Umi murálla oĩva Jericópe

MBAʼÉRE piko hoʼa koʼã murálla oĩva Jericópe? Haʼete ku hoʼavaʼekue hiʼári peteĩ vómba guasu. Péro umi tiémpope ndaiporivaʼekue vómba, térã kañón. Kóva ótro milágro Jehová ojapovaʼekue! Jahechami mbaʼéichapa oikorakaʼe upéva.

Ehendumi mbaʼépa heʼi Jehová Josuépe: ‘Nde ha umi oñorairõva nendive pejere pe siudáre. Pejere hese seis día aja, una vés káda día. Pegueraha pe árka pákto rehegua. Siete saserdóte ohovaʼerã pe árka renondépe ha ombopuvaʼerã ituru.

‘Pe siete día haguépe pejerevaʼerã siete vése pe siudáre. Upe rire pembopu are porã umi turu, ha enterove pesapukái hatã peñorairõtarõguáicha. Ha umi murálla hoʼapáta!’.

Josué ha pe puévlo ojapo Jehová heʼivaʼekue. Oguata aja hikuái, enterove okirirĩmba. Umi turu ha iguatakuéra ryapu añoite oñehendu. Oiméne okyhyjeparakaʼe umi iñenemigokuéra oĩva Jericópe. Rehechápa pe pióla pytã osaingóva pe ventánagui? Máva róga ventánapa upéva? Upeichaite, Rahab ojapo umi mokõi espía heʼihaguéicha chupe. Ifamiliakuéra oĩmbaite pe kotýpe hendive ha oñatendejoa.

Upe rire, siete día haguépe, ha siete vése ojere rire pe siudáre, ombopu hikuái umi turu, osapukái umi soldadokuéra, ha umi murálla hoʼapa. Josué heʼi: ‘Pejuka umi hénte ha pehapypaite pe siuda, péro umi pláta, óro, kóvre ha iérro peheja tavernákulope g̃uarã’.

Umi mokõi espíape, Josué heʼi: ‘Peguenohẽ hógagui Rahab ha ifamiliakuérape’. Haʼekuéra ojesalva oprometehaguéicha umi espía.