Romeʼẽ ndéve ore maitei rory ko Eskuéla Jaiporukuaa Hag̃ua la Bíbliape

KO Eskuéla Jaiporukuaa Hag̃ua la Biblia ojejapóma mas de cien mil kongregasiónpe ha oipytyvõ hetaiterei tapichápe oparupiete ko yvy ape ári. Káda semána haʼekuéra oñembokatupyryve ohóvo ko eskuéla rupive. Ijapytepekuéra oĩ umi oñepyrũ ramóva, péro oĩ avei umi heta áñorema ohóva ko eskuélape. Tahaʼe haʼéva pe lugár reikohápe, nde avei ikatu reaprovecha ko enseñánsa. Opagaʼỹre mbaʼevete, opaichagua persóna, tahaʼe ijedáva, imitãva, iñarandúva térã ilápi mbykýva, oñembokatupyry hína ko eskuéla rupive.

Ko eskuéla oñepyrũ testígo de Jehová kongregasionkuérape áño 1943-pe. ¿Mbaʼépa ojehupytyse ko eskuéla rupive? Pe lívro Curso en el Ministerio Teocrático [Course in Theocratic Ministry, páh. 4] omombeʼu maerãpa ojejapo ko eskuéla: “Oñembokatupyry hag̃ua umi ‘oservívape Ñandejárape’, umi ohendúva Ñandejára Ñeʼẽ ha ojeroviáva hese. Ikatu hag̃uáicha ‘ikatupyryve oporomboʼe hag̃ua’ [...] ha péicha oĩta preparádo oñeʼẽ hag̃ua hentekuéra renondépe omombeʼúvo pe esperánsa oguerekóva”. Ko eskuéla nokambiái, koʼág̃a peve oĩ upearã.

Ñandejára rupive ñande ikatu ñañeʼẽ, ¿mbaʼéichapa jaiporu vaʼerã ko rregálo porãite omeʼẽva ñandéve Jehová? La Biblia heʼi: “Opa mbaʼe oikovéva... tomombaʼeguasu Jehovápe” (Sal. 150:6). Jajapóramo upéicha ñambopyʼarory ñande Ru yvagapeguápe, ha jahechauka jaagradeseha chupe ñanderayhu rupi ha imbaʼeporã haguére ñanendive. La Bíbliape ñanemokyreʼỹ voi ‘akóinte ñambotuicha hag̃ua Ñandejárape. Jaiporu ñande juru jaikuaauka hag̃ua héra opavave renondépe’ (Heb. 13:15). Hiʼãite oréve poipytyvõ pemombaʼeguasu hag̃ua Jehovápe, ha peiporu upearã pe arandu haʼe omeʼẽva peẽme, upévare romeʼẽ peẽme ore maitei rory ko Eskuéla Jaiporukuaa Hag̃ua la Bíbliape.

Ko eskuéla nepytyvõta relee porã hag̃ua en púvliko, rejapo hag̃ua diskúrso ha reporomboʼe porã hag̃ua, péro ndahaʼéi upéva añónte. Nepytyvõta avei relee porã hag̃ua, rehendukuaa, restudia ha reheka hag̃ua informasión. Ikatúta avei rehesaʼỹijo ha remohenda porã umi informasión retopáva, reñemongeta ha rembohovái porãta umi oñeporandúva ndéve, ha avei reskrivikuaáta kárta, peteĩ téma rehesaʼỹijóva, térã ótra kósa reikotevẽva. Umi asignasión, komentário ha diskúrso ojejapóva ko eskuélape, oñemopyenda la Biblia ha umi puvlikasionkuérape. Rentende porãvévo rehóvo pe añetegua oĩva Ñandejára Ñeʼẽme ikatúta repensa ñande Apohare opensaháicha, ha upéva nepytyvõta opa mbaʼépe nde rekovépe. Peteĩ mboʼehára katupyry hérava William Lyon Phelps, ohechakuaa ideprovechoitereiha la Biblia, oñepyrũvo pe síglo 20, haʼe oskrivi: “Enterovéva umi oikuaa porãva la Biblia ikatu jaʼe hesekuéra añetehápe iñaranduha. [...] Che apensa, pe arandu jahupytýva la Biblia rupive jaikeʼỹre universidápe, ovaleveha peteĩ título ikatúvagui jahupyty pe universidápe”.

Eaprovecha porãkena ko eskuéla

Reaprovecha porã hag̃ua ko Eskuéla Jaiporukuaa Hag̃ua la Biblia, nde voi reñehaʼãmbaite vaʼerã. Apóstol Pablo omokyreʼỹ vaʼekue Timotéope heʼívo: “Ejepyʼamongeta koʼã mbaʼére, ha eñemeʼẽmbaite umíva rehehápe; péicha opavave ohechakuaáta reñakãrapuʼãha rehóvo” (1 Tim. 4:15). ¿Mbaʼéichapa nde avei ikatu resegi ko konsého?

