Éxodo
10 Upéi Jehová heʼi Moiséspe: “Tereho faraón rendápe. Che ningo aheja haʼe ha isiervokuéra oñembopyʼahatã+ ahechauka hag̃ua faraónpe che podér umi milágro ajapóva rupive.+ 2 Ha ajapo avei ko mbaʼe ikatu hag̃uáicha peẽ pemombeʼu pende raʼykuéra ha pene nietokuérape, mbaʼeichaitépa akastiga mbarete Egíptope ha ajapo heta milágro henondepekuéra.+ Ha peẽ peikuaa porãta che haʼeha Jehová”.
3 Upémarõ Moisés ha Aarón oho faraón rendápe, ha heʼi chupe: “Ñandejára Jehová, umi hebreokuéra Jára heʼika ndéve: ‘¿Arakaʼe peve piko reñemombaretéta chéve ha nderejapomoʼãi la haʼéva ndéve?+ Haʼéma ndéve: epoi che puévlogui oho hag̃ua cheadora.* 4 Péro péichante resegíramo nderepoiséi che puévlogui, eikuaa porãke koʼẽrõ amboutaha ne retãme hetaiterei tuku. 5 Ha umi tuku ojagarrapaitéta ko tetã ha ni pe yvy ndaikatumoʼãi ojehecha. Hoʼupaitéta hikuái umi plantasión opyta vaʼekue pe amandáu rapykuerépe, ha umi kóga hemby vaʼekue peẽme. Umi yvyramáta hoky jeýva entéro hoʼupáta hikuái.+ 6 Umi tuku ojagarrapáta nde rogakuéra, nde siervokuéra róga ha umi óga oĩva guive Egíptope. Ko mbaʼe oikótava avave ndohecháiva gueteri, ni nde túa ni nde avuélo umíva ndohecháiva’”.+ Upéi heʼipa rire koʼã mbaʼe, osẽ oho hikuái faraón oĩhágui.
7 Upémarõ isiervokuéra heʼi faraónpe: “¿Arakaʼe peve piko rehejáta ñandeapeligra ko kuimbaʼe? ¿Nderehechakuaái piko Egipto oñehundimaha? Epoína koʼã héntegui oho hag̃ua oadora Ijára Jehovápe”. 8 Upévare faraón ohenoika jey Moisés ha Aarónpe, ha heʼi chupekuéra: “Tapeho katu peadora pende Jára Jehovápe, péro peje chéve mávapa umi ohótava”. 9 Upépe Moisés osẽ heʼi chupe: “Ore rohopaitémante vaʼerã, ohóta orendive umi imitãva, umi ijedáva ha mitã mimi jepe. Avei rogueraháta ore ovecha ha ore rymba vakakuéra,+ pórke rojapo vaʼerã peteĩ fiésta roadora hag̃ua Jehovápe”.+ 10 Faraón katu heʼi chupekuéra: “¿Añetehápe piko peẽ peimoʼã apoitaha pendehegui ha pende raʼykuéragui? ¡Upéva oikóramo ojekuaa porãitereíta Jehová oĩha penendive!+ Ojepilla porã voi peẽ penemalaideanteha. 11 ¡Ndahaʼeiete katu la peẽ pejeháicha! Peadoraséramo Jehovápe, tapeho peẽ kuimbaʼekueténte”. Upe rire faraón omosẽ chupekuéra upégui.
12 Upémarõ Jehová heʼi Moiséspe: “Eipyso nde po yvága gotyo ou hag̃ua umi tuku Egíptope. Umi tuku ojagarrapaitéta Egipto ha hoʼupaitéta umi plantasión ha yvyramatakuéra opyta vaʼekue pe amandáu rapykuerépe”. 13 Moisés katu ensegída oipyso ivastón yvate gotyo, ha Jehová ombou yvytu oipejúva ésteguio. Pe yvytu oipeju Egipto tuichakue upe día entéro ha upe pyharépe avei. Upéi koʼẽmba rire, pe yvytu ogueru hetaiterei tuku. 14 Umi tuku ou ha ojagarrapaite Egipto território ha omumu opárupi.+ Arakaʼeve ndoúiva peichaite peve heta tuku Egíptope+ ha núnka ndoikomoʼãvéima avei péicha. 15 Umi tuku oveve ha omoʼã pe kuarahy ha omoypytũ Egipto território. Ha kontinuadoite hoʼu hikuái umi plantasión oĩva upe tetãme ha umi yva ndoitýi vaʼekue pe amandáu. Péicha omoperõ hikuái umi plantasión ha yvyramatakuéra oĩva guive Egíptope.
16 Upémarõ pyaʼe porã faraón ohenoika Moisés ha Aarónpe, ha heʼi chupekuéra: “Afalla pende Jára Jehová ndive ha penendive avei. 17 Upévare ajerure peẽme cheperdonami hag̃ua ikatúramo ko vuéltapente, ha pejerure avei pende Jára Jehovápe oipeʼa hag̃ua koʼã tuku orejukapátamava”. 18 Upéi Moisés osẽ oho faraón oĩhágui ha oñemboʼe Jehovápe.+ 19 Upémarõ Jehová ombou peteĩ yvytu atã oipejúva oésteguio, ha pe yvytu oguerahapaite umi tuku ha oitypaite Mar Rójope. Ni peteĩ tuku ndopytái Egíptope. 20 Péro Jehová oheja faraónpe ipyʼahatã jey+ ha ndopoíri umi israelítagui.
21 Upémarõ Jehová heʼi Moiséspe: “Eipyso nde po yvága gotyo ou hag̃ua pytũ Egipto territóriope, upépe pytũetéta ha ni ikuã ndaikatumoʼãi ohecha hikuái”. 22 Moisés katu ensegída oipyso ipo yvága gotyo, ha 3 día aja pytũete Egíptope.+ 23 Ha umi egipcio ndaikatúi ohecha avavépe, ha 3 día aja haʼekuéra ndohói moõve. Péro umi israelita oikohápe katu hesakã porã.+ 24 Upémarõ faraón ohenoika Moiséspe ha heʼi chupe: “Tapeho katu peadora Jehovápe.+ Ha umi mitã mimi entéro ikatu pegueraha penendive. Péro pende ovecha ha vakakuéra añoite ndapeguerahamoʼãi”. 25 Upépe Moisés heʼi chupe: “Nde reheja vaʼerã avei rogueraha umi animalkuéra ikatu hag̃uáicha rosakrifika ha roofrese ore Jára Jehovápe.+ 26 Ore roguerahapaitéta ore rymbakuéra, ni peteĩ ndorohejamoʼãi koʼápe. Umíva apytégui roiporavo vaʼerã umi rosakrifikátava ore Jára Jehovápe roadora hag̃ua chupe. Ndoroikuaái gueteri ningo mbaʼépa rosakrifika vaʼerã Jehovápe, rog̃uahẽ rire amoitémante roikuaáta”. 27 Péro Jehová oheja faraónpe ipyʼahatã jey ha ndopoíri umi israelítagui.+ 28 Upévare faraón heʼi Moiséspe: “¡Tereho chéve koʼágui, ndorohechasevéima! Anivetéke reju jey che rendápe, cháke reju jeýramo, remanóta”. 29 Upépe Moisés heʼi chupe: “Oĩ porã, ndajumoʼãvéima ne rendápe”.