Eiporu porã pe tiémpo oñemeʼẽva ndéve ha ani rehasapa nde óra

AÑETEHÁPE ningo iñimportánte ojejapo porã káda párte rreunionhápe, péro ñañatende porã vaʼerã avei ani jahasapa ñane tiémpo. Oñemoĩ voi peteĩ óra oñepyrũ ha opa hag̃ua umi rreunión, ha ikatu hag̃uáicha opa oraitépe, entéro orekóva párte orrespeta vaʼerã pe tiémpo oñemeʼẽva chupe.

Ymave umi hénte ndojepyʼapyguasúi vaʼekue la órare, upéicha rupi la Bíbliape oñeñeʼẽ jave pe tiémpore ndeʼíri mbaʼe oraitépa, síno heʼínte “las nuéverupi” térã “las cuátrorupi” (Mat. 20:3-6; Juan 1:39). Ha heta lugárpe koʼag̃aite peve umi hénte ndojepokuaái oiko órare.

Jepe ñande jaikohárupi umi hénte ndojepokuaái og̃uahẽ órape térã ñande voi ñane última óra, enterove ñañehaʼã vaʼerã ñakambia. ¿Mbaʼérepa iñimportantete upéva? Pórke umi rreuniónpe oĩ jepi heta párte ha káda uno orrespeta vaʼerã pe tiémpo oñemeʼẽva chupe. La Biblia heʼi voi ñandéve: “Opa mbaʼe tojejapo hekopete ha hendaitépe” (1 Cor. 14:40).

Mbaʼépa rejapo vaʼerã pono rehasapa la ne tiémpo. Tekotevẽterei rejeprepara porã. Oĩ diskursánte péicha péichante ojepreparáva ha upéi ohasapa la hiʼóra, oiméne ojeroviaiterei ijehe térã ojeprepara última oraitépe. Remombaʼe vaʼerã umi asignasión oñemeʼẽva ndéve ha ejeprepara porã, péicha nderehasapamoʼãi pe tiémpo oñemeʼẽva ndéve.

¿Mbaʼéicha ikatu rejeprepara otokáramo ndéve lektúra? Primeroite errepasa leksión 4 al 7 oĩva ko lívrope, upépe oñeñeʼẽ mbaʼéichapa relee syryry vaʼerã, umi páusare, ha mbaʼéichapa rerresalta vaʼerã umi palávra ha idéa iñimportantevéva. Upe rire elee en vos álta ha eñehaʼã esegi umi suherénsia oñemeʼẽva umi leksiónpe. Ekontrola ne tiémpo. ¿Tekotevẽpa reñeʼẽ pyaʼeve pono rehasapa la ne tiémpo? Upéicharõ elee pyaʼeve oĩháme umi idéa sekundária, péro repausa vaʼerã ha eñeʼẽ trankilove rerresalta hag̃ua umi idéa iñimportánteva. Eñensaja heta vése, péicha ikatútama relee syryry ha ndahasymoʼãi ndéve rekontrola hag̃ua ne tiémpo.

¿Mbaʼéicha ikatu rejeprepara otokáramo ndéve diskúrso? Reiporútaramo peteĩ voského ani remoĩ hetaiterei detálle ha rembopukueterei. Ani repensa avei reskrivíramo palávra por palávra nerevandeamoʼãiha la ne tiémpo. Leksión 25-pe oñemyesakãma mbaʼépa iporãve rejapo. Ereko enkuénta koʼã suherénsia: 1) Reheka vaʼerã informasión ohóva ne témare, péro ani hetaiterei. 2) Eñehaʼã nemanduʼa umi idéa prinsipál rehe péro ani rememorisa umi fráse kompletoite. 3) Emarka nde voskéhope mboy minútopepa rejapóta káda seksión. Ikatu avei remarka mboy minútopa ohasáma vaʼerã rehupytývo peteĩ subtítulo. 4) Rejeprepara jave rehecháma vaʼerã mbaʼe informasiónpa remboykéta, sapyʼa rei rejatrasáramo peteĩ pártepe. 5) Epraktika nde diskúrso.

Iñimportanteterei reñensaja porã, ha rejapokuévo ekontrola mboy minútopepa rejapo káda seksión. Epraktika heta vése rehechakuaa peve nderehasamoʼãiha pe tiémpo oñemeʼẽva ndéve. Ani remoingese hetaiterei informasión nde diskúrsope, ikuentave hína remohembyʼimíramo ne tiémpo, pórke remeʼẽ vove nde párte ikatu hína ipukuve ha rehasaʼimi pe tiémpo repraktika vaʼekuégui.

Mbaʼéichapa redividi vaʼerã ne tiémpo. Ani hag̃ua rehasapa nde óra iñimportánte avei redividi porã pe tiémpo oñemeʼẽva ndéve. Jahecha haguéicha leksión 38-pe natekotevẽi ipukueterei ne introduksión, remohembyve vaʼerã ne tiémpo remyesakã hag̃ua umi púnto prinsipál. Péro ani ipukueterei avei ha nahembyvéima ndéve rejapo porã hag̃ua ne konklusión, ojehechauka haguéicha leksión 39-pe.

Ojekuaáta ndekatupyryha rehóvo reñehaʼãmbaitéramo rekontrola porã la ne tiémpo ha nerevandeái pe óra oñemoĩ vaʼekue ndéve. Avei péicha rehechaukáta rerrespetaha umi ermáno orekótavape párte nde rire ha pe kongregasión kompletoitépe.