Ñandejára Rréino rupive “oĩta pyʼaguapy opa ára g̃uarã”

Koʼẽrõitéma Ñandejára Rréino osolusionambaitéta umi provléma ha jaikótama vyʼápe ha pyʼaguapýpe. Salmo 72:7-pe la Biblia heʼi voi ‘oĩtaha pyʼaguapy opa ára g̃uarã’ ko yvy ape ári. ¿Péro arakaʼépa oñepyrũta ogoverna Ñandejára Rréino? ¿Mbaʼéichapa oikóta upéva? ¿Mbaʼe iporãvapa ikatu rehupyty Ñandejára Rréino rupive?

¿ARAKAʼÉPA OÚTA ÑANDEJÁRA RRÉINO?

La Biblia heʼíma vaʼekue voi mbaʼe mbaʼépa oikóta japilla hag̃ua Ñandejára Rréino ou potaitemaha. Umíva apytépe heʼi ko múndo tuichakuére oĩtaha gérra, ñembyahýi, mbaʼasy, terremóto ha la hénte katu iñañavéta (Mateo 24:3, 7, 12; Lucas 21:11; Apocalipsis 6:2-8).

Ótra profesía heʼi avei: “Péro eikuaáke umi ára pahápe pe situasión ijetuʼúta ha ipeligrósota. Pórke umi hénte ojepyʼapýta ijehénte, iplatarayhúta, [...], naiñeʼẽrendumoʼãi ituakuérape, imalagradesídota, ombotavýta hapichápe, ndohayhumoʼãi ihéntepe, ndoikoporãsemoʼãi avavéndi, oñeʼẽ reíta ótrore, ndojejokokuaamoʼãi, isalváheta, ndaijaʼemoʼãi mbaʼeve iporãvare, [...] ijorgullósota, ojapóta chupekuéra ogustávante ohayhu rangue Ñandejárape” (2 Timoteo 3:1-4). Siémprente voi oĩva persóna peichagua, péro koʼág̃a hetaitereive.

Koʼã profesía oñepyrũ kuri oñekumpli 1914 guive. Oĩ voi istoriadór, polítiko ha eskritór heʼíva ko múndo okambiaite hague upe áño guive. Por ehémplo pe istoriadór danés Peter Munch oskrivi vaʼekue: “Pe gérra oiko vaʼekue áño 1914-pe okambiaite ko múndo. Iporãitéhagui la situasión, [...] oñepyrũ ivaipaite. Oiko hetaiterei sarambi, la hénte ojapo hetaiterei mbaʼe vai, ndochaʼevéi ojuehe ha ndaikatuvéi ojeiko trankílo”.

Péro ndahaʼéi avei la ivaipaitéva entéro mbaʼe. Heʼiháicha peteĩ ñeʼẽnga: “Amáske ivai, iporã ag̃ui”. Umi mbaʼe vaiete oikóva hína koʼág̃a, ohechaukánte Ñandejára Rréino koʼẽrõitéma oñepyrũtaha ogoverna ko yvy. Jesús omombeʼu vaʼekue avei peteĩ mbaʼe iporãitereíva oikotaha koʼã ára pahápe. Mateo 24:14-pe haʼe heʼi: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin”.

Upe notísia porã ore testígo de Jehová romombeʼu hína la héntepe. Pe rrevísta ikonosidovéva rorekóva héra voi péicha: “Ñemañaha. Oanunsia Jehová Goviérno”. Upe rrevístape haimete siémpre oñeñeʼẽ umi mbaʼe porã Ñandejára ojapótavare ñanderehehápe ha ñane planéta rehehápe.

¿MBAʼÉICHAPA ÑANDEJÁRA RRÉINO OÑEPYRŨTA OGOVERNA?

Jahechamína 4 mbaʼe iñimportánteva oikótava:

1. Ñandejára Rréino nopermitimoʼãi umi polítiko oĩva ko múndope oñentremete igoviérnore.

2. Umi polítiko osegiséta omanda ha oñemoĩta hikuái Ñandejára goviérnore, péro péicha ojapóvo ohechaukáta ivyroitereiha hikuái (Salmo 2:2-9).

3. Ñandejára Rréino ohundíta umi goviérno oĩvape koʼág̃a, pórke koʼãva osegiséta omanda (Daniel 2:44; Apocalipsis 19:17-21). Upe gérra oikótavape la Biblia ohenói Armagedón (Apocalipsis 16:14, 16).

4. Umi oñemoĩva Ñandejára Rréino poguýpe, nomanomoʼãi pe Armagedónpe ha ikatúta oiko pára siémpre pe múndo pyahúpe. La Biblia heʼi ojesalvataha peteĩ aty guasu, oséa hetaiterei persóna oĩta pe múndo pyahúpe (Apocalipsis 7:9, 10, 13, 14).

¿MBAʼE IPORÃVAPA IKATU REHUPYTY ÑANDEJÁRA RRÉINO RUPIVE?

Jaiko hag̃ua Ñandejára Rréino poguýpe, ñaaprende raẽ vaʼerã heta mbaʼe. Jesús oñemboʼérõ guare Ñandejárape heʼi vaʼekue voi: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue” (Juan 17:3).

Hetaiterei mbaʼépe ikatu ñanepytyvõ jaikuaa porãramo Ñandejárape. Primero, jajeroviavéta hese. Jajeroviavévo hese, ñaĩvéta segúro Ñandejára Rréino oexistiha ha koʼẽrõitéma ogovernataha (Hebreos 11:1). Ha segundo, ñanepytyvõ jahayhuve hag̃ua Ñandejárape ha ñande rapichápe. Amedída ke jahayhuve Ñandejárape, ifasilvéma ñaneñeʼẽrendu hag̃ua chupe, ha jahayhúvo ñande rapichápe katu ifasilvétama ñandéve jajapo hag̃ua la Jesús heʼi vaʼekue: “Entéro mbaʼe peẽ peipotáva pende rapichakuéra ojapo penderehehápe, peẽ pejapo vaʼerã avei hesehapekuéra” (Lucas 6:31).

Peteĩ túaicha ñande Kreadór oipota iporãvante ñandéve g̃uarã. Haʼe ningo oipota javyʼa, jadisfruta ha jareko pe ‘jeikove añetetéva’ (1 Timoteo 6:19). La hénte ningo koʼág̃arupi ndovyʼavéi, síno oñehaʼãnte oaguanta ha oikomíntema hikuái. ¿Mbaʼéichapa ikatu javyʼa añete? Ehechamína umi mbaʼe porãite Ñandejára Rréino ojapótava.