KAPÍTULO 35

¿Mbaʼéichapa ikatu oiko chehegui Ñandejára amígo?

Ombohovái rire peteĩ situasión ijetuʼuetereíva, Gabriel ohecha añetehápe iñimportanteha iñamista Jehovándi. Haʼe omombeʼu: “Che túa ningo orereja rei vaʼekue arekórõ guare 12 áño. Ha chemanduʼa peteĩ pyhare ake mboyve ajerure asy hague Jehovápe oumi jey hag̃ua”.

Gabriel oñeñandu vaieterei ha oñepyrũ upe moméntope olee la Biblia. Haʼe otopa peteĩ téxto heʼíva Jehováre: “Ne renondépe ningo oñemboja umi persóna inosénte osufríva. Nde katuete reipytyvõ umi ityreʼỹvape” (Salmo 10:14). Gabriel omombeʼu upéva opokoiterei hague hese, haʼe heʼi: “Alee rire pe téxto añandu Jehová chepytyvõseha, ha chemomanduʼa haʼe haʼeha che Túa. ¿Ha máva piko ikatu ohupyty ñande Túa Jehovápe?”.

¿NDÉPA reñeñandúma avei Gabriel oñeñandu haguéicha? Tahaʼe haʼeháicha ikatu reime segúro peteĩ mbaʼégui: Jehová oipota oiko ndehegui iñamígo. La Biblia heʼi: “Peñemoag̃uíkena Ñandejárare, ha haʼe oñemoag̃uíta penderehe” (Santiago 4:8). Epensamíntena, ñanemichĩetereíramo jepe henondépe ha ndaikatúiramo jepe jahecha chupe, Ñandejára Jehová ñaneinvita jaiko hag̃ua iñamígoramo.

Péro oiko hag̃ua ndehegui Ñandejára amígo tekotevẽta reñehaʼã. Ñantende hag̃ua upéva ikatu ñamoĩ peteĩ ehémplo: reguerekóramo peteĩ plánta ha reipotáramo okakuaa ha iporã, ¿mbaʼépa ikatu rejapo? Ndaikatúi rehejánte peteĩ lugárpe, upéva rangue tekotevẽta reñatende hese ha rerrega meme. Ha upéicha avei pe amista reguerekóva Ñandejárandi. ¿Mbaʼépa tekotevẽta rejapo okakuaave hag̃ua?

Iñimportanteterei restudia

Mokõi persóna oñoamígova tekotevẽ oñekomunika. Ha upeichaite avei hína jaipotáramo Ñandejára amista. ¿Mbaʼéicha piko ikatu ñahendu Jehovápe? Upearã tekotevẽ jalee ha jastudia Iñeʼẽ la Biblia (Salmo 1:2, 3).

Ikatu hína añetehápe ndahaʼéi la ndestiraitereíva pe estúdio. Hetápe ningo ogustave ohecha téle, ohuga algún videohuégo térã osẽ ojepasea iñamigokuérandi. Péro añetehápe reipotáramo oiko ndehegui Ñandejára amígo, tekotevẽta restudia ikatu hag̃uáicha rehendu mbaʼépa haʼe nemboʼese Iñeʼẽ rupive.

Péro ani rejepyʼapy, restudia la Biblia ningo ndahaʼéi rejaporamoguáicha nde taréa. Ha oiméramo jepe ndahaʼéi la ndegustaitereíva pe estúdio, ikatu hína reaprende redisfruta restudia jave la Biblia. ¿Mbaʼe mbaʼépa ikatu rejapo upearã? Primeroite voi, tekotevẽ remboyke pe tiémpo reipurútava restudia hag̃ua. Peteĩ mitãkuña hérava Luisa heʼi: “Che aprepara voi peteĩ prográma, ha alee katuete peteĩ kapítulo la che Biblia pyharevete apuʼãrema voi”. Ótro mitãkuña hérava María orekóva 15 áño katu heʼi: “Che siémpre alee la che Biblia pyhare ake mboyve”.

Reikuaa hag̃ua mbaʼéichapa ikatu reprepara la ne prográma ikatu rehecha pe rrekuádro oĩva páhina 292-pe. Rejapo rire upéva, ikatu reanota koʼápe mbaʼe moméntopepa ikatu reaparta 30 minutomi jepe restudia hag̃ua Ñandejára Ñeʼẽ:

․․․․․

Péro reprepara rire la ne prográma tekotevẽta resegi reñehaʼã. Reñepyrũ rire restudia la Biblia rehechakuaáta avei heta vése ndahaʼeiha la ifasilpáva jajapo upéva. Peteĩ mitãʼi hérava Kevin orekóva 11 áño heʼi voi: “Heta párte ijetuʼu lénto chéve alee hag̃ua”. Oiméramo oiko avei nderehe upéva, aníkena reñentrega. Nemanduʼákena restudia vove la Biblia rehejaha hína oñeʼẽ ndéve Jehová, pe amígo iporãvéva ikatúva reguereko. Mbeguekatúpe rehechakuaáta mbaʼéichapa amáske reñehaʼã hese, redisfrutavéta ha avei ideprovechovéta ndéve la nde estúdio.

