1 | Puʼuraaja: Püpüta «najapuluʼu Maleiwa süpüshuaʼa tü kasa shapaakalü atuma» paaʼin

TÜ SÜMAKAT TÜ BIBLIAKAT: «Jüpüta najapuluʼu Maleiwa süpüshuaʼa tü kasa shapaakalü atuma jaaʼin, jama jülüjain maʼin jia naaʼin» (1 PEDRO 5:7, TNM).

¿Jamaluʼulu tia?

Nücheka achikit Jehová waküjain nümüin tü shapaakalü atuma waaʼin (Salmo 55:22). Jaʼitairü kasain maʼin tü alatakat wamüin, anasü nümüin Maleiwa waküjale shia nümüin. Jülüjashii waya naaʼin Maleiwa shapaale waaʼin sutuma wanee kasa. Wanee kasa waaʼinrajatka süpüla jutatüin waaʼin shia woʼuraajüle nümüin Jehová (Filipos 4:6, 7).

¿Jamüsü jalouika wamüin tü sümakat?

Nnojoliire anain waya suluʼu wekii, eeshiijaʼa süpüla müin wamüiwaʼakai waaʼin, shialeekajaʼa nnojorüle nayaawatüin saaʼu na waneinnua tü alatakat wamüin (Proverbios 14:10). Niapejeʼe Maleiwa ayaawatüin saaʼu tü alatakat wamüin, nia chi aapajakai wanüiki otta nia chi kamaneekai wamüin. Makalaka eein süpüla waküjain nümüin jamüin waaʼin. Jülüjashii waya naaʼin Jehová, nütüjaa aaʼu mojule waaʼin otta niyaawata aaʼu tü wachechereetkalü akajee waaʼin. Talatüshi nia waküjale nümüin tü shapaakalü atuma waaʼin (2 Crónicas 6:29, 30).

Süpüla weʼitaʼaleeinjatüin maʼin waaʼin sünain nükaalinjeenain waya Jehová, anashii woʼuraajüle nümüin. Eesü süpüla müin wanüiki maʼaka nünüiki wanee wayuu ashajakai wanee pütchi suluʼu tü Bibliakat eere nümüin mayaa: «Piʼrüin tü tamülialakat otta jülüjashi taya paaʼin wanaa sümaa mojuin maʼin taaʼin» (Salmo 31:7). Süka watüjaain saaʼu alin nümüin Jehová tü alatakat wamüin, sükatchinreerü waaʼin süpüla ayatüin wachecherüin waaʼin soʼunnaa tü müliaa weʼrakat. Nnojotsü neʼe nütüjaain aaʼu Jehová tü müliaa weʼrakat, niyaawatüinña saaʼu jamüin waaʼin otta nükaalinjeein waya süpüla wantüin sünain tü pütchi atütüleʼereetkat waaʼin suluʼujee tü Bibliakat.

Jalouisü tü sümakat tü Bibliakat nümüin Julián

Takuwaʼipa sutuma shapawaa aaʼin

«Tachajaain maʼin sukuwaʼipa soʼukaiwai süpüla anainjatüin taaʼin shapaapa maʼin taaʼin jee süntajaapa mojuu suluʼu taaʼin. Antajaʼalaa müsü tü shapawaakalü aaʼin tamüin, matüjainsat shia aapiraa. Eesü sülatalaʼa sümüle tamüin tia saʼakale taya wayuu otta jülüjasü taaʼin jameerüin nanüiki tachiki.

»Na atüjaakana saaʼu takuwaʼipa nachajaain sukuwaʼipa süpüla nakaalinjain taya. Eesü naküjale wanee pütchi nnojotka anain tamüin, kojutupejeʼe tamüin tü naaʼinrakat tapüleerua süpüla anainjatüin taaʼin.

»Eesü isale tachiki oʼuraajaa shapaale maʼin taaʼin jee süntajaale mojuu aaʼin tamüin. Süntajaapa tia tamüin, achecherüinjachi taya taaʼin süpüla toʼuraajüin nümüin Jehová. Eesü wattale saalii kasa antajaaka tekiiruʼumüin. Sünainjee tia, isasü tachiki taküjain nümüin Jehová tü suluʼukat taaʼin».

Jalouisü tamüin tü sümakat tü Bibliakat

«Tü tatüjakat suluʼujee tü Bibliakat shia nnojoluin choʼujaain wainmainjatüin tanüiki toʼuraajapa nümüin Maleiwa otta nnojoluin choʼujaain maʼin takumajüinjachin tanüiki süpüla anain shia nümüin. ‹Jehová, jalia maa taya›, eeshi maʼwaire taya isale tachiki taküjain nümüin jamüin taaʼin. Mayaainjeʼe palitchoin neʼe tanüiki nümüin Jehová, tatüjaa aaʼu niyaawatüin saaʼu tü tamakat nümüin otta nükatchinrüin taaʼin soʼuleʼeya tia. Wane kasa taaʼinraka shia teʼrajeʼerüin sümaʼana tottoot. Sükajee toʼuraajüin jee teʼrajeʼerüin, anasü taaʼin. Eesü kapüleere tamüin tarütkaain nünainmüin chi Washi iipünaajachikai sutuma tü alatawaikat tamüin. Ayatapejeʼe taaʼinrüin tia süka tatüjaain saaʼu alin taya nüpüla otta nükaalinjeein taya».