¿Jamüsü joutka maʼin müliaa?

SUTUMA MOJULAAIN NA ALUWATAASHIIKANA

«Nuluwataale wanee wayuu eekai [mojulaain], müliasü naaʼin na nuluwataakana aaʼu.» (Proverbios 29:2, NM.)

Wainma na aluwataalii müliakana atuma na wayuu naluwataakana aaʼu. Eepajaʼa chi eekai nnojolin mojulaain, nükaaliinjeein na wayuukana. Akatsaʼa isain nachiki shia. Süka jamüin, atkaajiraashii neʼe süchiirua jaralin anain maʼin süpüla aluwatawaa. Eeshii eeka washireein nanainjee na wayuukana. Müshi Henry Kissinger, seküretaariopuʼushi süchiirua tü mmakat Estados Unidos: «Isasü nachiki naluwataain na wayuukana otta mojusü sukuwaʼipa tü naainjeekalü amüin».

Müsü tü Wiwüliakat: «Nnojoishi aluwataain chi wayuukai saaʼu nukuwaʼipa» (Jeremías 10:23, NM). Isale nüchiki chi wayuukai nuluwataain saaʼu nukuwaʼipa, yaaʼaleekajaʼa nüinkeerüin nuluwataain saaʼu tü wayuukalüirua. ¿Pütüjaaitpa aaʼu jamüin isaka nachiki na wayuukana najaʼttirüin tü müliaakat? Eeshii nayale na aluwataashiikana müliain atuma wayuu.

SUTUMA TÜ IKÜLEESIAIRUA NNOJOTKA SHIIMAIN

«Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia.» (Juan 13:35.)

Mayaapejeʼe naashajaain maʼin süchiki aijirawaa otta paaʼinwajirawaa na shikiipüʼükana tü iküleesia nnojotkat shiimain, nnojoishii ekirajüin wayuu süpüla aijiraainjanain naya sümaa nnojoluin nalerajüin wayuu. Shia neʼe jülüjaka naaʼin tü nakuwaʼipakat suluʼu tü iküleesia kaluʼukat naya otta natkeʼerüin wayuu. Müshi Hans Küng sajaʼttiamüin tü karaloukta nüshajakat: «Na teʼrakana atkaain maʼin süchiirua poliitika naya na suluʼukana tü iküleesiakat» (El cristianismo y las grandes religiones).

Eeshii na shikiipüʼükana tü iküleesia nnojotkat shiimain anaka amüin nümaʼüjiraain nukuwaʼipa wanee wayuu sümaa wayuu nnojotka nuʼwayuusein jee na tooloyuu amaʼüjiraakana sümaa tooloyuu. Sünainjee tia, joutsü maʼin müliaa, ayuulii, ojutiraa joʼuu, ooʼulaajirawaa otta kachonsü neʼe wayuu sümaa nnojoluin sücheküin.

SUTUMA NNOJOLUIN LOTUIN SUKUWAʼIPA WAYUU

«¿Kasa kaainjaleeka atüma wane wayuu? Kaainjaleeshi süka noonooin sümaa tü kasa mojusü keeʼireekat naaʼin. Müleka naaʼinrüle tü mojusükat keeʼireekat naaʼin, kaainjalaa tia.» (Santiago 1:14, 15.)

Sutuma kaainjaralin wanee wayuu, nnojotsü anain nutuma sukuwaʼipa tü kasa naainjakat. Shia naainjeeka maʼin amüin tü kasa mojusü jülüjakat naaʼin (Éfeso 2:3). Yaaʼaleekajaʼa niʼrüle tü kasa mojusü keeʼireekat naaʼin, nüchecherüinjatü maʼin naaʼin suulia naaʼinrüin shia. Nnojorüle naainjüin tia, amojujaajeerü nukuwaʼipa.

Müshi P. D. Mehta, wanee especialista: «Tü kasa müliakalü atuma naaʼin wanee wayuu shia sutuma kachiiruain naaʼin tü kasa mojusü suchuntaakat naaʼin otta washireein nia». Wainmairü wayuu mojuka akuwaʼipa sümaa müliain natuma napüshi otta naʼaleewainyuu. ¿Jamüsü? Süka kachiiruain naaʼin tü kasa suchuntaakat naaʼin jee kiʼrain naya sünain epeʼruwaa, ashaittaa, amaʼüjirawaa akuwaʼipaa, sünain tü kokaiinakat jee waneeirua kasa. Sükajee tia, watüjaa aaʼu shiimain tü sümakat tü Wiwüliakat, tü pütchi makat mayaa: «Watüjaa aaʼulu sünain müliayülüinya süpüshua tü kasa akumajuushikalüirua, je keeʼireesü maʼi saaʼin taasheein shia suulia. Müliasü maʼi shia maa aka saaʼin wane wayuu eekai saʼalijaain» (Roma 8:22).

