Kapítulo 17

Jahechauka ñande rogapýpe jahayhuha Ñandejárape

1. Mbaʼéichapa oiko koʼág̃a heta ména ha tembireko ojapohaguére Ñandejára Ñeʼẽ heʼíva?

JEHOVÁ, omoñepyrũvaʼekue pe ñemenda, ohechauka porã Iñeʼẽme mbaʼéichapa oikovaʼerã familiakuéra. Heta ojapóva Iñeʼẽme heʼiháicha oiko vyʼápe iména térã hembirekóndi. Umíva apytépe oĩ oikovaʼekue oñondive omendaʼỹre ha upéi ohechakuaa iporãveha ojapo pe léi heʼiháicha. Ha umi omoakãratĩvaʼekue iména térã hembirekópe katu ndojapovéima upéva. Oĩ avei kuimbaʼe oinupã ha ojaʼo vai vaʼekue hembireko ha itaʼyrakuérape, ha koʼág̃a hory ha imbaʼerechakuaáva.

2. Mbaʼépa ohechakuaavaʼerã kristianokuéra oiko porã hag̃ua hogapýpe?

² Kristianokuéra oiko porã hag̃ua hogapýpe ohechakuaavaʼerã nomendaiha sapyʼami g̃uarãnte, okumplivaʼerãha umi rresponsavilida ogapypegua ha otrata porã vaʼerãha hogayguápe (Efesios 5:33-6:4). Añete, ikatu jaikuaa mbaʼépa heʼi Ñandejára Ñeʼẽ koʼã mbaʼére, péro upéva ndeʼiséi jajapomaha upépe heʼiháicha. Ñande ndajajoguaséi umi Jesús okondenavaʼekuépe ndojapoihaguére Ñandejára heʼíva. Haʼekuéra ojavyvaʼekue oimoʼãvo ikatuha jaʼénte jaserviha Ñandejárape (Mateo 15:4-9). Ñande ndajaʼeséi jahayhuha Ñandejárape, péro ndajaikói upéicha ñande rogapýpe. Upéva rangue, ñande jahechaukase añetehápe jahayhuha Ñandejárape, ha upéva ogueru “heta mbaʼe iporãva” (1 Timoteo 5:4; 6:6; 2 Timoteo 3:5).

Arakaʼe pevépa oĩvaʼerã oñondive umi omendáva?

3. a) Mbaʼépa ojapo oikóvo heta kuña ha kuimbaʼe omendáva, péro mbaʼépa jajapovaʼerã ñande? b) Embohovái la Biblia rupive umi porandu oĩva pe párrafo rire.

³ Koʼág̃a rupi umi omendáva ndojoayhuvéi ymaguaréicha. Oĩ kuimbaʼe ha kuña ojopoíva heta áño rire omenda jey hag̃ua. Avei, pyʼỹi ñahendu umi omendaramóva jepe ojopoiha omenda riremínte. Oĩramo jepe ojapóva upéicha, ñande jajapose Jehová oipotáva. Upévare, ñahesaʼỹijomi umi porandu ha téysto oĩva ko párrafo rire, jahecha hag̃ua arakaʼe pevépa Ñandejára Ñeʼẽ heʼi oĩvaʼerãha oñondive ména ha tembireko.

Mboy tiémpopa oikovaʼerã oñondive umi omendáva? (Marcos 10:6-9; Romanos 7:2, 3.)

Mbaʼére añoitépa Ñandejára oheja ojedivorsia ména ha tembireko omenda jey hag̃ua? (Mateo 5:31, 32; 19:3-9.)

Mbaʼéichapa ohecha Jehová ndojejapóiramo pe divórsio Iñeʼẽme heʼiháicha? (Malaquías 2:13-16.)

Omokyreʼỹpa Ñandejára Ñeʼẽ umi omendávape ojopoi hag̃ua ha upéicha omyatyrõ iprovléma? (1 Corintios 7:10-13.)