Iñimportanteterei reñemboʼe

Pe ñemboʼe ningo haʼe peteĩ rregálo iporãitereíva omeʼẽva ñandéve Ñandejára, ha ko rregálo rupive ikatu ñañemongeta hendive. Epensamíntena, nde ikatu reñeʼẽ Jehovándi oimeha óra, tahaʼe de día térã pyhare ha haʼe siémpre oĩ nerendu hag̃uáicha. Haʼe ningo oipotaiterei voi reñemboʼe chupe, upévare la Biblia heʼi ñandéve: “Oimeraẽ situasiónpe pejerure Ñandejárape penepytyvõ hag̃ua, peñemboʼe ha pejerure asývo chupe, ha peagradese avei chupe” (Filipenses 4:6).

Upéva ohechauka porã ikatuha remombeʼu Ñandejárape opaite mbaʼe, por ehémplo mbaʼépa repensa ha ndepyʼapy. Péro avei iñimportánte siémpre reagradese chupe opa mbaʼére, pórke jaikuaaháicha iñimportanteterei umi amigokuéra ohechauka ojupe ijagradesidoha. Ha pe amígo hetave mbaʼéma ojapóva nderehehápe ningo haʼe hína Jehová (Salmo 106:1).

Eskrivimína koʼápe mbaʼe mbaʼe rehepa nde reagradese Jehovápe:

․․․․․

¿Mbaʼépa ikatu rejapo sapyʼánte oĩramo peteĩ mbaʼe ndepyʼapýva térã nemongyhyjéva? Salmo 55:22 heʼi: “Emoĩ Jehová pópe umi mbaʼe ndepyʼapýva, ha haʼe katuete nepytyvõta”.

Eskrivimína koʼápe mbaʼe mbaʼe rehepa reñeʼẽse Jehovápe ne ñemboʼépe:

․․․․․

Umi mbaʼe rehasámava avei nepytyvõta

Oĩ ótra kósa tekotevẽva avei rejapo ikatu hag̃uáicha reñemoag̃uive rehóvo Ñandejárare. Pe rréi David ningo oskrivi vaʼekue: “Petanteána ha pehecha mbaʼeichaitépa Jehová ivuéno” (Salmo 34:8). David oskrivírõ guare ko purahéi, ohasa ramoite peteĩ situasión ijetuʼuetereívare, ha upe situasión omongyhyje kuri chupe. Saúl ojukase vaʼekue Davídpe ha upévare haʼe ohómante vaʼerã okañy umi filisteokuéra apytépe, haʼéva avei iñenemígo. Haʼete kuri ndaikatumoʼãiva ojesalva pe situasióngui. Péro, ¿mbaʼépa ojapo ani hag̃ua ojejuka chupe? David oĩ aja upépe oñepyrũ ojapo heta mbaʼe umi filisteo opensa hag̃ua haʼe itavyraiha (1 Samuel 21:10-15).

Péro David nopensái vaʼekue ojesalva hague ivaleterei rupi. Haʼe ningo oikuaa porã vaʼekue Jehová haʼe hague upe osalváva chupe, upévare omoñepyrũ péicha ipurahéi: “Che añemboʼe Jehovápe ha haʼe cherendu. Ñandejára chepytyvõ anivéma hag̃ua akyhyje” (Salmo 34:4). Entéro umi mbaʼe David ahasa vaʼekue, tuichaiterei oipytyvõ kuri chupe ikatu hag̃uáicha ohechakuaa Jehová añetehápe ivuenoitereiha.a

¿Rehasámapa nde rekovépe peteĩ situasión rehechakuaa porã haguépe Jehová oñangarekoha nderehe? Upéicharõ eskrivimína koʼápe peteĩva. Ha natekotevẽi repensa álgo tuichaitereívare, lomímonte peteĩ mbaʼe isensillomíva:

․․․․․

Oiméne nde túa ha nde sy nemboʼe pe añetegua ha upéva ningo haʼe peteĩ vendisión omeʼẽva ndéve Jehová. Péro péicharõ jepe tekotevẽ hína ndete reñehaʼã oiko ndehegui Ñandejára amígo. Oiméramo neʼĩra rejapo upéva, umi mbaʼe jahecha vaʼekue ko kapítulope nepytyvõta reñepyrũ hag̃ua. Jehová katuete nevendesíta reñehaʼãramo rejapo upéva, la Biblia heʼi voi: “Pesegi pejerure ha oñemeʼẽta peẽme, pesegi peheka ha petopáta” (Mateo 7:7).

RETOPAVÉTA INFORMASIÓN VOLÚMEN 1, KAPÍTULO 38 HA 39

[Nóta]

TÉXTO OĨVA LA BÍBLIAPE

“Ovyʼa umi ohechakuaáva oikotevẽha Ñandejárare” (Mateo 5:3).