SUTUMA TÜ YOLUJAAKALÜIRUA

Saashin tü Wiwüliakat nia Satanaa «chi aluwataakai saʼaka wayuu manoujainsat» otta eeshii na yolujaa nümaajanakana (2 Corinto 4:3, 4; Alateetkat Mapeena [Apocalipsis] 12:9).

Satanaa otta na yolujaa nümaajanakana, neʼikeʼereein wayuu sümaa naainjireein naya tü keeʼireekat naaʼin. Müshi chi aluwataaushikai Pablo: «Nnojoliishii waya atkaashiin sümaa wayuu. Atkaashii sümaa tü yolujaa mojulaasükalüirua, tü aluwataakat saaʼu tü manoujainsatkalüirua sainküin mmakat, je saaʼu tü wayuukolüirua saʼakakat piyuushi sütüma saainjala, aainjinnakat kasa mojusü sütüma yolujaa» (Éfeso 6:12).

Mayaapejeʼe keejiain nümüin Satanaa otta na yolujaakana müliain wayuu natuma, shia nachajaaka maʼin nakayaleʼerüin naya nuulia Jeʼwaa, chi Maleiwa Miyoʼushikai maʼin (Salmo 83:18). Waneeirua kasa nemeejaka aka wayuu süpüla naainjireein tü keeʼireekat naaʼin, shia tü ooʼulakaakat süka shüliwai, tü saainjakat outsü, tü amaʼüjaakat wayuu jee tü ooʼulakaakat. Makalaka naapirüin waya Jeʼwaa suulia mojuin wakuwaʼipa otta naaʼinmajüin na wayuu aʼleejeekana tü yolujaakalüirua (Santiago 4:7).

SUTUMA SÜLÜʼÜLÜIN SÜPÜLA SAJAʼTTÜIN KASA SÜPÜSHUAʼA

Kakaliairü ashajünüin suluʼu tü Wiwüliakat tü pütchi makat mayaa: «Sülüʼütpa sükalia sajaʼttüinjatüin tü kasakat süpüshua. Shiimüin sünain müliainjatüin maʼi wayuu süpüshua soʼu kaʼikat tia».

Süchikijee, ashajünüsü jamüin müliainjatka wayuu: «Eejeerü wainma wayuu eekai kapülain naaʼin nakuaippa neʼe namüiwa, eekai kachiiruain naaʼin tü washirüükat, eekai naʼwaataain suluʼu nakuaippa, eekai neʼrüin wayumüin sümüin wayuu [...], eejeerü wainma wayuu eekai maalin wayuu napüla, eekai mamülialain amüin wayuu, eekai mojuin nanüiki sujuuna wayuu, eekai maaʼin naaʼin sümaa jashiee, je eekai nayouktüin tü anasükat. Eejeerü wainma wayuu eekai naaʼinreein kasa mojusü, eekai nayouktüin aluwataanaa, eekai yaletayaain nakuaippa suʼupala wayuu, je eekai shaitteein waneepia saaʼu maalin Maleiwa napüla». Wanee kasa müliaka atuma wayuu shia süka sülüʼülüin «sükalia sajaʼttüinjatüin tü kasakat süpüshua» (2 Timoteo 3:1-4).

Sükajee tü wekirajaaitpakalü anain, watüjaaitpa aaʼu isain nachiki na wayuukana najaʼlajeʼerüin tü müliaakat jaʼitairü nakaaliinjeein wayuu. ¿Jaraika wachuntajachin amüin kaaliinwaa? Nümüin chi Maleiwakai. Nüküjüin najaʼttirajatüin tü kasa mojusü naaʼinrakat Satanaa otta tü yolujaakalüirua (1 Juan 3:8). Sünain tü wanee pütchikat, wekirajaweerü anain tü naaʼinrajatkat Maleiwa süpüla najaʼttirüin tü müliaakat.