Mbaʼéicha javépa ikatu ojueja umi omendáva? (Salmo 11:5; Lucas 4:8; 1 Timoteo 5:8.)

4. Mbaʼépa ojapovaʼerã umi omendáva oiko are hag̃ua oñondive?

⁴ Mbaʼépa ojapovaʼerã ovyʼa ha oiko are hag̃ua oñondive umi omendáva? Upearã iñimportánte mokõivéva ityarõ raẽ omenda hag̃ua, ha avei iporã oñemoĩ hikuái peteĩ ñeʼẽme umi mbaʼe ohupytysévape, ha ikatuvaʼerã oñomongeta porã oñondive. Péro iñimportanteve ohayhu Jehovápe, omombaʼe Iñeʼẽ ha oiporu upéva omyatyrõ hag̃ua umi provléma (Salmo 119:97, 104; 2 Timoteo 3:16, 17). Umichagua tapicha ndeʼimoʼãi ojejopy jave, ikatuha ojopoínte térã ojedivorsiánte hikuái. Ndoiporumoʼãi iména térã hembireko defékto ndojaposéigui pe oñehaʼarõva chugui. Upéva rangue, ombohováita umi provléma ha ohecháta mbaʼéichapa ikatu omyatyrõ.

5. a) Mbaʼéichapa ohechauka ijerovia Jehováre umi omendáva? b) Ojehasa asýramo jepe, mbaʼe venefísiopa ogueru jajapo Ñandejára ojeruréva?

⁵ Satanás heʼi jahasa asy vove, jahejataha Ñandejárape (Job 2:4, 5; Proverbios 27:11). Péro opavave nunga oservíva Jehovápe, ombohasa asýramo jepe chupe iména térã hembireko, nomboykéi pe oñehaʼarõva umi omendávagui. Haʼekuéra osegi ojapo Jehová heʼíva ha oipotáva (Mateo 5:37). Upéicha rupi, umíva apytépe oĩ ohecháva mbaʼéichapa iména térã hembireko oservi avei Jehovápe, heta tiémpo ombohasa asy rire chupe (1 Pedro 3:1, 2). Ha umi iména térã hembireko ndoserviséiva Ñandejárape térã ohejáva chupekuéra kristiano haguére, oikuaa avei ohupytytaha heta mbaʼe porã ohechaukágui hogapýpe ohayhuha Ñandejárape (Salmo 55:22; 145:16).

Ména ha tembireko ojapovaʼerã ojejeruréva chuguikuéra

6. Ovyʼa hag̃ua ména ha tembireko, mbaʼépa omombaʼevaʼerã hikuái?

⁶ Ovyʼa hag̃ua ména ha tembireko, ndahaʼéi oikontevaʼerã oñondive; mokõive omombaʼevaʼerã avei mbaʼéichapa Jehová oipota oñemoakã pe ogapy. Ojejapóramo upéicha, pe ogapýpe ojeiko porã ha ojevyʼáta. Jahechakuaa 1 Corintios 11:3-pe [BNP] heʼíva: “Opáichavo, aipota peikuaa Cristoha pe kuimbaʼe akã, ha pe kuimbaʼe pe kuña akã, [...] Ñandejaraháicha Cristo akã”.

7. Mbaʼéichapa oñemoakãvaʼerã ogapy?

⁷ Mbaʼére raẽpa oñeʼẽ pe téysto? Upeichaite, kuimbaʼépe omoakã Cristo ha upévare oñemoĩvaʼerã ipoguýpe. Upéva heʼise pe ména omoakãvaʼerãha hogapy Jesús ojapohaguéicha. Cristo oñemoĩ Jehová poguýpe, ohayhu ipyʼaite guive kongregasiónpe ha omoĩ chupe oikotevẽva (1 Timoteo 3:15). Omeʼẽ voi katu “hese hekove”. Avei, noñemombaʼeguasúi ha imbaʼerechakuaa, ‘ipyʼaporã ha ndaijejapói’. Umi oñemoĩva ipoguýpe tuicha ipiroʼýta. Umi kuimbaʼe orekóva upéicha ifamíliape ohechauka oñemoĩha Cristo poguýpe. Ha ojapóvo upéicha, hembireko ovyʼa ha oñeñandu porã oipytyvõ hag̃ua iménape ha oñemoĩ ipoguýpe (Efesios 5:25-33; Mateo 11:28, 29; Proverbios 31:10, 28).