PETEĨ KONSÉHO

Releéramo la Biblia 5 páhina káda día, 1 áñope releepátama.

¿REIKUAÁPA RAʼE?

Añetehápe, nde relee ha remoĩ en práktika umi konsého bíblico oĩva ko lívrope, pórke Jehová ojepyʼapy nderehe ha oipota oiko ndehegui iñamígo (Juan 6:44).

UMI MBAʼE AJAPÓTAVA

¿Mbaʼépa ajapóta ideprovechove hag̃ua che estúdio de la Biblia? ․․․․․

¿Mbaʼépa ajapóta ikatu hag̃uáicha pyʼỹive añemboʼe Jehovápe? ․․․․․

¿Mbaʼépa aporanduse che túa térã che sýpe ko témare?․․․․․

¿NDÉPA MBAʼE ERE?

● ¿Mbaʼépa ikatu rejapo igustove hag̃ua ndéve restudia la Biblia?

● ¿Mbaʼérepa Jehová ohenduse ñane ñemboʼe ñaneimperféktoramo jepe?

● ¿Mbaʼépa ikatu rejapo iporãve hag̃ua ohóvo ne ñemboʼe?

[Komentário oĩva páhina 291-pe]

“Chemitãvérõ guare umi ñemboʼe ajapóvape haʼete arrepetínteva siémpre la mísma kósa. Koʼág̃a katu añehaʼã amombeʼu Jehovápe umi mbaʼe ahasáva káda día, ha péicha rupi ndarrepetivéi umi mbaʼe haʼéva” (Eva).

[Taʼanga ha rrekuádro oĩva páhina 292]

Eikuaa porã nde Biblia

1. Eiporavo peteĩ istória ndegustavéva. Upéi ejerure Jehovápe tanepytyvõ rentende porãve hag̃ua.

2. Eñekonsentra porã. Ani relee apúrope. Eñehaʼã eñeimahina umi mbaʼe releéva, por ehémplo mbaʼéichapa oñeʼẽ umi personáhe, ha avei ehetũ ha eñandu mbaʼe gústopa oreko umi tembiʼu. Upéicha igustovéta la releéva ha haʼetéta ku reiméva voi upépe.

3. Ejepyʼamongeta. Eleepa rire peteĩ istória eñeporandu:

● ¿Mbaʼére Jehová oipota oĩ Iñeʼẽme ko párte?

● ¿Máva ehémplopa iporãta asegi, ha máva ehémplopa nahániri?

● ¿Mbaʼe ideprovéchovapa ikatu avei aaprende ko párte aleévagui?

● ¿Mbaʼépa chemboʼe ko párte Jehovágui?

4. Eñemboʼe mbykymi Jehovápe. Emombeʼu chupe mbaʼépa reaprende, ha mbaʼéichapa repensa rejapo la reaprendéva. Siémpre reagradese vaʼerã Jehová pe rregálo porãite omeʼẽvare ndéve, Iñeʼẽ la Biblia.

[Taʼanga]

“Ne ñeʼẽ ningo peteĩ lámpara chegiáva aguata porã hag̃ua, ha peteĩ lus ohesapéva che rape” (Salmo 119:105).

[Taʼanga ha rrekuádro oĩva páhina 294-pe]

Emotenonde umi mbaʼe iñimportantevéva

¿Repensápa ndereguerekoiha tiémpo reñemboʼe ha restudia hag̃ua la Biblia? Pono oiko nderehe upéva, rehecha vaʼerã mbaʼépa remotenonde.

Ejapomína ko pruéva: ekarga peteĩ váldepe unos kuánto ita tuicháva, ha upéi ekarga pype yvykuʼi henyhẽ meve. Upéicha reguerekóta pe váldepe umi ita, ha avei pe yvykuʼi.

Koʼág̃a emonandi pe válde ha ekarga jey pype umi ita ha pe yvykuʼi, péro emoĩ raẽ pe yvykuʼi ha upe rire ae umi ita. ¿Ajépa ndaijavéima oñondive haʼéramo jepe la mísma kantida? Upéva oiko pórke ko vuéltape rekarga primero pe yvykuʼi.

¿Mbaʼépa ñaaprende? La Biblia heʼi: “Pehechakuaa mbaʼépa hína umi mbaʼe iñimportantevéva” (Filipenses 1:10). Remotenondérõ umi mbaʼe naiñimportanteguasúiva, por ehémplo umi diversión, nahembymoʼãvéima ndéve tiémpo rejapo hag̃ua Ñandejára ohaʼarõva. Péro rejapóramo Filipenses 1:10 heʼíva, reguerekóta tiémpo rejapo hag̃ua upéva, ha avei rejediverti mimi hag̃ua. Upévare tekotevẽterei remotenonde umi mbaʼe iñimportantevéva.

[Taʼanga oĩva páhina 290-pe]

Ñane amista Jehovándi ojogua peteĩ plántape, jakuida porã vaʼerã hese osegi hag̃ua okakuaa