LEVÍTICO

1 Jehová ohenói Moiséspe ha oñeʼẽ chupe pe tavernákulo*+ guive ha heʼi: 2 “Ere umi israelítape: ‘Oĩramo pende apytépe omeʼẽséva Jehovápe ofréndaramo peteĩ animál, omeʼẽ vaʼerã peteĩ tóro, peteĩ vaka térã peteĩ ovecha osino kavara.+

3 Ha oiporavóramo ivakakuéra apytégui ojapo hag̃ua peteĩ ofrénda ojehapýva, ogueraha vaʼerã peteĩ tóro isánova.+ Upéva haʼe oguerahaséguinte+ ogueraha vaʼerã Jehovápe g̃uarã pe tavernákulo entrádape. 4 Haʼe omoĩ vaʼerã ipo pe animál akã ári, ha Ñandejára oaseptáta upe ofrénda ojehapýva oñeperdona hag̃ua chupe ipekádo.

5 Upéi ojejuka vaʼerã pe tóro raʼyrusu Jehová renondépe, ha Aarón raʼykuéra ombaʼapóva saserdóteramo+ ogueraha vaʼerã pe animál ruguykue, ha ohypýi pype pe altár kompletoite.+ Upe altár oĩ hína pe tavernákulo entráda renondépe. 6 Pe animál oñemeʼẽtava ojejapo hag̃ua pe ofrénda ojehapýva ojepireʼo vaʼerã ha upéi oñembojaʼo en pedáso.+ 7 Aarón raʼykuéra oservíva de saserdóte ogueraha vaʼerã tatapỹi pe altárpe,+ ha omohenda porã umi jepeʼa pe tatapỹi ári. 8 Haʼekuéra omohenda porã vaʼerã pe animál oñembojaʼo vaʼekue pe tata ári,* pe altárpe,+ avei omohenda porã vaʼerã iñakãngue ha ikyrakue. 9 Pe animál ryekue ha umi ikanillakue ojejohéi vaʼerã, upéi pe saserdóte ohapy ha omotimbo vaʼerã kompletoite koʼã mbaʼe pe altár ári peteĩ ofrénda ojehapývaramo. Ha upe ofrénda ojehapýva hyakuã asýta* Jehovápe g̃uarã.+

10 Ha oiporavóramo ijovecha térã ikavarakuéra apytégui+ ojapo hag̃ua peteĩ ofrénda ojehapýva, ogueraha vaʼerã peteĩ ovecha térã peteĩ kavara raʼyrusu mácho isánova.+ 11 Upéi ojejuka vaʼerã upe animál Jehová renondépe, pe altár ypýpe nórte gotyo. Ha Aarón raʼykuéra ombaʼapóva saserdóteramo ohypýi vaʼerã pe animál ruguykuépe pe altár kompletoite.+ 12 Pe ofrénda oñembojaʼo vaʼerã en pedáso, ha pe saserdóte omohenda porã vaʼerã pe tata ári* pe altárpe, ha omohenda porã vaʼerã avei iñakãngue ha ikyrakue. 13 Pe animál ryekue ha umi ikanillakue ojejohéi vaʼerã, upéi pe saserdóte ohapy vaʼerã kompletoite pe altár ári ikatu hag̃uáicha otimbo. Upéicharõ kóva peteĩ ofrénda ojehapýva ha hyakuã asýva* Jehovápe g̃uarã.

14 Ha oguerahátaramo peteĩ guyra ojapo hag̃ua pe ofrénda ojehapýva Jehovápe g̃uarã, ogueraha vaʼerã tortóla osino palóma raʼy.+ 15 Pe saserdóte ogueraha vaʼerã pe altárpe ha oajurakytĩ pe guyra ipyapẽme, ha pe huguykue katu oñohẽ vaʼerã pe altár kostádore. Upéi ohapy vaʼerã pe altár ári ikatu hag̃uáicha otimbo. 16 Péro ojepeʼa vaʼerã chugui ijuʼái ha ojehagueʼo vaʼerã. Koʼãva oñemombo vaʼerã pe altár ypýpe éste gotyo, oñemoĩháme pe tanimbu.*+ 17 Ha ojagarra vaʼerã pe guyra ipepógui ha oavri mbytépe. Upéi pe saserdóte ohapy vaʼerã pe altár ári ikatu hag̃uáicha otimbo. Upéicharõ kóva peteĩ ofrénda ojehapýva ha hyakuã asýva* Jehovápe g̃uarã’”.

2 “‘Ha oĩramo oguerahaséva ofrénda de semílla+ Jehovápe, ogueraha vaʼerã pe arína iporãvéva, ha oñohẽ vaʼerã hese aséite ha omoĩ hiʼári olívano.+ 2 Upéi ogueraha vaʼerã umi saserdótepe, Aarón raʼykuérape. Ha peteĩva umi saserdóte ojagarráta un púño pe arína iporãvéva, pe aséite ha pe olívano kompletoite. Upéi ohapy vaʼerã pe altár ári ikatu hag̃uáicha otimbo, ha upéva orrepresentáta pe ofrénda kompletoite.*+ Upéicharõ kóva peteĩ ofrénda ojehapýva ha hyakuã asýva* Jehovápe g̃uarã. 3 Ha umi mbaʼe hembýva guive pe ofrénda de semíllagui opytapaitéta Aarón ha itaʼyrakuérape,+ pórke koʼãva hína umi mbaʼe sagradoitereíva.+ Koʼãva ningo hemby hína pe ofrénda ojehapývagui Jehovápe g̃uarã.

4 Ha oĩramo omeʼẽséva ofréndaramo pan* oñembojy vaʼekue tatakuápe, ojapo vaʼerã arína iporãvévagui. Ojapo vaʼerã pan argólla pe arína iporãvévagui ha omoĩ vaʼerã pype aséite, ha ndorekói vaʼerã levadúra, térã ojapo vaʼerã pan ipererĩ asýva ndorekóiva levadúra ha omona vaʼerã hese aséite.+

5 Ha oĩramo omeʼẽséva ofréndaramo pan* oñembojy vaʼekue vandéhape,+ ojapo vaʼerã arína iporãvévagui, ombojeheʼa vaʼerã aséitere ha ndorekói vaʼerã levadúra. 6 Upe pan oñembojaʼo vaʼerã heta hendápe ha oñeñohẽ vaʼerã hiʼári aséite.+ Upéva hína peteĩ ofrénda de semílla.

7 Ha oĩramo omeʼẽséva ofréndaramo pan* oñembojy vaʼekue páilape, ojapo vaʼerã arína iporãvévagui aséite reheve. 8 Regueru jave koʼãichagua ofrénda de semílla Jehovápe g̃uarã, remeʼẽ vaʼerã pe saserdótepe ha haʼe ogueraháta pe altárpe. 9 Ha pe saserdóte ogueraháta michĩmi pe ofrénda de semílla, ha ohapy vaʼerã pe altár ári ikatu hag̃uáicha otimbo peteĩ ofrénda ojehapývaicha ha hyakuã asýva*+ Jehovápe ha upéva orrepresentáta pe ofrénda kompletoite.*+ 10 Umi hembýva pe ofrénda de semíllagui opyta vaʼerã Aarón ha itaʼyrakuérape g̃uarã. Umíva ningo ofrénda ojehapýva Jehovápe g̃uarã+ ha umíva hína umi mbaʼe sagradoitereíva.

11 Ndorekói vaʼerã levadúra+ ni peteĩ ofrénda de semílla oñemeʼẽva Jehovápe, pórke ndojehapýi vaʼerã levadúra ni eíra* otimbo hag̃ua ojejapo jave Jehovápe peteĩ ofrénda ojehapýva.

12 Péro koʼã mbaʼe ikatu pegueru Jehovápe ofréndaramo umi tenonderãite+ pemonoʼõ vaʼekuégui ha iporãnguetéva, péro ndapeguerúi vaʼerã ojehapy hag̃ua pe altárpe otimbo ha hyakuã asy* hag̃ua.

13 Entéro umi ofrénda de semílla rejapóva remoheʼẽ juky vaʼerã, aníke nderesarái remoĩ hag̃ua juky ne ofréndape. Pe juky nemomanduʼáta pe kompromíso Ñandejára ojapo vaʼekuére. Entéro umi ofrénda rejapóva remoheʼẽ juky+ vaʼerã.

14 Reguerahátaramo Jehovápe ofrénda de semílla umi tenonderãite rekosecha vaʼekuégui, remeʼẽ vaʼerã chupe umi semílla ipyahúva ha oñemaimbe pyréva, umi semílla ipyahúva ojejoso vaʼekue. Upéva regueru vaʼerã ofrénda de semíllaramo umi tenonderãite+ rekosecha vaʼekuégui. 15 Remoĩ vaʼerã hiʼári aséite ha avei olívano. Péva hína peteĩ ofrénda de semílla. 16 Pe saserdóte ohapýta ikatu hag̃uáicha otimbo, ha upéva orrepresentáta pe ofrénda kompletoite.*+ Haʼe ohapy vaʼerã pe semílla ojejoso pyréva, pe aséite ha pe olívano kompletoite. Kóva hína peteĩ ofrénda ojehapýva Jehovápe g̃uarã’”.

3 “‘Ha oiméramo peteĩ persóna ojapóta peteĩ ofrénda de paz,+ ogueraha vaʼerã hymbakuéra apytégui peteĩ tóro térã peteĩ vaka. Ogueraha vaʼerã Jehová renondépe peteĩ animál isánova. 2 Haʼe omoĩ vaʼerã ipo pe animál akã ári, ha pe animál ojejuka vaʼerã pe tavernákulo* entráda renondépe. Ha Aarón raʼykuéra oservíva de saserdóte ohypýi vaʼerã pe altár kompletoite pe animál ruguykuépe. 3 Ha pe animál ojepurúvagui ojejapo hag̃ua pe ofrénda de paz, upévagui omboyke vaʼerã koʼã mbaʼe ojapo hag̃ua peteĩ ofrénda ojehapýva Jehovápe g̃uarã:+ pe ikyrakue+ oĩva hyekue ári ha avei pe ikyrakue oĩva pe hyekuére, 4 avei umi mokõi irriñón ha umi ikyrakue oĩva hese, koʼãva oĩ ag̃uiete pe ilómogui. Haʼe oipeʼa vaʼerã avei ikyrakue oĩva pe ígadore.+ 5 Aarón raʼykuéra ohapy vaʼerã koʼã mbaʼe pe altárpe ikatu hag̃uáicha otimbo, ha omoĩ vaʼerã pe ofrénda ojehapýva ári, okáiva hína pe tata+ ári* pe altárpe. Upéicharõ kóva peteĩ ofrénda ojehapýva ha hyakuã asýva* Jehovápe g̃uarã.+

6 Ha peteĩ persóna oguerúramo Jehovápe peteĩ ovecha térã kavara ojapóta jave peteĩ ofrénda de paz, upéicharõ ogueru vaʼerã peteĩ animál isánova,+ tahaʼe máchova térã kuñáva. 7 Ogueru vaʼerã peteĩ ovecha raʼyrusu máchova opresenta hag̃ua Jehová renondépe. 8 Haʼe omoĩ vaʼerã ipo pe animál akã ári, ha pe animál ojejuka vaʼerã pe tavernákulo entráda renondépe. Ha Aarón raʼykuéra ohypýi vaʼerã pe altár kompletoite pe animál ruguykuépe, 9 ha pe ikyrakue ojehapy vaʼerã Jehová renondépe.+ Péicha ojapo vaʼerã pe ovecha oipurúvagui ojapo hag̃ua pe ofrénda de paz: haʼe oikytĩ vaʼerã iñespináso mataite guive pe huguaire ikyraitéva, oipeʼa vaʼerã avei pe ikyrakue oĩva hyekue ári ha avei pe ikyrakue oĩva pe hyekuére. 10 Avei oipeʼa vaʼerã umi mokõi irriñón ha umi ikyrakue oĩva hese, koʼãva oĩ ag̃uiete pe ilómogui, ha avei ikyrakue oĩva pe ígadore.+ 11 Pe saserdóte ohapy vaʼerã koʼã mbaʼe pe altárpe. Kóva ningo peteĩ hiʼupy* ojehapýva Jehovápe g̃uarã.+

12 Ha peteĩ persóna oguerúramo peteĩ kavara, upéicharõ opresenta vaʼerã Jehová renondépe, 13 omoĩ vaʼerã ipo pe animál akã ári, ha pe animál ojejuka vaʼerã pe tavernákulo entráda renondépe. Ha Aarón raʼykuéra ohypýi vaʼerã pe altár kompletoite pe animál ruguykuépe. 14 Ha oaparta vaʼerã avei koʼã mbaʼe ohapy hag̃ua Jehová renondépe: pe ikyrakue oĩva hyekue ári ha avei pe ikyrakue oĩva pe hyekuére,+ 15 avei umi mokõi irriñón ha umi ikyrakue oĩva hese, koʼãva oĩ ag̃uiete pe ilómogui. Haʼe oipeʼa vaʼerã avei ikyrakue oĩva pe ígadore. 16 Pe saserdóte ohapy vaʼerã koʼã mbaʼe pe altárpe ikatu hag̃uáicha otimbo ha hyakuã asy* Ñandejárape g̃uarã. Kóva hína peteĩ hiʼupy* ojehapýva Ñandejárape g̃uarã. Ikyrakue kompletoite Jehová mbaʼe hína.+

17 Peẽ ndapeʼúi vaʼerã tuguy+ ni mbaʼeveichagua kyrakue. Kóva hína peteĩ léi peẽme g̃uarã ha pene familiarépe g̃uarã, ha peiko peikohápe peẽ siémpre pekumpli vaʼerã’”.

4 Jehová heʼi avei Moiséspe: 2 “Ere umi israelítape: ‘Oĩramo* opekáva ha ojapóva ojaposeʼỹre+ peteĩ mbaʼe Jehová omanda vaʼekue ani hag̃ua ojejapo, upéicharõ ojapo vaʼerã koʼã mbaʼe:

3 Pe súmo saserdóte ojeporavo+ vaʼekue* opekáramo+ ha ikáusare umi hénte opyta vai Ñandejára renondépe, upéicharõ haʼe ogueru vaʼerã Jehovápe peteĩ tóro raʼyrusu isánova, ha omeʼẽ vaʼerã ofréndaramo opaga hag̃ua pe pekádo haʼe ojapo vaʼekuére.+ 4 Ogueru vaʼerã pe tóro Jehová renondépe pe tavernákulo*+ entrádape, ha omoĩ vaʼerã ipo upe animál akã ári, ha ojuka vaʼerã Jehová renondépe.+ 5 Upéi pe súmo saserdóte ojeporavo+ vaʼekue ojagarra vaʼerã michĩmi pe tóro ruguy ha ogueraha pe tavernákulo ryepýpe, 6 ha omyakỹ vaʼerã ikuã pe tuguýpe+ ha ohypýi 7 vése+ pe yvy pe kortína oĩva pe lugár sánto ypýpe, Jehová renondépe. 7 Pe saserdóte omona vaʼerã avei pe tuguy umi vaka ratĩ joguaha rehe, orekóva pe altár ojehapyha insiénso hyakuã asýva.+ Upe altár oĩ hína pe tavernákulo ryepýpe Jehová renondépe. Ha pe tuguy rembyre katu oñohẽmbaite vaʼerã okápe pe altár vásere, pe altár ojepurúva jepi ojejapo hag̃ua umi ofrénda ojehapýva+ oĩva pe tavernákulo entráda renondépe.

8 Ha pe tóro oipuru vaʼekuégui ojapo hag̃ua pe ofrénda ojepaga hag̃ua umi pekádore, haʼe oipeʼapaite vaʼerã pe ikyrakue. Oipeʼa vaʼerã pe ikyrakue oĩva hyekue ári ha avei pe ikyrakue oĩva pe hyekuére. 9 Oipeʼa vaʼerã avei umi mokõi irriñón, ha umi ikyrakue oĩva hese, koʼãva oĩ ag̃uiete pe ilómogui. Haʼe oipeʼa vaʼerã avei ikyrakue oĩva pe ígadore.+ 10 Koʼã mbaʼe ojepeʼa avei pe tóro ojepurúvagui ojejapo hag̃ua pe ofrénda de paz.+ Pe saserdóte ohapy vaʼerã koʼã mbaʼe pe altár ojejapohápe pe ofrénda ojehapýva, ikatu hag̃uáicha otimbo.

11 Péro pe tóro pirekue, pe hoʼokue, iñakãngue, umi ikanillakue, hyekue ha pe hekakakue,+ 12 ha entéro mbaʼe ndojepurúiva pe tóro ojejuka vaʼekuégui, oñeguenohẽ vaʼerã pe kampaméntogui peteĩ lugár ipotĩháme ha ojehapy upépe.+ Ojehapy vaʼerã jepeʼa ári oñemombohápe jepi pe tanimbu.*

13 Kompletoite pe puévlo de Israel ojapóramo peteĩ mbaʼe vai ojaposeʼỹre ha péicha opeka hikuái,+ ha haʼekuéra ndopillái ojapo hague peteĩ mbaʼe Jehová omanda vaʼekue ani hag̃ua ojejapo,+ 14 péro upe rire ojekuaa upe pekádo, upéicharõ haʼekuéra ojapo vaʼerã koʼã mbaʼe: umi israelita ogueru vaʼerã peteĩ tóro raʼyrusu pe tavernákulo renondépe ojapo hag̃ua peteĩ ofrénda ojepaga hag̃ua umi pekádore. 15 Upéi entéro kuimbaʼe omoakãva* umi israelítape oho vaʼerã Jehová renondépe ha omoĩ ipo pe tóro akã ári, ha ojejuka vaʼerã pe tóro Jehová renondépe.

16 Upe rire, pe súmo saserdóte ojeporavo vaʼekue, ojagarra vaʼerã michĩmi pe tóro ruguy ha ogueraha pe tavernákulo ryepýpe, 17 ha omyakỹ vaʼerã ikuã pe tuguýpe ha ohypýi 7 vése pe yvy pe kortína ypýpe,+ Jehová renondépe. 18 Pe saserdóte omona vaʼerã avei pe tuguy umi vaka ratĩ joguaha rehe, orekóva pe altár+ ojehapyha insiénso perfumádo. Upe altár oĩ hína pe tavernákulo ryepýpe Jehová renondépe. Ha pe tuguy rembyre katu oñohẽmbaite vaʼerã okápe pe altár de kóvre vásere, oĩva pe tavernákulo entráda renondépe.+ Upe altár ojepuru jepi ojejapo hag̃ua umi ofrénda ojehapýva. 19 Pe saserdóte oipeʼapaite vaʼerã pe animálgui ikyrakue ha ohapy pe altár ári ikatu hag̃uáicha otimbo.+ 20 Haʼe oipeʼapaite vaʼerã entéro mbaʼe ojepeʼaháicha avei pe tóro ojepurúvagui ojejapo hag̃ua pe ofrénda ojepaga hag̃ua umi pekádore. Upéicha ojapo vaʼerã pe saserdóte hesehapekuéra ojepaga hag̃ua ipekadokuérare,+ ha péicha oñeperdonáta chupekuéra hembiapo vaikue. 21 Upe rire heʼi vaʼerã toñeguenohẽ pe kampaméntogui pe tóro ojejuka vaʼekue ha tojehapy entéro mbaʼe ndojepurúi vaʼekue chugui, ojejapo haguéicha avei pe ótro tórore.+ Péicha ojejapo vaʼerã pe ofrénda ojepaga hag̃ua umi pekádore pe puévlo de Israel rehehápe.+

22 Ha peteĩ kuimbaʼe omoakãva+ pe puévlo opekáramo Ñandejára renondépe, ojapo rupi ojaposeʼỹre peteĩ mbaʼe Jehová omanda vaʼekue ani hag̃ua ojejapo ha ohechakuaa ojavy hague, 23 térã ohechakuaávo opeka hague nokumplíri rupi peteĩ mandamiénto, upéicharõ haʼe ogueru vaʼerã peteĩ kavara raʼyrusu mácho isánova omeʼẽ hag̃ua Ñandejárape. 24 Haʼe omoĩ vaʼerã ipo upe kavara akã ári ha ojuka vaʼerã Jehová renondépe. Ojuka vaʼerã upe kavara pe ojejukahápe jepi voi pe animál ojepurúva ojejapo hag̃ua pe ofrénda ojehapýva.+ Kóva hína pe ofrénda ojejapóva ojepaga hag̃ua umi pekádore. 25 Upe rire pe saserdóte ojagarra vaʼerã michĩmi pe kavara ruguy ha omona umi vaka ratĩ joguaha rehe,+ orekóva pe altár de kóvre ojejapohápe ofrénda ojehapýva. Ha pe tuguy rembyre oñohẽmbaite vaʼerã pe altár vásere.+ 26 Haʼe ohapy vaʼerã pe ikyrakue pe altár ári ikatu hag̃uáicha otimbo, ojejapoháicha pe ofrénda de paz.+ Koʼã mbaʼe ojapo vaʼerã pe saserdóte pe ofalláva rehehápe ojepaga hag̃ua ipekádore, ha péicha oñeperdonáta chupe hembiapo vaikue.

27 Ha peteĩ persóna* opekáramo ojapo rupi ojaposeʼỹre peteĩ mbaʼe Jehová omanda vaʼekue ani hag̃ua ojejapo,+ 28 térã ohechakuaa haʼe opeka hague ojapo rupi peteĩ mbaʼe vai, upéicharõ haʼe ogueru vaʼerã peteĩ kavara kuña* isánova, ha omeʼẽ vaʼerã Ñandejárape umi mbaʼe vai ojapo vaʼekuére. 29 Haʼe omoĩ vaʼerã ipo upe kavara akã ári, upéva hína pe ofrénda ojepurúva ojepaga hag̃ua umi pekádore. Upéi ojuka vaʼerã upe kavara, ojejukahápe jepi voi pe animál ojepurúva ojejapo hag̃ua pe ofrénda ojehapýva.+ 30 Upe rire pe saserdóte ojagarra vaʼerã michĩmi pe kavara ruguy ha omona umi vaka ratĩ joguaha rehe, orekóva pe altár de kóvre ojejapohápe ofrénda ojehapýva. Ha pe tuguy rembyre oñohẽmbaite vaʼerã pe altár vásere.+ 31 Haʼe oipeʼapaite vaʼerã chugui ikyrakue,+ ojejapoháicha pe animál ojepurúvare ojejapo hag̃ua pe ofrénda de paz.+ Upéi ohapy vaʼerã pe altár ári ikatu hag̃uáicha otimbo ha hyakuã asy* Jehovápe g̃uarã. Koʼã mbaʼe ojapo vaʼerã pe saserdóte pe ofalláva rehehápe ojepaga hag̃ua ipekádore, ha péicha oñeperdonáta chupe hembiapo vaikue.

32 Péro haʼe oguerúramo umi ovechakuéra apytégui ojapo hag̃ua pe ofrénda opaga hag̃ua ipekádore, upéicharõ ogueru vaʼerã peteĩ ovecha kuña* isánova. 33 Haʼe omoĩ vaʼerã ipo upe ovecha akã ári, upéva hína pe ofrénda ojepurúva ojepaga hag̃ua umi pekádore. Upéi ojuka vaʼerã upe ovecha, ojejukahápe jepi voi pe animál ojepurúva ojejapo hag̃ua pe ofrénda ojehapýva.+ 34 Upe rire pe saserdóte ojagarra vaʼerã michĩmi pe ovecha ruguy ha omona umi vaka ratĩ joguaha rehe, orekóva pe altár de kóvre ojejapohápe ofrénda ojehapýva.+ Ha pe tuguy rembyre oñohẽmbaite vaʼerã pe altár vásere. 35 Haʼe oipeʼapaite vaʼerã chugui ikyrakue, ojejapoháicha avei pe ovecha raʼyrusu mácho ojepurúvare ojejapo hag̃ua pe ofrénda de paz. Upéi pe saserdóte ohapy vaʼerã koʼã mbaʼe pe altár ári, ha omoĩ vaʼerã umi ofrénda ojehapýva Jehovápe g̃uarã ári.+ Péicha ojapo vaʼerã ikatu hag̃uáicha otimbo ha hyakuã asy. Koʼã mbaʼe ojapo vaʼerã pe saserdóte pe ofalláva rehehápe ojepaga hag̃ua ipekádore, ha péicha oñeperdonáta chupe hembiapo vaikue’”.+

5 “‘Oĩramo ohecháva térã oikuaáva ojejapo hague peteĩ pekádo, upéicharõ haʼe peteĩ testígo hína. Ha upéi oñehenóiramo* umi testígope omombeʼu hag̃ua umi mbaʼe ojapo vaʼekue pe hembiapo vaíva,+ péro haʼe nomombeʼúi la oikuaáva, upéicharõ haʼe opeka hína. Haʼe oĩta rresponsávle upe mbaʼe vai ojapo vaʼekuére.

2 Peteĩ persóna* opytátama ikyʼa Ñandejára renondépe, ohechakuaaʼỹre jepe opokóramo peteĩ mbaʼe ikyʼávare Ñandejárape g̃uarã. Por ehémplo, opokóramo umi animál naipotĩriva reʼonguére, tahaʼe peteĩ animál saite térã peteĩ animál imánsova, térã umi vichoʼi* reʼonguére,+ upéicharõ haʼe oñemongyʼáma avei ha ofalláma hína Ñandejára renondépe. 3 Térã oĩramo peteĩ persóna ohechakuaaʼỹre opokóva hapicha mbaʼe kyʼáre,+ oimeraẽ mbaʼe omongyʼátavare chupe Ñandejára renondépe, péro upéi opilla opoko hague upe mbaʼe kyʼáre, upéicharõ upe persóna ofalla hína Ñandejára renondépe.

4 Térã peteĩ persóna* ohuráramo opensa porãʼỹre ojapotaha peteĩ mbaʼe, tahaʼe ojapo hag̃ua iporãva térã ivaíva, ha upe riréma opilla ojapura hague oñekompromete hag̃ua, upéicharõ jepe ofalla hína Ñandejára renondépe.+

5 Oĩramo ofalláva ojapo haguére koʼã mbaʼe, omombeʼu+ vaʼerã mbaʼéichapa ojapo raʼe upe mbaʼe vai. 6 Ha ogueru vaʼerã avei Jehovápe peteĩ ofrénda por la kúlpa: ogueru vaʼerã peteĩ ovecha kuña térã kavara kuña* ojapo hag̃ua pe ofrénda ipekádore.+ Ha pe saserdóte opresenta vaʼerã Ñandejárape upe ofrénda pe persóna rehehápe ojepaga hag̃ua ipekádore.

