SUSOUKTAKA EʼIPAJEE TÜ WIWÜLIAKAT
¿Kasa naaʼinrajatka wanee wayuu aneere nukuwaʼipa sümaa nuʼwayuuse?
Anasü nukuwaʼipa wanee wayuu sümaa nuʼwayuuse sutuma tü pütchi suluʼukat tü Wiwüliakat. ¿Jamüsü anaka shia? Süka nümaʼanajeejatüin shia Jeʼwaa, chi keʼitaalakai shikii tü kaʼwayuuseekat. Shikirajüin nia tü Wiwüliakat süpüla anainjatüin nukuwaʼipa sümaa nuʼwayuuse, süpüla nnojoluinjatüin nuuʼulaain shia otta süpüla anainjatüin nünüiki yootopa nia sümaa. (Paashajeʼera Colosas 3:8-10, 12-14.)
Kojutüjiraainjana na paʼwayuuseewashiikana. Aneerü nakuwaʼipa müleka naainjüle tü nuchuntakat Maleiwa namüin waneʼewai nakua. (Paashajeʼera Colosas 3:18, 19.)
¿Kasa naaʼinrajatka wanee wayuu waneepieere nia sümaa nuʼwayuuse?
Aijiraale wanee wayuu sümaa nuʼwayuuse, nnojoleena ooʼulaajiraain. Nüküjüin wamüin Maleiwa jamüinjatüin saaliin wayuu wapüla. Aijiraashi maʼin nia nümaa Jesucristo, chi Nüchonkai. Washatüinjatü tü nakuwaʼipakat. (Paashajeʼera 1 Juan 4:7, 8, 19.)
Kojutüle namüin na wayuukana niʼitaalain Maleiwa shikii tü kaʼwayuuseekat, nnojoleena ooʼulaajiraain. Keeʼireesü naaʼin Maleiwa waneepiainjachin chi wayuukai sümaa nuʼwayuuse. ¿Kasa apüla? Süpüla anainjatüin nakuwaʼipa otta anainjatüin nakuwaʼipa nachonnii. Nukumajala Maleiwa chi toolokoi sümaa tü jietkat süpüla nountüinjatüin nakaaliinjiraain otta wanaawajiraainjatüin naaʼin. Süpüla nashatüin nukuwaʼipa Maleiwa sünain aipüralin nia, nukumajüin naya sünain müin aka saaʼin nukuwaʼipa. (Paashajeʼera Génesis 1:27 otta 2:18, 24.)