Lívro número 57 Filemón

Ohai: Pablo

Moõpa ojehai: Roma

Arakaʼépa ojehaipa: áño 60-61 rupi Jesús ou rire

KO KÁRTA ohaivaʼekue Pablo iporãiterei ñandéve g̃uarã ohechauka rupi mbaʼéichapa jahayhu ha jatratavaʼerã ñane ermanokuérape. Kóva Pablo rembiapokue mbykyvéva, ha la Bíbliape Segunda ha Tercera de Juan añónte mbykyve chugui. Avei Pablo nomondói ko kárta peteĩ kongregasión térã peteĩ ansiánope. Haʼe ohai peteĩ ermánope omyatyrõ hag̃ua peteĩ provléma. Ko ermáno héra Filemón, ipláta heta ha oiko Colósaspe peteĩ táva Frigiaygua, opytáva Asia Menor mbytépe (Rom. 11:13).

² Maʼerãpa ohai ko kárta? Jahechami: Pablo oho ypýrõ guare kárselpe Rómape (áño 59-61), opredika hetápe marandu porã. Umíva apytépe oĩ Onésimo, peteĩ tembiguái okañyvaʼekue ijára Filemóngui, haʼéva Pablo amígo. Onésimogui oiko Cristo reroviaha ha oñeʼẽ rire hendive, Pablo omondo jey chupe ijára rendápe. Upérõ Pablo ohai kárta avei umi kongregasión Éfeso ha Colosasguápe. Haʼe oñemoñeʼẽ chupekuéra mbaʼéichapa ojotratavaʼerã peteĩ tembiguái ha ijára ojeroviáva Crístore (Efe. 6:​5-9; Col. 3:22–4:1). Pablo ohai avei peteĩ kuatiañeʼẽ Filemónpe, ojerurehápe chupe omog̃uahẽ porãmínte hag̃ua Onésimope. Pablo ndojeruréi avavépe ohai hag̃ua ikuatiañeʼẽ, haʼete voi ohai (File. 19). Upévare Filemón katuete omombaʼeve ko kuatiañeʼẽ.

³ Oiméne Pablo ohai ko kuatiañeʼẽ amo áño 60 térã 61 rupi, Rómape. Upéichane raʼe ajeve oipytyvõma hetápe ojerovia hag̃ua Jesús rehe. Avei versíkulo 22-pe heʼi hiʼãmaha chupe ojepoi chugui, upéicharõ areʼíma oĩhague kárselpe. Oiméne Tíquico ha Onésimo ogueraha ko kuatiañeʼẽ ha avei umi oñemondóva kongregasión Éfeso ha Colosasguápe (Efe. 6:​21, 22; Col. 4:​7-9).

⁴ Pablo oñepyrũvo heʼíma haʼe ohaihague ko kuatiañeʼẽ. Upéva heʼi avei Orígenes ha Tertuliano.a Ko kárta oĩ avei Pablo kuatiañeʼẽnguéra apytépe Fragmento Muratoriánope, síglo 2-peguare. Upéicharõ ikatu jajerovia haʼeha Ñandejára Ñeʼẽ.

MBAʼÉICHAPA ÑANEPYTYVÕ

⁷ Ko kuatiañeʼẽ ohechauka Pablo noñemoĩrihague mburuvichakuéra ojapóvare, umíva apytépe umi léi heʼíva ikatuha ojereko tembiguái. Ndeʼíri kristianokuéra opoivaʼerãha hembiguaikuéragui ojeroviahaguére Crístore, omondo guei Onésimope ijára rendápe. Upearã haʼe oviaha 1400 kilómetro rupi, Roma guive Colosas peve. Pablo ojapo hendápe porã hembiapo apóstolramo ha ‘omyerakuã Ñandejára sãmbyhy, ha oñemoñeʼẽ Jesucrístore’ (Hech. 28:31; File. 8, 9).

⁸ Ko kárta ohechauka mbaʼeichaitépa umi kristiáno ymaguare ojoayhu ha oiko peteĩ ñeʼẽme. Haʼekuéra oñohenói ermáno ha ermána (File. 2, 20). Ko kárta ohechauka ñandéve mbaʼéichapa jaikovaʼerã ñane ermanokuérandi. Pablo ohechauka ohayhuha ermanokuérape, omombaʼeha hapichakuéra ojapóva, ikatupyryha ñeʼẽkuaápe ha ndojejapoiha. Haʼe ndojopýi Filemónpe operdona hag̃ua Onésimope. Jepe oñemombaʼe Páblope kongregasiónpe, haʼe oñeʼẽnte Filemónpe pe mborayhu ohechaukávare kristianokuéra ha oñemoñeʼẽ chupe iñamigohaguére. Iporã umi ansiáno imanduʼa mbaʼéichapa Pablo oñemoñeʼẽ Filemónpe.

⁹ Pablo ningo oipota Filemón ojapo ojeruréva chupe. Upéva ohechaukáta Filemón ojapoha Jesús heʼíva Mateo 6:​14-pe ha Pablo heʼíva Efesios 4:​32-pe. Ñande avei ñanembaʼeporãvaʼerã ha jaheja rei ñane ermáno ojapóramo ñanderehe ivaíva. Filemón operdona hembiguáipe, jepe haʼe ikatu oreko asy Onésimope. Upéicharõ, máva piko ñande nañaperdonái hag̃ua ñane ermánope?

¹⁰ Ko kuatiañeʼẽ ohechauka mbaʼépa ojapo Jehová espíritu. Oipytyvõ Páblope oñemoñeʼẽ porãite hag̃ua peteĩ provléma ijetuʼúvare. Avei Ñandejára espíritu rupi kristianokuéra ojoayhu, oiko porã oñondivekuéra ha ojerovia ojuehe, Pablo ojeroviahaguéicha Filemónre. Ko kuatiañeʼẽ ñanemboʼe mbaʼéichapa jaikovaʼerã kristiánoicha. Ñanemokyreʼỹ jajogueraha porã hag̃ua ñane ermanokuérandi. Ohechauka umi ojeroviáva Ñandejárare ojoayhuha, ojerovia Ñandejára rréinore ha imbaʼeporãha Jehová imbaʼeporãháicha (v. 5).

[Nóta]