayuu› (Génesis 2:24; Mateo 19:3-6). Naashin Jeʼwaa otta Jesús waneepiainjatü tü kasaalüükat waneʼereʼeya sajaʼttüin ouktüle chi toolokoi jee shiale tü jietkat (1 Corinto 7:39). Tü kasaalüükat shia wanee kasa kojutüka maʼin nümüin Jeʼwaa, makalaka nnojoluinjanain nooʼulaajiraain na kaʼwayuuseshiikana sutuma kasa anaka süpüla anoukteʼennaa. Üttüsü naaʼin Jeʼwaa nanain na aainjakana tia sümaa nnojoluin sükajeejatüin tü sümakat tü Wiwüliakat (Malaquías 2:15, 16).

¿Kasa nooʼulaajiraainjatka anainjee na kaʼwayuuseshiikana saashin tü Wiwüliakat? Nüküjüin Jeʼwaa nülerajüin tü amaʼüjirawaakat akuwaʼipaa (Génesis 39:9; 2 Samuel 11:26, 27; Salmo 51:4). Nülerajüin maʼin tia, müsüjeseʼe nuuʼulaain nooʼulaajiraain na kaʼwayuuseshiikana eere wanee aʼluwajiraaka nukuwaʼipa. (Suluʼu ekirajaaya 9, pütchi 7, aküjünüsü tü sünainpünaakat aʼluwajirawaa akuwaʼipaa.) Naashin Jeʼwaa chi nnojoikai aʼluwajiraain nukuwaʼipa, nia aneeküinjachika ayatüle nia kasaalüin jee nuuʼulaajiraale (Mateo 19:9). Sutuma tia, nüneeküle nuuʼulaajiraain, nnojoishi aainjüin kasa mojusü nümüin Jeʼwaa. Akatsaʼa, naʼakajee na anoujüshiikana nnojotsü jaralüin müinjatüin nümüin wanee wayuu nuuʼulaajiraainjachin. Chi nnojoikai aʼluwajiraain nukuwaʼipa eesü nücheküle ayatüin nia sümaa nuʼwayuuse shiyaawajaale suulia saainjala. Eesü süpüla naainjüin tia süka niain aneeküinjachin tü naainjüinjatkat otta nüchecherüinjatü naaʼin süpüleerua tü alatajatkat sutuma tü nüneekakat (Galacia 6:5).

Eesü waneeirua kasa mojuka maʼin nükatalaaka anainjee wanee anoujüshi jee wanee anoujüsü sümaa eein süpüla nooʼulaajiraain, jaʼitairü nnojoluin naʼluwajiraain nakuwaʼipa na kasaatkana amaa naya. Saashin tü Wiwüliakat sülatüle tia, na akatajiraakana ‹ayatüinjana sünain maʼwayuusein jee shiale neiteʼerüin› naʼwayuuse (1 Corinto 7:11). Sünainjee tia, nnojotsü jutatüin nukuwaʼipa süpüla kasaalüin nia (Mateo 5:32). Wekirajaa sünain waneeirua kasa nakatajiraaka anainjee na wayuukana.

Nnojorüle naapüin tü choʼujaakat sümüin nüpüshi. Eeshii wayuu nnojoliika aapüin tü choʼujaakat sümüin napüshi, akatsaʼa nnojotsü shiain süka isain nachiki, shia süka nnojoluin keeʼireein naaʼin otta sutuma tia wainma tü choʼujaakat namüin. ¿Jamüsü sünüiki tü Wiwüliakat nachiki? ‹Wane anoujashi, nnojorule naaʼinmajüin nüpüshi, niyouktüin tü nünüikikat Maleiwa. Mojuleesia maʼi tü naaʼinrakat nuulia wane manoulasai› (1 Timoteo 5:8.) Niyouktüle wanee wayuu niiʼiranajaain nukuwaʼipa, eesü süpüla süneeküin tü nuʼwayuusekat nakatajiraain suluʼu laülaapia, tüü süpülajatü saaʼinmajüin sukuwaʼipa otta nakuwaʼipa süchonnii. Nüküjünüle achiki wanee anoujüshi sünain müin naainjala nachajaweerü akuwaʼipa na laülaashiikana süpüla sütüjaanüin aaʼu shiimainre tia, süka eein süpüla nujuʼitinnüin naʼakajee na anoujüshiikana.

Niʼyaajüle maʼin shia. Eeshii wayuu jashichika maʼin naʼyaajüin naʼwayuuse otta sutuma tia ayuuisü jee eesü süpüla ouktüin shia. Nünoujüle chi makai aainjala, nachajaweerü akuwaʼipa na laülaashiikana süpüla sütüjaanüin aaʼu shiimainre tia süka nojuʼitinnüinjanain naʼakajee na anoujüshiikana na jashichikana maʼin (Galacia 5:19-21).

Müliale maʼin shia nutuma sünainjee sünoujüin. Eeshii wayuu aainjaka wainma kasa shiiʼiree nnojoluin shiʼyataain naʼwayuuse nümüin Jeʼwaa jee naainjireein shia tü kasa mojukat saashin tü Wiwüliakat. Sülatüle tia, süneeküinjatü tü anoujüsükat sükatalaainjatüle nuulia süpüla ‹soonooin nümüin Maleiwa noulia na wayuukana› (Aluwataaushikana 5:29).

Sülatüle kasa eeka mojuin maʼin maʼaka saaʼin tü aküjünüitpakat, nnojotsü jaralüin müinjatüin sümüin wanee anoujüsü sükatajiraainjatüle jee ayatüinjatüle shia nümaa suʼwayuuse. Mayaapejeʼe eein süpüla nakaaliinjüin shia otta naküjüin pütchi analuʼulu na laülaashiikana jee waneeinnua wawalayuu laülaaka aaʼin sünain anoujaa, nayaawatüinjatü aaʼu niain neʼe Jeʼwaa atüjaaka saaʼu tü alatakat namüin na kaʼwayuuseshiikana. Nnojotsü kojutüin tü kasaalüükat otta nnojoishi kojutüin Jeʼwaa sutuma wanee anoujüsü jee niale wanee anoujüshi nakooʼomüinjüle süchiki tü kasa alatakat namüin shiiʼiree nakatajiraain. Otta müsia, nütüjaa aaʼu Jeʼwaa tü naainjakat wanee wayuu shiiʼiree nükatajiraain, jaʼitairü nuunjulüin maʼin süchiki. Shiimain, ‹nnojotsü eein saʼaka tü nükumajalakat Maleiwa eekai sunujulaain nuulia. Otta wasouktüinjatü aaʼu nümüin süpüshua tü waaʼinrakat› (Hebreokana 4:13). Sülatüle wanee kasa mojusü maʼin nümüin wanee anoujüshi nnojotsü jaralüinjatüin mojuin anüiki nüneeküle nükatajiraain. Nnojotsü waainjüinjatüin tia «süka washaʼwaleʼenneenain wapüshua nümülatuʼu [Maleiwa] soʼuweena wane kaʼi süpüla wasouktüinjanain nümüin saaʼu tü waaʼinrapüʼükat» (Roma 14:10-12).