¿Jamüsü eeyütkalia tü Wiwüliakat?

Sutuma nnojoluin sajaʼttinnüin tü Wiwüliakat, eesü süpüla eein shia pümaʼana otta eesü süpüla paashajeʼerüin shia. Püneeküle wanee Wiwülia eekai anain maʼin sukopiaajia, meerü paashajeʼerakai saaʼin tü Ashajuushi sümaiwajatkat süka wanaawain sünüiki sümaa.a ¿Jamüsü eeyütkalia tü Wiwüliakat mayaapejeʼe jooin süpüla itta tü ashajünakalü anain shia sümaiwa paala, mayaapejeʼe eein na ajaʼttireekana shia otta na aʼwanajeekana tü sümakat? ¿Jamüsü anaka maʼin tü Wiwüliakat suulialeʼeya karaloukta süpüshuaʼa?

Wattainna naalii na ekirajaakana sünain tü Wiwüliakat makana anüiki maʼaka naaʼin Pablo, müshi nia: «Süpüshuaʼa tü ashajuushikat, nümaʼanajeejatü shia Maleiwa» (2 Timoteo 3:16, TNM). Nanouja anainrü nnojoluin sajaʼttinnüin tü Wiwüliakat süka Nünüikin shia Maleiwa otta nia aaʼinmajaka shia süpüla eeinjatüin shia maaʼulu. Nikirajaa anainrü mapa tü Wiwüliakat Faizal, chi wayuu waküjakai achiki sünain tü palajatkat ekirajaaya. Ponoshootosü naaʼin tü nikirajaakalü anain. Niʼrüin nnojoluin suluʼuin tü Wiwüliakat tü nekirajakalü anain na anoujakana nünain Jesuu naashin. Sütanalüin naaʼin Faizal tü naaʼinrüinjatkat Maleiwa yaa saaʼu tü Mmakat saashin tü Wiwüliakat.

Anuu nünüiki Faizal: «Tatüjaa aaʼulu nüsülajalain Maleiwa tamüin tü Wiwülia tajapuluʼukat. Nukumala Maleiwa kasa süpüshuaʼa, shialeekajaʼa iseematüin nüchiki naapüin wamüin tü Nünüikikat sümaa naaʼinmajüin shia. Nnojorüle wanoujain tia, müshii nnojoliika wanoujain sünain nuuntüin Maleiwa, Chi Pülashikai maʼin naaʼinrüin kasa süpüshuaʼa. Nnojoittaʼaleeshijaʼa taya süpüla tanoujainjachin sünain eein tü isakat nüchiki Maleiwa» (Isaías 40:8).