8. a) Mbaʼérepa ikatu ñaimoʼã peteĩ famíliape ndaikatuiha ojeporu la Biblia heʼíva? b) Mbaʼépa jajapovaʼerã jahasáramo koʼã mbaʼére?

⁸ Upéicharõ jepe, ikatu oĩ provléma ogapýpe. Oñepyrũ mboyve peteĩ tapicha ojapo Ñandejára heʼíva, ikatu hogapýpe avave nomombaʼéi pe autorida. Upeichahápe, jajerure porãvéramo jepe ikatu ndojejapói pe jaʼéva. Jaikuaaháicha, la Biblia heʼi ani hag̃ua ‘ñandepochy vai térã ñandepochy rei, ani jasapukái térã ñaneñeʼẽ guasu ojupe’ (Efesios 4:31). Péro haʼetéramo upéicha añoite oñentendétava pe jaʼéva, mbaʼépa ikatu jajapo? Jesús ndoikoivaʼekue oporoamenasa ha ijuru guasu heta ojapoháicha, upéva rangue ojerovia Itúvare (1 Pedro 2:22, 23). Upévare, ijetuʼu jave ñande rogapýpe, jahechauka jahayhuha Ñandejárape jajerurévo chupe tañanepytyvõ, jajaporangue ko múndope ojejapoháicha (Proverbios 3:5-7).

9. Mbaʼépa ohechakuaa heta ména ikatuha ojapo, oikorangue oñeʼẽ vai hembirekóre?

⁹ Ikatu ndojehechapyaʼéi umi mbaʼe porã oguerúva, péro jajapóramo kyreʼỹme Ñandejára Ñeʼẽ heʼiháicha, osẽ porãta katuete. Heta ména oiko porãve hembirekóndi ohechakuaa rire mbaʼéichapa Cristo oñangareko kongregasiónre. Ndaipóriramo jepe ipype iperféktova, Jesús ohayhu ha omoĩ chupekuéra ehémplo, ha oiporu Ñandejára Ñeʼẽ oipytyvõ hag̃ua chupekuéra. Omeʼẽ voi katu hekove pe kongregasión rehehápe (1 Pedro 2:21). Jesús ojapovaʼekue omokyreʼỹ heta ménape omoakã porã hag̃ua ifamília ha oiko porãve hag̃ua hembireko ndive. Upéicha ojehupyty hetave mbaʼe porã, oikorangue oñeʼẽ vai hembirekóre térã noñeʼẽvéi chupe.

10. a) Mbaʼéichapa pe ména térã tembireko, haʼéramo jepe kristiáno, ikatu oguereko asy ifamíliape? b) Mbaʼéichapa ikatu ñaipytyvõ ojeiko porãve hag̃ua?

¹⁰ Avei ikatu pe ména ndohechakuaái umi mbaʼe oñandúva ha oikotevẽva ifamília, noñehaʼãi ostudia hendivekuéra la Biblia térã ojapo oimeraẽ mbaʼe oñondivepa. Ikatu avei pe tembireko noipytyvõi iménape ha noñemoĩri ipoguýpe Ñandejára oipotaháicha. Oĩ família oñemongeta porãva oñondivepa iprovlémare ha osẽ porã hikuái (Génesis 21:10-12; Proverbios 15:22). Péro ndoikóiramo jepe ñahaʼarõháicha, enterove ikatu ñañopytyvõ jaiko porãve hag̃ua ñande rogapýpe. Upéva ikatu jajapo ñamoheñói rupi ñande rekovépe umi mbaʼe porã Ñandejára espíritugui oúva, ñanembaʼerechakuaa ha jahayhu rupi ñande rogayguakuérape (Gálatas 5:22, 23). Ndajahupytymoʼãi mbaʼeve jaikóramo ñahaʼarõ ñande rapichakuéra raẽ ojapo koʼã mbaʼe, ñande ñamoñepyrũvaʼerã. Upéicha jahechaukáta avei jahayhuha Ñandejárape (Colosenses 3:18-21).