7 Péro ndorekóiramo la pláta ojogua hag̃ua peteĩ ovecha, ogueru vaʼerã Jehovápe mokõi tortóla térã mokõi palóma raʼy+ ikatu hag̃uáicha ojejapo pe ofrénda por la kúlpa. Peteĩ omeʼẽta ojejapo hag̃ua pe ofrénda ojepaga hag̃ua ipekádore ha pe ótro katu ojejapo hag̃ua pe ofrénda ojehapýva.+ 8 Ha umi mokõi guyra oguerúta pe saserdótepe, ha haʼe opresenta raẽ vaʼerã upe ojepurútava ojejapo hag̃ua pe ofrénda ojepaga hag̃ua umi pekádore. Upearã oajurakytĩta pe guyra ipyapẽme, péro noñakãʼói vaʼerã. 9 Upéi pe ofrénda ojepaga hag̃ua umi pekádore ruguykuépe ohypýita michĩmi un ládo pe altár, ha pe tuguy hembýva katu omondykypa vaʼerã pe altár vásere.+ Kóva hína peteĩ ofrénda ojepaga hag̃ua umi pekádore. 10 Pe ótro guyraʼi katu oipurúta ojejapo hag̃ua pe ofrénda ojehapýva, ha ojapo vaʼerã ojejapoháicha jepi voi ofrénda ojehapýva.+ Koʼã mbaʼe ojapóta pe saserdóte pe persóna rehehápe ojepaga hag̃ua ipekádore, ha péicha oñeperdonáta chupe hembiapo vaikue.+

11 Péro ndorekóiramo la pláta ojogua hag̃ua mokõi tortóla térã mokõi palóma raʼy, ogueru vaʼerã arína iporãva una décima de efá*+ ojejapo hag̃ua pe ofrénda ojepaga hag̃ua umi pekádore. Nomoĩri vaʼerã pype aséite ni olívano, pórke péva hína pe ofrénda ojepaga hag̃ua umi pekádore. 12 Ogueru vaʼerã pe arína pe saserdótepe, ha haʼe ojagarráta chugui un púño, ha upéva orrepresentáta pe ofrénda kompletoite.* Upéi opoi vaʼerã pe altárpe ikatu hag̃uáicha okái ha otimbo, opoi vaʼerã pe ofrénda ojehapýva Jehovápe g̃uarã ári. Kóva hína peteĩ ofrénda ojepaga hag̃ua umi pekádore. 13 Koʼã mbaʼe ojapóta pe saserdóte pe persóna rehehápe ojepaga hag̃ua ipekádore, ha péicha oñeperdonáta chupe hembiapo vaikue.+ Ha pe hembýva guive pe ofréndagui opytáta pe saserdótepe,+ oikoháicha jepi avei oñemeʼẽ jave pe ofrénda de semílla’”.+

14 Jehová osegi oñeʼẽ Moiséspe, ha heʼi: 15 “Oĩramo* oikuaaʼỹre oipurúva hendapeʼỹ umi mbaʼe oñemboyke vaʼekue Jehová servísiope g̃uarã,+ ha upéicha rupi opeka, upéicharõ ogueru vaʼerã Jehovápe peteĩ ovecha mácho isánova. Upéva ojepurúta ojejapo hag̃ua pe ofrénda por la kúlpa.+ Pe saserdóte heʼi vaʼerã mboýpa ovale* upe ovecha mácho, asegún pe présio* ojepurúva pe tavernákulope.+ 16 Ha pe persóna omyengovia vaʼerã upe mbaʼe oipuru vaʼekue hendapeʼỹ, ha omeʼẽve vaʼerã hiʼári 20 por ciento upe ovalévagui.+ Upéva ojapo vaʼerã opeka rupi oipurúvo hendapeʼỹ umi mbaʼe oĩva pe lugár sántope. Pe persóna omeʼẽ vaʼerã pe ofrénda pe saserdótepe, ha haʼe oipurúta pe ovecha ojejapo hag̃ua pe ofrénda por la kúlpa, ha péicha oñeperdonáta chupe hembiapo vaikue.+

17 Oĩramo* opekáva ojapo rupi ojaposeʼỹre peteĩ mbaʼe Jehová heʼi vaʼekue ndojejapói vaʼerãha, péro ndopillái ojapo hague ivaíva, upéicharõ jepe, upe persóna ofalláma hína Ñandejára renondépe ha oĩ vaʼerã rresponsávle umi mbaʼe ojapo vaʼekuére.+ 18 Ha ogueru vaʼerã peteĩ ofrénda por la kúlpa: peteĩ ovecha mácho isánova asegún pe présio omoĩva pe saserdóte.+ Upéi pe saserdóte oipurúta pe ovecha opaga hag̃ua pe persóna pekádore, upe mbaʼe vai ojapo vaʼekuére oikuaaʼỹre ha ojaposeʼỹre. Péicha oñeperdonáta chupe hembiapo vaikue. 19 Kóva hína peteĩ ofrénda por la kúlpa, pórke pe persóna ofalla kuri Jehová renondépe ha opeka”.

6 Jehová heʼi avei Moiséspe: 2 “Oĩramo opekáva ha naiñeʼẽrendúi Jehovápe+ ombotavývo hapichápe umi mbaʼe oheja vaʼekuére ikárgope, térã omeʼẽ vaʼekuére chupe oñongatu hag̃ua, térã omondáramo+ hapichápe térã ombotavy chupe, 3 térã otopa raʼe peteĩ mbaʼe okañy vaʼekue hapichágui péro onega orekoha, ha ijapu raʼe ohurávo ndojapói hague mbaʼeve ivaíva,+ upéicharõ upe persóna ojapo vaʼerã kóicha: 4 oiméramo haʼe opeka raʼe ha ojekuaa ojapo hague upe mbaʼe vai, upéicharõ omyengovia vaʼerã upe omonda vaʼekue, térã upe ojeheja vaʼekue ikárgope, térã upe mbaʼe oipeʼa vaʼekue hapichágui ombotavy rupi chupe, térã upe mbaʼe ahéno otopa vaʼekue, 5 térã oimeraẽ mbaʼe oipeʼa vaʼekue hapichágui ha ijapu ohurávo upéva imbaʼeha, haʼe omyengoviapaite vaʼerã pe oipeʼa vaʼekue hapichágui,+ ha omeʼẽve vaʼerã hiʼári 20 por ciento. Haʼe omeʼẽ vaʼerã upéva ijárape ojekuaaha díape haʼe ojapo hague upe mbaʼe vai. 6 Ha ogueru vaʼerã Jehovápe peteĩ ovecha mácho isánova, asegún pe présio omoĩ vaʼekue pe saserdóte. Ha omeʼẽ vaʼerã pe ovecha pe saserdótepe ojejapo hag̃ua pe ofrénda por la kúlpa.+ 7 Ha pe saserdóte opresentáta Jehovápe upe ofrénda pe persóna rehehápe ojepaga hag̃ua ipekádore. Péicha oñeperdonáta chupe oimeraẽ mbaʼe vai ojapo vaʼekue ha oheja vaíva chupe Ñandejára renondépe”.+

8 Jehová osegi oñeʼẽ Moiséspe ha heʼi chupe: 9 “Ere Aarón ha itaʼyrakuérape: ‘Kóva hína pe léi heʼíva mbaʼéichapa ojejapo vaʼerã pe ofrénda ojehapýva:+ pe ofrénda ojehapýva opyta vaʼerã pe altár ári tódo el pyhare koʼẽmba peve, ha pe tata oĩva pe altárpe ndoguéi vaʼerã. 10 Pe saserdóte omonde vaʼerã pe kalsonsíllo de líno,+ ha avei pe ao de líno iporãva ojejapo vaʼekue chupekuéra g̃uarã.+ Upéi onohẽ vaʼerã pe altárgui pe tanimbu*+ opytáva pe ofrénda ojehapývagui, ha omoĩ pe altár ykére. 11 Upéi okambia vaʼerã pe ijao+ ha ogueraha pe tanimbu pe kampaméntogui peteĩ lugár ipotĩháme.+ 12 Pe tata siémpre hendy vaʼerã pe altárpe ha ndoguéi vaʼerã voi. Káda pyhareve pe saserdóte omoĩve vaʼerã jepeʼa,+ ha omohendáta hiʼári pe ofrénda ojehapýva ha avei pe ofrénda de paz kyrakue ikatu hag̃uáicha otimbo.+ 13 Pe tata siémpre hendy vaʼerã pe altárpe ha ndoguéi vaʼerã voi.

14 Kóva hína pe léi heʼíva mbaʼéichapa ojejapo vaʼerã pe ofrénda de semílla:+ Aarón raʼykuéra ogueru vaʼerã upe ofrénda Jehovápe pe altár renondépe. 15 Peteĩva ijapyteguikuéra ojagarráta pe ofréndagui un púño pe arína iporãva, michĩmi aséite ha kompletoite pe olívano oĩva pe ofrénda ári. Upéi omoĩ vaʼerã pe altárpe ikatu hag̃uáicha okái ha otimbo ha hyakuã asy,* ha upéva orrepresentáta pe ofrénda kompletoite* Jehová renondépe.+ 16 Ha pe hembývagui katu ojejapo vaʼerã pan ilevaduraʼỹva, ha Aarón ha itaʼyrakuéra hoʼu vaʼerã+ peteĩ lugár sagrádope, pe tavernákulo* korapýpe.+ 17 Noñemoĩri vaʼerã pype ni michĩmi levadúra.+ Upe párte hembýva umi ofrénda ojehapývagui che ameʼẽma chupekuéra imbaʼerã.+ Koʼãva hína umi mbaʼe sagradoitereíva,+ sagradoháicha avei umi ofrénda ojepaga hag̃ua umi pekádore ha umi ofrénda por la kúlpa. 18 Enterove Aarón raʼykuéra ikatu hoʼu upe párte hembýva.+ Upe párte siémpre otokáta chupekuéra ha ifamiliarépe ojejapo jave pe ofrénda ojehapýva Jehovápe g̃uarã.+ Entéro mbaʼe ojepurúva ojejapo hag̃ua pe ofrénda sagrádo hína’”.

19 Ha Jehová oñeʼẽ jey Moiséspe, ha heʼi chupe: 20 “Aarón ha itaʼyrakuéra opresenta vaʼerã ko ofrénda Jehovápe oñenombraha*+ díape chupe oservi hag̃ua de súmo saserdóte: ogueru vaʼerã una décima de efá*+ arína iporãva ofrénda de semíllaramo,+ alamita opresenta vaʼerã pyhareve ha upe hembýva katu kaʼaru. 21 Oñembojeheʼa vaʼerã aséitere ha oñembojy vandéhape.+ Upéi oñembojaʼo vaʼerã heta hendápe pe ofrénda de semílla oñembojy vaʼekue tatakuápe ha oñembojeheʼa porã vaʼerã aséitere. Upéi oñepresenta vaʼerã Jehovápe peteĩ ofrénda hyakuã asývaicha.* 22 Pe ojeporavóva Aarón raʼykuéra+ apytégui oservi hag̃ua de súmo saserdóte ojapo vaʼerã upe ofrénda. Kóva hína peteĩ léi siémpre oñekumpli vaʼerã: ko ofrénda ojehapy vaʼerã kompletoite ha oñemotimbo Jehovápe g̃uarã. 23 Entéro ofrénda de semílla ojejapóva peteĩ saserdóte rehehápe ojehapy vaʼerã kompletoite. Péva ndojeʼúi vaʼerã”.

24 Ha Jehová oñeʼẽ jey Moiséspe, ha heʼi chupe: 25 “Ere Aarón ha itaʼyrakuérape: ‘Kóva hína pe léi heʼíva mbaʼéichapa ojejapo vaʼerã pe ofrénda ojepaga hag̃ua umi pekádore:+ pe animál ojepurútava ojejapo hag̃ua pe ofrénda ojepaga hag̃ua umi pekádore ojejuka vaʼerã Jehová renondépe, pe lugár ojejukahápe jepi voi pe animál ojepurúva ojejapo hag̃ua pe ofrénda ojehapýva.+ Koʼãva hína umi mbaʼe sagradoitereíva. 26 Pe saserdóte ojapóva pe ofrénda ojepaga hag̃ua umi pekádore ikatúta hoʼu pe párte otokáva chupe pe ofréndagui.+ Hoʼu vaʼerã peteĩ lugár sagrádope, pe tavernákulo korapýpe.+

27 Sagrádota entéro mbaʼe ojepurúva ojejapo hag̃ua pe ofrénda pe animálgui. Ha pe animál ruguykue ohypýiramo pende ao, peẽ pejohéi vaʼerã pe párte ojehypýi hague peteĩ lugár sagrádope. 28 Ha pe soʼo oñembojýramo peteĩ mbaʼyru ojejapo vaʼekuépe ñaiʼũgui, ojejokapaite vaʼerã. Péro oimérõ oñembojy raʼe peteĩ mbaʼyru de kóvrepe, upéva ojekyty porã vaʼerã ha ojejohéi ýpe.

29 Enterove kuimbaʼe oservíva de saserdóte ikatu hoʼu upe párte otokáva chupe pe ofréndagui.+ Koʼãva hína umi mbaʼe sagradoitereíva.+ 30 Péro oiméramo pe animál ruguykue ojegueraha raʼe pe tavernákulo ryepýpe oñeperdona hag̃ua umi pekádo pe lugár sántope,+ upéicharõ ndapeʼúi vaʼerã upe ofrénda ojepuru vaʼekue ojepaga hag̃ua umi pekádore. Upe ofrénda ojehapy vaʼerã’”.

7 “‘Kóva hína pe léi heʼíva mbaʼéichapa ojejapo vaʼerã pe ofrénda por la kúlpa:+ upéva sagradoiterei hína. 2 Pe animál ojepurútava ojejapo hag̃ua pe ofrénda por la kúlpa, ojejuka vaʼerã pe lugár ojejukahápe jepi voi pe animál ojepurúva ojejapo hag̃ua pe ofrénda ojehapýva, ha pe huguykuépe+ ojehypýi vaʼerã pe altár kompletoite.+ 3 Pe saserdóte* opresentáta pe ikyrakue kompletoite:+ pe huguaikue ikyraitéva, pe ikyrakue oĩva hyekue ári, 4 avei umi mokõi irriñón ha umi ikyrakue oĩva hese, koʼãva oĩ ag̃uiete pe ilómogui. Haʼe oipeʼa vaʼerã avei ikyrakue oĩva pe ígadore.+ 5 Pe saserdóte ohapy vaʼerã koʼã mbaʼe pe altárpe ikatu hag̃uáicha otimbo peteĩ ofrénda ojehapývaicha ha hyakuã asýva Jehovápe g̃uarã.+ Kóva hína peteĩ ofrénda por la kúlpa. 6 Entéro kuimbaʼe oservíva de saserdóte ikatu hoʼu pe ofrénda,+ ojeʼu vaʼerã peteĩ lugár sagrádope. Pe párte otokáva chupekuéra sagradoiterei hína.+ 7 Pe ofrénda por la kúlpa ojejapo vaʼerã ojejapoháicha pe ofrénda ojepaga hag̃ua umi pekádore. Pe animál roʼokue opytáta pe saserdóte ojapóvape upe ofrénda.+

8 Pe saserdóte opresenta vove ótro rehehápe pe ofrénda ojehapýva, pe animál pirekue+ opytáta pe saserdótepe g̃uarã.

9 Umi ofrénda de semílla oñembojy vaʼekue tatakuápe, páilape térã vandéhape,+ opytapaitéta pe saserdóte ojapóvape pe ofrénda. Koʼã mbaʼe opytapaitéta pe saserdótepe.+ 10 Péro umi ótro ofrénda de semílla, tahaʼe isékova+ térã oñemoheʼõʼimi vaʼekue aséitepe,+ opytapaitéta Aarón raʼykuérape, káda únope otokáta la mísma kantida.

11 Peteĩ persóna opresentaséramo Jehovápe peteĩ ofrénda de paz,+ ikatu ojapo ko léipe heʼiháicha: 12 ojapóramo ko ofrénda oagradese hag̃ua Ñandejárape,+ opresenta vaʼerã hendive pan argólla ilevaduraʼỹva ha oñembojeheʼa pyréva aséitere, pan pererĩ opururũ asýva ha oñemoĩʼimíva hese aséite. Avei pan argólla ojejapo vaʼekue arína iporãvagui oñembojeheʼa ha oñeamasa porã vaʼekue aséite reheve. 13 Avei opresenta vaʼerã iñofrénda ndive pan argólla orekóva levadúra. Péicha ojapo vaʼerã opresenta jave pe ofrénda de paz oagradese hag̃ua Ñandejárape. 14 Opresenta vaʼerã peteĩ pan de káda kláse, upéva hína pe párte sagráda Jehovápe g̃uarã. Péva opytáta pe saserdóte ohypýivape pe tuguy ojepurúva ojejapo jave pe ofrénda de paz.+ 15 Pe animál roʼo ojepurúva ojejapo hag̃ua pe ofrénda de paz ojeʼu vaʼerã pe oñepresentaha díape. Haʼe ndohejái vaʼerã ikoʼẽ mbaʼeve al ótro día peve.+

16 Ojapóramo pe ofrénda okumpli hag̃ua peteĩ promésa+ térã ojapóramo pe ofrénda voluntária,+ upéicharõ pe ofrénda ikatu ojeʼu oñepresentaha díape ha avei ikatu ojeʼu al día sigiénte hembýramo. 17 Péro 3 diahápe hembýramo gueteri pe soʼo, ojehapypaitéma vaʼerã.+ 18 Péro pe tercer díape oĩramo hoʼúva upe soʼo hemby vaʼekue pe ofrénda de paz ojejapo vaʼekuégui, Ñandejára ndoguerohorymoʼãi upe opresenta vaʼekuépe. Pe persónape ndaideprovechomoʼãi mbaʼevetépe upe ofrénda ojapo vaʼekue, pórke upéva ombojeguaru Ñandejárape. Ha pe persóna oĩ vaʼerã rresponsávle umi mbaʼe vai ojapo vaʼekuére ha ojekastiga vaʼerã chupe.+ 19 Pe soʼo ojáramo peteĩ mbaʼe kyʼáre, ojehapy vaʼerã, avave ndoʼúi vaʼerã. Péro enterove ipotĩva Ñandejára renondépe ikatu hoʼu pe soʼo ipotĩva.

20 Péro peteĩ persóna ikyʼáva Ñandejára renondépe hoʼúramo pe soʼo ojepuru vaʼekue ojejapo hag̃ua pe ofrénda de paz Jehovápe g̃uarã, upe persónape ojejuka vaʼerã.+ 21 Ha peteĩ persóna opokóramo peteĩ mbaʼe ikyʼávare, tahaʼe peteĩ hapicha ikyʼávare Ñandejára renondépe,+ peteĩ animál naipotĩrivare+ térã oimeraẽ mbaʼe ikyʼa ha oporombojeguarúvare,+ ha upéi hoʼu pe soʼo ojepuru vaʼekue ojejapo hag̃ua pe ofrénda de paz Jehovápe g̃uarã, upéicharõ upe persónape ojejuka vaʼerã’”.

22 Ha Jehová osegi oñeʼẽ Moiséspe ha heʼi chupe: 23 “Ere umi israelítape: ‘Peẽ ndapeʼúi vaʼerã umi tóro kyrakue,+ umi ovecha raʼyrusu mácho kyrakue ni umi kavara kyrakue. 24 Petopáramo peteĩ animál omano rei vaʼekue térã pejuhúramo peteĩ animál omano vaʼekue ojukágui chupe ótro animál, upéicharõ peẽ ikatu peipuru ikyrakue oimeraẽ mbaʼerã, péro ni mbaʼevéicharõ ndapeʼúi vaʼerã.+ 25 Ha peteĩ persóna hoʼúramo peteĩ animál kyrakue ojehapy vaʼekue ofréndaramo Jehovápe, upéicharõ upévape ojejuka vaʼerã.

26 Peẽ ndapeʼúi vaʼerã mbaʼeveichagua tuguy+ mamo peikohápe, tahaʼe umi guyra térã ótro animál ruguykue. 27 Oimeraẽ hoʼúva tuguy, tahaʼe haʼéva ruguykue, upévape ojejuka vaʼerã’”.+

28 Jehová heʼi avei Moiséspe: 29 “Ere umi israelítape: ‘Oĩramo ojapóva peteĩ ofrénda de paz Jehovápe g̃uarã, haʼe omeʼẽ vaʼerã peteĩ párte iñofréndagui Jehovápe.+ 30 Haʼe ogueru vaʼerã ipópe pe animál kyrakue+ ha avei ipechokue ojehapy hag̃ua Jehovápe ofréndaramo. Ha upéi ogueru vaʼerã koʼã mbaʼe ha ombokacha+ Jehová renondépe. 31 Pe saserdóte omoĩta pe altárpe pe ikyrakue ikatu hag̃uáicha okái ha otimbo,+ péro pe ipechokue opytáta Aarón ha itaʼyrakuérape.+

32 Peẽ pejapo jave pe ofrénda de paz, pemeʼẽ vaʼerã pe saserdótepe pe animál kuartokue a la derechapegua, pórke upéva hína pe párte sagráda chupekuéra g̃uarã.+ 33 Aarón raʼy opresentáva Ñandejárape pe animál ruguykue ha pe ikyrakue ojejapo jave pe ofrénda de paz, upévape oñemeʼẽta+ pe hetymangue a la derechapegua. 34 Pórke pe saserdóte Aarón ha itaʼyrakuérape g̃uarã che ahejáma pe animál pechokue ojejapo jave pe ofrénda oñembokacháva, ha avei pe hetymangue ojeapartáva chupekuéra g̃uarã pe ofrénda de paz ojapóvagui umi israelita. Kóva peteĩ léi siémpre okumpli vaʼerã umi israelita.+

35 Koʼãva hína umi párte ojeaparta vaʼekue umi saserdótepe g̃uarã umi ofrénda ojehapývagui Jehovápe g̃uarã. Koʼãva ojeaparta vaʼekue Aarón ha itaʼyrakuérape g̃uarã ojeporavoha día guive chupekuéra oservi hag̃ua de saserdóte Jehovápe.+ 36 Pe oñenombraha* díape chupekuéra,+ Jehová heʼi kuri umi israelítape omeʼẽ vaʼerãha umi saserdótepe koʼã párte. Kóva peteĩ léi siémpre okumpli vaʼerã umi israelita’”.

37 Kóva ko léi heʼi mbaʼéichapa ojejapo vaʼerã pe ofrénda ojehapýva,+ pe ofrénda de semílla,+ pe ofrénda ojepaga hag̃ua umi pekádore,+ pe ofrénda por la kúlpa,+ pe sakrifísio de nombramiénto+ ha pe ofrénda de paz.+ 38 Koʼã mbaʼe Jehová heʼi vaʼekue Moiséspe pe Sérro Sinaípe,+ umi israelita opresentátarõ guare Jehovápe iñofrénda pe desiérto de Sinaípe.+

8 Jehová osegi oñeʼẽ Moiséspe ha heʼi: 2 “Eraha Aarón ha itaʼyrakuérape,+ egueraha avei umi ao,+ pe aséite ojejapo hag̃ua nombramiénto,+ pe tóro ojepurútava ojejapo hag̃ua pe ofrénda ojepaga hag̃ua umi pekádore, umi mokõi ovecha mácho ha pe kanásto orekóva umi pan ilevaduraʼỹva.+ 3 Ere avei entéro israelítape toñembyaty pe tavernákulo* korapy entrádape”.

4 Upémarõ Moisés ojapo Jehová heʼi hagueichaite chupe, ha umi israelita oñembyaty pe tavernákulo korapy entrádape. 5 Upéi Moisés heʼi umi héntepe: “Jehová heʼi oréve rojapo vaʼerãha koʼã mbaʼe”. 6 Upéi Moisés ohenói Aarón ha itaʼyrakuérape ha ombojahu chupekuéra.*+ 7 Upe rire omonde Aarón rehe pe ao puku akuádro,+ omoĩ ikuʼáre pe sinturón,+ omonde hese pe ao puku ijyvakuareíva,+ ha upéva ári omoĩ pe delantál.*+ Upéi ojokua ikuʼáre pe sinturón vordádo+ oĩva pe delantál rehe ha oñapytĩ hatã porã. 8 Upe rire omoĩ pe pechéra*+ pe delantál ári ha omoĩ pype pe Urim ha Tumim.*+ 9 Ha omoĩ avei iñakãre pe turvánte*+ ha hiʼári pe pláka de óro sagrádo* omimbíva, ha ohechaukáva ojeapartaha chupe ombaʼapo hag̃ua Ñandejárape g̃uarã.+ Moisés ojapo Jehová heʼi hagueichaite chupe.

10 Upe rire Moisés ojagarra pe aséite ojejapo hag̃ua nombramiénto ha omoĩ pe tavernákulore* ha opa mbaʼe oĩvare pype,+ ha osantifika ojepuru hag̃ua Ñandejára servísiope añoite. 11 Ha ohypýi avei pe aséitepe 7 vése pe altár, ha péicha oñesantifika ha ojeaparta ojepuru hag̃ua Ñandejára servísiope añoite pe altár, hembiporukuéra, pe palangána guasu ha hendag̃ua. 12 Ipahaitépe oñohẽ avei pe aséite Aarón akãre, onombra ha osantifika hag̃ua chupe.+

13 Upéi Moisés ogueru Aarón raʼykuérape ha omonde hesekuéra umi ao puku akuádro ha omoĩ ikuʼarekuéra pe sinturón, ha omoĩ iñakãrekuéra pe turvánte.+ Moisés ojapo Jehová heʼi hagueichaite chupe.

14 Upéi ogueru pe tóro ojejapo hag̃ua pe ofrénda ojepaga hag̃ua umi pekádore, ha Aarón ha itaʼyrakuéra omoĩ ipo upe tóro akã ári, pe ojepurúva ojejapo hag̃ua pe ofrénda ojepaga hag̃ua umi pekádore.+ 15 Moisés ojuka pe tóro ha ojagarra michĩmi pe huguykue,+ omoinge pype ikuã ha omona pe tuguy umi vaka ratĩ joguaháre oĩva pe altárpe, omopotĩ hag̃ua pe altár pekádogui. Pe tuguy hembýva katu oñohẽmbaite pe altár vásere, ha péicha oñesantifika ojejapo hag̃ua hiʼári umi sakrifísio. 16 Upéi Moisés oipeʼa pe animál kyrakue oĩva hyekuére, pe ikyrakue oĩva pe ígadore, umi mokõi irriñón ha umi ikyrakue oĩva hiʼári. Koʼãva Moisés ohapy pe altár ári ikatu hag̃uáicha otimbo.+ 17 Péro umi hembyre oñeguenohẽ pe kampaméntogui ha ojehapypaite: pe tóro pirekue, hoʼokue ha hekakakue.+ Moisés ojapo Jehová heʼi hagueichaite chupe.

18 Upéi ogueru pe ovecha mácho ojejapo hag̃ua pe ofrénda ojehapýva, ha Aarón ha itaʼyrakuéra omoĩ ipo pe ovecha akã ári.+ 19 Upéi Moisés ojuka pe ovecha mácho, ha pe huguykuépe ohypýi pe altár kompletoite. 20 Moisés okarnea pe ovecha mácho ha oikytĩ en pedáso, ha omoĩ pe altárpe otimbo hag̃ua pe iñakãngue, umi pedáso oikytĩ vaʼekue ha avei ikyrakue. 21 Upéi ojoheipaite pe hyekue ha umi ikanillakue, ha ohapy pe ovecha kompletoite pe altár ári ikatu hag̃uáicha otimbo. Kóva hína peteĩ ofrénda ojehapýva ha hyakuã asýva.* Kóva ningo peteĩ ofrénda ojehapýva Jehovápe g̃uarã, ha Moisés ojapo Jehová heʼi hagueichaite chupe.

