Lívro número 63 2 Juan

Ohai: Apóstol Juan

Moõpa ojehai: Éfeso térã ijypýpe

Arakaʼépa ojehaipa: áño 98 rupi Jesús ou rire

JUAN kárta mokõiha mbykymíramo jepe ñanemboʼe heta mbaʼe. Oiméne ojehai peteĩ papiro rehénte. Oñemondo ‘pe kuñakarai Ñandejára oiporavovaʼekuépe ha imembykuérape’. “Kyria” ningo heʼise griégope “kuñakarai” péro haʼe avei peteĩ téra, upévare oĩ heʼíva ko kárta oñemondohague peteĩ péicha héravape. Avei oĩ umi heʼíva Juan ohaihague peteĩ kongregasiónpe. Ha heʼínte omondoha ‘pe kuñakarai Ñandejára oiporavovaʼekuépe’ ombotavy hag̃ua umi oñemoĩvape hesekuéra. Oiméramo upéicha pe versíkulo pahápe heʼívo ‘ne reindy membykuéra’ omomaiteiha chupekuéra, oiméne hína ermanokuéra ambue kongregasiongua. Upéicharõ ikatu ko kárta oñemondo peteĩ tapichápe térã peteĩ kongregasiónpe. Upévare noñeʼẽi heta mbaʼére oñeʼẽháicha pe primera kárta (v. 1, BNP).

² Heta mbaʼe ohechauka Juan ohaihague ko kárta. Haʼe voi heʼi ijehe: “Che, karaietémava”. Upéva ningo añete, haʼe ningo itujáma ha haʼéntema opyta umi apóstol apytégui, upévare oñemombaʼe chupe kongregasiónpe (Gál. 2:9). Chupe ojekuaa opárupi, ha natekotevẽi heʼi ambue mbaʼe ojekuaauka hag̃ua. Jaikuaa avei Juan ohaihague ko kárta ojoguaitereígui ojehai lája 1 Juan ha Juan Kuatiañeʼẽme. Oiméne ojejapo avei Éfesope térã ijypýpe, amo áño 98 rupi. Segunda ha tercera de Juan rehe McClintock ha Strong Cyclopedia heʼi: “Koʼã mokõi kárta ojojogua heta mbaʼépe, upévare ikatu jaʼe ojehaihague Éfesope, 1 Juan ojejapopa riremínte. Koʼã kárta ohechauka mbaʼéichapa peteĩ tapicha ojapovaʼerã 1 Juan omboʼéva”.a Ymaite guive ojejerovia ko kuatiañeʼẽre, Ireneo síglo 2-peguare imanduʼa hese ha Clemente Alejandriaygua ojerovia avei hese.b Juan kartakuéra oĩ avei Fragmento Muratoriánope.

³ Juan ohai avei ko kárta ojepyʼapýgui kongregasiónpe oikehaguére mboʼehára japu. Haʼe omomaranduse ermanokuérape opilla hag̃ua koʼãvape ha ani ojeheʼa hesekuéra. Omokyreʼỹ chupekuéra opyta hag̃ua ijeroviápe ha ojoayhu hag̃ua.

MBAʼÉICHAPA ÑANEPYTYVÕ

⁵ Upérõ ha koʼág̃a avei oĩ heta nomombaʼéiva umi mbaʼe porã Cristo omboʼevaʼekue. Haʼekuéra oipota oñemombaʼeguasu chupekuéra ha ojerereko mboʼehára guasúramo ko múndope ojejapoháicha. Ohupyty hag̃ua koʼã mbaʼe omongyʼa kongregasión ha omoingo vai oñondive umi ermanokuérape. Juan katu omombaʼeterei kongregasiónpe ojeiko porãmbáramo. Haʼe oikuaa upearã oĩvaʼerãha mborayhu ha oñemboʼevaʼerãha hendaitépe umi ñeʼẽ oúva Túva ha Taʼýragui. Ñande avei tekotevẽ ñañehaʼã jaiko porã ñane ermanokuérandi. Naiporãi jajeheʼa ni ñamomaitei jepe umi ohejavaʼekue Jehovápe ha nomboʼevéiva la Biblia heʼíva. Jaikóramo Ñandejára oipotaháicha ha javyʼáramo ñane ermanokuéra apytépe ‘Ñandejára, Túva, ha Jesucristo, itaʼýra, ohykuavóta ñande ári imbaʼeporãngue, ñandeporiahuverekóta ha ñanembopyʼaguapýta, añetehápe ha mborayhúpe’ (v. 3). Ko kárta ohechauka iporãitereiha jaiko porãmba ñane ermanokuérandi.

[Nóta]