Mbaʼéichapa ikatu ñambohovái umi mbaʼe jaikuaaséva?

11, 12. Mbaʼépa omeʼẽ ñandéve Jehová jaiko hag̃ua vyʼápe ñande rogapýpe?

¹¹ Hetaiterei oĩ umi oñemoñeʼẽva familiakuérape. Upéicharõ jepe, ñande jaikuaa Ñandejára Ñeʼẽme oĩha umi konsého iporãvéva, ha jaagradese chupe ñanepytyvõhaguére iñorganisasión rupive. Ndépa rehechakuaa nepytyvõha koʼã mbaʼe? (Salmo 119:129, 130; Miqueas 4:2.)

¹² Reho meméramo jepe rreunionhápe, remboyképa avei tiémpo restudia hag̃ua Ñandejára Ñeʼẽ nde rogayguakuéra ndive? Umi upéicha ojapóva omombaʼeguasu porãvéta Ñandejárape oñondivepa. Ovyʼave hikuái hogapýpe ojapóramo Ñandejára Ñeʼẽ heʼíva (Deuteronomio 11:18-21).

13. a) Jaikuaaséramo mbaʼépa ojapovaʼerã peteĩ família, moõpa ikatu jaheka? b) Mbaʼépa ojehechavaʼerã umi mbaʼe jajapóvare?

¹³ Oiméne reñeporandu mbaʼépa ojapovaʼerã peteĩ família. Pór ehémplo, mbaʼépa ikatu ojejapo ani hag̃ua ñane família reta? Oĩ porãnepa peteĩ kuña oityukáramo imemby (aborto)? Peteĩ mitã ndoserviséiramo Ñandejárape ituvakuéra ndive, mbaʼépa ikatu ojejapo? Umi puvlikasión omosarambíva testigos de Jehová omyesakã koʼã mbaʼe. Reñehaʼãvaʼerã retopa koʼã mbaʼe reiporúvo umi puvlikasión nepytyvõtava restudia hag̃ua la Biblia, umíva apytépe pe Índice. Ndereguerekóiramo umi puvlikasión rehecha hag̃ua, ikatu reheka Salón del Reinopegua livrokuéra apytépe. Ikatu avei reheka komputadórape. Avei, umi mbaʼe ndepyʼapýva reporandukuaa peteĩ ermáno térã ermána ikatupyrývape. Upéicharõ jepe, ani rehaʼarõ ojeʼe ndéve mbaʼépa rejapovaʼerã. Pyʼỹinte nde voi rehechavaʼerã mbaʼépa rejapóta, ha ikatu avei ne ména térã ne rembirekóndi. Umícha jave, rejapovaʼerã umi mbaʼe ohechaukáva rehayhuha Ñandejárape, tahaʼe reime jave nde rapichakuéra ndive térã nde rogapýpe (Romanos 14:19; Efesios 5:10).

Ñanemanduʼa hag̃ua

• Mbaʼérepa jajeroviáramo Jehováre nañamoakãratĩmoʼãi ñane ména térã ñane rembirekópe?

• Ñambohovái vove provléma ñande rogapýpe, mbaʼépa ñanepytyvõta jajapo hag̃ua Ñandejára oipotáva?

• Oĩramo jepe ñande rogaygua nañanepytyvõiva jaiko porãve hag̃ua, mbaʼépa ikatu jajapo?

[Nóta oĩva taʼanga ndive páhina 155]

Pe ména omoakãvaʼerã hogapy Jesús ojapohaguéicha

[Nóta oĩva taʼanga ndive páhina 157]

Umi família ostudia meméva la Biblia ojoayhuve