22 Upe rire Moisés ogueru pe ótro ovecha mácho, pe ojepurúva ojejapo hag̃ua nombramiénto,+ ha Aarón ha itaʼyrakuéra omoĩ ipo pe ovecha akã ári.+ 23 Upéi Moisés ojuka pe ovecha mácho ha ombyaty michĩmi huguykue ha omonaʼimi Aarón nambi derécha rehe, ikuã guasu ha ipysã guasu a la derechapeguáre. 24 Upéi Moisés ogueru Aarón raʼykuérape ha omonaʼimi avei hesekuéra pe tuguy: inambi derécha rehe, ikuã guasu ha ipysã guasu a la derechapeguáre. Péro pe tuguy hemby vaʼekuépe ohypýi pe altár kompletoite.+

25 Upéi Moisés ojagarra pe ovecha kyrakue: huguaikue ikyraitéva, kompletoite pe ikyrakue oĩva hyekue ári, pe ikyrakue oĩva pe ígadore, umi mokõi irriñón, umi ikyrakue oĩva hiʼári ha hetymangue a la derechapegua.+ 26 Upe rire ojagarra avei umi pan ilevaduraʼỹva pe kanásto oĩvagui Jehová renondépe: peteĩ pan argólla,+ pan argólla ojejapo vaʼekue arína ha aséitegui,+ ha peteĩ pan pererĩ opururũ asýva. Upéi Moisés omoĩ koʼã mbaʼe pe animál kyrakue ha hetymangue a la derechapegua ári. 27 Entéro koʼã mbaʼe omoĩ Aarón ha itaʼyrakuéra pópe ha oñepyrũ ombokacha hikuái Jehová renondépe. Kóva hína peteĩ ofrénda oñembokacháva Ñandejára renondépe. 28 Upéi Moisés ojagarra jey chuguikuéra upe ofrénda ha ohapy pe altár ári ikatu hag̃uáicha otimbo, ha omoĩ pe ofrénda ojehapýva ári. Kóva hína peteĩ sakrifísio de nombramiénto hyakuã asýva,* peteĩ ofrénda ojehapýva Jehovápe g̃uarã.

29 Upe rire Moisés ojagarra pe ovecha pechokue ha ombokacha, ojejapoháicha pe ofrénda oñembokacháva Jehová renondépe.+ Upe ovecha ojepuru vaʼekuégui ojejapo hag̃ua nombramiénto, upévagui ojepeʼa ha oñemboyke Moiséspe g̃uarã pe ipechokue. Moisés ojapo Jehová heʼi hagueichaite chupe.+

30 Upéi Moisés ojagarra michĩmi pe aséite ojepurúva ojejapo hag̃ua nombramiénto+ ha pe tuguy oĩva pe altár ári, ha ohypýi pype Aarónpe ha ijaokuéra. Ohypýi avei itaʼyrakuérape+ ha umi ijaokuéra, péicha oñesantifika chupekuéra ha ijaokuéra Ñandejára servísiope g̃uarã.+

31 Upéi Moisés heʼi Aarón ha itaʼyrakuérape: “Pembopupu+ pe ovecha roʼokue pe tavernákulo entrádape, ha peʼu upépe pe pan oĩva reheve pe kanástope.* Péicha ojeʼe kuri chéve pejapo vaʼerãha: ‘Aarón ha itaʼyrakuéra hoʼu vaʼerã upéva’.+ 32 Hembýramo pe soʼo ha pe pan, pehapy vaʼerã.+ 33 Peẽ pepyta vaʼerã pe tavernákulo entráda ypýpe 7 día aja ojejapopa peve pe nombramiénto, pórke 7 día aja ojejapóta pe nombramiénto peservi hag̃ua de saserdóte.+ 34 Jehová heʼi koʼã mbaʼe jajapo vaʼekue koestedía ojejapo vaʼerãha avei umi ótro día hembývape, ikatu hag̃uáicha oñeperdona peẽme pende pekádo.+ 35 Peẽ pepyta vaʼerã pe tavernákulo entrádape ára ha pyhare 7 día aja,+ ha pekumpli vaʼerã pene rresponsavilida Jehovándi.+ Upéicharõmante napemanomoʼãi, pórke péicha oñemanda chéve”.

36 Ha Aarón ha itaʼyrakuéra ojapo opa mbaʼe Jehová heʼi vaʼekue Moisés rupive.

9 Pe 8 diahápe+ Moisés ohenói Aarón ha itaʼyrakuérape ha entéro umi kuimbaʼe omoakãvape* Israel. 2 Moisés heʼi Aarónpe: “Egueru peteĩ tóro raʼyrusu isánova ikatu hag̃uáicha ojejapo pe ofrénda ojepaga hag̃ua umi pekádore,+ ha peteĩ ovecha mácho isánova ojejapo hag̃ua peteĩ ofrénda ojehapýva. Koʼãva ningo representa vaʼerã Jehová renondépe. 3 Péro ere umi israelítape: ‘Pegueru peteĩ kavara mácho ojejapo hag̃ua pe ofrénda ojepaga hag̃ua umi pekádore. Ha pegueru avei peteĩ tóro raʼyrusu ha peteĩ ovecha raʼyrusu máchova, koʼãva de un áño vaʼerã ha isáno vaʼerã avei. Koʼã animál ojepurúta ojejapo hag̃ua peteĩ ofrénda ojehapýva. 4 Pegueru avei peteĩ tóro ha peteĩ ovecha mácho ojejapo hag̃ua pe ofrénda de paz,+ ha ojesakrifika hag̃ua Jehová renondépe. Avei pegueru peteĩ ofrénda de semílla+ oñembojeheʼa vaʼekue aséitere. Pegueru vaʼerã koʼã mbaʼe pórke koestedía Jehová ojechaukáta peẽme’”.+

5 Haʼekuéra ogueru opa mbaʼe Moisés ojerure vaʼekue pe tavernákulo* renondépe. Upéi enterove israelita ou oñembyaty upépe, ha opyta oñemboʼyhápe Jehová renondépe. 6 Ha Moisés heʼi chupekuéra: “Jehová heʼi kuri pejapo vaʼerãha koʼã mbaʼe, ikatu hag̃uáicha Jehová ohechauka peẽme ipodér tuichaitéva”.+ 7 Upéi Moisés heʼi Aarónpe: “Eñemboja pe altárpe ha ejapo pe ofrénda repaga hag̃ua nde pekádore+ ha ejapo avei ne ofrénda ojehapýva. Koʼã mbaʼe rejapo vaʼerã nde ha nde rogayguakuéra rehehápe+ oñeperdona hag̃ua peẽme pende pekádo. Upéi epresenta pe ofrénda pe puévlo rehehápe+ oñeperdona hag̃ua chupekuéra ipekádo.+ Koʼã mbaʼe rejapo vaʼerã Jehová heʼi hagueichaite”.

8 Upémarõ pyaʼe porã Aarón oñemboja pe altár ypýpe, ha ojuka pe tóro raʼyrusu ojapo hag̃ua pe ofrénda opaga hag̃ua ipekádore.+ 9 Upéi Aarón raʼykuéra ogueru chupe upe animál ruguykue+ ha haʼe omoinge ikuã pe tuguýpe ha omona umi vaka ratĩ joguaháre oĩva pe altárpe, ha pe tuguy hembýva katu oñohẽmbaite pe altár vásere.+ 10 Ha pe animál kyrakue, umi irriñón ha pe ikyrakue oĩva pe ígadore ohapy pe altárpe ikatu hag̃uáicha otimbo. Koʼã mbaʼe oipeʼa pe animál ojepuru vaʼekuégui ojejapo hag̃ua pe ofrénda ojepaga hag̃ua umi pekádore. Haʼe ojapo Jehová heʼi hagueichaite Moiséspe.+ 11 Upéi onohẽ pe kampaméntogui pe animál roʼo ha ipirekue ha ohapypaite.+

12 Upéi ojuka pe animál ojapo hag̃ua pe ofrénda ojehapýva, ha Aarón raʼykuéra omeʼẽ chupe pe animál ruguykue, ha haʼe ohypýi pype kompletoite pe altár.+ 13 Haʼekuéra omeʼẽ avei chupe pe animál akãngue ha umi pedáso oñekytĩ vaʼekue ojejapo hag̃ua pe ofrénda ojehapýva. Ha haʼe omoĩ koʼã mbaʼe pe altárpe okái ha otimbo hag̃ua. 14 Avei haʼe ojohéi pe animál ryekue ha umi ikanillakue, upéi omoĩ pe altárpe pe ofrénda ojehapýva ári ikatu hag̃uáicha okái ha otimbo.

15 Upe rire Aarón ojapo pe ofrénda pe puévlo rehehápe. Upearã ojagarra ha ojuka pe kavara mácho, ikatu hag̃uáicha ojapo pe ofrénda ojepaga hag̃ua umi pekádore pe puévlo rehehápe. Aarón ojapo ko ofrénda ojepaga hag̃ua umi pekádore ojapo haguéicha pe primer ofrénda. 16 Haʼe opresenta pe ofrénda ojehapýva ojejapoháicha jepi voi.+

17 Upe riremínte opresenta pe ofrénda de semílla.+ Upearã ojagarra un púño upe ofréndagui ha omoĩ pe altár ári ikatu hag̃uáicha okái ha otimbo, péva ojapo pe ofrénda ojehapývandi pyharevekue.+

18 Upéi ojuka pe tóro ha pe ovecha mácho ojepurúva ojejapo hag̃ua pe ofrénda de paz pe puévlo omeʼẽ vaʼekue. Ha Aarón raʼykuéra omeʼẽ chupe umi animál ruguykue, ha haʼe ohypýi pype kompletoite pe altár.+ 19 Ha pe tóro kyrakue,+ pe ovecha mácho ruguaikue ikyraitéva, pe ikyrakue oĩva hyekue ári, umi irriñón ha pe ikyrakue oĩva pe ígadore,+ 20 haʼekuéra omoĩmbaite koʼãva umi animál pechokue ári. Ha upe rire Aarón omoĩ umi ikyrakue pe altár ári ikatu hag̃uáicha okái ha otimbo.+ 21 Péro umi animál pechokue ha umi hetymangue a la derechapegua Aarón ombokacha ojejapoháicha pe ofrénda oñembokacháva Jehová renondépe. Haʼe ojapo Moisés heʼi hagueichaite chupe.+

22 Upémarõ Aarón ohupi ipo pe puévlo oĩha gotyo, upéi ovendesi chupekuéra+ ha oguejy ojapo rire pe ofrénda ojepaga hag̃ua umi pekádore, pe ofrénda ojehapýva ha umi ofrénda de paz. 23 Ipahaitépe Moisés ha Aarón oike pe tavernákulope, upéi osẽ hikuái ha ovendesi pe puévlope.+

Jehová katu ohechauka ipodér tuichaitéva enterove umi hénte renondépe,+ 24 ha Jehová ombou tata+ ha ohapypaite pe ofrénda ojehapýva ha umi animál kyrakue oĩva pe altár ári. Umi hénte ohechávo upéva, ovyʼaiterei ha oñepyrũ osapukái, upéi oñesũ ha oñakãity hikuái.+

10 Upe rire Nadab ha Abihú+ ojagarra umi imbaʼyru ojehapyha insiénso ha omoĩ pype tatapỹi ha insiénso.+ Upéi oñepyrũ ojapo hikuái Jehová renondépe ofrénda* noñepermitíriva,+ hiʼarive Ñandejára ndeʼíri kuri chupekuéra ojapo hag̃ua upéva. 2 Upepete osẽ tata Jehová oĩhágui, ha ojuka chupekuéra Jehová renondépe.+ 3 Upémarõ Moisés heʼi Aarónpe: “Péicha heʼi Jehová: ‘Umi oñemoag̃uíva cherehe chesantifika vaʼerã,+ ha enterove umi hénte chemombaʼeguasu vaʼerã’”. Ha Aarón okirirĩeténte.

4 Upévo Moisés ohenói Misael ha Elzafánpe, ituakuéra hína Uziel,+ Aarón tio. Ha Moisés heʼi chupekuéra: “Peju koʼápe ha pegueraha pene ermanokuérape ko lugár sagrádo renondégui, ha peguenohẽ ko kampaméntogui”. 5 Haʼekuéra oho ojagarra oguenohẽ pe kampaméntogui umi kuimbaʼe retekue orekóva gueteri ijehe ijao puku akuádrova. Ojapo hikuái Moisés heʼi haguéicha chupekuéra.

6 Upe rire Moisés heʼi Aarón ha itaʼyrakuéra Eleazar ha Itamárpe: “Aníke peneakã chara ni pemondoro pende ao pehechauka hag̃ua peñembyasyha.+ Upéicharõmante napemanomoʼãi ha Ñandejára ndaipochymoʼãi enterove umi israelítandi. Péro pene ermanokuéra israelita ojaheʼóta Jehová ohundi haguére Aarón raʼykuérape tata rupive. 7 Peẽ pepyta vaʼerã pe tavernákulo* entráda ypýpe ani hag̃ua pemano, pórke Jehová penenombráma kuri pe aséite rupive”.+ Ha haʼekuéra ojapo Moisés heʼi haguéicha.

8 Upéi Jehová heʼi Aarónpe: 9 “Nde ha nde raʼykuéra ndapeʼúi vaʼerã víno ni mbaʼeveichagua vevída orekóva alkoól peju vove pembaʼapo hag̃ua tavernákulope,+ upéicharõmante napemanomoʼãi. Upéva hína peteĩ léi siémpre pekumpli vaʼerã, nde ha ne familiare, 10 ikatu hag̃uáicha peẽ pehechakuaa idiferenteha peteĩ mbaʼe sagrádova ha peteĩ mbaʼe ndahaʼéiva, peteĩ mbaʼe ikyʼáva ha peteĩ mbaʼe ipotĩva.+ 11 Avei ikatu hag̃uáicha pemboʼe umi israelítape ojapo hag̃ua opa mbaʼe Jehová heʼi vaʼekue Moiséspe”.+

12 Upéi Moisés ohenói Aarónpe, ha mokõive itaʼýra hembývape, Eleazar ha Itamárpe, ha heʼi chupekuéra: “Pejagarra pe pan hembýva pe ofrénda de semíllagui ojehapy vaʼekue Jehovápe g̃uarã, péva pe pan ilevaduraʼỹva peʼu vaʼerã pe altár ypýpe,+ pórke upéva sagradoiterei hína.+ 13 Peʼu vaʼerã peteĩ lugár sagrádope,+ upéva upe párte ningo otoka ndéve ha avei nde raʼykuérape ojehapy jave umi ofrénda Jehovápe g̃uarã, pórke péicha ojeʼe chéve ojejapo vaʼerãha. 14 Ha peẽ peʼu vaʼerã peteĩ lugár ipotĩvape pe animál pechokue ojejapo jave pe ofrénda oñembokacháva ha pe animál retymangue pe párte sagrádagui.+ Koʼã mbaʼe reʼu vaʼerã nde, ha avei hoʼu vaʼerã nde raʼykuéra ha nde rajykuéra.+ Koʼã párte ningo otoka ndéve ha nde raʼykuérape umi ofrénda de paz ojapóvagui umi israelita. 15 Pe animál retymangue pe párte sagrádagui, pe animál pechokue pe ofrénda oñembokachávagui ha avei umi ikyrakue ojehapýva ojejapo jave umi ofrénda, ojegueru vaʼerã peẽme ikatu hag̃uáicha pejapo pe ofrénda oñembokacháva Jehová renondépe. Pe animál pechokue ha hetymangue siémpre oñemboyke vaʼerã ndéve ha nde raʼykuérape g̃uarã,+ Jehová heʼi haguéicha”.

16 Upéi Moisés oñepyrũ oporandu mbaʼépa oiko raʼe pe kavara mácho ojepuru vaʼekuégui ojejapo hag̃ua pe ofrénda ojepaga hag̃ua umi pekádore,+ ha otopa ojehapypáma hague. Upévare orrenegaiterei umi mokõi Aarón raʼy hembývare, Eleazar ha Itamar rehe, ha heʼi chupekuéra: 17 “¿Mbaʼére piko ndapeʼúi raʼe pe lugár sagrádope pe ofrénda ojejapo vaʼekue ojepaga hag̃ua umi pekádore?+ Upéva ningo sagradoiterei ha Ñandejára oheja kuri pende kárgope peofrese hag̃ua umi mbaʼe vai ojapo vaʼekuére umi hénte, ha péicha oñeperdonáta chupekuéra ipekádo Jehová renondépe. 18 ¡Pemañamína! Pe animál ruguy ningo ndojeguerahái kuri pe tavernákulo ryepýpe.+ Upévare peẽ katuete peʼu vaʼerã kuri pe ofrénda pe lugár sagrádope, haʼe haguéicha peẽme”. 19 Upémarõ Aarón heʼi Moiséspe: “Koestedía pe puévlo opresenta Jehovápe iñofrénda ojepaga hag̃ua umi pekádore ha pe ofrénda ojehapýva,+ péro che ndaʼúi kuri umi ofrénda. Ndéngo reikuaa porã mbaʼépa oiko kuri cherehe koestedía, ha haʼúrire pe ofrénda ojepaga hag̃ua umi pekádore, ¿oguerohorýta piko raʼe upéva Jehová?”. 20 Ha Moisés ohendúvo Aarónpe ontende mbaʼérepa ojapo raʼe upéva.

11 Upéi Jehová heʼi Moisés ha Aarónpe: 2 “Peje umi israelítape: ‘Koʼãva hína umi animál ko yvy arigua ikatúva peʼu:+ 3 entéro animál ipysãpẽ paʼũva ha oñaminduʼúva* ikatu peʼu.

4 Péro ndapeʼúi vaʼerã koʼã animál oñaminduʼúva térã ipysãpẽ paʼũva: pe kaméllo, pórke haʼe oñaminduʼu péro naipysãpẽpaʼũi. Upévare ikyʼa peẽme g̃uarã.+ 5 Avei pe damán,*+ pórke haʼe oñaminduʼu péro naipysãpẽpaʼũi. Upévare ikyʼa peẽme g̃uarã. 6 Avei pe tapiti, pórke haʼe oñaminduʼu péro naipysãpẽpaʼũi. Upévare ikyʼa peẽme g̃uarã. 7 Avei pe kure,+ pórke haʼe ipysãpẽ paʼũ péro noñaminduʼúi. Upévare ikyʼa peẽme g̃uarã. 8 Peẽ ndapeʼúi vaʼerã ni mbaʼevéicharõ koʼã animál roʼo ni ndapepokói vaʼerã heʼonguére. Koʼãva ikyʼa peẽme g̃uarã.+

9 Koʼãva ikatúta peʼu umi oikóvagui ýpe: opaichagua pira iplátava ha ijalétava, tahaʼe oikóva márpe térã rríope.+ 10 Péro oimeraẽ mbaʼe oĩva márpe térã rríope ha ndaijalétaiva térã ndaiplátaiva penembojeguaru vaʼerã, tahaʼe umi piraʼi, vichoʼi* térã oimeraẽ ótra kósa* oikóva ýpe. 11 Koʼãva penembojeguaru vaʼerã ha ndapeʼúi vaʼerã ni mbaʼevéicharõ,+ ha penembojeguaru vaʼerã avei heʼongue. 12 Opa mbaʼe oĩva ýpe ha ndaijalétaiva ni ndaiplátaiva penembojeguaru vaʼerã.

13 Koʼãva hína umi guyra penembojeguaru vaʼerã, peẽ ndapeʼúi vaʼerã pórke koʼãva ikyʼaiterei: pe ágila,+ pe taguato hoʼúva pira, pe yryvu hũ,+ 14 pe taguato pytã ha opaichagua taguato hũ, 15 ha avei opaichagua kuérvo. 16 Avei pe ñandu guasu, pe lechúsa, pe gavióta ha opaichagua alkón, 17 pe kavureʼi, pe mbigua, ha pe ñakurutũ. 18 Avei pe sísne, pe pelíkano, pe yryvu, 19 pe siguéña, opaichagua gársa, pe ypekũ joguaha* ha pe mbopi. 20 Avei penembojeguaru vaʼerã opaichagua vichoʼi ovevéva ha 4 ipýva.

21 Péro umi vícho ovevéva ha 4 ipýva apytégui, peẽ ikatu peʼu umi orekóva mokõi hetyma ipukuvéva oipurúva opo hag̃ua. 22 Umíva apytépe peẽ ikatu peʼu opaichagua tuku,+ tuicháva ha michĩva, ha avei umi kyju.* 23 Entéro umi ótro vícho ipepóva ha 4 ipýva penembojeguaru vaʼerã. 24 Peẽ pendekyʼáta Ñandejára renondépe peʼúramo koʼã mbaʼe. Ha oimeraẽ opokóva koʼãva reʼonguére opytáta ikyʼa kuarahy oike peve.+ 25 Peteĩ persóna ojagarráramo koʼã vícho reʼongue, ojohéi vaʼerã ijao+ ha haʼe opyta vaʼerã ikyʼa kuarahy oike peve.

26 Entéro animál ipysãpẽ paʼũva péro noñembojaʼóiva kompletoite pe ipysãpẽ ha noñaminduʼúiva, ikyʼa peẽme g̃uarã. Oimeraẽ opokóva koʼã animál reʼonguére opytáta ikyʼa.+ 27 Entéro animál 4 ipýva ha ipyapẽ akuáva,* ikyʼa peẽme g̃uarã. Oimeraẽ opokóva koʼãva reʼonguére opytáta ikyʼa kuarahy oike peve. 28 Peteĩ persóna ojagarráramo ogueraha koʼã animál reʼongue, ojohéi vaʼerã ijao+ ha haʼe opytáta ikyʼa kuarahy oike peve.+ Koʼã animál ikyʼa peẽme g̃uarã.

29 Koʼãva hína umi animál yvy arigua ikyʼáva peẽme g̃uarã: pe anguja yvyguypegua ha pe anguja.+ Avei opaichagua teju, 30 pe ambere, teju guasu, teju ypegua, teju yvykuʼipegua ha kamaleón. 31 Koʼãva hína umi vícho ikyʼáva peẽme g̃uarã.+ Peteĩ persóna ojagarráramo koʼã animál reʼongue, ojohéi vaʼerã ijao ha haʼe opyta vaʼerã ikyʼa kuarahy oike peve.+

32 Koʼã animál reʼongue hoʼáramo peteĩ mbaʼe ári, upéva opytátama ikyʼa, tahaʼe tembiporu de madéra, peteĩ ao, kuéro térã ao arpilléra. Oimeraẽ mbaʼe peẽ peipurúva ha ojáva koʼã mbaʼére, pemoinge vaʼerã ýpe, ha opytáta ikyʼa kuarahy oike peve. Upe rire ae ipotĩta. 33 Peẽ pejokapaite vaʼerã umi mbaʼyru ojejapo vaʼekue ñaiʼũgui hoʼáramo pype koʼã animál reʼongue, ha oimeraẽ mbaʼe oĩ vaʼekue upe mbaʼyrúpe ikyʼa avei.+ 34 Ha pe y oĩva ko mbaʼyrúpe oñehẽ térã ojáramo oimehaichagua hiʼupýre, upéva opytátama ikyʼa. Ha oimehaichagua líkido oĩva upe mbaʼyrúpe opytátama ikyʼa avei. 35 Hoʼáramo oimeraẽ mbaʼe ári koʼã animál reʼongue, upéva opytátama ikyʼa. Hoʼáramo peteĩ ornoʼi térã iváse ári,* upéva ojejokapaite vaʼerã. Koʼã mbaʼe ikyʼa, ha peẽme g̃uarã opyta vaʼerã avei ikyʼa. 36 Péro hoʼáramo peteĩ ykua térã peteĩ alhívepe,* koʼãva ndaikyʼamoʼãi. Péro pe opokóva pe animál reʼonguére, upéva opytáta ikyʼa. 37 Ha koʼã animál reʼongue hoʼáramo umi semílla ojepurútava oñeñemitỹ hag̃ua ári, koʼãva ndaikyʼamoʼãi. 38 Péro peipurúramo pe y pemboykue hag̃ua umi semílla ha pe animál reʼongue hoʼa avei hiʼári, upéicharõ umi semílla opytátama ikyʼa peẽme g̃uarã.

39 Omanóramo oimeraẽ animál peẽ ikatúva peʼu, ha pepokóramo upe animál reʼonguére, pepytáta pendekyʼa kuarahy oike peve.+ 40 Oimeraẽ hoʼúva upe animál roʼo ojohéi vaʼerã ijao ha opyta vaʼerã ikyʼa kuarahy oike peve.+ Ha oimeraẽ ojagarráva ogueraha koʼã animál reʼongue, ojohéi vaʼerã ijao ha haʼe opyta vaʼerã ikyʼa kuarahy oike peve. 41 Entéro umi vícho oĩva ko yvy ári penembojeguaru vaʼerã,+ ni mbaʼevéicharõ ndapeʼúi vaʼerã. 42 Peẽ ndapeʼúi vaʼerã umi animál otyryrýva yvýre, umi 4 ipýva, térã oimeraẽ ótro vícho 4 ipýva térã hetave ipýva. Koʼã mbaʼe penembojeguaru vaʼerã.+ 43 Aníke peʼu koʼã animál ha vícho, ani hag̃ua pendekyʼa avei umíva káusare. Péro peẽ peʼúramo koʼã mbaʼe, pepytáta pendekyʼa Ñandejára renondépe.+ 44 Che hína Jehová pende Jára,+ ha peẽ penepotĩ ha penderekoporã vaʼerã,+ pórke che sánto hína.+ Peẽ napeñemongyʼái vaʼerã peʼúvo umichagua vícho ko yvy arigua. 45 Pórke che hína Jehová, ha che poguenohẽ kuri Egíptogui ahechauka hag̃ua peẽme che haʼeha Ñandejára.+ Ha peẽ penepotĩ ha penderekoporã vaʼerã,+ pórke che sánto hína.+

46 Kóva hína pe léi oñeʼẽva umi animál rehe, umi guyrakuérare, umi animál oĩvare ýpe, ha entéro umi vícho oĩvare ko yvy ape ári, 47 ikatu hag̃uáicha pehechakuaa mbaʼépa ipotĩ ha mbaʼépa naipotĩri, mbaʼe animálpa ikatu peʼu ha mbaʼépa ndovaléi peʼu’”.+

12 Upéi Jehová heʼi Moiséspe: 2 “Ere umi israelítape: ‘Peteĩ kuña hyeguasúramo ha imemby peteĩ mitãʼi, opytáta ikyʼa 7 día, opytaháicha avei ikyʼa oguejy jave chupe iperiódo.+ 3 Ha 8 diahápe oñesirkunsida vaʼerã* pe mitãʼípe.+ 4 Pe kuña imemby vaʼekue osegi vaʼerã ohaʼarõ 33 día ipotĩ jey hag̃ua pe huguy operde vaʼekuégui. Haʼe ndopokói vaʼerã mbaʼeve oñemboyke vaʼekuére Ñandejárape g̃uarã, ha ndohói vaʼerã avei pe lugár sagrádope oñekumplipa peve umi día ipotĩ jey hag̃ua.

