Mbaʼéichapa jaapoja ñane organisasión ojapóva

ÑANDE, testígo de Jehová, japredika umi notísia porã “umi lugár mombyryvehápe jepe ko yvy ape ári”, péicha oñekumpli Jesús profesía oñeʼẽva umi ára paháre (Hech. 1:8; Mat. 24:14). Ñakomparti hag̃ua la héntendi umi enseñánsa oĩva la Bíbliape, vyʼápe jaipuru ñane tiémpo ha ñane mbaretekue. Jajerovia Jehová omeʼẽtaha opa mbaʼe oikotevẽva umi ombaʼapóvape hendive, upévare jasegi ñamotenonde meme Irréino (Mat. 6:25-34; 1 Cor. 3:5-9). Umi mbaʼe jahupytýva ohechauka porã Jehová ovendesi ha oguerohoryha ipuévlope.

MBAʼÉICHAPA OJEPAGA UMI GÁSTO JAREKÓVA KO MÚNDO TUICHAKUÉRE

² Umi hénte oñesorprende jepi ohechávo ñande nañavendeiha umi Biblia ni umi puvlikasión ñameʼẽva predikasiónpe. Añetehápe heta ojegasta ojejapo ha oñeimprimi hag̃ua umi Biblia ha puvlikasión. Avei Ñandejára organisasión omopuʼã ha omantene umi ogár Betel. Heta ermáno ombaʼapo upépe. Algúno ombaʼapo impréntape, oĩ oorganisáva pe predikasión, ha ótro ojapo heta mbaʼe oñemotenonde hag̃ua pe predikasión. Koʼã mbaʼe ningo igásto hína. Avei oñemeʼẽ peteĩ ajúda ekonómika osegi hag̃ua hembiapo umi superintendénte de sirkuítope, umi misionérope, umi prekursór espesiálpe ha ótro ermáno oĩvape pe servísio espesiál de tiémpo komplétope. Jahechaháicha heta ojegasta oñemotenonde hag̃ua pe predikasión, tahaʼe ñande jaikohárupi térã ko múndo tuichakuére. ¿Mbaʼéichapa ojekuvripa umi gásto?

³ Oĩ heta hénte omombaʼéva umi testígo de Jehová ojapóva omboʼe hag̃ua la Biblia, upévare vyʼápe omeʼẽ ikontrivusión ojesegi hag̃ua upe traváho. Upéicharõ jepe, umi kontrivusión ñande ñameʼẽva la oipytyvõvéva hína ko traváhope. Oĩ Testígo omondóva ikontrivusión pe sukursálpe voi. Ñandejára siervokuéra yma guare ipojera vaʼekue ha oapoja oñemopuʼã hag̃ua peteĩ lugár ojeadora hag̃ua Jehovápe. Upéicha avei ñande, testígo de Jehová, pyʼaporãme ñameʼẽ ñane kontrivusión (Éx. 35:20-29; 1 Crón. 29:9). Oĩ ojapóva donasión umi testaménto rupive. Ótro katu omondo ikontrivusión individuálmente, ha oĩ avei umi kontrivusión oúva umi kongregasión ha sirkuítogui omeʼẽva umi ermáno ikatumiháicha. Entéro koʼã kontrivusión oipytyvõ osegi hag̃ua pe predikasión.

⁴ Ñandéve g̃uarã ningo peteĩ priviléhio tuichaitereíva ñameʼẽ ñande pláta ha umi mbaʼe jarekóva ojesegi hag̃ua ojepredika. Jesús ha idisipulokuéra oreko vaʼekue peteĩ pláta ryru, ha upégui oguenohẽ pe pláta opaga hag̃ua umi gásto orekóva (Juan 13:29). La Biblia avei heʼi oĩ hague unos kuánto kuña oipurúva ipláta ha umi mbaʼe orekóva oñatende hag̃ua Jesús ha idisipulokuérare (Mar. 15:40, 41; Luc. 8:3). Apóstol Pablo oagradese ha oasepta vaʼekue pe ajúda omeʼẽva chupe umi oapojaséva iservísio ha oipotáva ojesegi ojepredika (Filip. 4:14-16; 1 Tes. 2:9). Ñandejára siérvo yma guare ningo ikyreʼỹ ha ipojera vaʼekue, ha ñande jasegi iñehemplokuéra vyʼápe ñameʼẽvo ñane kontrivusión. Upéicha rupi umi hénte ipyʼaporãva ikatu orresivi “grátis pe y oporomoingovéva” (Apoc. 22:17).

MBAʼÉICHAPA UMI KONGREGASIÓN OKUVRI IGÁSTO

⁵ Umi gásto orekóva umi kongregasión ojepaga umi kontrivusión voluntária rupive. Umi lugár ñañembyatyhápe ndojejeruréi pláta, ndojejapói kolékta ha noñemandái mboýpa káda uno omeʼẽ vaʼerã. Upéva rangue, oñemoĩ káha de kontrivusión ikatu hag̃uáicha káda uno omeʼẽ “odesidiháicha ikorasõme” (2 Cor. 9:7).

⁶ Primeroite voi pe pláta oñemeʼẽva ojepuru ikatu hag̃uáicha ojepaga umi gásto orekóva pe Salón del Reino. Avei pe kuérpo de ansiáno ikatu odesidi omondo peteĩ párte pe plátagui sukursálpe ikatu hag̃uáicha oñekontrivui pe óvra mundiálpe. Péicha jave pe kongregasión ojapo vaʼerã peteĩ rresolusión. Heta kongregasión ojapo péicha ha okontrivui pe óvra mundiálpe ojepaga hag̃ua umi gásto oĩva ko múndo tuichakuére. Enterove ermáno ohechakuaáramo pe Salónpe oĩha gásto, umi ansiáno natekotevẽmoʼãi pyʼỹi oanunsia tekotevẽha oñekontrivui ojepaga hag̃ua umi gástore.

