Jaasepta vaʼerã Jesús autorida

“IÑEPYRŨME Ñandejára ojapo vaʼekue yvága ha yvy”, ha entéro mbaʼe ojapo vaʼekue ‘iporãiterei’ (Gén. 1:1, 31). Jehová omeʼẽ kuri yvyporakuérape peteĩ futúro iporãitereíva. Péro Adán ha Eva opuʼã rire Ñandejárare okambiaite la situasión. Upéicharamo jepe upe situasión ndosegimoʼãi upéicha pára siémpre. Jehová nokambiái ivolunta ko yvýpe g̃uarã ha ñandéve g̃uarã. Haʼe opromete vaʼekue entéro Adán familiare iñeʼẽrendúva ojesalvataha. Haʼekuéra ikatúta oadora porã jey pe Dios verdadérope, ha Haʼe ohundíta Satanáspe ha entéro umi mbaʼe vai ojapóva (Gén. 3:15). Opa mbaʼe ‘iporãiterei’ jeýta iñepyrũme guaréicha. Jehová okumplíta koʼã promésa Itaʼýra Jesucristo rupive (1 Juan 3:8). Upévare iñimportanteterei jaasepta pe autorida Jehová omeʼẽva Jesúspe (Hech. 4:12; Filip. 2:9, 11).

MBAʼE PUÉSTOPA OREKO JESÚS

² Ñapensávo umi puésto Jehová omeʼẽ vaʼekuére Jesúspe jahechakuaa haʼe orekoha heta rresponsavilida iñimportantetereíva. Haʼe ningo ñande Salvadór, ñane súmo saserdóte, omoakã pe kongregasión kristiána ha koʼág̃a haʼe hína Rréi Ñandejára Rréinope. Jajepyʼamongetávo koʼã rresponsavilida Jesús orekóvare, ñamombaʼevéta Jehová ojapo vaʼekue ñanderehehápe ha jahayhuvéta Crístope. La Biblia oñeʼẽ umi puésto Jesús orresivi vaʼekuére.

³ Cristo oĩrõ guare ko yvy ape ári ojekuaa porãiterei vaʼekue haʼe rupive umi hénte iñeʼẽrendúva ikatutaha oĩ porã jey Ñandejára renondépe (Juan 14:6). Cristo ningo ñande Salvadór pórke haʼe omano opaga hag̃ua pe rreskáte ñanderehehápe (Mat. 20:28). Jesús ndahaʼéi omoĩnteva ehémplo porã enterovépe g̃uarã, síno haʼe rupive Jehová okumplipaitéta entéro mbaʼe opromete vaʼekue. Haʼe añoite ikatu ñanepytyvõ ñaime porã jey hag̃ua Ñandejára renondépe (Hech. 5:31; 2 Cor. 5:18, 19). Jesús omano ha oikove jey rupi, entéro umi iñeʼẽrendúva oreko pe oportunida odisfrutávo opa árare umi mbaʼe porã oguerútava Ñandejára Rréino.

⁴ Jesús ningo ñane súmo saserdóte, upévare ikatu “ñanentende ñanekangy jave”, haʼe rupive oñeperdona umi iñeʼẽrendúva pekádo. Apóstol Pablo heʼi vaʼekue voi Jesúsre: “Ñande jareko peteĩ súmo saserdóte ikatúva ñanentende ñanekangy jave, pórke haʼe ohasa vaʼekue avei entéro umi pruéva ñande jahasáva, péro haʼe núnka ndopekái”. Upéi Pablo omokyreʼỹ enterove umi ojeroviávape Jesúsre oaprovecha porã hag̃ua pe traváho ojapóva haʼe kómo súmo saserdóte. Pablo heʼi: “Upévare, ñañemoag̃uíkena Ñandejára trónore ha ñañemboʼe chupe kyhyjeʼỹme, haʼe ningo imbaʼeporãiterei ñanendive. Jajapo upéva ikatu hag̃uáicha Ñandejára ñandeporiahuvereko ha imbaʼeporãiterei ñanendive ñaikotevẽ jave” (Heb. 4:14-16; 1 Juan 2:2).

⁵ Cristo omoakã avei pe kongregasión kristiána. Upéicha rupi, ni umi kristiáno yma guare, ni ñande koʼág̃a, ndajarekói peteĩ líder umáno, pórke Jesús ojevale pe espíritu sántore ha kuimbaʼekuéra ikatupyrývare odirihi ha oñangareko hag̃ua “Ñandejára ovechakuérare”. Koʼã kuimbaʼe oikuaa avei Jesús ha Ñandejára ohusgataha chupekuéra otrata lájare pe kongregasiónpe (Heb. 13:17; 1 Ped. 5:2, 3). Peteĩ profesíape Jehová heʼíma vaʼekue voi Jesús rehe: “Che anombra peteĩ líder ha governánte umi tetãme g̃uarã, amoĩ chupe che testígoramo umi tetãme g̃uarã” (Is. 55:4). Jesús ohechauka vaʼekue ko profesía oñekumpliha hese heʼírõ guare idisipulokuérape: “Ani avei peheja avave heʼi peẽme líder. Pórke pende Líder peteĩnte, upéva hína Cristo” (Mat. 23:10).