5 Ha peteĩ kuña imembýramo peteĩ mitãkuñaʼi, opytáta ikyʼa 14 día, opytaháicha avei ikyʼa oguejy jave chupe iperiódo. Haʼe osegi vaʼerã ohaʼarõ 66 día ipotĩ jey hag̃ua pe huguy operde vaʼekuégui. 6 Oñekumpli vove umi día ipotĩ jey hag̃ua imemby rire peteĩ mitãʼi térã peteĩ mitãkuñaʼi, ogueru vaʼerã peteĩ ovecha raʼyrusu máchova de un áño ojejapo hag̃ua pe ofrénda ojehapýva.+ Avei ogueru vaʼerã peteĩ palóma raʼy térã peteĩ tortóla ojejapo hag̃ua pe ofrénda ojepaga hag̃ua umi pekádore. Koʼã animál ogueraha vaʼerã pe saserdótepe pe tavernákulo* entrádape. 7 Pe saserdóte opresentáta umi ofrénda Jehová renondépe pe kuña rehehápe oñeperdona hag̃ua chupe ipekádo. Péicha pe kuña ipotĩta pe huguy operde vaʼekuégui. Kóva hína pe léi heʼíva mbaʼépa ojapo vaʼerã peteĩ kuña imembýramo peteĩ mitãʼi térã peteĩ mitãkuñaʼi. 8 Péro ndorekóiramo la pláta ojogua hag̃ua peteĩ ovecha, ogueru vaʼerã mokõi tortóla térã mokõi palóma raʼy.+ Peteĩ ojepurúta ojejapo hag̃ua pe ofrénda ojepaga hag̃ua umi pekádore, ha pe ótro katu ojepurúta ojejapo hag̃ua pe ofrénda ojehapýva. Pe saserdóte opresentáta pe kuña rehehápe umi ofrénda ha opytáta ipotĩ jey’”.

13 Jehová osegi oñeʼẽ Moisés ha Aarónpe, ha heʼi chupekuéra: 2 “Peteĩ kuimbaʼe térã kuña pirére osẽramo peteĩ mbaʼe iñapenóva, térã kuru, o peteĩ rróncha, ojegueraha vaʼerã chupe pe saserdóte Aarón rendápe, térã peteĩva umi itaʼyrakuéra oservíva de saserdóte rendápe.+ Ojegueraha vaʼerã chupe, pórke ikatu hína lépra*+ upe osẽva ipirére. 3 Pe saserdóte orrevisáta pe mbaʼasy osẽva pe persóna pirére. Ha ohecháramo morotĩha pe hague upe osẽháme pe mbaʼasy, ha pe párte oñeinfektáva oikemaha hoʼóre, upéicharõ upéva lépra hína. Ha pe saserdóte orrevisapa rire ohecháramo koʼã mbaʼe, heʼi vaʼerã hese ikyʼaha. 4 Péro pe rróncha osẽva ipirére morotĩramo ha pe párte oñeinfektáva ndoikéi gueteri hoʼóre, ha namorotĩriramo pe hague upe osẽháme pe mbaʼasy, upéicharõ pe saserdóte oapartáta* pe hasývape oĩ hag̃ua haʼeño 7 día.+ 5 Ha ohasa rire umi 7 día pe saserdóte orrevisa jeýta chupe, ha ndokakuaáiramo pe mbaʼasy ha ndokorréiramo ipirére, upéicharõ pe saserdóte oaparta jeýta chupe ótro 7 día.

6 Ha ohasa rire koʼã 7 día pe saserdóte orrevisa jeýta upe persónape, ha okuerámaramo pe párte oñeinfektáva ha ndokorréiramo ipirére, pe saserdóte heʼíta hese ipotĩha.+ Peteĩ kurúnte raʼe la osẽ vaʼekue hese. Upéi pe persóna ojohéi vaʼerã ijao ha opytátama ipotĩ. 7 Péro pe saserdóte orrevisa rire chupe,* pe kuru* okakuaa ha okorréramo ipirére, upéicharõ haʼe oho jey vaʼerã* pe saserdóte rendápe. 8 Ha pe saserdóte orrevisáta chupe, ha ohecháramo pe kuru okakuaa ha okorre hague ipirére, upéicharõ pe saserdóte heʼíta hese ikyʼaha. Lépra la ojagarráva chupe.+

9 Peteĩ persónape ojagarráramo lépra, ojegueraha vaʼerã chupe pe saserdóte rendápe, 10 ha pe saserdóte orrevisáta chupe.+ Ha peteĩ párte ipire iñapeno morotĩramo, ha omomorotĩramo avei hague, ha osẽramo peteĩ kuru vai pe iñapenoháme,+ 11 upéicharõ lépra puroite la osẽva ipirére. Ha pe saserdóte heʼi vaʼerã hese ikyʼaha, ha natekotevẽvéima ojeaparta chupe ojerrevisa jey hag̃ua,+ pórke haʼe ikyʼa. 12 Péro pe lépra ojagarrapaitéramo chupe, ipy guive iñakã meve, pe saserdóte ikatuha peve ohecha, 13 ha orrevisa rire ohechakuaáramo pe lépra ojagarrapaitéma hague pe persóna pire ha morotĩmbaitemaha, upéicharõ heʼíta pe mbaʼasy ndovamoʼãiha.* Haʼe ipotĩ hína. 14 Péro peichahágui osẽramo upe persóna pirére peteĩ kuru vai, upéicharõ haʼe ikyʼa. 15 Pe saserdóte orrevisa vove chupe ha ohecha pe kuru vai, haʼe heʼíta hese ikyʼaha.+ Upéva lépra hína.+ 16 Péro pe kuru vai okueráramo ha upéi morotĩ jeýramo pe hendague, upéicharõ haʼe oho vaʼerã pe saserdóte rendápe. 17 Pe saserdóte orrevisáta pe mbaʼasy oĩva pe persóna pirére,+ ha ohecháramo pe kuru okuera ha morotĩha, upéicharõ pe saserdóte heʼíta ipotĩha upe orekóva pe mbaʼasy.

18 Peteĩ persóna orekóramo peteĩ kuru ipeupáva ha upéi okuera, 19 péro pe okuera haguépe osẽramo peteĩ apeno morotĩ térã peteĩ rróncha morotĩ pytãngýva, upéicharõ oho vaʼerã ohechauka pe saserdótepe. 20 Pe saserdóte orrevisáta upéva,+ ha ohechárõ pe párte oñeinfektáva oikemaha hoʼóre ha morotĩha pe hague upe osẽháme hese, upéicharõ heʼi vaʼerã pe persóna ikyʼaha. Lépra hína pe osẽva hese pe kuru ipeupáva rendaguépe. 21 Péro pe saserdóte orrevisa rire chupe, ohecháramo pe hague namorotĩriha, ha pe párte oñeinfektáva katu ndoikeiha hoʼóre ha okañymaha ohóvo, upéicharõ oaparta vaʼerã chupe oĩ hag̃ua haʼeño 7 día.+ 22 Ha ojekuaa porãramo pe oñeinfektaha okorréma hague ipirére, upéicharõ pe saserdóte heʼíta hese ikyʼaha, pórke lépra hína la osẽva hese. 23 Péro pe rróncha ndokakuaái ha ndokorréiramo ipirére, pe saserdóte heʼíta hese ipotĩha,+ pórke irurúnte chugui pe ikuruha.

24 Térã oĩramo okáiva, ha pe okái haguépe osẽramo peteĩ rróncha morotĩ pytãngýva térã morotĩva, 25 upéicharõ pe saserdóte orrevisa vaʼerã chupe. Ha ohecháramo morotĩha pe hague upe rróncha oĩháme, ha pe párte oñeinfektáva oikemaha hoʼóre, upéicharõ lépra hína pe osẽva hese pe okái haguépe. Ha pe saserdóte heʼíta hese ikyʼaha, pórke lépra hína la osẽva hese. 26 Péro pe saserdóte orrevisa rire chupe, ohecháramo pe hague namorotĩriha, ha pe párte oñeinfektáva katu ndoikeiha hoʼóre ha okueramaha ohóvo, upéicharõ oaparta vaʼerã chupe oĩ hag̃ua haʼeño 7 día.+ 27 Ha 7 diahápe pe saserdóte orrevisa jeýta chupe, ha ojekuaa porãramo pe oñeinfektaha okorréma hague ipirére, upéicharõ pe saserdóte heʼíta hese ikyʼaha, pórke lépra hína la osẽva hese. 28 Péro pe rróncha ndokakuaái ha ndokorréiramo ipirére, ha okueráma ohóvo, upéicharõ irurúnte raʼe pe okái hague. Pe saserdóte heʼíta hese ipotĩha, pórke irurúnte chugui pe okái hague.

29 Peteĩ kuimbaʼe térã peteĩ kuña akã pirére térã hañykãre osẽramo peteĩ mbaʼe oñeinfektáva, 30 upéicharõ pe saserdóte orrevisa vaʼerã.+ Ha ohecháramo pe párte oñeinfektáva oikemaha hoʼóre ha pe hague ipokã ha saʼyjuha, upéicharõ pe saserdóte heʼíta hese ikyʼaha. Upéva peteĩ mbaʼasy osẽva iñakã pirére térã hováre. Lépra hína upe osẽva iñakã pirére térã hováre. 31 Péro pe saserdóte ohecháramo pe párte oñeinfektáva ndoikeiha hoʼóre ha saʼyjuha pe hague, upéicharõ oaparta vaʼerã pe hasývape oĩ hag̃ua haʼeño 7 día.+ 32 Ha 7 diahápe pe saserdóte orrevisa jeýta chupe, ha ojekuaa porãramo pe oñeinfektáva ndokorréi hague ipirére, ndasaʼyjuiha pe hague, ha pe párte oñeinfektaha katu ndoikéi hague hoʼóre, 33 upéicharõ pe persóna oñemoakã perõ térã ojevarvea vaʼerã, péro nomoperõi vaʼerã pe párte oñeinfektaha. Ha pe saserdóte oaparta vaʼerã pe hasývape oĩ hag̃ua haʼeño 7 día.

34 Ha 7 diahápe pe saserdóte orrevisa jeýta pe párte oñeinfektaha, ha ojekuaáramo ndokorreiha iñakã pirére térã hováre ha ndoikeiha avei hoʼóre, upéicharõ pe saserdóte heʼíta hese ipotĩha. Upéi pe persóna ojohéi vaʼerã ijao ha opytátama ipotĩ. 35 Péro ojekuaa porãramo pe párte oñeinfektáva okorréma hague ipirére ojeʼe rire hese ipotĩha, 36 upéicharõ pe saserdóte orrevisa jey vaʼerã chupe. Ha ohechakuaáramo pe párte oñeinfektáva oikemaha hoʼóre, upéicharõ pe saserdóte natekotevẽvéima ohecha saʼyjúpa pe hague, pórke pe persóna ikyʼa. 37 Péro pe saserdóte orrevisávo chupe, ojekuaáramo pe párte oñeinfektáva ndokorreiha ha okakuaamaha upépe hague hũva, upéicharõ okueráma imbaʼasýgui. Ha pe saserdóte heʼíta pe hasývare ipotĩha.+

38 Peteĩ kuimbaʼe térã peteĩ kuñáre osẽramo rróncha ha morotĩramo umi rróncha, 39 upéicharõ pe saserdóte orrevisa vaʼerã upéva.+ Ha umi rróncha osẽva ipirére morotĩ léntoramo, upéicharõ para reínte la osẽva hese, haʼe ipotĩ hína.

40 Peteĩ kuimbaʼégui okúiramo iñakãrangue ha opyta iñakã perõ, haʼe ipotĩ hína. 41 Ha okúiramo chugui iñakãrangue ha opyta isyva perõ, haʼe ipotĩ hína. 42 Péro osẽramo peteĩ kuru vai morotĩ pytãngýva pe iñakã perõháme térã pe isyva perõháme, upéicharõ lépra hína la osẽva hese. 43 Pe saserdóte orrevisa vaʼerã upéva, ha ohecháramo morotĩ pytãngyha pe kuru oĩva iñakã perõ térã isyva perõre, ha ojogua léprape, 44 upéicharõ lépra hína la orekóva. Pe persóna ikyʼa, ha pe saserdóte heʼi vaʼerã hese ikyʼaha, pórke lépra hína la osẽva hese. 45 Peteĩ persóna orekóva lépra omondoro vaʼerã ijao ha opyta vaʼerã iñakã chara, ha omoʼã vaʼerã ijuru* ha osapukái: ‘¡Cherasy, cherasy!’.* 46 Haʼe ikyʼáta hasy aja entéro, ha ikyʼa haguére oiko vaʼerã haʼeño mombyry pe kampaméntogui.+

47 Pe lépra ojagarráramo peteĩ ao, tahaʼe peteĩ ao de lána térã de líno, 48 tahaʼe pe ao pukukue térã ipekue,* térã ojagarráramo peteĩ kuéro térã oimeraẽ mbaʼe ojejapo vaʼekue chugui, 49 ha ojekuaáramo peteĩ máncha vérde saʼyju léntova térã pytãngýva koʼã mbaʼére, upéva lépra hína ha ojechauka vaʼerã pe saserdótepe. 50 Pe saserdóte orrevisa vaʼerã upe mbaʼe orekóva pe máncha, ha heʼíta toñemoĩ apartete 7 día.+ 51 Ha 7 diahápe pe saserdóte orrevisa jeýta pe máncha, ha ohecháramo okorreha pe aóre, pe ílo orekóvare peteĩ téla, pe kuérore, tahaʼe haʼéva la ojejapo vaʼekue chugui, upéva hína lépra ikatúva ova. Ha pe mbaʼe orekóva pe lépra ikyʼa hína.+ 52 Ojehapy vaʼerã pe ao de lána térã de líno, ha oimeraẽ mbaʼe de kuéro orekóva pe lépra. Upéva lépra ikatúva ova, upévare ojehapy vaʼerã umi mbaʼe.

53 Péro oiméramo pe saserdóte orrevisa ha ndokorréi raʼe pe máncha pe aóre, pe ílo orekóvare peteĩ téla, pe kuérore, térã oimeraẽ mbaʼe de kuérore, 54 upéicharõ pe saserdóte heʼíta ojejohéi hag̃ua umi mbaʼe orekóva pe máncha ha omoĩta upéva apartete ótro 7 día. 55 Ha pe saserdóte orrevisáta ojejohéi porã rire upe mbaʼe orekóva pe máncha, ha oiméramo ndojeíri raʼe, upéicharõ ikyʼa upe mbaʼe, jepe pe máncha ndokorréi. Upéicharõ ojehapy vaʼerã, pórke pe máncha okarúma hese, tahaʼe hyepýguio térã ijapéguio.

56 Péro pe saserdóte orrevisárõ upe mbaʼe ha ohecha pe máncha ojeíma hague ojejohéi porã rire, upéicharõ haʼe oipeʼa vaʼerã pe máncha rendague pe aógui, pe ílo orekóvagui peteĩ téla, térã pe kuérogui. 57 Péro pe máncha osẽramo ótro hendápe pe aóre, pe ílo orekóvare peteĩ téla, térã oimeraẽ mbaʼe de kuérore, upéicharõ okorre hína pe máncha ha ojehapy vaʼerã upéva, tahaʼe haʼéva upe mbaʼe orekóva pe máncha.+ 58 Péro pe máncha ojeíramo ojejohéi rire pe ao, pe ílo orekóva peteĩ téla, térã oimeraẽ mbaʼe de kuéro, upéicharõ ojejohéi jey vaʼerã ha opytátama ipotĩ.

59 Kóva hína pe léi peikuaa hag̃ua mbaʼéicha javépa ojeʼe vaʼerã ipotĩha térã ikyʼaha peteĩ mbaʼe, pe lépra osẽ jave peteĩ ao de lána térã de línore, pe ílo orekóvare peteĩ téla, térã oimeraẽ mbaʼe de kuérore”.

14 Jehová osegi oñeʼẽ Moiséspe ha heʼi chupe: 2 “Kóva hína pe léi heʼíva mbaʼépa ojapo vaʼerã peteĩ lepróso ojeguerahaha díape pe saserdóte rendápe ojeʼe hag̃ua hese ipotĩha.+ 3 Pe saserdóte osẽ vaʼerã pe kampaméntogui orrevisa hag̃ua okuerámapa pe lepróso. Ha ohecháramo okueramaha, 4 pe saserdóte heʼíta chupe ogueru hag̃ua koʼã mbaʼe ikatu hag̃uáicha opyta ipotĩ: mokõi guyraʼi ipotĩva Ñandejára renondépe, sédro rakã, ílo pytã asýva ha peteĩ máso ñana.*+ 5 Pe saserdóte heʼíta ojejuka hag̃ua peteĩva umi guyraʼi peteĩ mbaʼyru ojejapo vaʼekuépe ñaiʼũgui. Pe mbaʼyrúpe oĩ vaʼerã y oñeguenohẽ vaʼekue peteĩ ykua yvúgui. 6 Upéi ojagarra vaʼerã pe ótro guyraʼi, pe sédro rakã, pe ílo pytã asýva ha pe ñana máso, ha omoinge vaʼerã koʼãva pe guyraʼi ruguykuépe, pe ojejuka vaʼekue pe mbaʼyru orekóvape y. 7 Ha ojehypýi vaʼerã pe tuguýpe 7 vése pe oñemopotĩvape lépragui, ha ojeʼéta hese ipotĩmaha. Upéi ojepoi vaʼerã pe ótro guyraʼi oikovévagui oho hag̃ua pe ñúre.+

8 Pe persóna oñemopotĩva lépragui ojohéi vaʼerã ijao, avei oñemoakã perõ ha oipeʼapaite vaʼerã pe hague oĩva hetére. Avei ojahu vaʼerã ha opytátama ipotĩ. Upéi ikatúta oike pe kampaméntope, péro ohaʼarõ jey vaʼerã 7 día oike hag̃ua hógape. 9 Ha pe 7 diahápe oñemoakã perõ vaʼerã, ojevarvea ha oipeʼapaite vaʼerã ityvyta. Upéi oipeʼapaite vaʼerã pe hague oĩva hetére, ojohéi vaʼerã ijao ha ojahu vaʼerã, ha upéi opytátama ipotĩ.

10 Ha pe 8 diahápe ogueraha vaʼerã mokõi ovecha raʼyrusu mácho isánova ha peteĩ ovecha kuña* isánova+ de un áño. Avei ogueraha vaʼerã ofrénda de semíllaramo 3 décima de efá* arína iporãva oñembojeheʼa pyréva aséitere,+ ha un cuarto rasami* aséite.+ 11 Ha pe saserdóte heʼi vaʼekue upe persónare ipotĩmaha ogueraha vaʼerã chupe ha umi iñofrénda Jehová renondépe, pe tavernákulo* entrádape. 12 Upéi pe saserdóte ojagarra vaʼerã peteĩ ovecha raʼyrusu máchova ha ojapo pe ofrénda por la kúlpa,+ ha oofrese vaʼerã avei hendive un cuarto rasami* aséite. Upe rire ombokacha vaʼerã koʼã mbaʼe ojejapoháicha pe ofrénda oñembokacháva Jehová renondépe.+ 13 Ha ojuka vaʼerã pe ovecha raʼyrusu máchova pe lugár sagrádope, pe lugár ojejukahápe jepi voi pe animál ojepurúva ojejapo hag̃ua pe ofrénda ojepaga hag̃ua umi pekádore, ha pe ofrénda ojehapýva.+ Pe ofrénda ojejapóva ojepaga hag̃ua umi pekádore pe saserdóte mbaʼe hína, upéicha avei pe ofrénda por la kúlpa.+ Upéva ningo sagradoiterei hína.+

14 Upéi pe saserdóte ojagarráta michĩmi pe animál ruguykue, ojepuru vaʼekue ojejapo hag̃ua pe ofrénda por la kúlpa ha omonaʼimi vaʼerã pe persóna oñemopotĩva nambi derécha rehe, ha avei ikuã guasu ha ipysã guasu a la derechapeguáre. 15 Pe saserdóte ojagarra vaʼerã pe un cuarto rasami* aséite+ ha oñohẽ michĩmi ipopytépe, pe a la iskierdapeguápe. 16 Upéi omyakỹ vaʼerã ikuã a la derechapegua pe aséite oĩvape ipopytépe, pe a la iskierdapeguápe, ha ohypýi vaʼerã pe yvy 7 vése Jehová renondépe. 17 Upe rire pe saserdóte omonáta michĩmi pe aséite oĩva ipopytépe pe persóna oñemopotĩva nambi derécha rehe, ha avei ikuã guasu ha ipysã guasu a la derechapeguáre. Haʼe omona vaʼerã hese pe aséite upe oñemona haguépe pe animál ruguykue, upéva ojepuru kuri ojejapo hag̃ua pe ofrénda por la kúlpa. 18 Ha pe aséite hembýva ipopytépe omoĩ vaʼerã pe persóna oñemopotĩva akãre, péicha ojapo vaʼerã pe saserdóte hesehápe ikatu hag̃uáicha oñeperdona chupe ipekádo Jehová renondépe.+

19 Pe saserdóte opresenta vaʼerã pe ofrénda ojepaga hag̃ua umi pekádore+ pe persóna oñemopotĩva rehehápe, ikatu hag̃uáicha oñeperdona chupe ipekádo ha opyta ipotĩ. Upéi ojuka vaʼerã pe animál ojepurútava ojejapo hag̃ua pe ofrénda ojehapýva. 20 Ha pe saserdóte oofrese vaʼerã pe altár ári pe ofrénda ojehapýva, ha pe ofrénda de semílla.+ Péicha ojapo vaʼerã hesehápe ikatu hag̃uáicha oñeperdona chupe ipekádo, ha haʼe opytátama ipotĩ.+

21 Péro haʼe imboriahúramo ha ndorekói ojogua hag̃ua koʼã mbaʼe, upéicharõ ogueru vaʼerã peteĩ ovecha raʼyrusu mácho ojejapo hag̃ua pe ofrénda por la kúlpa, ha ikatu hag̃uáicha ojejapo avei pe ofrénda oñembokacháva. Upéva ojejapo vaʼerã hesehápe ikatu hag̃uáicha oñeperdona chupe ipekádo. Ogueraha vaʼerã avei ofrénda de semíllaramo una décima de efá* arína iporãva oñembojeheʼa pyréva aséitere, ha un cuarto rasami* aséite. 22 Ha ikatúramo omeʼẽ, ogueraha vaʼerã avei mokõi tortóla, térã mokõi palóma raʼy. Peteĩva ojepurúta ojejapo hag̃ua pe ofrénda ojepaga hag̃ua umi pekádore, ha pe ótro ojejapo hag̃ua pe ofrénda ojehapýva.+ 23 Ha haʼe ogueraha vaʼerã koʼã mbaʼe pe saserdótepe pe 8 diahápe,+ pe tavernákulo entrádape Jehová renondépe, ojeʼe hag̃ua hese ipotĩha.+

24 Upéi pe saserdóte ojagarra vaʼerã pe ovecha raʼyrusu máchova ojepurútava ojejapo hag̃ua pe ofrénda por la kúlpa,+ ha pe un cuarto rasami* aséite. Upe rire ombokacha vaʼerã koʼã mbaʼe ojejapoháicha pe ofrénda oñembokacháva Jehová renondépe.+ 25 Ha ojukáta pe ovecha raʼyrusu máchova ojapo hag̃ua pe ofrénda por la kúlpa. Upéi pe saserdóte ojagarráta michĩmi pe animál ruguykue ha omonaʼimíta pe persóna oñemopotĩva nambi derécha rehe, ha avei ikuã guasu ha ipysã guasu a la derechapeguáre.+ 26 Pe saserdóte omoĩta michĩmi aséite ipopytépe, pe a la iskierdapeguápe.+ 27 Upéi omyakỹ vaʼerã ikuã a la derechapegua pe aséite oĩvape ipopytépe, pe a la iskierdapeguápe, ha ohypýi vaʼerã pe yvy 7 vése Jehová renondépe. 28 Upe rire pe saserdóte omonáta avei michĩmi pe aséite oĩva ipopytépe pe persóna oñemopotĩva nambi derécha rehe, ha ikuã guasu ha ipysã guasu a la derechapeguáre. Haʼe omona vaʼerã hese pe aséite upe oñemona haguépe pe animál ruguykue, upéva ojepuru kuri ojejapo hag̃ua pe ofrénda por la kúlpa. 29 Ha pe aséite hembýva ipopytépe omoĩ vaʼerã pe persóna oñemopotĩva akãre, péicha ojapo vaʼerã pe saserdóte hesehápe ikatu hag̃uáicha oñeperdona chupe ipekádo ha opyta ipotĩ Jehová renondépe.

30 Upéi, asegún la ikatu vaʼekue omeʼẽ upe persóna, pe saserdóte opresenta vaʼerã peteĩ tortóla, térã peteĩ palóma raʼy.+ 31 Peteĩva ojepurúta ojejapo hag̃ua pe ofrénda ojepaga hag̃ua umi pekádore ha pe ótro ojejapo hag̃ua pe ofrénda ojehapýva,+ ha upévandi ogueraha vaʼerã avei pe ofrénda de semílla. Pe saserdóte oipurúta koʼã mbaʼe pe persóna oñemopotĩva rehehápe, ikatu hag̃uáicha oñeperdona chupe ipekádo Jehová renondépe.+

32 Kóva hína pe léi heʼíva mbaʼépa ojapo vaʼerã peteĩ imboriahúva ha orekóva lépra, ikatu hag̃uáicha ojeʼe hese ipotĩha”.

33 Upéi Jehová heʼi Moisés ha Aarónpe: 34 “Ág̃a peike vove Canaánpe,+ pe yvy ameʼẽtavape peẽme peiko hag̃ua,+ ha ojagarráramo lépra peteĩ ógape che apermiti rupi upéva,+ 35 upéicharõ pe ogajára oho vaʼerã pe saserdóte rendápe ha heʼi vaʼerã chupe: ‘Che róga parére osẽ peteĩ máncha ha haʼete lépra’. 36 Pe saserdóte heʼi vaʼerã oñemonandi hag̃ua pe óga oho mboyve orrevisa, ani ág̃a heʼi opa mbaʼe oĩva pe ógape ikyʼaha avei. Upe rire oikéta pe saserdóte orrevisa hag̃ua pe óga. 37 Haʼe orrevisáta pe párte oĩha pe máncha, ha ojekuaáramo pe parére oĩha máncha vérde saʼyju léntova térã pytã léntova, ha haʼetévaicha oikémava pe parére, 38 upéicharõ pe saserdóte osẽ vaʼerã pe ógagui ha ombotýta pe óga 7 día.+

39 Upéi pe saserdóte oho jeýta orrevisa pe óga 7 diahápe, ha ohecháramo pe máncha okorréma hague pe óga parére, 40 upéicharõ pe saserdóte heʼi vaʼerã ojepeʼa hag̃ua umi ita orekóva pe máncha ha toñemombo mombyry pe siudágui, oñemombohápe umi mbaʼe kyʼa. 41 Upéi heʼi vaʼerã tojepeʼapaite pe rrevóke oĩva pe óga ryepýpe, ha toñemombo mombyry pe siudágui, oñemombohápe umi mbaʼe kyʼa. 42 Upéi oñemoĩ jey vaʼerã ótro ita umi ojepeʼa vaʼekue rendaguépe ha upearã ojepuru vaʼerã peteĩ méskla pyahu, ha avei ojerrevokapaite jey vaʼerã pe óga.

43 Péro osẽ jeýramo pe máncha pe óga parére ojepeʼa riréma umi ita ha pe rrevóke tuja, ha ojerrevoka jey riréma, 44 upéicharõ pe saserdóte oho vaʼerã orrevisa pe óga. Oiméramo pe máncha okorre pe óga parére, upéicharõ upe ógare oĩ hína lépra ikatúva ova.+ Upévare pe óga ikyʼa. 45 Upéicharõ pe saserdóte heʼi vaʼerã ojeity hag̃ua pe óga. Ha umi ita, umi yvyra, pe rrevóke ha imesklakue oñemombo vaʼerã mombyry pe siudágui, oñemombohápe umi mbaʼe kyʼa.+ 46 Ha umi día oñemboty aja pe óga,+ oimeraẽ oikéva upépe, opytáta ikyʼa kuarahy oike peve.+ 47 Ha oimeraẽ oikéva upe ógape oñeno térã okaru hag̃ua, ojohéi vaʼerã ijao.