Eñehaʼã eho meme rreunionhápe káda semána, ha ejapókena opa ikatúva reiporu porã hag̃ua ko lívro: Eñembokatupyrýke Eskuéla Jaiporukuaa Hag̃ua la Biblia Rupive. Emoĩ nde réra nde lívrore páhina únope, ha siémpre egueraha reho jave pe Eskuéla Jaiporukuaa Hag̃ua la Bíbliape. Ani nderesarái ko lívro ikatuha reiporu restudia jave neañoháme. Relee jave iporãta remarkáramo umi párte iñimportantevéva retopáva ha ideprovéchotava ndéve. Káda páhina oguereko voi tuicha lugár reskrivi hag̃ua, upépe remoĩkuaa umi mbaʼe iñimportánteva retopáva ha ikatútava reiporu.

Rejeprepara jave ko eskuelarã, ani nderesarái la Biblia haʼeha hína pe lívro iñimportantevéva ojestudiáva ko eskuélape. Upévare iporãta remotenondéramo pe prográma oñemoĩva ojelee hag̃ua la Biblia káda semána. Tuicha avei nepytyvõta releéramo umi informasión ojeporútava rreunionhápe upe semánape.

Eñehaʼãkena epartisipa meme oĩ jave umi párte ikatuhápe oñekomenta, upéva tuicha nepytyvõta nemanduʼa hag̃ua umi mbaʼe rehendu vaʼekuére ha rejapo hag̃ua upe reaprendéva.

Ko eskuélape nde ikatúta rejapo diskúrso ha demostrasión, eaprovechapaitékena umi oportunida nembokatupyrýtava reñeʼẽ ha remboʼe porã hag̃ua. Pe eskuéla omoakãva omeʼẽta jepi ndéve konsého nepytyvõtava, ehendúkena ha esegi umi konsého remehora hag̃ua, ikatu voi reanota nde lívrope umi suherénsia. Oimérõ heta áñorema reime ko eskuélape lomímonte reikotevẽ konsého, upévare ehendúkena umi konsého oñemeʼẽva ndéve mborayhúpe ha oñemopyendáva la Bíbliape. Umíva ningo tuicha nepytyvõta reñakãrapuʼã hag̃ua. Enterovénte ñaikotevẽ ótro ñanepytyvõ, pórke ñande ndajahechakuaái heta mbaʼe ñandejehe (Prov. 1:5).

¿Mbaʼépa rejapokuaa pyaʼeve reñakãrapuʼã hag̃ua? Upearã ndete reñehaʼã vaʼerã. Por ehémplo restudiáramo umi informasión ojeporútava rreunionhápe pe semánape, ikatúta reñekuaveʼẽ rejapo hag̃ua peteĩ rrempláso, oĩramo ofaltáva. Péicha pyaʼe ndevalevéta. Eñatende porãkena avei umi ótro ojapo jave ipárte, pórke enterove ikatu ñaaprende ojuehegui.

Ikatúma guive, estudia ko lívro neañoháme. Rehesaʼỹijo porã rire umi quince párte oĩva tenondeve, ehasa pe párte héravape: “Asignasión nepytyvõtava reporomboʼe ha rejapokuaa hag̃ua diskúrso”, oñepyrũva páhina 78-pe. Restudiávo káda leksión, ejapo avei umi taréa oĩva upépe, ha upéi eñehaʼã esegi umi suherénsia repredika ha reporomboʼe jave. Péicha pyaʼeve ndekatupyryvéta rejapo hag̃ua diskúrso ha remboʼe hag̃ua Ñandejára Ñeʼẽ.

Ko eskuéla nepytyvõta remombaʼeguasu hag̃ua Jehovápe hekoitépe, péva hína pe iñimportantevéva ikatúva jajapo ñande rekovépe. ¿Mbaʼérepa? Haʼe ningo ñande Apohare ha ñande jaikove ñambotuicha hag̃ua chupe. Pe Eskuéla Jaiporukuaa Hag̃ua la Biblia nepytyvõta remombaʼeguasu hag̃ua Jehovápe haʼe omereseháicha. Umi mbaʼe reaprendéva ideprovechoiterei, pórke nemboʼéta repensakuaa ha reiko hag̃ua hekoitépe, avei repredika porã hag̃ua pe añetegua ijojahaʼỹva oĩva Ñandejára Ñeʼẽme (Apoc. 4:11).