Tü nüpaalakat wapüla Maleiwa

1. ¿Kasa niiʼiyataka aka Jeʼwaa alin nüpüla na wayuukana?

JEʼWAA, nia «chi Maleiwa katakai oʼu süpüla kaʼikat süpüshua» otta nia aküjaka wamüin tü waainjüinjatkat süpüla katüin woʼu waneepia. «Tü pütchi nünüikikat chi Maleiwakai, ayateeria sünain shiimüin süpüla kaʼikat süpüshua.» (1 Ped. 1:23-25.) ¡Talatsü maʼin waaʼin süka eeyülüinya pütchikat tia suluʼu tü Wiwüliakat nutuma Maleiwa! Niiʼiyatüin mayaa alin waya nüpüla.

2. ¿Kasa eeyütkaʼaya nutuma Jeʼwaa suluʼu tü Wiwüliakat süpüla nupueulose?

² Eeyülia nutuma Maleiwa suluʼu tü Nünüikikat tü anüliee niʼitaakat nünain süpüla suchuntüin shia nupueulose. Oʼttüsü sünain ashajünaa nünülia Jeʼwaa suluʼu tü Wiwüliakat wanaa sümaa süküjünüin süchiki tü naainjakat paala sünain «akumajaa kasa süpüshua chaa iipünaa ooʼulaka yaa mmoluʼu» (Gén. 2:4). Süchikijee, ashajünüsü shia kojuyatua sünain tü ipa sümaajatkat tü poloosükat pütchi aapünaka nümüin Moisés, müsü tia palajatkat pütchi: «Taya chi pümaleiwasekai Jeʼwaa» (Éx. 20:1-17, NM). Mayaapejeʼe najaʼttireein Satanaa tü Nünüikikat Maleiwa otta tü nünüliakat, ayatsia shia naaʼinmajüin Jeʼwaa (Sal. 73:28).

3. ¿Kasa naaʼinmajaka Jeʼwaa süpüla woonooinjanain sümaa?

³ Ayatsia nutuma Jeʼwaa tü shiimainkat suluʼu tü karaloukta Nünüikimaajatkat. Sükajee woonooin sümaa tia, müsü nünakakai saaʼin tü wopu kaluʼukat waya (paashajeʼera Salmo 43:3, 4). Süka nanoujüin sünain tü alawaakat na wayuukana, saʼakashii tü piyuushikat, akanasaʼa na aküjüliikana pütchi saʼakashii tü nuwaralakat Maleiwa süka naaʼinrüin tü shiimain nikirajakalü anain (1 Juan 1:6, 7).

TÜ NÜPAALAKAT WAPÜLA MALEIWA

4, 5. ¿Kasa eʼraajünaka aka waya soʼujee juyaka 1931?

⁴ Anasü maʼin tü nüpaalakat wapüla Maleiwa. Tü apaalaakat shia wanee kasa aapünaka sümüin wayuu jee sülatirüin shia namüin na süpüshikana. Tü nüpaalakat wapüla Maleiwa, sünainpünaasü shia watüjaain saaʼu tü Nünüikikat, tü shiimainkat nüchiki otta süchiki tü keeʼireekat naaʼin. Otta eesia wanee kasa analeeka atuma shia.

⁵ Tia, aashajaana achikit sünain wanee outkajawaa eejatka soʼu juyaka 1931 chayaa Columbus (Ohio), Estados Unidos. Ashajünüsü JW sünain tü karaloukta sümaajatkat tü ekirajaanajatkalü anain. Müsü wanee wawala: «Natüjawee aaʼu na wawalayuukana jamaluʼuluin tü leetüra ashajünakat». Süküjünaka jamaluʼuluin tia rimiinkoʼu 26 soʼu kashika juulioʼu, 1931. Aküjünüsü nnojoliinjanain weʼraajünüin süka tü anülieekat: Ekirajaalii sünain tü Wiwüliakat, eʼnnaajünüinjana jooluʼu waya sükajee tü anüliee suluʼujeejatkat tü Wiwüliakat: Aküjülii pütchi nüchiki Jeʼwaa (Jehovahʼs Witnesses suluʼu inkülee). Talatsü maʼin naaʼin na wawalayuukana soʼu tia (paashajeʼera Isaías 43:12). Müshi wanee wawala: «Sotoyülia taaʼin tü münakat soʼu tia otta naʼwatüin maʼin najapü na wawalayuukana». Nnojotsü eein wanee iküleesia achekaka anülieekat tia, wayaʼala neʼe wayakana; alatüirü mekiisat shikii juya süchikijee tia. ¡Anakatche maʼin «aküjülii pütchi nüchiki Jeʼwaa» wamünüin!