48 Péro pe saserdóte ohóramo orrevisa pe óga ojerrevoka jey rire ha ohecha pe máncha nosẽveimaha, upéicharõ heʼíta pe óga ipotĩha, pórke opaitéma pe máncha. 49 Ha ikatu hag̃uáicha ojeʼe pe ógare opytamaha ipotĩ upe mbaʼe kyʼágui, haʼe ogueru vaʼerã mokõi guyraʼi, sédro rakã, ílo pytã asýva ha peteĩ máso ñana.+ 50 Haʼe ojuka vaʼerã peteĩva umi guyraʼi peteĩ mbaʼyru ojejapo vaʼekuépe ñaiʼũgui. Pe mbaʼyrúpe oĩ vaʼerã y oñeguenohẽ vaʼekue peteĩ ykua yvúgui. 51 Upéi ojagarra vaʼerã pe sédro rakã, pe ñana máso, pe ílo pytã asýva ha pe ótro guyraʼi. Koʼãva omoinge vaʼerã pe guyraʼi ruguykuépe, pe ojejuka vaʼekue pe mbaʼyru orekóvape y. Upéi ohypýi vaʼerã upévape 7 vése pe óga.+ 52 Ha haʼe oipurúta pe sédro rakã, pe ñana máso, pe ílo pytã asýva, ha pe guyraʼi ruguykue, pe ojejuka vaʼekue pe mbaʼyru orekóvape y, omopotĩ hag̃ua pe óga, ha opyta hag̃ua ipotĩ upe mbaʼe kyʼágui. 53 Upéi opoi vaʼerã pe guyraʼi oikovévagui mombyry pe siudágui oho hag̃ua pe ñúre. Péicha ojapóta pe saserdóte pe óga rehehápe ipotĩ jey hag̃ua, ha upe rire opytátama ipotĩ.

54 Kóva hína pe léi heʼíva mbaʼépa ojejapo vaʼerã osẽ jave lépra peteĩ persóna akã pire rehe térã hováre,+ 55 térã peteĩ aóre,+ térã peteĩ ógare.+ 56 Ha mbaʼépa ojejapo vaʼerã avei osẽ jave peteĩ mbaʼe iñapenóva, peteĩ kuru, térã rróncha+ 57 ikatu hag̃uáicha peikuaa mbaʼéicha javépa ikatu ojeʼe ikyʼaha térã ipotĩha peteĩ mbaʼe.+ Kóva hína pe léi oñeʼẽva lépra rehe”.+

15 Jehová osegi oñeʼẽ Moisés ha Aarónpe, ha heʼi: 2 “Peñeʼẽ umi israelítape ha peje chupekuéra: ‘Peteĩ kuimbaʼe hasýramo ha osẽ peteĩ líkido hiʼórgano sexuálgui, upéicharõ haʼe ikyʼa hína.+ 3 Haʼe ikyʼáta, tahaʼe osegíramo osẽ chugui pe líkido, térã opytáramo hyepýpe ha ndaikatuvéi okuaru.

4 Oimeraẽ tupa oñeno haguépe upe kuimbaʼe osẽvagui pe líkido, opytáta ikyʼa, ha opa mbaʼe haʼe oguapy haguépe, opytáta avei ikyʼa. 5 Oĩramo opokóva upe kuimbaʼe hasýva rupáre, ojohéi vaʼerã ijao, avei ojahu vaʼerã ha opytáta ikyʼa kuarahy oike peve.+ 6 Oimeraẽ oguapýva pe kuimbaʼe hasýva oguapy haguépe, ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 7 Oimeraẽ opokóva upe kuimbaʼe hasývare, ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 8 Ha upe kuimbaʼe hasýva ondyvúramo peteĩ hapicha ipotĩvare, upéva ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 9 Ha pe kuimbaʼe hasýva oipurúramo peteĩ mbaʼe* oguapy hag̃ua hymba ári, upéicharõ upéva opytátama avei ikyʼa. 10 Oĩramo opokóva pe ikyʼáva oguapy haguépe, opytáta ikyʼa kuarahy oike peve. Ha oimeraẽ ogueraháva koʼã mbaʼe, ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 11 Pe kuimbaʼe hasýva+ ndojepohéiriramo ha opoko peteĩ hapicháre, upe hapicha ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 12 Ha upe hasýva opokóramo peteĩ mbaʼyru ojejapo vaʼekuére ñaiʼũgui, ojejokapaite vaʼerã, ha opokóramo peteĩ mbaʼyru de madérare, ojejohéi vaʼerã ýpe.+

13 Ha pe kuimbaʼe órgano sexuálgui nosẽvéiramo pe líkido ha okuera, upéicharõ 7 día haguépe haʼe ojohéi vaʼerã ijao, avei ojahu vaʼerã y oñeguenohẽ vaʼekuépe ykua yvúgui, ha opytátama ipotĩ.+ 14 Ha pe 8 diahápe ogueraha vaʼerã mokõi tortóla térã mokõi palóma raʼy,+ ha omeʼẽ vaʼerã pe saserdótepe pe tavernákulo* entrádape, Jehová renondépe. 15 Pe saserdóte oofrese vaʼerã Ñandejárape koʼã mbaʼe. Peteĩva oipurúta ojapo hag̃ua pe ofrénda ojepaga hag̃ua umi pekádore, ha pe ótro oipurúta ojapo hag̃ua pe ofrénda ojehapýva. Péicha ojapóta pe saserdóte pe kuimbaʼe hasykatu vaʼekue rehehápe ikatu hag̃uáicha ipotĩ jey* Jehová renondépe.

16 Ha peteĩ kuimbaʼe opoíramo sémen, ojahu vaʼerã ha opytáta ikyʼa kuarahy oike peve.+ 17 Haʼe ojohéi vaʼerã oimeraẽ ao térã ótra kósa de kuéro oja hague isémen, ha koʼã mbaʼe opytáta ikyʼa kuarahy oike peve.

18 Peteĩ kuimbaʼe opoíramo sémen oreko jave rrelasión sexuál peteĩ kuña ndive, mokõivéva ojahu vaʼerã ha opytáta ikyʼa kuarahy oike peve.+

19 Peteĩ kuñáme oguejýramo iperiódo, haʼe opytáta ikyʼa 7 día.+ Ha oimeraẽ opokóva hese opytáta ikyʼa kuarahy oike peve.+ 20 Ha opytáta avei ikyʼa oimeraẽ mbaʼe oipuru vaʼekue oñeno hag̃ua térã oguapy hag̃ua oguejy aja chupe iperiódo.+ 21 Ha oimeraẽ opokóva pe kuña rupáre, ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 22 Oimeraẽ opokóva pe haʼe oguapy haguépe, ojohéi vaʼerã ijao, avei ojahu vaʼerã ha opytáta ikyʼa kuarahy oike peve. 23 Ha oimérõ pe kuña oguapy raʼe tupápe térã oimeraẽ ótra kósa ári, ha oĩramo opokóva koʼã mbaʼére, opytáta ikyʼa kuarahy oike peve.+ 24 Ha pe kuñáme oñepyrũramo oguejy iperiódo oreko jave rrelasión sexuál,+ upéicharõ pe kuimbaʼe opytáta ikyʼa 7 día. Oimeraẽ tupa oñeno haguépe pe kuimbaʼe opytáta avei ikyʼa.

25 Peteĩ kuña huguýramo heta díare,+ péro ndahaʼéi hína pe tiémpo oguejy hag̃ua chupe iperiódo,+ térã oguejy rire chupe iperiódo osegínteramo huguy heta díare, upéicharõ haʼe opytáta ikyʼa upe aja entéro, opytaháicha jepi ikyʼa oguejy aja chupe iperiódo. 26 Upéicha jave, opytáta ikyʼa oimeraẽ tupa oñeno hague, opytaháicha avei ikyʼa pe hupa haʼe oreko jave iperiódo.+ Ha oimeraẽ mbaʼe oguapy haguépe opytáta ikyʼa, opytaháicha ikyʼa avei pe hupa haʼe oreko jave iperiódo. 27 Ha oĩramo opokóva koʼã mbaʼére opytáta ikyʼa, ha ojohéi vaʼerã ijao, avei ojahu vaʼerã ha opytáta ikyʼa kuarahy oike peve.+

28 Péro opyta vove chupe pe huguy, upéicharõ 7 día haguépe opytátama ipotĩ.+ 29 Ha pe 8 diahápe ogueraha vaʼerã mokõi tortóla térã mokõi palóma raʼy,+ ha omeʼẽ pe saserdótepe pe tavernákulo entrádape.+ 30 Ha pe saserdóte oipurúta peteĩva ojapo hag̃ua pe ofrénda ojepaga hag̃ua umi pekádore, ha pe ótro oipurúta ojapo hag̃ua pe ofrénda ojehapýva. Péicha ojapóta pe saserdóte pe kuña hasykatu+ vaʼekue rehehápe ikatu hag̃uáicha ipotĩ jey* Jehová renondépe.

31 Péicha peẽ pejapo vaʼerã umi israelita ojei hag̃ua umi mbaʼe kyʼágui, ha ani hag̃ua omano hikuái omongyʼa haguére che tavernákulo, oĩva hína ijapytepekuéra.+

32 Kóva hína pe léi heʼíva mbaʼépa ojejapo vaʼerã peteĩ kuimbaʼe hasýramo ha osẽ peteĩ líkido hiʼórgano sexuálgui, térã opytáramo ikyʼa opoi haguére sémen.+ 33 Ha avei mbaʼépa ojejapo vaʼerã oguejýramo peteĩ kuñáme iperiódo,+ térã oimeraẽ persóna hasýramo ha osẽ chugui peteĩ líkido, térã huguýramo,+ térã peteĩ kuimbaʼe orekóramo rrelasión sexuál peteĩ kuña naipotĩrivandi pe léi heʼiháicha’”.

16 Jehová oñeʼẽ Moiséspe omano rire Aarón raʼykuéra, haʼekuéra ningo omano kuri oñemoag̃ui haguére Jehováre hendapeʼỹ.+ 2 Jehová heʼi Moiséspe: “Ere ne ermáno Aarónpe ndohasái vaʼerãha pe kortína+ oike hag̃ua pe Santísimope oñantoha javénte chupe.+ Haʼe ndoikéi vaʼerã pe Árka del Pákto renondépe* oikeseha órante, haʼe ndojapói vaʼerã upéicha pono omano,+ pórke che ajechaukáta hína peteĩ araípe+ pe árka tápa ári.+

3 Aarón ogueru vaʼerã koʼã mbaʼe oike mboyve pe Santísimope: peteĩ tóro raʼyrusu ojejapo hag̃ua pe ofrénda ojepaga hag̃ua umi pekádore,+ ha peteĩ ovecha mácho ojejapo hag̃ua pe ofrénda ojehapýva.+ 4 Ha omonde vaʼerã pe ao puku akuádro de líno,+ ha pe kalsonsíllo de líno+ ani hag̃ua oĩ opío. Omoĩ vaʼerã avei pe sinturón de líno,+ ha omoĩ vaʼerã avei iñakãre pe turvánte.*+ Koʼã ao ningo sagrádo hína.+ Haʼe ojahu vaʼerã+ ha upéi oñemonde.

5 Ha umi israelita omeʼẽ vaʼerã chupe mokõi kavara raʼy ojejapo hag̃ua pe ofrénda ojepaga hag̃ua umi pekádore.+ Avei peteĩ ovecha mácho ojejapo hag̃ua peteĩ ofrénda ojehapýva.

6 Upéi Aarón opresenta vaʼerã Ñandejárape pe tóro ojepurútava ojejapo hag̃ua pe ofrénda ojepaga hag̃ua umi pekádore, upéva ojapóta oñeperdona hag̃ua chupe ipekádo+ ha avei hogayguápe.

7 Upéi ogueraha vaʼerã umi mokõi kavara raʼy Jehová renondépe, pe tavernákulo* entrádape. 8 Ha Aarón osorteáta oikuaa hag̃ua mávapa umi mokõi kavara raʼýgui opytáta Jehovápe g̃uarã, ha mavaitévapa ojepurúta ogueraha hag̃ua pe puévlo pekádo.* 9 Aarón ogueraha vaʼerã pe kavara raʼy osẽ vaʼekue sorteádo+ Jehovápe g̃uarã, ha ojapo vaʼerã chugui peteĩ ofrénda ojepaga hag̃ua umi pekádore. 10 Péro pe ótro kavara ojeporavo vaʼekue ogueraha hag̃ua pe puévlo pekádo* oñepresenta vaʼerã Jehová renondépe, ikatu hag̃uáicha upéva rupive oñeperdona chupekuéra ipekádo. Upe rire oñemondo vaʼerã desiértope umi israelitakuéra pekádo reheve.+

11 Aarón ogueraha vaʼerã Ñandejára renondépe pe tóro ojepurútava ojejapo hag̃ua pe ofrénda ojepaga hag̃ua umi pekádore. Upéva oofreséta hína oñeperdona hag̃ua chupe ipekádo ha avei hogayguápe. Ha upéi ojukáta pe tóro ojepaga hag̃ua ipekádore.+

12 Upéi ojagarra vaʼerã pe insiénso ryru+ ha okarga pype tatapỹi oĩva pe altárpe+ Jehová renondépe, ha ojagarráta avei 2 púño insiénso hyakuã asýva ha oñemonguʼi porã vaʼekue.+ Ha ogueraha vaʼerã pe Santísimope, oĩva pe kortína rire.*+ 13 Ha Jehová renondépe haʼe omoĩta upe insiénso pe tatapỹi ári,+ ha pe tatatĩ osẽva chugui ojagarrapaite vaʼerã pe árka tápa,+ oĩva pe Árka del Pákto*+ ári. Haʼe ojapo vaʼerã upéva ani hag̃ua omano.

14 Upe rire ojagarra vaʼerã michĩmi pe tóro ruguy+ ha ohypýi pe árka ypýpe, éste gotyo. Haʼe ohypýi vaʼerã pe yvy 7 vése pe Árka del Pákto renondépe.*+

15 Upéi ojuka vaʼerã pe kavara ojejapo hag̃ua pe ofrénda ojepaga hag̃ua umi pekádore, péva ojapo vaʼerã pe puévlo rehehápe.+ Ha ogueraha vaʼerã pe huguykue pe Santísimope, oĩva pe kortína rire.*+ Ojapóta pe kavara ruguykuégui+ ojapo haguéicha pe tóro ruguykuégui: haʼe ohypýi vaʼerã pe árka renondépe.

16 Péicha haʼe omopotĩta Ñandejára renondépe pe lugár sagrádo umi israelita rembiapo vaikuégui ha ipekadokuéragui.+ Ojapo vaʼerã avei upéicha pe tavernákulo rehehápe, oĩva hína umi israelita apytépe, pórke haʼekuéra hembiapo vai hína.

17 Ha haʼe ojerure aja oñeperdona hag̃ua ipekádo umi israelítape pe lugár sántope, avave ndoikéi vaʼerã pe tavernákulope haʼe osẽ meve. Upépe haʼe oñemopotĩ vaʼerã ipekádogui, ha omopotĩ vaʼerã avei hogayguápe+ ha entéro umi israelítape.+

18 Upéi haʼe osẽ vaʼerã okápe oĩháme pe altár,+ ha osantifika vaʼerã upe altár oĩva hína Jehová renondépe ipotĩ hag̃ua. Upearã ojagarra vaʼerã michĩmi pe tóro ruguykue ha avei pe kavara ruguykue, ha omona vaʼerã umi vaka ratĩ joguaha oĩvare umi 4 eskínape pe altárpe. 19 Avei oipurúta michĩmi pe tuguy ohypýi hag̃ua pe altár 7 vése, péicha osantifikáta pe altár umi israelita rembiapo vaikuégui.

20 Osantifikapa+ rire pe lugár sánto, pe tavernákulo ha pe altár,+ opresenta vaʼerã Ñandejára renondépe pe kavara ndojejukái vaʼekue.+ 21 Aarón omoĩta mokõive ipo pe kavara akã ári ha omombeʼu vaʼerã umi israelita rembiapo vaikue ha ipekadokuéra. Péicha haʼetéta omoĩva pe kavara akã ári umi israelita pekádo,+ ha upéi peteĩ kuimbaʼe ojeporavóma vaʼekue ogueraha vaʼerã pe kavara pe desiértope. 22 Haʼe omondóta pe kavara pe desiértope, ogueraha hag̃ua umi israelita pekádo.+

23 Upéi Aarón oikéta pe tavernákulope ha oipeʼáta ijao de líno omonde vaʼekue oike hag̃ua pe Santísimope, ha ohejáta upépe ijao. 24 Ha ojahu vaʼerã+ pe lugár sagrádope ha omonde vaʼerã pe ótro ijao.+ Upéi osẽ vaʼerã ha ojapo pe ofrénda ojehapýva,+ upéva ojapóta hesehápe. Ha ojapóta avei pe ofrénda ojehapýva pe puévlo rehehápe.+ Péicha haʼe oñemopotĩta ipekádogui ha omopotĩta avei umi israelítape ipekádogui.+ 25 Ha pe animál ojepurúva ojejapo hag̃ua pe ofrénda ojepaga hag̃ua umi pekádore, upéva kyrakue ohapy vaʼerã pe altárpe ikatu hag̃uáicha otimbo.

26 Pe kuimbaʼe ogueraha vaʼekue pe desiértope pe kavara ojepurúva ogueraha hag̃ua pe puévlo pekádo,*+ ojohéi vaʼerã ijao ha ojahu. Ha upe rire ae ikatúta oike jey pe kampaméntope.

27 Ha pe tóro ha pe kavara ojepuru vaʼekue ojejapo hag̃ua umi ofrénda ojepaga hag̃ua umi pekádore, oñeguenohẽ vaʼerã pe kampaméntogui ha ojehapy kompletoite: pe ipirekue, pe hoʼokue ha pe hekakakue. Koʼã animál ruguykue ningo oñemoinge kuri pe Santísimope oñeperdona hag̃ua umi pekádo.+ 28 Pe ohapy vaʼekue koʼã mbaʼe ojohéi vaʼerã ijao ha ojahu, ha upe rire ae ikatúta oike jey pe kampaméntope.

29 Kóva hína peteĩ léi siémpre pekumpli vaʼerã: pe día 10 del séptimo méspe, peñembyasy* vaʼerã pene rembiapo vaikuégui, ha ndapejapói vaʼerã mbaʼeveichagua traváho,+ tahaʼe israelita térã umi extranhéro oikóva pende apytépe. 30 Upe díape peẽ peime porã jeýta Ñandejárandi,+ ha haʼe penemopotĩta. Péicha pepytáta penepotĩ pende pekádogui Jehová renondépe.+ 31 Kóva hína peteĩ sábado pepytuʼu hag̃ua, ha peẽ peñembyasy vaʼerã pene rembiapo vaikuégui.+ Péva pe léi siémpre pekumpli vaʼerã.

32 Pe saserdóte ojeporavo+ vaʼekue ha oñenombráva* súmo saserdóte+ itúa rekovia,+ ojapo vaʼerã umi sakrifísio oñeperdona hag̃ua umi pekádo, ha omonde vaʼerã umi ao de líno.+ Koʼã ao ningo sagrádo hína.+ 33 Haʼe oofrese vaʼerã umi sakrifísio ikatu hag̃uáicha ipotĩ koʼã mbaʼe Ñandejára renondépe: pe Santísimo,+ pe tavernákulo,+ pe altár,+ umi saserdóte ha enterove umi israelita.+ 34 Kóva ko léi siémpre pekumpli vaʼerã+ una ves al áño, oñeperdona hag̃ua umi israelítape entéro umi ipekádo”.+

Ha Aarón ojapo Jehová heʼi hagueichaite Moiséspe.

17 Jehová heʼi Moiséspe: 2 “Eñeʼẽ Aarónpe, itaʼyrakuérape ha entéro israelítape, ha ere chupekuéra: ‘Péicha heʼi Jehová:

3 Peteĩ kuimbaʼe israelita ojukáramo peteĩ tóro, ovecha raʼyrusu mácho, térã peteĩ kavara pe kampaméntope térã pe ñúre, 4 ha ndoguerahái Jehová tavernákulo* entrádape ojapo hag̃ua peteĩ ofrénda Jehovápe, upéicharõ upe kuimbaʼépe ojekulpáta. Haʼe oñohẽ pe tuguy hendapeʼỹ, upévare upe kuimbaʼépe ojejuka vaʼerã pende apytégui. 5 Upéicharõ, umi israelita ndojukavéima vaʼerã pe ñúre umi animál hoʼútava. Upéva rangue, haʼekuéra ogueru vaʼerã hymbakuéra pe saserdótepe omeʼẽ hag̃ua Jehovápe, pe tavernákulo entrádape. Haʼekuéra ojuka vaʼerã koʼãva ha ojapo chugui peteĩ ofrénda de paz Jehovápe g̃uarã.+ 6 Ha pe saserdóte ohypýi vaʼerã Jehová altár koʼã animál ruguykuépe, pe tavernákulo entrádape. Ha umi ikyrakue katu ohapy vaʼerã pe altárpe, ikatu hag̃uáicha otimbo ha hyakuã asy* Jehovápe g̃uarã.+ 7 Upéicharõ, haʼekuéra ndojapovéima vaʼerã sakrifísio umi demónio ojoguávape kavarápe,*+ umívape haʼekuéra oadora hína koʼág̃a.*+ Kóva hína peteĩ léi siémpre pekumpli vaʼerã, peẽ ha enterove pene familiare’.

8 Ere vaʼerã avei chupekuéra: ‘Peteĩ kuimbaʼe israelita térã peteĩ extranhéro oikóva pende apytépe, ojapóramo peteĩ ofrénda ojehapýva térã ótro sakrifísio, 9 ha ndoguerahái pe tavernákulo entrádape opresenta hag̃ua Jehovápe, upéicharõ ojejuka vaʼerã upe kuimbaʼépe.+

10 Ha peteĩ kuimbaʼe israelita térã peteĩ extranhéro oikóva pende apytépe hoʼúramo oimehaichagua tuguy,+ che arrechasáta chupe ha ojejuka vaʼerã pende apytégui. 11 Pórke umi mbaʼe oikovéva rekove* oĩ hína huguýpe, ha che haʼéma kuri pe tuguy+ oñemoĩ vaʼerãha pe altárpe,+ ikatu hag̃uáicha oñeperdona peẽme pende pekádo. Pe tuguy rupive añoite ikatu oñeperdona peẽme pende pekádo,+ pórke pe hekove* oĩ hína huguýpe. 12 Upévare haʼéma kuri enterove israelítape: “Avavete pende apytépe ndoʼúi vaʼerã tuguy, ha ni peteĩ extranhéro oikóva pende apytépe+ ndoʼúi vaʼerã avei tuguy”.+

13 Peteĩ israelita térã peteĩ extranhéro oikóva pende apytépe ohóramo omariska ha ojuka peteĩ animál saite térã peteĩ guyra ikatúva ojeʼu, upéicharõ haʼe oñohẽ vaʼerã chugui huguy+ ha ojaty. 14 Pórke umi mbaʼe oikovéva rekove* oĩ hína huguýpe, upévare che haʼe kuri umi israelítape: “Aníke peʼu mbaʼeveichagua tuguy, pórke umi mbaʼe oikovéva rekove* oĩ hína huguýpe. Oimeraẽ hoʼúva tuguy ojejuka vaʼerã”.+ 15 Peteĩ israelita térã peteĩ extranhéro hoʼúramo peteĩ animál reʼongue otopa vaʼekue, térã peteĩ animál omano vaʼekue ojukágui chupe animál salváhe,+ upéicharõ upe persóna ojohéi vaʼerã ijao ha ojahu, ha opytáta ikyʼa kuarahy oike peve.+ Upe rire ae ipotĩ jeýta. 16 Péro ndojohéiriramo ijao ha ndojahúi, upéicharõ upe persónape ojekastiga vaʼerã hembiapo vaikuére’”.+

18 Jehová osegi oñeʼẽ Moiséspe, ha heʼi: 2 “Eñeʼẽ umi israelítape ha ere chupekuéra: ‘Che hína Jehová pende Jára.+ 3 Peẽ ndapeikói vaʼerã umi egipcio oikoháicha, upe lugár peiko haguépe. Ha ndapejapói vaʼerã umi mbaʼe ojapóva umi cananeo, upe lugár che poguerahahápe hína.+ Ndapeikói vaʼerã koʼã hénte oikoháicha. 4 Peẽ pekumpli vaʼerã umi léi ameʼẽva peẽme, ha peiko vaʼerã che haʼeháicha peẽme.+ Che hína Jehová pende Jára. 5 Pekumpli vaʼerã umi léi ameʼẽva peẽme ha peiko vaʼerã che haʼeháicha peẽme, pórke entéro umi okumplíva oikovéta.+ Che hína Jehová.

6 Ni peteĩva pende apytépe ndorekói vaʼerã rrelasión sexuál ipariéntendi.+ Che hína Jehová. 7 Peẽ ndaperekói vaʼerã rrelasión sexuál pende túa térã pende sýndi. Haʼe ningo nde sy, ha ndereguerekói vaʼerã hendive rrelasión sexuál.

8 Ndereguerekói vaʼerã rrelasión sexuál nde túa rembirekóndi.+ Péicha rejapóramo remotĩ hína nde túape.

9 Ndereguerekói vaʼerã rrelasión sexuál ne ermánandi, tahaʼe nde túa rajýndi térã nde sy membykuñándi, oiméramo jepe upe ne ermána onase raʼe nde rógape térã ótra famíliape.+

10 Ndereguerekói vaʼerã rrelasión sexuál ne niétandi, tahaʼe nde raʼy rajýndi, térã nde rajy membýndi, haʼekuéra ningo oreko avei nde ruguy, ha rejapóramo péicha ndete voi reñemotĩta.

11 Ndereguerekói vaʼerã rrelasión sexuál nde túa rembireko membykuñándi, haʼe ningo nde túa rajy, upéicharõ haʼe ne ermána hína.

12 Ndereguerekói vaʼerã rrelasión sexuál nde túa ermánandi, haʼe ningo nde túa parientete hína.+

13 Ndereguerekói vaʼerã rrelasión sexuál nde sy ermánandi, haʼe ningo nde sy parientete hína.

14 Neremotĩri vaʼerã nde túa ermánope reguerekóvo rrelasión sexuál hembirekóndi. Haʼe ningo nde tia hína.+

15 Ndereguerekói vaʼerã rrelasión sexuál ne nuérandi.+ Haʼe ningo nde raʼy rembireko hína, upévare ndereguerekói vaʼerã hendive rrelasión sexuál.

16 Ndereguerekói vaʼerã rrelasión sexuál ne ermáno rembirekóndi,+ pórke péicha remotĩ hína ne ermánope.

17 Reikóramo peteĩ kuñándi, upéicharõ ndereguerekói vaʼerã rrelasión sexuál imembykuñándi ni iniétandi,+ tahaʼe imembykuña membyréndi térã imembykariaʼy rajyréndi. Umíva iparientete hína, ha opyta vaietereíta rejapóramo upéicha.

18 Nderejagarrái vaʼerã peteĩ kuñáme ha iñermánape ne rembirekorã.+ Ne rembireko oikove aja entéro, ndereguerekói vaʼerã rrelasión sexuál iñermánandi.