⁶ Jesús ningo imbaʼeporãiterei ha ñanepytyvõ. Upévare heʼi vaʼekue: “Peju che rendápe enterove peẽ penekaneʼõva ha pendekárga pohýiva, ha che pombopiroʼýta. Pehupi pende ári che júgo ha peaprende chehegui. Che ningo ndachepochyreíri ha cheumílde che pyʼaite guive, upévare katuete pombopiroʼýta. Che júgo napendeforsamoʼãi ha che kárga ivevýi” (Mat. 11:28-30). Jesús odirihi pe kongregasión kristiána mborayhúpe, ha ombopiroʼy enterovépe. Itúaicha, Jesucristo haʼe avei peteĩ “pastór imbaʼeporãva” (Juan 10:11; Is. 40:11).

⁷ Apóstol Pablo oskrivírõ guare pe primera kárta umi ermáno Corintoguápe, oñeʼẽ chupekuéra ótro traváho Jehová onkarga vaʼekuére Jesúspe. Pablo heʼi: “Haʼe ogoverna vaʼerã Ñandejára omoĩ meve ipy guýpe entéro umi iñenemígope. Péro Ñandejára omoĩ rire entéro mbaʼe Itaʼýra poguýpe, upéi pe Taʼýra oñemoĩta avei Ñandejára poguýpe. Ñandejára hína upe omoĩ vaʼekue entéro mbaʼe pe Taʼýra poguýpe. Upéicha Ñandejára añoite upe ogovernátava entéro mbaʼe ári” (1 Cor. 15:25, 28). Jesús ou mboyve ko yvy ape ári, ombaʼapo vaʼekue Itúandi “peteĩ konstruktór ivaletereívaicha”. Ñandejára ojapo vaʼekue chupe raẽvete (Prov. 8:22-31). Ñandejára omboúrõ guare Jesúspe ko yvy ape ári, haʼe siémpre ojapo vaʼekue Itúa volunta. Haʼe oaguanta vaʼekue pe pruéva ijetuʼuvéva ha omano iñeʼẽrendu rupi Ñandejárape (Juan 4:34; 15:10). Haʼe ifiél rupi, Ñandejára omoingove jey vaʼekue chupe ha omoĩ Jesúspe ogoverna hag̃ua Irréinope yvágape (Hech. 2:32-36). Jehová onkarga avei chupe ojapo hag̃ua ko mbaʼe iñimportantetereíva: haʼe odirihíta hína umi ánhel ipoderosoitévape ohundi hag̃ua umi goviérno umáno ha oipeʼaite hag̃ua entéro mbaʼe vai ojejapóva ko múndope (Prov. 2:21, 22; 2 Tes. 1:6-9; Apoc. 19:11-21; 20:1-3). Upe rire Ñandejára Rréino añoiténtema ogovernáta ko yvy ape ári (Apoc. 11:15).

MBAʼÉPA HEʼISE JAASEPTA JESÚS AUTORIDA

⁸ Jesús ningo pe ehémplo iporãvéva ñande jarekóva. Jehová omoĩ Jesúspe okuida hag̃ua ñanderehe. Siémpre ñaneñeʼẽrendu vaʼerã Jehovápe ha jaha iñorganisasión ykére, péicha haʼe mborayhúpe oñangarekóta ñanderehe.

⁹ Umi kristiáno síglo primérope guare oasepta vaʼekue pe autorida Jesús orekóva. Haʼekuéra ohechauka vaʼekue upéva ombaʼapóvo peteĩ ñeʼẽme Cristo poguýpe, ha ojapóvo haʼe omandáva chupekuéra espíritu sánto rupive (Hech. 15:12-21). Apóstol Pablo oexplika vaʼekue pe unida oĩva umi unhído apytépe pe kongregasiónpe heʼívo: “Jaʼe vaʼerã siertoguávante ha japorohayhu, ha péicha ikatúta jakakuaapa entéro mbaʼépe jajogua hag̃ua Crístope, upe ñanemoakãvape. Haʼe rupive pe hete kompletoite ojoaju umi ñúdo rupive ha ombaʼapo porã oñondive, omeʼẽvo upe oñekotevẽva. Ha káda párte ojapo porãvo hembiapo otokáva chupe, oipytyvõ pe hetépe okakuaa ha oñemombarete hag̃ua ohóvo mborayhúpe” (Efes. 4:15, 16).

¹⁰ Upéicha, káda uno oñopytyvõramo ha osegíramo oñemoĩ peteĩ ñeʼẽme Jesús poguýpe, katuete pe kongregasión okakuaáta ha ojoayhúta. Pe mborayhu ningo “oipytyvõ enterovépe oĩ hag̃ua unído oñondivepa” (Juan 10:16; Col. 3:14; 1 Cor. 12:14-26).

¹¹ Umi profesía bíblica oñekumplíva áño 1914 guive ohechauka porãiterei oñemeʼẽma hague Jesúspe pe autorida ogoverna hag̃ua Ñandejára Rréinope. Ha haʼe koʼág̃a ogoverna hína iñenemigokuéra apytépe (Sal. 2:1-12; 110:1, 2). ¿Mbaʼérepa upéva iñimportánte umi oikóvape g̃uarã ko yvy ape ári? Koʼẽrõitéma Jesús okastigáta umi oñemoĩvape hese ha upéicha ohechaukáta haʼeha pe “Rréi omandavéva entéro umi ótro rréigui” (Apoc. 11:15; 12:10; 19:16). Upéi oñekumplíta pe Jehová opromete vaʼekue hardín de Edénpe oñepuʼãrõ guare hese, ha haʼe osalváta umi oĩvape Cristo deréchape (Mat. 25:34). Ajépa javyʼaite jaasepta haguére Cristo autorida Ñandejára organisasiónpe. Jasegíkena jaservi Jehovápe ñane ermanokuérandi ko múndo tuichakuére ha jarrespeta Jesús autorida.