6. ¿Jarat tü pütchi süpüshikat nüpaala Maleiwa?

⁶ Süpüshi tü nüpaalakat Maleiwa shia tü pütchi suluʼukat tü Wiwüliakat, pansaasü maʼin otta anasü wakuwaʼipa maaʼulu sutuma. Jülüja waaʼin nukuwaʼipa Abraham, Isaac otta Jacob, yootushii eera naya sümaa napüshi süchiki tü naainjüinjatkat süpüla talatüin Maleiwa namaa. Makalaka niyouktüin achiki José ainkawaa sümaa nuʼwayuuse Potifar suulia kaainjalajüin nia nuʼupalapünaa Maleiwa (Gén. 39:7-9). Soʼu nakalia na nikirajüinkana Jesuu, aküjünüsü namüin tü nanoujüinjatkalü anain jee eesü nashatüle shia sünainjee nakuwaʼipa na waneeinnua. Naainjüin tia Pablo wanaa sümaa nüküjüin jamüinjatüin sukuwaʼipa tü ekawaa aipaʼajatkat nutuma chi Senyotkai (1 Cor. 11:2, 23). Suluʼusü tü Nünüikikat Maleiwa tü waainjüinjatkat süpüla waʼwaajüin nia ‹süka waaʼin otta süka tü shiimainkat› (paashajeʼera Juan 4:23, 24, NM). Mayaapejeʼe eein süpüla anain sukuwaʼipa wayuu süpüshuaʼa sükajee tü sümakat tü Wiwüliakat, wayaʼala neʼe kojutka amüin shia.

7. ¿Jarat tü pütchi saʼakakat nüpaala Maleiwa?

⁷ Saʼaka tü nüpaalakat Maleiwa eesü tü aküjünakat maaʼulu eeʼiyataka eein Jeʼwaa wamaa (Sal. 118:7). Talatsü waaʼin waashajeʼerapa shia, jaʼitainna müliain waya atumawaa. Kooʼomüinsü wamüin tü nüpaalakat Maleiwa jee sünainpünaasü shia pütchikat tüü: «‹Jaʼitairü kasain maʼin aainjünüin püka, amalajaajeerü, jaʼitairü kasain eperulajünüin püchiki, piyamüleerü. Shiaʼaya nüpaalaka tia Jeʼwaa namüin na aʼyataakana nümüin» (Is. 54:17; NM). Jaʼitairü kasain maʼin naainjüin Satanaa waka, nnojoleena jamajüin waya sutuma.

8. ¿Kasainjatü wekirajaaka anain jooluʼu jee sünain tü wanee ekirajaayakat?

⁸ Nüchajaa akuwaʼipat Satanaa najaʼttirüin tü Nünüikikat Maleiwa, nnojoluin shiʼraajünüin nünülia Jeʼwaa otta nnojoluin sütüjaanüin aaʼu tü shiimainkat. Amüla neʼe naainjüin tia, nnojoishi antapünaain nünain Jeʼwaa. Wekirajaainjatü anain jooluʼu jee sünain tü wanee ekirajaayakat süchiki tü naainjakat Jeʼwaa süpüla naaʼinmajüin tü Nünüikikat, watüjaain saaʼu kasaichin nünülia otta watüjaain saaʼu tü shiimainkat.

NAAʼINMAJÜIN JEʼWAA TÜ NÜNÜIKIKAT

9-11. ¿Kasa eeʼiyataka isain nachiki najaʼttirüin na wayuukana tü Wiwüliakat?

⁹ Mayaainjeʼe sajaʼttinneein tü Nünüikikat Jeʼwaa, naaʼinmajüin shia. Süchajaain sukuwaʼipa tü iküleesia katoolikakat süpüla nnojoluin saashajeʼennüin tü Wiwüliakat. Suʼunnaa noutkajaain na shikiipüʼükana tü iküleesia katoolikakat chayaa Francia soʼu 1229, naküjüin kaainjalain na wayuukana naashajeʼerüle tü Wiwüliakat suluʼu nanüiki. Meematsia tü aneekünakat soʼu 1234 chayaa España. Soʼu juyaka 1559, nüküjüin chi kanüliakai Papa Pablo IV nnojoluinjatüin shiʼinprimiijünüin tü Wiwüliakat aluʼusaʼa anashiire shia sümüin tü iküleesiakat.