19 Ndereguerekói vaʼerã rrelasión sexuál peteĩ kuñándi oguejy aja chupe iperiódo.+

20 Ndereguerekói vaʼerã rrelasión sexuál nde rapicha rembirekóndi, péicha rejapóramo ndete voi reñemongyʼáta.+

21 Neremeʼẽi vaʼerã ni peteĩ nde raʼy térã nde rajy oservi* hag̃ua pe dios Mólekpe.+ Péicha rejapóramo remongyʼáta hína Ñandejára réra.+ Che hína Jehová.

22 Ndereguerekói vaʼerã rrelasión sexuál nde rapicha kuimbaʼéndi reguerekoháicha avei rrelasión sexuál peteĩ kuñándi.+ Péva peteĩ mbaʼe vai oporombojeguarúva.

23 Peteĩ kuimbaʼe ndorekói vaʼerã rrelasión sexuál peteĩ animál ndive, pórke péva peteĩ mbaʼe tieʼỹ penemongyʼáva Ñandejára renondépe. Ha peteĩ kuña ndojayvýi vaʼerã peteĩ animál renondépe oreko hag̃ua hendive rrelasión sexuál.+ Ñandejára nañandeapói vaʼekue jaiko hag̃ua upéicha.

24 Aníke pejapo koʼã mbaʼe vaiete ha péicha peju peñemongyʼa che renondépe. Pórke che amosẽta hína umi nasión peẽ pehotahápe peiko ojapo rupi koʼã mbaʼe vaiete oporombojeguarúva.+ 25 Koʼã hénte káusare ko yvy oñemongyʼa, ha che akastigáta umi hénte oikóva koʼã nasiónpe, ha oñemosẽmbáta chupekuéra upe oikohágui.+ 26 Peẽ katu pekumpli vaʼerã umi léi ameʼẽva peẽme ha pejapo vaʼerã opa mbaʼe haʼéva peẽme.+ Tahaʼe israelita térã extranhéro oikóva pende apytépe, ndojapói vaʼerã ni peteĩ umi mbaʼe oporombojeguarúva.+ 27 Pórke entéro koʼã mbaʼe oporombojeguarúva ojapo kuri umi hénte oikóva koʼã lugárpe peẽ peju mboyve,+ ha upéicha rupi pe yvy opyta ikyʼa. 28 Upéicharõ, peẽ napemongyʼái vaʼerã upe yvy ani hag̃ua peñemosẽ upégui, pórke péicha oikóta hína umi hénte oikóvare koʼã lugár peẽ pehotahápe peiko. 29 Oĩramo ojapóva peteĩ koʼã mbaʼe oporombojeguarúva, upévape ojejuka vaʼerã pende apytégui. 30 Peẽ peneñeʼẽrendu ha pejapo vaʼerã umi mbaʼe haʼéva peẽme. Avei ndapejapói vaʼerã mbaʼeveichagua mbaʼe vai ojepokuaa vaʼekue ojapo umi hénte oiko vaʼekue ko lugárpe,+ peẽ peju mboyve peiko pype. Pejapóramo koʼã mbaʼe pepytáta pendekyʼa che renondépe. Che hína Jehová pende Jára’”.

19 Jehová oñeʼẽ jey Moiséspe ha heʼi: 2 “Eñeʼẽ enterove israelítape ha ere chupekuéra: ‘Peẽ penepotĩ ha penderekoporã vaʼerã, pórke che Jehová pende Jára sánto hína.+

3 Enterove peẽ perrespeta vaʼerã pende sy ha pende túape,+ ha pemboarete vaʼerã pe sábado.+ Che hína Jehová pende Jára. 4 Ani pemombaʼeguasu umi dios fálso,+ ha ani pejapo mbaʼeveichagua dios de metál.+ Che hína Jehová pende Jára.

5 Ha pejapóramo peteĩ ofrénda de paz Jehovápe g̃uarã,+ pejapo vaʼerã upe ofrénda hekoitépe ikatu hag̃uáicha haʼe pendeguerohory.+ 6 Ko ofrénda peʼu vaʼerã ojeofreseha díape ha avei al día sigiénte, péro hembýramo gueteri pe tercer díape, ojehapypaitéma vaʼerã.+ 7 Péro peichahágui oĩramo hoʼúva pe tercer díape, Ñandejára ndoaseptamoʼãi upe ofrénda, pórke ombojeguaru chupe. 8 Upe hoʼúvape ojekastigáta upe mbaʼe vai ojapo vaʼekuére, pórke omongyʼa peteĩ mbaʼe sagrádova oñemeʼẽma vaʼekue Jehovápe. Upévare upe persóna ojejuka vaʼerã.

9 Og̃uahẽ vove pe kosécha tiémpo, ani remonoʼõmbaite umi mbaʼe reñotỹ vaʼekue, síno rehejaʼimi vaʼerã umi oĩva nde kokue rembeʼýre. Ha remonoʼõmba rire, pe hembýva* nderehovéima vaʼerã rembyaty.+ 10 Avei nerembyatýi vaʼerã umi parrál hembýva ni umi hoʼa vaʼekue ndehegui, umíva reheja vaʼerã umi imboriahúva+ ha umi extranhérope g̃uarã. Che hína Jehová pende Jára.

11 Neremondái vaʼerã,+ nereporombotavýi vaʼerã,+ ha ndereikói vaʼerã reletradea nde rapicháre. 12 Ndereipurúi vaʼerã che réra rehura rei hag̃ua,+ pórke péicha remongyʼáta nde Jára réra. Che hína Jehová nde Jára. 13 Nerembotavýi vaʼerã nde rapichápe,+ ha neremondái vaʼerã.*+ Repaga vaʼerã ne personálpe idiaitépe, ani reheja nendive ipláta al ótro día peve.+

14 Neremaldesíri vaʼerã peteĩ nde rapicha nohendúivape, ha neremoĩri vaʼerã mbaʼeve umi ohechaʼỹva renondépe oñepysanga térã hoʼa hag̃ua,+ ha rerrespeta vaʼerã Ñandejárape.+ Che hína Jehová.

15 Ndehústo vaʼerã reporohusga jave. Ani resẽ peteĩ imboriahúva favórpe imboriahu haguérente, ha ani embojerovia peteĩ irríkovape ipláta haguére.+ Hekoitépe rehusga vaʼerã nde rapichápe.

16 Ndereikói vaʼerã reñeʼẽ rei* nde rapicháre umi hénte apytépe.+ Aníkena reipeʼase nde rapichágui* hekove.*+ Che hína Jehová.

17 Ndovaléi repyta nderechaʼevéi ne ermánore nde pyʼapýpe.+ Oiméramo nde rapicha ojavy raʼe, reñemoñeʼẽ vaʼerã chupe ani hag̃ua oiko ndehegui ikómplise upe mbaʼe vai ojapo vaʼekuépe.+

18 Ndovaléi reñevenga+ nde rapicháre ni ndepyʼaro ne ermanokuérare. Rehayhu vaʼerã nde rapichápe nde voi rejehayhuháicha.+ Che hína Jehová.

19 Peẽ pekumpli vaʼerã umi léi ameʼẽva peẽme. Ndovaléi pembokrusa oñondive animál de diferénte kláse. Ani embojopara 2 kláse semílla reñotỹ hag̃ua nde kokuépe.+ Neremondéi vaʼerã peteĩ ao ojejapo vaʼekue 2 kláse ílogui.+

20 Peteĩ kuimbaʼe orekóramo rrelasión sexuál peteĩ kuñándi, ha upe kuña peteĩ eskláva omendátava ótro kuimbaʼére, péro neʼĩra ojepagapa* upe kuñáre térã noñemeʼẽiti chupe iliverta, upéicharõ ojekastiga vaʼerã mokõivévape. Péro ndojejukái vaʼerã chupekuéra, pórke pe kuñáme noñemeʼẽi gueteri iliverta. 21 Upéva oikóramo, pe kuimbaʼe ogueru vaʼerã Jehovápe peteĩ ovecha mácho pe tavernákulo* entrádape, ojapo hag̃ua peteĩ ofrénda por la kúlpa.+ 22 Pe saserdóte omeʼẽta hesehápe pe ovecha mácho upe mbaʼe vaiete ojapo vaʼekuére, ha péicha oñeperdonáta chupe ipekádo Jehová renondépe.

23 Peike vove pe yvy ameʼẽtavape peẽme, ha peñotỹ opaichagua yvyramáta hiʼáva peʼu hag̃ua, 3 áño aja ndapeʼúi vaʼerã umi hiʼakue. Umi hiʼa tenondegua ikyʼa vaʼerã peẽme g̃uarã ha ndapeʼúi vaʼerã. 24 Péro pe cuarto áñope sagrádota peẽme g̃uarã umi yva, ha vyʼápe pemeʼẽ vaʼerã Jehovápe.+ 25 Ha pe 5 añohápe hetaiterei oprodusíta peẽme, ha upe áñope ikatútama peʼu umi yva. Che hína Jehová pende Jára.

26 Ndapeʼúi vaʼerã mbaʼeveichagua soʼo huguy reheve.+

Ndovaléi pejapo adivinasión peikuaa hag̃ua pende futúro, ha ndapejapói vaʼerã avei máhia.+

27 Napemoperõi vaʼerã pene akã pe ikostádope, ha napeikytĩri vaʼerã pende várva púnta.*+

28 Ani peñekytĩmba pehechauka hag̃ua peñembyasyha peteĩ persóna omanóvare,*+ ha ndapejapói vaʼerã tatuáhe pendejehe. Che hína Jehová.

29 Ani remotĩ nde rajýpe rejapóvo chugui prostitúta,+ pórke rejapóramo upéicha pe yvy peikoha henyhẽtéta tekovaígui ha ikyʼáta.+

30 Pemboarete vaʼerã umi sábado,+ ha perrespeta vaʼerã che tavernákulo. Che hína Jehová.

31 Ani peho umi espiritísta+ rendápe ni umi adivíno+ rendápe, ha péicha peñemongyʼa ikausarekuéra. Che hína Jehová pende Jára.

32 Perrespeta vaʼerã umi iñakãrangue morotĩvape,+ ha pemombaʼe vaʼerã umi ijedávape.+ Avei perrespeta vaʼerã Ñandejárape.+ Che hína Jehová.

33 Peteĩ extranhéro oikóramo pende apytépe ndapetratavaíri vaʼerã chupe.+ 34 Peẽ petrata vaʼerã peteĩ israelítaicha pe extranhéro oikóvape pende apytépe.+ Rehayhu vaʼerã chupe nde voi rejehayhuháicha, pórke peikórõ guare Egíptope peẽ extranhéro vaʼekue avei.+ Che hína Jehová pende Jára.

35 Pemedi térã pepesa jave peteĩ mbaʼe, peẽ peneonrrádo vaʼerã.+ 36 Ndapeipurúi vaʼerã valánsa térã pésa monda. Hendaitépe pemedi vaʼerã opa mbaʼe,+ tahaʼe líkido térã isékova.* Che hína Jehová pende Jára, peneguenohẽ vaʼekue Egíptogui. 37 Upéicharõ peẽ pekumpli vaʼerã entéro umi léi ameʼẽva peẽme ha pejapo vaʼerã opa mbaʼe haʼéva peẽme.+ Che hína Jehová’”.

20 Jehová osegi oñeʼẽ Moiséspe ha heʼi: 2 “Ere vaʼerã umi israelítape: ‘Oimeraẽ israelita térã extranhéro oikóva pende apytépe omeʼẽramo itaʼýra térã itajýra Mólekpe, katuete ojejuka vaʼerã.+ Enterove umi hénte ojapi vaʼerã chupe itápe omano meve. 3 Che chepochýta upe kuimbaʼéndi ha ahundietéta chupe pende apytégui, pórke haʼe omeʼẽ peteĩ ifamília Mólekpe. Haʼe omongyʼa che lugár sagrádo+ ha omongyʼa avei che réra ipotĩetéva. 4 Umi hénte ohecháramo upe kuimbaʼe omeʼẽha peteĩ ifamília Mólekpe, péro noñepenái hese ha ndojejukái chupe,+ 5 upéicharõ che chepochýta upe kuimbaʼéndi ha hogayguándi.+ Ahundietéta upe kuimbaʼépe pende apytégui ha avei enterove omoirũvape chupe oadora hag̃ua Mólekpe.*

6 Oĩramo ohóva umi espiritísta+ rendápe térã umi adivíno+ rendápe, ha péicha naiñeʼẽrendúi chéve ha chetraisiona,* upéicharõ che chepochýta hendive ha ahundietéta chupe pende apytégui.+

7 Peẽ penepotĩ ha penderekoporã vaʼerã,+ pórke che hína Jehová pende Jára. 8 Peẽ pekumpli vaʼerã umi léi ameʼẽva peẽme, ha peiko vaʼerã che haʼeháicha peẽme.+ Che hína Jehová pende Jára, upe penemopotĩva peiko hag̃ua che puévloramo.+

9 Oimeraẽ omaldesíva itúa térã isýpe, ojejuka vaʼerã katuete.+ Upe persóna iporupiete oñekondena omano hag̃ua,* pórke omaldesi kuri itúa térã isýpe.

10 Peteĩ kuimbaʼe orekóramo rrelasión sexuál tembireko ahénondi, ojejuka vaʼerã mokõivévape: pe kuimbaʼe oporomoakãratĩ vaʼekuépe ha pe kuñáme avei.+ 11 Peteĩ kuimbaʼe orekóramo rrelasión sexuál itúa rembirekóndi, omotĩ hína itúape.+ Ojejuka vaʼerã katuete pe kuimbaʼépe ha pe itúa rembirekópe. Haʼekuéra iporupiete oñekondena omano hag̃ua.* 12 Peteĩ kuimbaʼe orekóramo rrelasión sexuál inuérandi, mokõivévape ojejuka vaʼerã katuete, pórke Ñandejára ndojapói vaʼekue yvypórape oiko hag̃ua upéicha. Haʼekuéra iporupiete oñekondena omano hag̃ua.*+

13 Peteĩ kuimbaʼe orekóramo rrelasión sexuál hapicha kuimbaʼéndi, upéicharõ mokõivéva ojapo peteĩ mbaʼe vai oporombojeguarúva.+ Mokõivévape ojejuka vaʼerã katuete, ha haʼekuéra iporupiete oñekondena omano hag̃ua.*

14 Peteĩ kuimbaʼe omendáramo peteĩ kuñáre, ha orekóramo avei rrelasión sexuál pe hembireko sýndi, ojapo hína peteĩ mbaʼe ivaietereíva.+ Pejuka ha pehapy vaʼerã pe kuimbaʼépe ha avei umi kuñáme,+ ani hag̃ua ojesegi ojejapo peteĩ mbaʼe ivaietereíva pende apytépe.

15 Oĩramo peteĩ kuimbaʼe orekóva rrelasión sexuál peteĩ animál ndive, ojejuka vaʼerã katuete upe kuimbaʼépe, ha avei pe animálpe.+ 16 Peteĩ kuña ojayvýramo peteĩ animál renondépe ha oreko hendive rrelasión sexuál,+ ojejuka vaʼerã upe kuñáme ha avei pe animálpe. Katuete ojejuka vaʼerã mokõivévape. Pe kuña ha pe kuimbaʼe orekóva rrelasión sexuál animál ndive, iporupiete oñekondena omano hag̃ua.*

17 Peteĩ kuimbaʼe orekóramo rrelasión sexuál iñermánandi, tahaʼe itúa rajýndi térã isy membykuñándi, ojapo hína peteĩ mbaʼe oporomotĩva.+ Mokõivévape ojejuka vaʼerã umi hénte renondépe. Pe kuimbaʼe ningo omotĩ iñermánape oñenóvo hendive. Haʼe opaga vaʼerã upe hembiapo vaikuére.

18 Peteĩ kuimbaʼe orekóramo rrelasión sexuál peteĩ kuñándi oguejy aja chupe iperiódo, ohechauka hína ndorrespetaiha pe tuguy ha ndahaʼeiha sagrádo chupekuéra g̃uarã.+ Mokõivévape ojejuka vaʼerã pende apytégui.

19 Ndereguerekói vaʼerã rrelasión sexuál nde sy ermánandi térã nde túa ermánandi, pórke péicha remotĩ hína peteĩ ne parientetépe.+ Mokõivéva opaga vaʼerã upe hembiapo vaikuére. 20 Peteĩ kuimbaʼe orekóva rrelasión sexuál itio rembirekóndi, omotĩ hína itiópe.+ Upe kuimbaʼe ha pe itio rembirekópe ojejuka vaʼerã hembiapo vaikuére, ha omanóta hikuái orekoʼỹre família oñondive. 21 Peteĩ kuimbaʼe orekóramo rrelasión sexuál iñermáno rembirekóndi, ojapo hína peteĩ mbaʼe ivaietereíva ha oporombojeguarúva.+ Haʼe omotĩ iñermánope. Pe kuña ha pe kuimbaʼépe ojejuka vaʼerã hembiapo vaikuére, ha omanóta hikuái orekoʼỹre família oñondive.

22 Peẽ pekumpli vaʼerã umi léi ameʼẽva peẽme ha pejapo vaʼerã opa mbaʼe haʼéva peẽme,+ upéicharõ peẽ pepytáta peiko pe yvy poguerahahápe hína ha napeñemosẽmoʼãi upégui.+ 23 Peẽ ndapeikói vaʼerã umi ótro tetãygua oikoháicha, pórke umívape che amosẽ hína pene renonderãgui ojapo haguére koʼã mbaʼe vaiete,+ ha upévare chembojeguaru hikuái.+ 24 Upévare haʼe kuri peẽme: “Peẽ pejagarráta pe yvy ha che ameʼẽta peẽme penembaʼerã. Upe yvýpe ningo osyry kamby ha eirete.+ Che hína Jehová pende Jára, upe pendeporavo vaʼekue entéro umi ótro puévlo apytégui”.+ 25 Peẽ pehechakuaa vaʼerã mbaʼeichagua animálpa ipotĩ ha mbaʼeichaguápa ikyʼa, mbaʼeichaguápa hína umi guyra ipotĩva ha umi ikyʼáva.+ Aníke peʼu umi animál, umi guyra térã oimeraẽ ótro animál che haʼe vaʼekue peẽme ikyʼaha. Pórke peʼúramo umíva, pepytáta pendekyʼa che renondépe.+ 26 Peẽ penepotĩ ha penderekoporã vaʼerã, pórke che Jehová sánto hína,+ ha poiporavo chembaʼerã entéro umi ótro puévlo apytégui.+

27 Oĩramo pende apytépe peteĩ espiritísta, térã peteĩ ojapóva adivinasión, ojejuka vaʼerã katuete chupekuéra.+ Enterove umi hénte ojapi vaʼerã chupekuéra itápe omano meve. Haʼekuéra iporupiete oñekondena omano hag̃ua’”.*

21 Jehová heʼi Moiséspe: “Eñeʼẽ umi saserdótepe, Aarón raʼykuérape, ha ere chupekuéra: ‘Ni peteĩ saserdóte noñemongyʼái vaʼerã opokóvo peteĩ israelita reʼonguére.*+ 2 Péro ikatu opoko iparientete reʼonguére ha oñembyasy hese, opytátaramo jepe ikyʼa upe haguére. Por ehémplo, omanóramo isy, itúa, itaʼýra, itajýra térã iñermáno. 3 Ha ikatu avei opoko iñermána reʼonguére ha oñembyasy hese, opytátaramo jepe ikyʼa. Ojapokuaa upéicha oiméramo upe iñermána oiko kuri hógape,* vírhen ha nomendajepéi kuri. 4 Péro haʼe noñemongyʼái vaʼerã opokóvo peteĩ kuña omendávare peteĩ kuimbaʼe ipuevlopeguáre. 5 Umi saserdóte noñemoakãperõi vaʼerã,+ ndoipeʼái vaʼerã ivárva pe hova kostádope ni noikytĩmbái vaʼerã hete.*+ 6 Haʼekuéra ipotĩ vaʼerã+ che renondépe ha nomongyʼái vaʼerã che réra,+ pórke haʼekuéra hína umi ohapýva umi ofrénda Jehová renondépe. Umíva ningo hiʼupy Ñandejárape g̃uarã, upévare ipotĩ vaʼerã hikuái.+ 7 Umi saserdóte nomendái vaʼerã peteĩ prostitútare,+ peteĩ ndahaʼevéimavare vírhen, térã peteĩ kuña ojedivorsia vaʼekuére,+ pórke haʼekuéra ipotĩ vaʼerã Ñandejára renondépe. 8 Ha enterove peẽ israelita pehechakuaa vaʼerã umi saserdóte ipotĩha,+ pórke haʼekuéra opresenta pe hiʼupy Ñandejára renondépe. Pehechakuaa vaʼerã umi saserdóte ipotĩha, pórke che Jehová sánto hína, ha che ajapo hína pendehegui peteĩ puévlo ipotĩva.+

9 Peteĩ saserdóte rajýgui oikóramo prostitúta, haʼe oñemongyʼa hína ha omotĩ avei itúape. Upe kuñáme ojejuka ha ojehapy vaʼerã.+

10 Pe oservíva de súmo saserdóte umi iñermanokuéra saserdóte apytépe, nomondorói vaʼerã ijao ni ndohejái vaʼerã iñakãrangue ichara.+ Iñakãre ningo oñeñohẽ kuri pe aséite ojepurúva ojejapo hag̃ua nombramiénto+ ha ojeporavo chupe ikatu hag̃uáicha omonde umi ao oipurúva umi saserdóte.+ 11 Haʼe noñemongyʼái vaʼerã opokóvo térã oñembyasývo peteĩ omano vaʼekuére,*+ tahaʼe jepe raʼe isy térã itúa upe omano vaʼekue. 12 Péicha jave haʼe nosẽi vaʼerã pe lugár sagrádogui ha nomongyʼái vaʼerã Ñandejára tavernákulo,+ pórke pe aséite ojepurúva ojejapo hag̃ua pe nombramiénto oñeñohẽ kuri iñakãre,+ ha oĩ avei iñakãre pe pláka de óro.* Che hína Jehová.

13 Haʼe omenda vaʼerã peteĩ kuña vírhen rehe.+ 14 Nomendái vaʼerã peteĩ viúdare, peteĩ kuña ojedivorsia vaʼekuére, peteĩ ndahaʼevéimavare vírhen, térã peteĩ prostitútare, síno oiporavo vaʼerã hembirekorã peteĩ kuña israelita vírhen. 15 Haʼe ojapo vaʼerã upéicha ani hag̃ua omotĩ ifamiliarépe umi israelitakuéra apytépe,+ pórke che hína Jehová, upe osantifikáva chupe’”.

16 Jehová osegi oñeʼẽ Moiséspe ha heʼi: 17 “Ere Aarónpe: ‘Ni peteĩ kuimbaʼe umi ifamiliare apytégui orekóva peteĩ defékto, ndaikatumoʼãi oñemoag̃ui opresenta hag̃ua pe hiʼupy Ñandejárape. Péva peteĩ léi siémpre oñekumpli vaʼerã. 18 Oĩramo peteĩ kuimbaʼe orekóva peteĩ defékto ndaikatumoʼãi oñemoag̃ui pe tavernákulore: tahaʼe peteĩ kuimbaʼe isiégova, ikarẽva,* hetyma térã ijyva pukuvéva un ládo, térã hova defektuósova. 19 Avei peteĩ kuimbaʼe opẽ vaʼekue ipy térã ipópe, 20 peteĩ ilómo kandúva, peteĩ enáno, peteĩ iprovlémava hesápe, ikarachapáva, ipire ñembyaipáva,* térã orekóva defékto haʼỹime.+ 21 Ni peteĩ Aarón familiare orekóva defékto ndaikatumoʼãi oñemoag̃ui opresenta hag̃ua Jehovápe umi ofrénda ojehapýva. Pe kuimbaʼe oreko rupi peteĩ defékto ndaikatumoʼãi opresenta Ñandejárape pe hiʼupy. 22 Péro haʼe ikatu hoʼu umi hiʼupy ojeofrese vaʼekue Ñandejárape otokáva umi saserdótepe, umíva hína umi mbaʼe sagrádova+ ha avei umi sagradoitereíva.+ 23 Péro haʼe noñemoag̃uíri vaʼerã pe kortína+ ypýpe ni pe altár oĩháme,+ pórke haʼe idefektuóso ha haʼe nomongyʼái vaʼerã che tavernákulo,+ pórke che hína Jehová, upe osantifikáva chupekuéra’”.+

24 Ha Moisés heʼi koʼã mbaʼe Aarónpe, itaʼyrakuérape ha umi israelítape.

22 Jehová oñeʼẽ jey Moiséspe ha heʼi chupe: 2 “Ere Aarón ha itaʼyrakuérape toñatende mbaʼéichapa oipuru umi mbaʼe sagrádo oguerúva umi israelita, ha osantifika vaʼekue chéve g̃uarã,+ ha ani ág̃a upevakuére omongyʼa che réra ipotĩetéva.+ Che hína Jehová. 3 Ere avei chupekuéra: ‘Peteĩva ne familiare naipotĩri jave oñembojáramo umi mbaʼe sagrádovare, umi israelita oapartávare Jehovápe g̃uarã, upéicharõ ojejuka vaʼerã chupe ha péicha ojeíta che renondégui.+ Che hína Jehová. 4 Peteĩ kuimbaʼe Aarón familiare orekóva lépra+ térã hasykatu rupi osẽva hiʼórgano sexuálgui peteĩ líkido,+ ipotĩ jey mboyve ndaikatumoʼãi hoʼu umi hiʼupy sagrádova.+ Ha ndaikatumoʼãi avei hoʼu umi hiʼupy sagrádova pe kuimbaʼe opoíramo isémen,+ térã opokóramo peteĩ hapicha oñemongyʼa vaʼekuére opoko rupi peteĩ teʼonguére.+ 5 Upéicha avei peteĩ kuimbaʼe opokóramo vichoʼi* térã animál ikyʼávare,+ térã opokóramo peteĩ kuimbaʼe ikyʼávare.+ 6 Pe persóna opokóva koʼã mbaʼére opytáta ikyʼa kuarahy oike peve, ha ndaikatumoʼãi hoʼu umi hiʼupy sagrádova. Haʼe ojahu vaʼerã,+ 7 ha oike rire pe kuarahy ipotĩ jeýta ha upéi ae ikatúta hoʼu umi hiʼupy sagrádova, pórke upéva otoka voi chupe.*+ 8 Haʼe ndoʼúi vaʼerã avei peteĩ animál reʼongue otopa vaʼekue, térã peteĩ animál omano vaʼekue ojukágui chupe ótro animál, koʼã mbaʼe hoʼúramo opytáta ikyʼa.+ Che hína Jehová.

9 Haʼekuéra ojapo vaʼerã katuete umi mbaʼe haʼéva chupekuéra, pórke ndojapóiramo upéicha opekáta hína ha ojejukáta chupekuéra omongyʼa haguére umi mbaʼe sagrádova. Che hína Jehová, upe penesantifikáva hína.

