Jeremías
42 Upéi entéro umi kuimbaʼe omoakãva pe ehérsito, umíva apytépe Johanán,+ haʼéva Caréah raʼy, Jezanías, haʼéva Hosaya raʼy, ha kompletoite umi hénte, tahaʼe pe michĩvéva térã pe tuichavéva ijapytepekuéra, oñemboja 2 ha heʼi proféta Jeremíaspe: “Ehendumína umi mbaʼe rojerure asýva ndéve, ha eñemboʼe orerehehápe nde Jára Jehovápe, entéro koʼã hénte hembýva rehe, pórke rehechaháicha hína mbovymíntema hemby umi hetaite oĩ vaʼekuégui.+ 3 Ha nde Jára Jehová tomombeʼu oréve mbaʼe tapérupipa roho vaʼerã ha mbaʼépa rojapo vaʼerã”.
4 Proféta Jeremías heʼi chupekuéra: “Ahendu la pejéva, ha añemboʼéta pende Jára Jehovápe pejerure haguéicha, ha entéro mbaʼe Jehová heʼikáva peẽme che amombeʼúta peẽme. Amombeʼupaitéta peẽme, namokañymoʼãi pendehegui mbaʼevete”.
5 Haʼekuéra heʼi Jeremíaspe: “Jehová haʼéta testígo ifiélva ha heʼíva añetegua, ha haʼe taorekastiga ndorojapóiramo nde Jára Jehová heʼi hagueichaite oréve nde rupive. 6 Tahaʼe iporãva térã ivaíva, lomímonte rojapóta ore Jára Jehová heʼíva. Ore ningo romondo hína ndéve hendápe, ikatu hag̃uáicha osẽ porã oréve opa mbaʼe, pórke ore oreñeʼẽrendu ore Jára Jehovápe”.
7 Upéi, 10 día haguépe Jehová oñeʼẽ Jeremíaspe. 8 Upémarõ haʼe ohenoika Johanán Caréah raʼýpe ha entéro umi kuimbaʼe omoakãva pe ehérsito oĩ vaʼekuépe hendive, ha kompletoite umi héntepe, tahaʼe pe michĩvéva térã pe tuichavévape.+ 9 Jeremías heʼi chupekuéra: “Péicha heʼi Israel Jára Jehová, hendápe ningo peẽ chemondo kuri, amombeʼu hag̃ua chupe upe pejerure asy vaʼekue: 10 ‘Peẽ pepytáramo ko paíspe, upéicharõ che pomopuʼãta ha napohundimoʼãi, pomoheñóita ha ndapohapoʼomoʼãi, pórke pombyasýta* umi mbaʼe vai ajapo vaʼekuére penderehe.+ 11 Ani pekyhyje rréi de Babilóniagui, peẽ ningo pekyhyjeterei hína chugui’.+
‘Ani pekyhyje chugui’, heʼi Jehová, ‘pórke che aime penendive posalva ha porreskata hag̃ua chugui. 12 Ha che poiporiahuverekóta,+ upévare haʼe pendeporiahuverekóta avei ha penemondo jeýta pende yvy teépe.
13 Péro peẽ pejéramo: “¡No, ore ndoropytamoʼãi ko paíspe!”, ha napeneñeʼẽrendúi pende Jára Jehovápe, 14 ha peje: “No, ore rohóta Egipto territóriope,+ upépe ndorohechamoʼãi gérra ni norohendumoʼãi turu pu oñembopúva oñembyaty hag̃ua umi soldádo ohótava gerrahápe, avei naoreñembyahyimoʼãi ofaltágui oréve hiʼupy. Upépe rohóta roiko”. 15 Upéicharõ pehendúke Jehová ñeʼẽ, peẽ Judagua hembýva. Péicha heʼi Israel Jára Jehová, umi ehérsito yvagapegua ruvicha: “Peẽ pejedesidíramo katuete pehotaha Egíptope ha pepytataha peiko upépe,* 16 upéicharõ pe espáda penemongyhyjetéva penderupytýta Egíptope, ha pe ñembyahýi pekyhyjetévagui pendesegíta Egíptope, ha upépe pemanóta.+ 17 Ha entéro umi kuimbaʼe odesidíva oho oiko Egíptope omanóta upépe ñembyahýigui, mbaʼasýgui* ha espádape. Ni peteĩva ndojesalvamoʼãi ni nokañymoʼãi umi mbaʼe vai che aguerútavagui hiʼarikuéra”’.
18 Pórke péicha heʼi Israel Jára Jehová, umi ehérsito yvagapegua ruvicha: ‘Ambou haguéicha che pochykue umi Jerusalengua ári,+ péicha avei amboúta che pochykue pende ári pehóramo Egíptope, ha peẽ peñemaldesíta, umi hénte okyhyjetereíta ohechávo umi mbaʼe vai aguerúva pende ári, heʼíta oiko hag̃ua penderehe ivaíva, ha oñeʼẽ vaíta penderehe+ ha núnka mas ndapehechamoʼãvéima ko lugár’.
19 Jehová oñeʼẽma pene kóntrape, peẽ Judagua hembýva. Ani peho Egíptope. Peẽ peikuaa vaʼerã che poavisa porãma hague koestedía, 20 penerembiapo vai haguére pemanotaha.* Pórke peẽ chemondo kuri pende Jára Jehová rendápe, ha peje: ‘Eñemboʼéna orerehehápe ore Jára Jehovápe, ha emombeʼu oréve opa mbaʼe heʼíva ndéve ore Jára Jehová, ha ore rojapóta’.+ 21 Ha che amombeʼúma peẽme koestedía, péro peẽ napeneñeʼẽrendumoʼãi pende Jára Jehovápe ha ndapejapomoʼãi avei ni peteĩ mbaʼe haʼe heʼi vaʼekue chéve haʼe hag̃ua peẽme.+ 22 Upévare, peikuaákena katuete pemanotaha ñembyahýigui, mbaʼasýgui ha espádape pe lugár pehosehápe hína ha pepytasehápe peiko”.+