¹⁰ Ayatsia eein maaʼulu tü Wiwüliakat mayaapejeʼe sajaʼttireein shia wayuu. Soʼutpünaa 1382 alatinnüsü tü Wiwüliakat suluʼu inkülee nutuma John Wyclef namaa waneeinnua wayuu. Eeshi wanee alatirüi Wiwülia oʼutünakai aaʼin soʼu 1536, nia William Tyndale. Müshi nia saashin wayuu süpülapünaa nüülünüin: «¡Senyotkalee, pükaaliinja chi aluwataaikai saaʼu Inglatera süpüla niyaawatüin saaʼu tü shiimainkat!». Nüülünaka sümaa naʼajünüin.

¹¹ Mayaapejeʼe najaʼttireein na wayuukana tü Wiwüliakat, isasü nachiki naaʼinrüin tia, ¿süka jamüin? Süka sujuʼitüin wanee Wiwülia nülatiraka Miles Coverdale soʼu tü juyakat 1535. Nuʼunirüin tü niʼyataainkat sükajee tü naainjakat paala Tyndale süka Nuevo Testamento otta sükajee Génesis sünainmüin Crónicas. Otta naapaain tü sümakat tü Wiwüliakat suluʼu Latín otta tü naainjakat Martín Lutero suluʼu alemán süpüla nülatirüinjatüin süpüshi tü Wiwüliakat. Maaʼulu yaa kamalainsü maʼin sümüin wayuu tü Wiwüliakat Traducción del Nuevo Mundo de las Santas Escrituras süka mapüleein tü sümakat, pansaain shia otta mapüleein aküjaa pütchi süka. Talatsü waaʼin süka nnojoleerüin niyüülajüin Jeʼwaa tü Nünüikikat süpüla najaʼttirüin shia Satanaa otta na wayuukana.

NAAʼINMAJÜIN JEʼWAA TÜ NÜNÜLIAKAT

12. ¿Jamüsü eeyütkaʼaya nünülia Maleiwa suluʼu Traducción del Nuevo Mundo?

¹² Naaʼinmajüin Jeʼwaa tü nünüliakat süpüla shiʼitaanüin suluʼu tü Wiwüliakat maʼaka suluʼuin shia Traducción del Nuevo Mundo. Nalatirüin shia na wawalayuukana süka süpüshuaʼa naaʼin. Müsü wanee pütchi sünainkat tü Wiwüliakat alijunaikiruʼu: «Tü anakalü maʼin atuma Wiwüliakat tüü shia süshajünüin tü nünüliakat Maleiwa eeinjatüle shia. 6.973 süshajünüin süka tü ashajünakat süka hebreo otta 237 süshajünüin süka tü ashajünakat süka griego». Alatinnüirü tü Wiwüliakat Traducción del Nuevo Mundo suluʼu 116 anüikii otta eʼinprimiijünüirü 178.545.862.

13. ¿Jamüsü watüjaaka saaʼu niʼraajünatüjülinya Maleiwa süka tü nünüliakat?

¹³ Atüjaanatüjülia aaʼu kasaichin nünülia Maleiwa; nütüjaa aaʼulu shia Adán sümaa Eva. Süküjüin tü Wiwüliakat suchuntüin Eva nünülia Maleiwa. Wanaa sümaa mojutüin Noé nutuma Cam süchikijee tü juya miyoʼushaatakat, müshi Noé: «Anakaja nuʼwaajünüle Jehová, chi Nümaleiwasekai Sem. Otta müshia Canaán [chi nüchonkai Cam], nüchepchieechi Sem» (Gén. 4:1; 9:26). Majiraashi Maleiwa nüchiki: «Tayaʼaya chi kanüliakai Jeʼwaa. Tayaʼalüinjachi neʼe aʼwaajünaka. Müshi nia nüchikuaʼa: «Taya chi kanüliakai Jeʼwaa. Nnojoishi eein wanee Maleiwa naata toulia» (Is. 42:8; 45:5, NM). Naaʼinmajüin tü nünüliakat süpüla niʼraajünüinjachin sutuma wayuu maʼleekalia. Kojutsü wamüin weʼraajünüin süka nünülia Maleiwa, ¿aashimüin? (Sal. 20:5.)

14. ¿Kasa amaa ashajünaka anain nünülia Maleiwa?