10 Ni peteĩ persóna ndahaʼéiva saserdóte* ndaikatumoʼãi avei hoʼu umi hiʼupy sagrádova,+ avei ni peteĩ extranhéro opytáva oiko peteĩ tiémpore pe saserdóte rógape térã ipersonál. 11 Péro peteĩ saserdóte ojoguáramo ijesklavorã, upéicharõ upe persóna ikatúta hoʼu umi hiʼupy sagrádova. Ha umi esklávo onase vaʼekue pe saserdóte rógape ikatúta avei hoʼu umi hiʼupy sagrádova.+ 12 Peteĩ saserdóte rajy omendáramo peteĩ ndahaʼéivare saserdóte, ndaikatumoʼãi hoʼu umi hiʼupy sagrádova ojegueru vaʼekue. 13 Péro upe saserdóte rajy opytáramo viúda térã ojedivorsia ha naimembýi, ha oho jey oiko itúa rógape yma imitãrõ guaréicha, upéicharõ ikatúta hoʼu umi hiʼupy sagrádova itúape otokáva.+ Péro ni peteĩ persóna ndahaʼéiva saserdóte* ndaikatumoʼãi hoʼu umi hiʼupy sagrádova.

14 Peteĩ kuimbaʼe oikuaaʼỹre hoʼúramo peteĩ hiʼupy sagrádova, upéicharõ haʼe omyengovia vaʼerã upéva ha omeʼẽve vaʼerã hiʼári 20 por ciento pe saserdótepe.+ 15 Umi saserdóte nomongyʼái vaʼerã umi mbaʼe sagrádova umi israelita omeʼẽ vaʼekue Jehovápe g̃uarã,+ 16 ha ani ág̃a ikulparekuéra ojekastiga pe puévlope opermiti haguére chupekuéra hoʼu umi hiʼupy sagrádova. Che hína Jehová, upe penesantifikáva hína’”.

17 Jehová osegi oñeʼẽ Moiséspe ha heʼi: 18 “Eñeʼẽ Aarónpe, itaʼyrakuérape ha entéro umi israelítape, ha ere chupekuéra: ‘Peteĩ israelita térã peteĩ extranhéro oikóva pende apytépe, opresentáramo peteĩ ofrénda ojehapýva+ okumpli hag̃ua peteĩ promésa Jehovápe, térã ojapo hag̃ua peteĩ ofrénda voluntária,+ 19 ogueraha vaʼerã peteĩ animál isánova,+ tahaʼe peteĩ tóro, ovecha raʼyrusu mácho térã kavara. Péichamante Ñandejára pendeguerohorýta. 20 Napepresentái vaʼerã peteĩ sakrifísio orekóva peteĩ defékto,+ pórke Ñandejára ndoaseptamoʼãi pendehegui ha napendeguerohorymoʼãi.

21 Ha peteĩ persóna ojapóramo peteĩ ofrénda de paz+ opaga hag̃ua peteĩ promésa Jehovápe, térã ojapo hag̃ua peteĩ ofrénda voluntária, ogueraha vaʼerã peteĩ animál isánova ivakakuéra apytégui, ijovecha, térã ikavarakuéra apytégui, ni peteĩ defékto ndorekói vaʼerã. Péichamante Ñandejára oguerohorýta chupe. 22 Ndapesakrifikái vaʼerã Jehovápe ni peteĩ animál isiégova, opẽva, oñekytĩmbáva, ikurupáva, ikarachapáva térã ipire ñembyaipáva. Koʼãichagua animál ndapeipurúi vaʼerã pejapo hag̃ua peteĩ ofrénda pe altár ári Jehovápe g̃uarã. 23 Ikatu peipuru peteĩ tóro térã peteĩ ovecha hetyma térã ijyva pukuve térã mbykyvéva un ládo pejapo hag̃ua peteĩ ofrénda voluntária. Péro peichagua animál ndojeaseptamoʼãi pendehegui pejaposéramo peteĩ ofrénda pepaga hag̃ua peteĩ promésa. 24 Ndapeofreséi vaʼerã avei Jehovápe peteĩ animál haʼỹi ñembyaíva, haʼỹi defektuósova, térã peteĩ animál ojekapa pyréva térã ojepeʼapa vaʼekue chugui haʼỹi. Pe yvy peikohápe ndapeofreséi vaʼerã koʼãichagua animál. 25 Ha peteĩ extranhéro oguerúramo koʼãichagua animál, peẽ ndapeofreséi vaʼerã Ñandejárape hiʼupýramo, pórke koʼã animál ivai ha oreko defékto. Ñandejára ndoaseptamoʼãi pendehegui ha napendeguerohorymoʼãi’”.

26 Jehová oñeʼẽ jey Moiséspe ha heʼi: 27 “Onaséramo peteĩ tóro raʼy, peteĩ ovecha mácho térã peteĩ kavara raʼy, 7 día opyta vaʼerã isýndi,+ péro pe 8 día guive ikatúma peipuru pepresenta hag̃ua chéve, ha che aaseptátama ofréndaramo. Upe día guive ikatútama peipuru pehapy ha peofrese hag̃ua Jehovápe. 28 Peteĩ tóro raʼy térã peteĩ ovecha raʼy ndapejukái vaʼerã isýndi el mísmo día.+

29 Peẽ pejapóramo peteĩ ofrénda peagradese hag̃ua Jehovápe,+ pejapo vaʼerã peipotágui haʼe pendeguerohory. 30 Upe ofrénda peʼu vaʼerã pe oñepresentaha díape. Ha ndapehejái vaʼerã mbaʼeve ikoʼẽ al ótro día peve.+ Che hína Jehová.

31 Peẽ pekumpli vaʼerã entéro umi léi ameʼẽva peẽme ha pejapo vaʼerã opa mbaʼe haʼéva peẽme.+ Che hína Jehová. 32 Napemongyʼái vaʼerã che réra ipotĩetéva,+ upéva rangue pechemombaʼeguasu vaʼerã umi israelita apytépe.+ Che hína Jehová, upe penesantifikáva,+ 33 ha upe peneguenohẽ vaʼekue Egíptogui oiko hag̃ua chehegui pende Jára.+ Che hína Jehová”.

23 Jehová osegi oñeʼẽ Moiséspe ha heʼi: 2 “Eñeʼẽ umi israelítape ha ere chupekuéra: ‘Umi fiésta Jehová heʼíva peẽme pejapo vaʼerãha,+ umíva rreunión sagráda hína ha enterovéva pemboarete vaʼerã.+ Koʼãva hína umi fiésta che aipotáva pemboarete:

3 Seis día aja ikatúta pembaʼapo, péro pe séptimo día sábado hína, ha pepytuʼu vaʼerã.+ Upe díape pejapo vaʼerã peteĩ rreunión sagrádova, ha napembaʼapói vaʼerã, pórke peiko peikohápe péva hína peteĩ sábado Jehová nde Járape g̃uarã.+

4 Umi fiésta Jehová heʼíva peẽ pemboarete vaʼerãha, umíva rreunión sagráda hína. Koʼãva hína umi fiésta pemboarete vaʼerã itiempoitépe: 5 pe día 14 del primer mes,+ kaʼaruete pytũ mboyve* ojejapo vaʼerã pe Páskua*+ Jehovápe g̃uarã.

6 Ko méspe, pe día 15-pe oñepyrũ pe Fiésta del Pan Ilevaduraʼỹva* Jehovápe g̃uarã.+ Siete día aja peʼu vaʼerã pan ilevaduraʼỹva,+ 7 ha pe primer díape pejapo vaʼerã peteĩ rreunión sagráda.+ Upe díape peẽ ndapejapói vaʼerã mbaʼeveichagua traváho pohýi. 8 Siete día aja pehapy vaʼerã peteĩ ofrénda Jehovápe g̃uarã. Ha pe séptimo díape pejapo vaʼerã peteĩ rreunión sagráda. Upe díape peẽ ndapejapói vaʼerã mbaʼeveichagua traváho pohýi’”.

9 Jehová osegi oñeʼẽ Moiséspe ha heʼi: 10 “Eñeʼẽ umi israelítape ha ere chupekuéra: ‘Ág̃a peike vove pe yvy ameʼẽtavape peẽme ha pekosecha vove umi mbaʼe peñotỹ vaʼekue, peẽ pegueraha vaʼerã pe saserdótepe un máso umi tenonderãite pekosecha vaʼekuégui.+ 11 Haʼe ombokacháta upéva Jehová renondépe ikatu hag̃uáicha haʼe pendeguerohory. Al ótro día pe sábado rire, pe saserdóte ombokacha vaʼerã koʼã mbaʼe. 12 Upe díape avei peofrese vaʼerã peteĩ ovecha raʼyrusu máchova de un áño ofrénda ojehapývaramo Jehovápe. 13 Ha pejapo hag̃ua pe ofrénda de semílla peipuru vaʼerã 2 décima de efá* arína iporãva oñembojeheʼa pyréva aséitere. Koʼã mbaʼe pehapy vaʼerã ikatu hag̃uáicha okái ha hyakuã asy* Jehovápe g̃uarã. Ha peipuru vaʼerã 1 lítro* de víno pejapo hag̃ua pe ofrénda líkida. 14 Pegueru mboyve Ñandejárape pene ofrénda, ndapeʼúi vaʼerã mbaʼeveichagua pan, ni semílla oñemaimbe pyréva térã umi semílla ipyahúva. Péva peteĩ léi siémpre pekumpli vaʼerã peẽ ha pene familiare peiko peikohápe.

15 Al ótro día pe sábado rire, upe guive pekonta vaʼerã 7 semána. Pekonta vaʼerã upe peguerahaha día guive pe un máso umi mbaʼe pekosecha vaʼekuégui. Upéva ojepuru kuri ojejapo hag̃ua pe ofrénda oñembokacháva.+ En totál pekompleta vaʼerã 7 semána. 16 Ha pe 7 semána pekompletáta al ótro día pe último sábado rire, ha ohupytýta en totál 50 día,+ ha pepresenta vaʼerã Jehovápe peteĩ ofrénda umi semílla ipyahúvagui.+ 17 Pegueru vaʼerã avei pende rógagui mokõi pan, ojejapo hag̃ua pe ofrénda oñembokacháva. Umíva peofrese vaʼerã Jehovápe umi trígo tenonderãite pekosecha vaʼekuégui.+ Koʼã pan ojejapo vaʼerã 2 décima de efá* arína iporãvagui, oñemoĩ vaʼerã pype aséite ha levadúra.+ 18 Ha umi pan ndive peofrese vaʼerã 7 ovecha raʼyrusu mácho de un áño isánova. Ha peofrese vaʼerã peteĩ tóro raʼyrusu ha mokõi ovecha mácho.+ Koʼãvagui ojejapóta peteĩ ofrénda ojehapýva Jehovápe g̃uarã. Avei peofrese vaʼerã hendive pe ofrénda de semílla ha pe ofrénda líkida, peteĩ ofrénda ojehapývaicha ha hyakuã asýva* Jehovápe g̃uarã. 19 Ha peofrese vaʼerã peteĩ kavara raʼyrusu ojejapo hag̃ua pe ofrénda ojepaga hag̃ua umi pekádore,+ ha mokõi ovecha raʼyrusu mácho de un áño, ojejapo hag̃ua pe ofrénda de paz.+ 20 Pe saserdóte ombokacháta umi mokõi ovecha raʼyrusu mácho oñepresenta vaʼekue, ha avei umi pan ojejapo pyréva umi trígo tenonderãite ojekosecha vaʼekuégui, ojapo vaʼerã upéva ojejapoháicha pe ofrénda oñembokacháva Jehová renondépe. Koʼã mbaʼe haʼekuéra omeʼẽ vaʼerã Jehovápe ha opytáta pe saserdótepe g̃uarã.+ 21 Upe díape peikuaauka vaʼerã pejapotaha peteĩ rreunión sagráda.+ Ndapejapói vaʼerã mbaʼeveichagua traváho pohýi upe díape. Ko léi siémpre pekumpli vaʼerã, peẽ ha pene familiare peiko peikohápe.

22 Og̃uahẽ vove pe kosécha tiémpo, ani pemonoʼõmbaite umi mbaʼe peñotỹ vaʼekue, síno pehejaʼimi vaʼerã umi oĩva pende kokue rembeʼýre. Ha pemonoʼõmba rire, pe hembýva* ndapehovéima vaʼerã pembyaty.+ Umíva peheja vaʼerã umi imboriahúva+ ha umi extranhérope g̃uarã.+ Che hína Jehová pende Jára’”.

23 Jehová osegi oñeʼẽ Moiséspe ha heʼi: 24 “Ere umi israelítape: ‘Pe primer díape del séptimo mes pepytuʼu vaʼerã ha pejapo peteĩ rreunión sagráda. Upe día pemboarete hag̃ua oñembopúta trompéta,+ ikatu hag̃uáicha penemanduʼa ha peñembyaty. 25 Ndaikatumoʼãi pejapo mbaʼeveichagua traváho pohýi, ha pejapo vaʼerã peteĩ ofrénda ojehapýva Jehovápe g̃uarã’”.

26 Jehová oñeʼẽ jey Moiséspe ha heʼi: 27 “Péro pe día 10 del séptimo mes hína pe Día Oñeperdonaha umi Pekádo.+ Peẽ pejapo vaʼerã peteĩ rreunión sagráda, peñembyasy*+ ha pejapo vaʼerã peteĩ ofrénda ojehapýva Jehovápe g̃uarã. 28 Peẽ ndapejapói vaʼerã mbaʼeveichagua traváho pohýi, pórke upe día ningo peteĩ día de perdón oñeperdona hag̃ua peẽme pende pekádo+ Jehová pende Jára renondépe. 29 Oimeraẽ noñembyasýiva* upe díape, ojejuka vaʼerã pende apytégui.+ 30 Ha ahundíta pende apytégui oimeraẽ ojapóva oimehaichagua traváho upe díape. 31 Peẽ ndapejapói vaʼerã mbaʼeveichagua traváho, péva peteĩ léi siémpre pekumpli vaʼerã, peẽ ha pene familiare peiko peikohápe. 32 Upéva peteĩ sábado pepytuʼu hag̃ua, ha ko méspe pe día 9 kaʼarúpe, peẽ peñembyasy vaʼerã.+ Peẽ pemboarete vaʼerã pe sábado kuarahy oike guive al ótro día kuarahy oike peve”.

33 Jehová osegi oñeʼẽ Moiséspe ha heʼi: 34 “Ere umi israelítape: ‘Pe día 15 ko séptimo méspe pejapo vaʼerã pe Fiésta de las Kaváñas* pemombaʼeguasu hag̃ua Jehovápe, ha ipuku vaʼerã 7 día.+ 35 Pejapo vaʼerã peteĩ rreunión sagráda pe primer día, ha ndapejapói vaʼerã mbaʼeveichagua traváho pohýi. 36 Siete día aja pehapy vaʼerã peteĩ ofrénda Jehovápe g̃uarã. Pe día ochohápe katu pejapo vaʼerã peteĩ rreunión sagráda,+ ha pehapy vaʼerã peteĩ ofrénda Jehovápe g̃uarã. Upéva hína peteĩ rreunión sagráda peadora hag̃ua chupe. Ndapejapói vaʼerã mbaʼeveichagua traváho pohýi.

37 Koʼãva hína umi fiésta peẽ pemboarete vaʼerã Jehovápe.+ Peẽ peikuaauka vaʼerã pejapotaha umi rreunión sagráda+ pehapy hag̃ua peteĩ ofrénda Jehovápe: pejapo vaʼerã pe ofrénda ojehapýva+ ha hendive pe ofrénda de semílla,+ ha pe ofrénda líkida+ asegún pe oñemeʼẽ vaʼerã káda día. 38 Koʼã mbaʼe pemeʼẽ vaʼerã Jehovápe ha avei umi ofrénda pemeʼẽva jepi voi sabadokue,+ umi rregálo pemeʼẽva Ñandejárape,+ umi ofrénda pekumpli hag̃ua pene promésa+ ha umi ofrénda voluntária.+ Koʼã mbaʼe peẽ pemeʼẽ vaʼerã Jehovápe. 39 Péro pe día 15 del séptimo mes, pekosechapa vove umi mbaʼe peñotỹ vaʼekue, peẽ pejapo vaʼerã peteĩ fiésta Jehovápe 7 díare.+ Pe primer día ha pe 8 diahápe pepytuʼu vaʼerã.+ 40 Pe primer díape pembyaty vaʼerã umi yva oĩva umi yvyramáta iporãvévare, palméra rogue,+ yvyramáta iporãvéva rakã, ha umi sáuse rakã oĩva umi ñu guasúre.* Ha 7 día aja pevyʼa+ vaʼerã pende Jára Jehová renondépe.+ 41 Káda áño pejapo vaʼerã ko fiésta Jehovápe g̃uarã 7 día aja.+ Péva peteĩ léi siémpre pekumpli vaʼerã peẽ ha pene familiare, ha katuete pejapo vaʼerã ko fiésta pe séptimo méspe. 42 Peiko vaʼerã umi óga kapiʼi guýpe 7 día aja.+ Entéro israelita oiko vaʼerã óga kapiʼi guýpe, 43 ikatu hag̃uáicha umi pene familiare oikuaa+ che poguenohẽ rire Egíptogui, peẽ peiko hague óga kapiʼípe.+ Che hína Jehová pende Jára’”.

44 Upéi Moisés oñeʼẽ umi israelítape umi fiésta Jehová oipotávare ojejapo.

24 Jehová osegi oñeʼẽ Moiséspe ha heʼi chupe: 2 “Ere umi israelítape togueru ndéve aséite de olíva puroite, oñemoĩ hag̃ua umi lamparaʼípe hendy hag̃ua kontinuadoite.+ 3 Káda pyhare Aarón omyendy vaʼerã umi lamparaʼi Jehová renondépe. Kuarahy oike guive pyharevete peve hendy vaʼerã kontinuadoite umi lamparaʼi, koʼãva oĩ hína pe Árka del Pákto* kortína renondépe, pe tavernákulo* ryepýpe. Ko léi siémpre pekumpli vaʼerã peẽ ha pene familiare. 4 Ha Aarón katuete omohenda porã vaʼerã umi lamparaʼi pe kandelávro+ de órope, Jehová renondépe.

5 Ha rejapo vaʼerã 12 pan argólla arína iporãvévagui. Reipuru vaʼerã 2 décima de efá* arína rejapo hag̃ua káda pan. 6 Emoĩ vaʼerã pe mesa de óro ári Jehová renondépe,+ remoĩ vaʼerã peteĩ hendápe ojoʼári 6 pan ha ijykére ótro 6 pan ojoʼári.+ 7 Emoĩ vaʼerã olívano púro umi pan oñembojoʼa vaʼekue ári ha eofrese Jehovápe, péva ningo orrepresentáta pe ofrénda kompletoite*+ ojehapýva chupe g̃uarã. 8 Káda sábado oñemoĩ ha oñemohenda vaʼerã umi pan Jehová renondépe, péicha siémpre oĩta henondépe.+ Péva peteĩ kompromíso che ajapóva umi israelítandi ha siémpre okumpli vaʼerã hikuái. 9 Koʼã pan opytáta Aarón ha itaʼyrakuérape g̃uarã,+ ha hoʼu vaʼerã hikuái peteĩ lugár sagrádope.+ Koʼãva ningo peteĩ mbaʼe sagradoitereíva ha otokáva chupekuéra umi ofrénda ojehapývagui Jehovápe g̃uarã. Péva peteĩ léi siémpre oñekumpli vaʼerã”.

10 Upéi peteĩ kuimbaʼe isy israelítava ha itúa egípciova,+ oiko vai peteĩ kuimbaʼe israelítandi pe kampaméntope. 11 Pe kuimbaʼe isy israelítava oñepyrũ oñeʼẽ vai Ñandejára rérare ha omaldesi,+ upévare ojegueraha chupe Moisés rendápe.+ Upe kuimbaʼe sy ningo héra Selomit, Dibrí rajy Dan trivugua. 12 Ha ojejagarra upe kuimbaʼépe ha oñehaʼarõ ojekuaa porã meve mbaʼépa Jehová odesidi ojejapotaha hese.+

13 Upéi Jehová heʼi Moiséspe: 14 “Penohẽ pe kampaméntogui upe oñeʼẽ vai ha omaldesi vaʼekuépe che réra. Ha entéro umi ohendu vaʼekue haʼe ojapórõ guare upéva omoĩ vaʼerã ipo pe kuimbaʼe akã ári, ha upéi enterovete umi israelita ojapi vaʼerã chupe itápe omano meve.+ 15 Ha ere umi israelítape: ‘Oimeraẽ omaldesíva Ñandejárape ojekastiga vaʼerã ipekádore. 16 Upéicharõ pe persóna oñeʼẽ vai ha omaldesíva Jehová réra katuete ojejuka vaʼerã.+ Enterovete umi israelita ojapi vaʼerã chupe itápe omano meve. Tahaʼe extranhéro térã israelita, lomímonte ojejuka vaʼerã oñeʼẽ vai haguére Ñandejára rérare.

17 Oĩramo ojukáva hapichápe, katuete ojejuka vaʼerã avei chupe.+ 18 Oimeraẽ oinupã vaietereíva peteĩ animál ahéno ha ojuka, opaga vaʼerã hese. Omeʼẽ vaʼerã peteĩ animál pe ótro animál rekovia.* 19 Oĩramo olastimáva hapichápe, ojejapo vaʼerã hese upe ojapo hagueichaite hapicháre:+ 20 omopẽramo hapichápe, oñemopẽ vaʼerã avei chupe, omohesatũramo hapichápe, oñemohesatũ vaʼerã avei chupe, oitýramo hapichágui hãi, ojeity vaʼerã avei chugui hãi. Oimeraẽ mbaʼe ojapóva hapicháre, upeichaite ojejapo vaʼerã avei hese.+ 21 Oimeraẽ oinupã vaietereíva peteĩ animál ahéno ha ojuka, opaga vaʼerã hese,+ péro oĩramo oinupã vaietereíva hapichápe ha ojuka, katuete ojejuka vaʼerã chupe.+

22 Peteĩ léinte oĩta umi israelita ha extranherokuérape g̃uarã,+ pórke che hína Jehová pende Jára’”.

23 Upémarõ Moisés heʼipaite koʼã mbaʼe umi israelítape. Ha haʼekuéra oguenohẽ pe kampaméntogui pe kuimbaʼe oñeʼẽ vai ha omaldesi vaʼekuépe Ñandejára réra, ha ojapi chupe hikuái itápe omano meve.+ Péicha umi israelita ojapo Jehová heʼi hagueichaite Moiséspe.

25 Jehová oñeʼẽ jey Moiséspe pe Sérro Sinaípe, ha heʼi chupe: 2 “Eñeʼẽ umi israelítape ha ere chupekuéra: ‘Peike vove pe yvy apromete vaʼekuépe peẽme,+ pekumpli vaʼerã Jehová léi oñeʼẽva pe sábadore ha napembaʼapói vaʼerã pende yvýre.+ 3 Seis áño pukukue reñemitỹ vaʼerã nde kokuépe ha ikatu rehakãʼo nde parralty, ha ikatúta rembyaty umi mbaʼe oprodusíva nde yvy.+ 4 Péro pe séptimo áño haʼe vaʼerã peteĩ sábado remombytuʼu hag̃ua nde yvy, pórke upéva peteĩ sábado Jehovápe g̃uarã. Nereñotỹi vaʼerã mbaʼeve nde kokuépe ha nerehakãʼói vaʼerã nde parralty. 5 Umi kóga heñóiva ijehegui rei remonoʼõmba riréma umi mbaʼe reñotỹ vaʼekue, umíva neremonoʼõvéima vaʼerã. Ha upe oprodusíva umi parrál máta noñehakãʼói vaʼekue, upéva nerembyatýi vaʼerã. Un áño kompletoite remombytuʼu vaʼerã nde kokue. 6 Péro ikatu reʼu umi kóga ha yva heñóiva ijehegui rei pe séptimo áñope. Ikatu avei hoʼu umi nde esklávo ha eskláva, ne personalkuéra ha umi extranhéro oikóva pende apytépe. 7 Ha ikatu avei hoʼu umi ne rymba ha umi animál salváhe. Entéro mbaʼe oprodusíva pe yvy ikatu peʼu.

8 Pekonta vaʼerã 7 vése 7 áño sabático, upéicharõ en totál ohupytýta 49 áño. 9 Og̃uahẽ vove pe día 10 del séptimo mes, pe Día Oñeperdonaha umi Pekádo,+ upe díape peẽ pembopu hatã porã vaʼerã pe turu, ikatu hag̃uáicha oñehendu oparupiete. 10 Pe áño 50 katu sagrádo vaʼerã peẽme g̃uarã, ha peikuaauka vaʼerã enterovépe og̃uahẽmaha pe áño oñemeʼẽtaha liverta enterovépe.+ Upe áño haʼéta hína pe Áño de Liverasión* peẽme g̃uarã, ha enterove ikatúta orrekupera jey ijyvy ha avei oho jeýta oiko ifamíliandi.+ 11 Upe áño 50 haʼéta hína peẽme g̃uarã peteĩ Áño de Liverasión. Upe áñope napeñemitỹi ha napemonoʼõi vaʼerã umi kóga osẽ vaʼekue ijehegui rei. Avei napembyatýi vaʼerã umi parrál oprodusíva pende parralty napehakãʼói vaʼekue.+ 12 Umi mbaʼe oprodusíva pe yvy ijehegui rei, umíva añoiténte ikatúta peʼu, pórke upe áño hína peteĩ Áño de Liverasión ha sagrádo vaʼerã peẽme g̃uarã.+

13 Ko Áño de Liverasiónpe enterove orrekupera jeýta ijyvy ha ohóta oiko jey upépe.+ 14 Ndapejaprovechái vaʼerã pende rapicháre pejogua térã pevendétaramo chupe peteĩ mbaʼe.+ 15 Péro pejoguátaramo pende rapichágui ijyvy, pehecha vaʼerã mboy áñopa ojapo ohasa hague pe Áño de Liverasión. Ha pe ovendétava ijyvy okalkula vaʼerã mboy áñopa hemby gueteri oñeñemitỹ ha ojekosecha hag̃ua upe yvýpe, og̃uahẽ mboyve pe áño 50.+ 16 Ofaltáramo gueteri heta áño, ikatu ovende hepyve ijyvy, péro saʼieterei hembýramo ovende varatove vaʼerã, pórke haʼe ovende jave okalkuláta hína mboy áñopa ikatúta oñeñemitỹ ha ojekosecha pe yvy. 17 Avave ndojaprovechái vaʼerã hapicháre,+ ha pehechauka vaʼerã perrespetaha pende Járape,+ pórke che hína Jehová pende Jára.+ 18 Pekumplíramo umi léi ameʼẽva peẽme ha pejapóramo opa mbaʼe haʼéva, peikóta pyʼaguapýpe.+ 19 Pe yvy katuete oprodusíta peẽme ha peẽ peʼúta peneryg̃uatãha meve umi mbaʼe oprodusíva.+ Avei peikóta pyʼaguapýpe.+

20 Péro peẽ pejéramo: “¿Mbaʼe piko roʼúta ndaikatúiramo rokosecha ni roñemitỹ pe séptimo áñope?”.+ 21 Upéicharõ peikuaáke che povendesitaha pe sexto áñope, ha pe yvy oprodusíta hetaiterei hiʼupy ohupyty hag̃uáicha peẽme 3 áño.+ 22 Ha pe áño octávope ae peñepyrũta peñemitỹ, ha peẽ pekarúta umi mbaʼe peñongatu vaʼekuégui pe áño noveno peve. Og̃uahẽ meve pe kosécha, pesegíta peʼu umi mbaʼe peñongatu vaʼekue.

