MBAʼÉPA HEʼI LA BIBLIA
¿Mbaʼépa heʼi la Biblia umi huégore?
Oĩ algúno opensáva umi huégo oñeganahápe pláta haʼeha peteĩ diversión reínte, ótro katu heʼi umíva haʼeha peteĩ vísio ipeligrósova.
¿Oĩ porãpa japara huegohápe?
OJEʼÉVA JEPI
Heta persóna oimoʼã umi huégo ikatuhápe ñagana pláta ndoperhudikaiha avavépe, okumplíma guive la heʼíva umi léi. Oĩ voi algúno huégo pe goviérno oapojáva, ha peteĩ párte pe pláta oñembyatývagui ojepuru oñepytyvõ hag̃ua umi héntepe.
MBAʼÉPA HEʼI LA BIBLIA
La Bíbliape noñeñeʼẽi espesífikamente koʼãichagua huégore. Péro si omeʼẽ ñandéve konsého ñanepytyvõtava jaikuaa hag̃ua mbaʼépa Ñandejára opensa umívare.
Umi ohugávape g̃uarã koʼãichagua mbaʼe iñimportanteterei ogana heta pláta, upéva operhudikátaramo jepe umi ótrope. Ha upéva ndojoguerahái la Jesús heʼi vaʼekuére: “Peñatende porãkena siémpre ha ani peipota potave” (Lucas 12:15). Legálmente umi huégo omokyreʼỹ la héntepe oipota potave hag̃ua. Umi emprésa ojededikáva umi huégope heʼi voi ikatuha oñegana hetaiterei pláta, péro haʼekuéra ndeʼiriete saʼietereiha la posivilida oñegana hag̃ua upéva, pórke oipota umi hénte oaposta heta pláta umi huegohápe. Umi huégo ningo noipytyvõi umi héntepe oñekontenta hag̃ua la orekóvare, síno omokyreʼỹ chupekuéra irrikose hag̃ua ombaʼapoʼỹre.
Umi ohugáva koʼã huégo ningo ijehénte opensa, pórke haʼekuéra oganase hína pe pláta umi ótro operdéva. Péro la Biblia heʼíva katu idiferénte, upépe heʼi: “Káda uno jasegi vaʼerã jajapo pe ideprovéchotava ñande rapichápe, ha ani ñandévente ou porãtava” (1 Corintios 10:24). Umi 10 Mandamiénto apytépe oĩ voi peteĩ heʼíva: ‘Ani reipota nembaʼerã [...] mbaʼeve orekóva nde rapicha’ (Éxodo 20:17). Péro peteĩ hugadór oganasetereíva ohaʼarõ voi umi ótro operde, opyta hag̃ua imbaʼerã la pláta operde vaʼekue pe hapicha.
La Biblia heʼi porã ñandéve ani hag̃ua jaguerovia pe suérte ikatuha ñanepytyvõ oho porã hag̃ua ñandéve. Yma Israélpe oĩ vaʼekue algúno ndojeroviáiva Ñandejárare ha oñepyrũ oadora “pe dios de la suértepe”. ¿Péro mbaʼépa Ñandejára opensa raʼe la ojapóvare hikuái? Haʼe heʼi vaʼekue: “Peẽ pesegínte pejapo ivaíva che renondépe ha pedesidi pejapo la chéve ndachegustáiva” (Isaías 65:11, 12).
Oĩ ningo añete umi país oipurúva peteĩ párte pe pláta oñembyatýva umi huégope oipytyvõ hag̃ua la héntepe, opaga hag̃ua pe edukasión ha omehora hag̃ua pe ekonomía. Péro la ojepuru lája pe pláta ndeʼiséi oĩ porã hague mbaʼéichapa oñekonsegi kuri upéva, pórke upéva oñekonsegi kuri umi huégo rupive. Ha jahecha haguéicha umi huégo omokyreʼỹ la héntepe oipota potave hag̃ua, opensa hag̃ua ijehénte ha orekose hag̃ua heta mbaʼe ojapoʼỹre mbaʼeve.
‘Ani reipota nembaʼerã [...] mbaʼeve orekóva nde rapicha” (Éxodo 20:17).
¿Mbaʼéichapa ikatu ñandeperhudika umi huégo?
MBAʼÉPA HEʼI LA BIBLIA
La Biblia heʼi porã: “Umi ojedesidímava ipláta hetataha, hoʼa ñuhãme, peteĩ lásope ha oiko heta vyrorei ha deséo oporoperhudikáva rapykuéri, ha upéva ogueru chupekuéra heta sufrimiénto ha oñehundiete hikuái” (1 Timoteo 6:9). Majórmente umi oparáva huegohápe, ojapo upéva noñekontentáigui la orekóvare ha oipota potavégui pe pláta. Péro upéva ningo ipeligrosoiterei, upévare la Biblia heʼi porã ñamboykete hag̃ua koʼãichagua deséo vai (Efesios 5:3).
La Biblia heʼi avei pe platarayhu ogueruha “opaichagua mbaʼe vai”. Ha epara jave umi huegohápe ikatu hína eñepyrũ ndeplatarayhu, pórke haʼetévaicha la upéicha ifasiletereíva ekonsegi hag̃ua pe pláta. Algúno oipotaitereígui pe pláta, upévantema voi oreko iñakãme ha upéicha rupi ojepyʼapyháre oiko ha sapyʼánte oñemomombyry Ñandejáragui. Upévare voi la Biblia heʼi umi hoʼáva koʼãichagua ñuhãme ‘oikeha opaichagua akã rasýpe ha heta ohasa asyha’ (1 Timoteo 6:10).
Amáske peteĩ persóna oipota potave la kósa, noñekontentái umi mbaʼe orekóvare ha ndovyʼái. Eclesiastés 5:10 heʼi voi: “Peteĩ persóna ohayhúva pe pláta, núnka noñekontentamoʼãi pe plátare, ni pe ohayhúva umi rrikésa ndovyʼamoʼãi pe oganávare”.
Hetaiterei persóna oñenvisiaite voi pe huégore térã pe apuéstare. Peteĩ rrepórte ohechauka Estados Unídospente voi oĩha millones de persóna orekóva upe vísio.
La Biblia ohechauka peteĩ persóna oipota potavéva la kósa ikatuha hína “ipláta primerorã, péro upéi umi mbaʼe orekóva ndaideprovechomoʼãi chupe” (Proverbios 20:21). Umi oñenvisiáva pe huégore ikatu hína oike peteĩ déuda tuichávape ha operdepa la orekóva, inklúso iñamigokuéra, itraváho ha ifamíliape jepe. Jasegíramo umi konsého bíblico, jajeíta heta akã rasýgui ha javyʼáta.
“Umi ojedesidímava ipláta hetataha, hoʼa ñuhãme, peteĩ lásope ha oiko heta vyrorei ha deséo oporoperhudikáva rapykuéri, ha upéva ogueru chupekuéra heta sufrimiénto ha oñehundiete hikuái” (1 Timoteo 6:9).