¹⁴ Nnojotsü shiain neʼe tü Wiwüliakat ashajünüin aluʼu tü nünüliakat Maleiwa. Ashajünüsü shia sünain waneeirua kasa maʼaka saaʼin tü kanüliakat Piedra Moabita suluʼu tü mma chakat Dhiban, wüinpümüin saaʼujee mar Muerto. Sünain tia ipakat, antüna anainrü nünülia Omrí, chi aluwataaikai otta tü nümakat Mesá süchiki eʼraa wayumüin namüin na israeliitakana (1 Rey. 16:28; 2 Rey. 1:1; 3:4, 5). Wanee kasa anaka maʼin atuma tia ipakat shia süshajünüin sünain tü pienchisükat leetüra ashajünaka aka nünülia Jeʼwaa suluʼu hebreo. Otta antüna anainrü tia pienchisükat leetüra sünain tü kanüliakat Cartas de Lakís, shia shiʼipa wanee julaʼa antünaka anain chayaa Israel.

15. ¿Kasa wayuu tü Septuaginta münakat? ¿Jamüsü shiʼyataanaka anain?

¹⁵ Na alatirakana paala tü pütchi suluʼukat tü Wiwüliakat, nachajaain sukuwaʼipa süpüla ayatüinjatüin süshajünüin nünülia Maleiwa. Püreesashii na judíokana chaa Babilonia soʼujee 607 sünainmüin 537 süpülapünaa wakalia otta eeshii na maleʼejüinkana noumainpaʼamüin. Sutuma wainmain na judío makatakana chaa Alejandría, choʼujaasü namüin sülatinnüin suluʼu girego tü Ashajuushikat süka hebreo. Makalaka süshajünüin soʼu siglo III otta sujutaaka soʼu siglo II, tia, eʼraajünüsü süka tü Septuaginta münakat. Ashajünüsü nünülia Jeʼwaa süka hebreo suluʼu süpüshi tia karalouktakat.

16. Püküja jamakuwaʼipalüin süshajünaka nünülia Maleiwa suluʼu tü karaloukta ojuʼitakat soʼu 1640.

¹⁶ Ashajünüsü nünülia Maleiwa suluʼu tü karalouktakat Bay Psalm Book (Libro de Salmos de la Bahía), shia tü palajatkat karaloukta ashajünaka chaa América del Norte natuma na aashajaakana inkülee. Ojuʼitüsü tü palajatkat soʼu 1640 otta shia alatinnaka Salmos sünainjee hebreo suluʼumüin inkülee. Ashajünüsü nünülia Maleiwa suluʼu Salmo 1:1, 2 eere saashajaain süchiki «analeeinya chi wayuu nnojoikai oonooin sümaa sünüiki wayuu mojulaasü; süka shiain talatüin atuma naaʼin tü nuluwataakalü anain Jehová». Puusüteerü anain sooʼomüin pütchi süchiki nünülia Maleiwa suluʼu tü karalouktakat El nombre divino que durará para siempre.

NAAʼINMAJÜIN JEʼWAA TÜ SHIIMAINKAT

17, 18. (1) Püküja jamaluʼuluin tü pütchikat shiimain (2) ¿Kasa sünainpünaaka tü shiimainkat nüchiki Maleiwa?

¹⁷ Talatsü waaʼin sünain aʼyatawaa nümüin Jeʼwaa, chi Maleiwa aküjakai waneepia tü shiimainkat (Heb. 6:18). Tü shiimainkat saashin wanee karaloukta, sünainpünaasü shia wanee kasa atüjaanaka aaʼu sülatüirüin. Tü shiimainkat suluʼu hebreo shia wanee kasa atüjaanaka aaʼu sünain eein shia. Süka griego sünainpünaasü shia wanee kasa pansaaka akuwaʼipa jee lotoko akuwaʼipa.

¹⁸ Naaʼinmajüin Jeʼwaa tü pütchi shiimain suluʼukat tü Wiwüliakat otta nükaaliinjüin waya süpüla watüjaainjatüin saaʼu (2 Juan 1, 2). Müsü tü Wiwüliakat süchiki tü watüjaakalü aaʼu: «Napüna na lotushiikana akuwaʼipa müsü aka saaʼin nuwarala chi kaʼikai, suwasajaa suwasajaa sümapa tü aikat» (Prov. 4:18, NM). Pansaasü waaʼin sümaa tü nümakat Jesuu nümüin Maleiwa: «Anakaja müleka pükatarüle naya pünainmüin sütümajee tü pünüiki shiimüinkat» (Juan 17:17). Tü pütchi shiimainkat, suluʼusü tü karaloukta Nünüikimaajatkat Maleiwa. Tia, shia süpüshuaʼa tü wanoujakalü anain (Gal. 2:14). Eesü tü shiimainkat süchiki nünülia Jeʼwaa, süchiki tü Nuluwataayakat, süchiki ouktüin Jesuu otta nüsoʼiraain aaʼin. Wekirajaa sünain tü naainjakat Maleiwa süpüla naaʼinmajüin tü shiimainkat nüchiki mayaapejeʼe nuunjulajeein shia Satanaa.