23 Peẽ ndaikatúi pevende pende yvy peteĩ persónape opyta hag̃uáicha chupe opa árare,+ pórke pe yvy chembaʼe hína.+ Chéve g̃uarã ningo peẽ extranhéro ha pepytánte hína peiko peteĩ tiémpore koʼã yvýpe.+ 24 Upévare pe lugár peẽ pehotahápe peiko, oĩramo pende apytépe ovendéva ijyvy, haʼe orekóta derécho ojogua jeývo ijyvykue.

25 Peteĩ ne ermáno israelita oúramo imboriahu ha upévare ovende peteĩ párte ijyvy, upéicharõ peteĩ ipariénte serkáno ojogua ha orrekupera jey vaʼerã upe iñermáno ovende vaʼekue.+ 26 Ha oĩramo ndorekóiva ihénte ojogua hag̃ua chupe ijyvykue, péro haʼe oúramo ipláta jey ha orekóma ojogua hag̃ua ijyvykue, 27 upéicharõ haʼe okalkula vaʼerã mboy áñomapa ohasa ovende hague pe ijyvy, ha mboy koséchamapa oñeguenohẽ raʼe chugui. Ha ojapo rire upe kálkulo, haʼe orresta vaʼerã upéva pe présio ovende vaʼekuégui, ha pe hembýva opaga vaʼerã upe ojogua vaʼekuépe.+

28 Péro ndorekóiramo la pláta orrekupera jey hag̃ua ijyvy, upéicharõ opytáta pe ojogua vaʼekuépe og̃uahẽ meve pe Áño de Liverasión.+ Pe yvy oñemeʼẽ jey vaʼerã ijarakuépe+ og̃uahẽ vove pe Áño de Liverasión.

29 Peteĩ kuimbaʼe orekóramo hóga peteĩ siuda imurallapáva ryepýpe ha ovende, orekóta un áño orrekupera jey hag̃ua. Upe tiémpo oñekonta vaʼerã ojepagapa guive upe ógare. Upéicharõ un áño kompletoite orekóta tiémpo orrekupera jey hag̃ua hóga.+ 30 Péro ohasáramo un áño ha ndojerrekuperái pe óga, upéicharõ opytátama pe ojogua vaʼekuépe g̃uarã. Upe óga oĩva pe siuda imurallapáva ryepýpe opytáta imbaʼerã ha ifamiliakuérape g̃uarã opa árare, ha noñemeʼẽmoʼãi ijarakuépe og̃uahẽ vove pe Áño de Liverasión. 31 Péro umi óga oĩva okápe, ndaiporihápe murálla omongoráva upe lugár, umíva ikatúta ojerrekupera jey ohasámaramo jepe un áño, pórke umi óga ningo umi ñu reheguánte avei. Koʼã óga oñemeʼẽ jey vaʼerã ijarakuépe og̃uahẽ vove pe Áño de Liverasión.

32 Umi levita róga oĩva umi isiudakuérape,+ umíva siémpre ikatúta ojerrekupera jey ovendéramo hikuái. 33 Péro peteĩ levita ndaikatúiramo ojogua jey hóga ovende vaʼekue pe siuda oĩháme iñerénsia, upéicharõ upe óga oñemeʼẽ jey vaʼerã chupe og̃uahẽ vove pe Áño de Liverasión.+ Koʼã óga oĩva umi levitakuéra siudápe ningo oñemeʼẽma kuri chupekuéra ipropiedarã umi israelitakuéra apytépe.+ 34 Ha umi pastoty+ oĩva umi levitakuéra siuda jerére ndaikatumoʼãi oñevende, umíva opytaitéma chupekuéra g̃uarã.

35 Peteĩ ne ermáno israelita oúramo imboriahu ha ndaikatuvéi oñemantene, reipytyvõ vaʼerã chupe+ rejapotaháicha avei oikotevẽramo peteĩ extranhéro, térã peteĩ persóna opytáva oiko penendive peteĩ tiémpore.+ Péicha rejapóramo, ne ermáno israelita osegíta oikove. 36 Ani rekovra chupe interés térã rejaprovecha hese.+ Rehechauka vaʼerã rerrespeta ha rekyhyjeha Ñandejáragui,+ péicha ne ermáno osegíta oikove. 37 Reipurukáramo chupe pláta nderekovrái vaʼerã chupe interés,+ ha ani revende chupe hepyve umi hiʼupy. 38 Che hína Jehová pende Jára, peneguenohẽ vaʼekue Egíptogui+ ameʼẽ hag̃ua peẽme Canaán yvy ha oiko hag̃ua chehegui pende Jára.+

39 Peteĩ ne ermáno israelita oikóva nde róga ypýpe oúramo imboriahu ha upévare oñevende ndéve,+ upéicharõ neremombaʼapói vaʼerã chupe peteĩ esklávoicha.+ 40 Retrata vaʼerã chupe retrataháicha peteĩ ne personálpe,+ rejapoháicha avei peteĩ extranhéro oikóvare pende apytépe. Haʼe opytáta ombaʼapo nendive og̃uahẽ meve pe Áño de Liverasión. 41 Upéi haʼe ha itaʼyrakuéra osẽta ha oho jey iparientekuéra oĩháme. Haʼe oho jey vaʼerã oĩháme umi ijypykuéra propieda.+ 42 Umi israelita ningo che esklávo, aguenohẽ vaʼekue Egíptogui.+ Haʼekuéra noñevendéi vaʼerã hapichápe oñevendeháicha umi esklávo. 43 Nderejahéiri vaʼerã hese+ ha rehechauka vaʼerã rerrespetaha Ñandejárape.+ 44 Reipotáramo nde esklavorã, térã nde esklavarã, rekonsegi vaʼerã umi nasión oĩvagui nde jerére. Chuguikuéra rejogua vaʼerã nde esklavorã térã nde esklavarã. 45 Avei rejoguakuaa nde esklavorã umi extranhéro oikóvape pende apytépe,+ térã umi ifamiliare onase vaʼekue chupekuéra oiko aja pende apytépe. Chupekuéra ikatu rejogua nde esklavorã ha opytátama nembaʼerã. 46 Ha koʼã esklávo ikatúta reheja nde raʼykuérape ha opytáta chupekuéra g̃uarã peteĩ erénsiaicha opa árare. Umívape nde ikatúta remombaʼapo esklávoicha, péro umi ne ermáno israelítape neremaltratái vaʼerã ha ndereikói vaʼerã rejopy hendivekuéra.+

47 Ha peteĩ extranhéro térã peteĩ persóna opyta vaʼekue oiko penendive peteĩ tiémpore oúramo ipláta heta, ha ne ermáno israelita oikóva pende apytépe katu ou imboriahu, ha upévare oñevendémante vaʼerã chupe térã pe extranhéro familiarépe, 48 upéicharõ, oñevende rire, haʼe voi ikatúta opaga ijehe osẽ hag̃ua lívre. Avei ikatúta ojogua jey chupe peteĩva iñermáno,+ 49 itio, iprímo, peteĩ ipariénte serkáno térã oimeraẽ ihentekuéra ikatúta ojogua jey chupe.

Ha pe oñevende vaʼekue oúramo ipláta heta, upéicharõ haʼe voi ikatúta ojejogua jey.+ 50 Haʼe okalkula vaʼerã ipatrón ndive mboy áñopa ohasa haʼe oñevende hague ha mboýpa ofalta gueteri og̃uahẽ hag̃ua pe Áño de Liverasión,+ ha pe pláta ojepaga vaʼekue hese odividi vaʼerã koʼã áñore.+ Upe tiémpo aja ojepaga vaʼerã chupe la mísma kantida ojepagáva umi personálpe.+ 51 Ofaltáramo heta áño og̃uahẽ hag̃ua pe Áño de Liverasión, upéicharõ haʼe omeʼẽ jey vaʼerã pe pláta ojepagáma vaʼekue hese koʼã áñore ojejoguárõ guare chupe. Péicha haʼe ojejogua jeýta hína omeʼẽvo pe pláta umi áño ofaltávare og̃uahẽ hag̃ua pe Áño de Liverasión. 52 Ha hembýramo unos kuánto áñontema og̃uahẽ hag̃ua pe Áño de Liverasión, upéicharõ haʼe okalkula vaʼerã mboy áñopa hemby ha omeʼẽ jey vaʼerã pe pláta ojepagáma vaʼekue hese koʼã áñore, péicha haʼe ojejogua jeýta hína. 53 Umi áño ombaʼapóva ipatrón ndive siémpre ojetrata vaʼerã chupe ojetrataháicha umi personálpe, ha peẽ pehecha vaʼerã ani ipatrón otrata vai pene ermáno israelítape.+ 54 Péro haʼe ndaikatúiramo ojejogua heʼiháicha ko léi, upéicharõ haʼe osẽ vaʼerã lívre og̃uahẽ vove pe Áño de Liverasión.+ Upe áñope osẽta lívre haʼe ha itaʼyrakuéra.

55 Penemanduʼa vaʼerã umi israelita haʼeha che esklávo, ha che aguenohẽ hague chupekuéra Egíptogui.+ Che hína Jehová pende Jára’”.

26 “‘Peẽ ndapejapói vaʼerã umi dios raʼanga ndovaléiva mbaʼeverã,+ ha ndapejapói vaʼerã avei umi taʼanga.+ Ndapejapói vaʼerã penembaʼerã peteĩ kolúmna sagráda, ha ndapeguerekói vaʼerã pe yvy peikohápe mbaʼeveichagua dios raʼanga ojejapo vaʼekue itáre+ peñesũ hag̃ua henondépe,+ pórke che hína Jehová pende Jára. 2 Peẽ pemboarete vaʼerã umi sábado, ha perrespeta vaʼerã che tavernákulo. Che hína Jehová.

3 Pesegíramo peiko che haʼeháicha, pejapo ha pekumplíramo umi léi ameʼẽva peẽme,+ 4 upéicharõ amboúta peẽme ama itiempoitépe+ ha pe yvy oprodusi porãta.+ Avei hetaiterei hiʼáta umi pende yvyramáta. 5 Pende kóga hetaiterei oprodusíta, upéicha rupi pesegíta gueteri pemonoʼõ umíva og̃uahẽ meve pe tiémpo pembyaty hag̃ua umi parrál. Ha oprodusi porãitereíta rupi pende parralty, pemonoʼõta gueteri hiʼakue og̃uahẽ meve pe tiémpo peñemitỹ hag̃ua. Peẽ peʼúta hiʼupy peneryg̃uatãha meve ha peikóta pyʼaguapýpe.+ 6 Amoĩta pyʼaguapy+ pene retãme ha peñenóta peke kyhyjeʼỹme.+ Che napermitimoʼãi umi animál salváhe ojapo penderehe mbaʼeve, ha avave ndohomoʼãi peẽme espáda reheve. 7 Ha peẽ pemuñáta pene enemigokuérape ha pejukáta chupekuéra espádape. 8 Cinco kuimbaʼe omuñáta 100 pene enemigokuérape, ha 100 kuimbaʼe omuñáta 10.000 pene enemigokuérape, ha pejukáta chupekuéra espádape.+

9 Che povendesíta ha peẽ penefamília retáta,+ ha che akumplíta pe kompromíso ajapo vaʼekue penendive.+ 10 Umi mbaʼe pekosecha vaʼekue pe áño ohasa vaʼekuépe peguerekóta gueteri peʼu hag̃ua, upévare peñongatu hag̃ua umi kosécha ipyahúva tekotevẽta peguenohẽ umi itujáva. 11 Ha amoĩta che tavernákulo pende apytépe+ ha che ndapohejamoʼãi. 12 Aiméta penendive ha che haʼéta pende Jára+ ha peẽ haʼéta che puévlo.+ 13 Che hína Jehová pende Jára peneguenohẽ vaʼekue Egíptogui anivéma hag̃ua peiko esklávoramo. Che amopẽ umi júgo oĩ vaʼekue pende ári anivéma hag̃ua penetindy.

14 Péro peẽ nacherenduséiramo ha ndapejapóiramo umi mbaʼe haʼéva peẽme,+ 15 napekumplíriramo che léi,+ ha ndapeikuaaséi mbaʼeve che haʼévagui peẽme ha napekumplíriramo pe kompromíso ajapo vaʼekue penendive,+ 16 upéicharõ che ajapóta penderehe koʼã mbaʼe: pokastigáta ha pombohasa asýta, amboúta peẽme mbaʼasypoʼi ha akãnundu guasu ombyaítava pende resa ha penemokangypátava. Reiete peñemitỹta, pórke pene enemigokuéra hoʼupáta pendehegui peñotỹva guive.+ 17 Che porrechasáta ha pene enemigokuéra penerundíta.+ Umi ndaijaʼéiva penderehe pendeguereko asýta,+ ha pekyhyjégui pediparáta ndaipóriramo jepe avave pendepersegíva.+

18 Péro ni péicha napehendúiramo che haʼéva peẽme, upéicharõ pokastigáta 7 vése mas. 19 Pokastigáta anivéma hag̃ua peñemombaʼeguasu, namboumoʼãvéima peẽme ama*+ ha pende yvy hatãitereíta* ha ndoprodusimoʼãi mbaʼeve. 20 Peẽ pembaʼapo jejopy reíta ha peñemokaneʼõ reíta hese, pórke pende yvy ndoprodusimoʼãi mbaʼeve+ ha pende yvyramatakuéra ndahiʼamoʼãi.

21 Péro peẽ pesegínteramo peñemoĩ cherehe ha nacherenduséi, upéicharõ che pokastiga jeýta 7 vése mas pende pekádore. 22 Amboúta peẽme animál salváhe ha umíva ohundipáta pendehegui pene rymbakuéra,+ hoʼúta pendehegui pene família+ ha penembovýta pepytávo. Upéicha rupi avave ndoguatamoʼãi umi tapérupi.+

23 Péro upéicharõ jepe ndapejevýiramo pene rembiapo vaikuégui+ ha pesegínte peñemoĩ che kóntrape, 24 upéicharõ che porrechasáta, ha chete voi pokastiga jeýta 7 vése mas pende pekádore. 25 Amboúta pene enemígope espáda reheve pendekastiga hag̃ua, pórke napekumplíri pe kompromíso perekóva chendive.+ Pehóramo pekañy pende siudápe, amondóta peẽme mbaʼasy,+ ha pene enemigokuéra ipuʼakáta penderehe.+ 26 Ág̃a ahundipa vove pendehegui umi hiʼupy perekóva,*+ 10 kuña ombojýta pan peteĩ tatakuápente. Ha haʼekuéra opesáta michĩmi pan káda únope g̃uarã,+ ha peʼúta péro napeneryg̃uatãmoʼãi.+

27 Ha ni upéicha napehendúiramo che haʼéva peẽme ha pesegínteramo peñemoĩ cherehe, 28 upéicharõ che añemoĩ mbaretevéta pene kóntrape,+ ha chete pokastigáta 7 vése mas pende pekádore. 29 Ha upéva oiko vove, peẽ pejukáta pende raʼy ha pende rajýpe ha peʼúta hoʼokue.+ 30 Che ahundíta umi lugár yvate perekóva,+ umi altár pehapyhápe insiénso, ha amoĩta pene reʼongue umi pende dios puerkésa* ahundíva ári,+ ha añemomombyrýta pendehegui pórke peẽ pechembojeguarúta.+ 31 Ahejáta oñehundipa pende siudakuéra+ ha opytáta nandi umi lugár sagrádo. Nahetũmoʼãi avei pende sakrifísio ryakuã asy* pejapóva. 32 Chete voi ahejáta nandi pene retã,+ ha pene enemigokuéra oikóva upépe ohecharamoitereíta upéva.+ 33 Pomosarambíta umi tetãnguérare+ ha amondóta pene enemigokuérape espáda reheve pende rapykuéri.+ Pende yvy opytáta nandi+ ha oñehundipáta pende siudakuéra.

34 Peime aja prisionéroramo pene enemigokuéra yvýpe, pende yvy opytuʼúta* ha opytáta nandi. Upe aja pe yvy opytuʼúta* umi sábado ndopytuʼúi vaʼekuére.+ 35 Opyta aja entéro nandi, pe yvy opytuʼúta,* pórke peẽ peikórõ guare upépe napemombytuʼúi kuri pe yvy.*

36 Umi ndojejukái vaʼekue+ ha opytáva oiko pene enemigokuéra poguýpe, okyhyjetereíta ha ni ndorekomoʼãi esperánsa. Ha okyhyjégui hikuái, ohendu haguérente umi yvyra rogue ryapu oipeju jave yvytu, osẽtama odipara. Haʼekuéra odiparáta ha hoʼapáta oĩramoguáicha omuñáva chupekuéra espáda reheve, ndaipóriramo jepe avave opersegíva chupekuéra.+ 37 Haʼekuéra oñepysangapáta ojuehe ha hoʼapáta oñemuñarõguáicha chupekuéra espáda reheve, péro avave ndopersegíri chupekuéra. Ha ndaikatumoʼãi ipuʼaka hikuái iñenemigokuérare.+ 38 Pemanombáta umi nasión pehotahápe peiko+ ha peñehundíta pene enemigokuéra retãme. 39 Ha umi opytáva katu itujupáta iñenemigokuéra retãme+ hembiapo vaikuére ha ituakuéra rembiapo vaikue káusare.+ 40 Haʼekuéra omombeʼúta hembiapo vai hague+ ha umi mbaʼe vai ituakuéra ojapo vaʼekue. Ha orrekonoséta hikuái naiñeʼẽrendúi ha opuʼã hague cherehe.+ 41 Upéicharõ jepe che añemoĩta hesekuéra+ ha agueraháta chupekuéra umi iñenemígo yvýpe.+

Ikatu mbaʼe péicha ndaipyʼahatãvéi ha oñemomirĩ hikuái+ ha opagapa hembiapo vaikuére. 42 Ha chemanduʼáta pe kompromíso ajapo vaʼekuére Jacob ndive,+ ha pe kompromíso ajapo vaʼekuére Isaac ndive,+ ha pe kompromíso ajapo vaʼekuére Abrahán ndive+ ha chemanduʼáta pe yvy apromete vaʼekuére chupekuéra. 43 Ha ndaipóri aja avave upépe, pe yvy opytuʼúta ha péicha oñemboaretéta umi sábado.+ Haʼekuéra katu opagáta hembiapo vaikuére nokumplíri rupi che léi, ha ndoikuaaséi haguére mbaʼeve che haʼévagui chupekuéra.+ 44 Péro upéicharõ jepe, oĩ aja entéro iñenemigokuéra poguýpe, arakaʼeve ndahejaitemoʼãi chupekuéra+ ni ndajaheimoʼãi hesekuéra oñehundipa peve. Che ndajapomoʼãi upéva pórke péicha ajapóramo nakumplimoʼãi pe kompromíso+ ajapo vaʼekue hendivekuéra. Che hína Jehová pe Ijarakuéra. 45 Chemanduʼáta hesekuéra, pórke ajapo vaʼekue pe kompromíso umi ijypykuérandi.+ Chupekuéra ningo aguenohẽ vaʼekue Egíptogui umi tetãnguéra rovake,+ ha péicha oiko hag̃ua chehegui Ijarakuéra. Che hína Jehová’”.

46 Koʼãva hína umi rreglaménto, umi mbaʼe ihústova ojedesidi vaʼekue, ha umi léi Jehová omeʼẽ vaʼekue umi israelítape Moisés rupive pe Sérro Sinaípe.+

27 Jehová osegi oñeʼẽ Moiséspe ha heʼi: 2 “Eñeʼẽ umi israelítape ha ere chupekuéra: ‘Peteĩ israelita ojapóramo peteĩ promésa+ espesiál omeʼẽ hag̃ua Jehovápe peteĩ persóna repykue, 3 upéicharõ haʼe omeʼẽ vaʼerã 570 grámo* de pláta peteĩ kuimbaʼe orekóvare éntre 20 ha 60 áño. Omeʼẽ vaʼerã asegún pe kiláhe ojepurúva pe tavernákulope. 4 Péro omeʼẽtaramo peteĩ kuña repykue, upéicharõ omeʼẽ vaʼerã 342 grámo* de pláta. 5 Ha peteĩ kuimbaʼe orekóva éntre 5 ha 20 áño ovaléta 228 grámo* de pláta, ha peteĩ kuña katu 114 grámo* de pláta. 6 Ha pe kuimbaʼe orekóramo éntre un mes ha 5 áño ovaléta 57 grámo* de pláta, ha peteĩ kuña katu 34 grámo* de pláta.

7 Ha peteĩ kuimbaʼe orekómaramo 60 áño térã hetave, upéicharõ ovaléta 171 grámo* de pláta, ha peteĩ kuña katu 114 grámo* de pláta. 8 Péro imboriahuetereíramo opaga hag̃ua pe présio oñemoĩva,+ ogueraha vaʼerã pe saserdóte rendápe upe opromete vaʼekue omeʼẽtaha, ha haʼe heʼíta chupe mboýpa ovale. Pe saserdóte omoĩta pe présio asegún pe ikatútava opaga upe kuimbaʼe ojapo vaʼekue pe promésa.+

9 Péro oprometéramo omeʼẽtaha peteĩ animál ikatúva ojeofrese Jehovápe, upéva oñemboykétama Jehovápe g̃uarã, tahaʼe haʼéva upe oñemeʼẽtava. 10 Pe oofrese vaʼekue ndaikatumoʼãvéima okambia upe animál, tahaʼe peteĩ iporãvévare térã ivaivévare. Péro peichahágui okambiáramo ótro animál rehe, upéicharõ mokõivéva oñemboykéta ha opytátama Ñandejárape g̃uarã, pe primeroite omeʼẽ vaʼekue ha pe oguerúva okambia hag̃ua. 11 Péro haʼéramo peteĩ animál ikyʼáva+ ha ndaikatúiva ojeofrese Jehovápe, upéicharõ ogueraha vaʼerã upe animál pe saserdóte renondépe. 12 Ha ohecha rire pe saserdóte heʼíta mboýpa ovale, asegún iporã térã ivai pe animál. Ha pe présio omoĩva pe saserdóte, upéva ovaléta pe animál. 13 Péro haʼe ojoguase jeýramo pe omeʼẽ vaʼekue, upéicharõ omeʼẽ vaʼerã hese pe hepykue ha hiʼári 20 por ciento.+

14 Peteĩ kuimbaʼe omeʼẽtaramo hóga Jehovápe, pe saserdóte heʼíta mboýpa ovale, asegún iporã térã ivai. Ha pe présio omoĩva pe saserdóte, upéva ovaléta upe óga.+ 15 Péro haʼe ojoguase jeýramo, upéicharõ omeʼẽ vaʼerã hese pe hepykue ha hiʼári 20 por ciento, ha péicha opyta jeýtama imbaʼerã upe óga.

16 Peteĩ kuimbaʼe omeʼẽtaramo Jehovápe peteĩ párte ikokuégui, pe saserdóte heʼíta mboýpa ovale, asegún mboy kantida de semíllapa ojepurúta oñeñemitỹ hag̃ua pype: ojepurútaramo 1 homer* seváda, pe kokue ovaléta 570 grámo* de pláta. 17 Omeʼẽramo ikokue pe Áño de Liverasiónpe,+ upéicharõ pe kokue omantenéta pe présio oñemoĩ vaʼekue. 18 Ha omeʼẽramo pe Áño de Liverasión riréma, pe saserdóte okalkula vaʼerã mboýpa ovale asegún mboy áñopa ofalta og̃uahẽ hag̃ua pe Áño de Liverasión. Asegún upéva omboguejy vaʼerã pe kokue présio.+ 19 Péro haʼe ojoguase jeýramo pe kokue, upéicharõ omeʼẽ vaʼerã hese pe hepykue ha hiʼári 20 por ciento, ha péicha opyta jeýtama imbaʼerã. 20 Ha haʼe ndaikatúiramo ojogua jey pe kokue ha oñevende ótro kuimbaʼépe, upéicharõ ndaikatumoʼãvéima ojejogua jey. 21 Ha og̃uahẽvo pe Áño de Liverasión, pe kokue oñemboykétama Jehovápe g̃uarã oñemeʼẽmarõguáicha chupe. Upe kokue opytáta umi saserdótepe g̃uarã.+

22 Peteĩ kuimbaʼe omeʼẽramo Jehovápe peteĩ yvy ndahaʼéiva iñerensiakue, síno peteĩ ojogua pyréva,+ 23 upéicharõ pe saserdóte okalkula vaʼerã mboýpa ovale asegún mboy áñopa ofalta og̃uahẽ hag̃ua pe Áño de Liverasión. Ha pe kuimbaʼe opaga vaʼerã upe díape voi pe présio oñemoĩva.+ Péva peteĩ mbaʼe sagrádova Jehovápe g̃uarã. 24 Ha og̃uahẽ vove pe Áño de Liverasión, upe yvy opyta jeýta pe ijára teetépe.+

25 Umi présio oñemoĩ vaʼerã asegún pe kiláhe ojepurúva pe tavernákulope. Pe siclo ojepurúva oreko vaʼerã 20 guerá.*

26 Avave ndoofreséi vaʼerã Ñandejárape umi animál ypykue, pórke umi primeroite onaséva Jehová mbaʼéma voi.+ Tahaʼe peteĩ tóro térã peteĩ ovecha, umíva Jehová mbaʼénte voi hína.+ 27 Péro oĩramo oipotáva peteĩ animál ypykue umi naipotĩriva apytégui, upéicharõ pe kuimbaʼe ikatu opaga hese ha ojogua imbaʼerã, asegún pe présio omoĩ vaʼekue hese pe saserdóte. Omeʼẽ vaʼerã hese pe hepykue ha hiʼári 20 por ciento.+ Péro ndaikatúiramo ojogua, oñevendéta asegún pe présio oñemoĩ vaʼekue hese.

28 Peteĩ kuimbaʼe omeʼẽramo Jehovápe peteĩ mbaʼe pára siémpre, upe mbaʼe ndaikatumoʼãi oñevende ni ojejogua jey, tahaʼe peteĩ persóna, animál térã yvy. Entéro mbaʼe oñemeʼẽva Jehovápe, sagradoiterei hína.+ 29 Avei ni peteĩ persóna oñekondena vaʼekue ojejuka hag̃ua ndaikatumoʼãi ojesalva.*+ Katuete ojejuka vaʼerã.+

30 Entéro mbaʼe oprodusívagui pe yvy, 10 por ciento*+ Jehová mbaʼe hína, tahaʼe kokuépe guare térã umi yva. Ko mbaʼe sagrádo hína Jehovápe g̃uarã. 31 Peteĩ kuimbaʼe ojoguase jeýramo pe 10 por ciento omeʼẽ vaʼekue, upéicharõ omeʼẽ vaʼerã hese pe hepykue ha hiʼári 20 por ciento. 32 Ha entéro umi tóro, vaka, ovecha térã kavarakuéra apytégui, omeʼẽ vaʼerã 10 por ciento. Pe pastór okonta vaʼerã umi animál,* ha peteĩ de káda 10 ohasáva ivastón guýrupi oaparta* vaʼerã Jehovápe g̃uarã. 33 Natekotevẽi orrevisa iporãpa térãpa ivai, ha nokambiái vaʼerã. Péro peichahágui okambiáramo ótro animál rehe, upéicharõ mokõivéva ojeapartátama* Ñandejárape g̃uarã, pe primeroite omeʼẽ vaʼekue ha pe oguerúva okambia hag̃ua.+ Umi animál ndaikatumoʼãvéima ojejogua jey’”.

34 Koʼãva hína umi léi Jehová omeʼẽ vaʼekue umi israelítape Moisés rupive pe Sérro Sinaípe.+