NÜMALAJEʼERÜIN JEʼWAA TÜ NAAINJAKAT SATANAA

19, 20. ¿Jarai chi wayuu kanüliakai Nemrod? ¿Kasa alataka sümüin tü miichi nukumajirakat?

¹⁹ Mawaipuʼusü wayuu süchikijee tü Juya Miyoʼushaatakat: «Nnojoishi eein wanee wayuu maʼaka naaʼin Nemrod eekai tütüin sünain olojoo sümaa peʼipaain nia nümaa Jeʼwaa» (Gén. 10:9, NM). Nüʼünüüshi Jeʼwaa jee nuʼwaajüin Satanaa. Shia naaʼinrapuʼuka tia na üttakana aaʼin nünain Jesuu. Müshi Jesuu namüin: «Shia jaaʼinreeka maʼi tü kasa mojusü nüchekakat jüpüleerua chi sülaülakai yolujaa, süka niain shiimüin jüshin. [...] Niyouktüin tü shiimüinkat» (Juan 8:44).

²⁰ Nia laülaaka Nemrod saaʼu Babel otta saaʼu waneeirua mma süʼütpünaaka tü süchikat Tigris otta Éufrates (Gén. 10:10). Eeshi süpüla niain akumajirüin tü piichi miyoʼushaatakat soʼutpünaa juyaka 2269 süpülapünaa wakalia. Nayoukta achikirü na akumajüliikana tia piichikat walakatüinjatüin wayuu sainküin Mma, makalaka namajiraain: «Anashii kolotüle waya waneepia süpüla weʼnnaajünüin sutuma wayuu suulia waʼwalakajeʼennüin sainküin mma. Jooʼuya wakumajaiwa wapüla wane pueulo miyoʼu kakulaatsein. Je suluʼu tü pueulokat, wakumajeerü wane aliikajaalee müleʼoshaatainjatüin iipünaamüin sutuʼupaʼamüin tü sirumakat». Amüla neʼe naainjüin tia; nuʼwalakajeʼerüin Jeʼwaa sukuwaʼipa nanüiki sümaa nuʼwalakajeʼerüin naya sainküinpünaa tü Mmakat süpüshuaʼa saaliijee tü naaʼinrakat (Gén. 11:1-4, 8, 9). Nnojotsü kasayaain anain apüla tü naainjakat Satanaa shiiʼiree nuʼwaajünüinjachin. Matüjüinsai akanajuwaa Jeʼwaa otta kooʼomüinshii maʼin na wayuu aʼwaajakana nia.

21, 22. (1) ¿Jamüsü ayataka eein wayuu anoujaka nünain Jeʼwaa? (2) ¿Kaseerü wekirajaaka anain sünain tü wanee ekirajaayakat?

²¹ Ayateena eein na wayuu anoujakana nünain Jeʼwaa süka naaʼinmajüin tü Nünüikikat, niʼraajirüin tü nünüliakat otta nikirajüin wayuu sünain tü shiimainkat (Is. 30:20, 21). Talatsü waaʼin waainjüle tü nüchekakat Jeʼwaa. Makalaka eejüinjatüin waaʼin suulia sümalajaain wanoula, waainjüinjatü tü nümakat Maleiwa otta jüüjüüinjana waya nümüin chi naaʼinkai.

²² Wekirajaajeerü anain sünain tü wanee ekirajaayakat jamakuwaʼipalüin sukumajaaka tü alawaa sunoujakalü anain wayuu otta atüjaana aaʼu nnojoluin shiimain shia shikirajaanapa anain tü Nünüikikat Maleiwa. Wekirajaajeerü anain tü nikirajakalü anain waya Jeʼwaa sümaa kojutüin maʼin shia wapüla otta shialeʼeya süpüshi tü nüpaalakat wamüin Maleiwa.