MBAʼÉPA OJEJAPO UMI KONTRIVUSIÓNGUI

⁷ Káda rreunión rire mokõi ermáno oguenohẽ vaʼerã pe pláta oñemoĩva umi káha de kontrivusiónpe. Haʼekuéra okonta ha ojapo peteĩ rresívo (2 Rey. 12:9, 10; 2 Cor. 8:20). Umi ansiáno ohecha vaʼerã toñeñongatu porã pe pláta oñemondo peve pe sukursálpe térã ojepuru peve ojepaga hag̃ua umi gásto oĩvare pe salónpe. Pe ermáno oñenkargáva pe kuéntare oprepara vaʼerã káda mes peteĩ infórme oñeanunsia hag̃ua pe kongregasiónpe. Ha káda 3 mése pe koordinadór ohecha ojerrevisa hag̃ua umi kuénta, péva hína pe intervensión de kuénta.

UMI GÁSTO OREKÓVA PE SIRKUÍTO

⁸ Umi gásto oĩva ojejapo hag̃ua umi aty guasu un diagua ha ótro gásto orekóva pe sirkuíto ojepaga umi kontrivusión rupive omeʼẽva umi ermáno oĩva upe sirkuítope. Pe lugár ojejapohápe pe asambléa oñemoĩ káha de kontrivusión ikatu hag̃uáicha umi ermáno okontrivui pe sirkuítope g̃uarã. Amás día ningo oĩ hetave gásto, upévare umi kongregasión ikatu avei omeʼẽve ikontrivusión ótro moméntope.

⁹ Iporãitereíta káda sirkuíto orekóramo opaga hag̃ua igástore, ha hemby jeýramo pe pláta oñemondo hag̃ua pe óvra mundiálpe g̃uarã. Péro sapyʼánte pe sirkuíto ndorekopái pe pláta oñekotevẽva ojepaga hag̃ua umi gásto orekóva pe asambléa. Térã ikatu ofalta pe pláta ojepaga hag̃ua pe asambléa oúvare, por ehémplo ojealkila hag̃ua pe lokál ojepurútava. ¿Mbaʼépa ikatu ojejapo péicha jave? Pe superintendénte de sirkuíto oikuaaukáta umi kongregasiónpe upe situasión ikatu hag̃uáicha oñemomanduʼa umi ermánope haʼeha peteĩ priviléhio ñameʼẽ ñane kontrivusión. Káda kuérpo de ansiáno oñeʼẽta upe témare ha ohecháta mboýpa ikatu omeʼẽ ikongregasión pe sirkuítope g̃uarã. Upe rire haʼekuéra ojapóta peteĩ rresolusión.

¹⁰ Oiméramo pe sirkuítope tekotevẽ oñeñeʼẽ peteĩ téma ekonómikore, umi ansiáno upe sirkuitopegua ojapóta peteĩ rreunión de ansiáno pe día ojejapohápe pe aty guasu un diagua. Umi ansiáno ojapo vaʼerã peteĩ rresolusión oimérõ ojepurúta pe pláta ótra kosarã, ndahaʼéiva umi gásto normálmente ojerekóva pe sirkuítope. Umi rresolusiónpe oñanota vaʼerã mboýpa exáktamente ojegasta ha oñepresenta vaʼerã ikatu hag̃uáicha ojeaprova.

¹¹ Pyʼỹinte oñeorganisa ojejapo hag̃ua pe intervensión de la kuénta del sirkuíto.

OÑEPYTYVÕ UMI OIKOTEVẼVAPE

¹² Jesús ha umi disípulo oipuru vaʼekue avei pe ombyatýva pe pláta ryrúpe oipytyvõ hag̃ua umi imboriahúvape (Mar. 14:3-5; Juan 13:29). Entéro kristiáno jareko pe rresponsavilida ñaipytyvõvo umi oikotevẽvape. Jesús heʼi vaʼekue voi: “Umi imboriahúva siémpre oĩta penendive” (Mar. 14:7). ¿Mbaʼéichapa ñakumpli ko rresponsavilida?

¹³ Sapyʼánte peteĩ ermáno kongregasionpegua ikatu ojejopy vai ha ndaiplátai. Ikatu oime ijedáma, hasykatu térã oreko ótro provléma ndaikatúiva osolusiona. Péicha jave ikatu oipytyvõ chupe ifamília voi, umi ótro ipariénte térã ótro ermáno oikuaáva isituasión. Apóstol Juan heʼi vaʼekue voi mbaʼépa ojejapo vaʼerã: “Oimeraẽ orekóva heta mbaʼe oñemantene hag̃ua ha ohecha iñermáno oikotevẽha, ha upéicharõ jepe ndojaposéi mbaʼeve oiporiahuvereko hag̃ua chupe, ¿mbaʼéicha piko upéicharõ haʼe heʼíta ohayhuha Ñandejárape? Che raʼykuéra pohayhuetéva, aníkena ñande jurúpente jaʼe japorohayhuha, síno jahechauka vaʼerã upéva umi mbaʼe jajapóva rupive ha ñanesinséro vaʼerã” (1 Juan 3:17, 18; 2 Tes. 3:6-12). Jakuidávo umi ermáno oikotevẽvare ajúda jahechauka jaadoraha pe Dios verdadérope (Sant. 1:27; 2:14-17).

¹⁴ ¿Mbaʼéichapa ikatu ojejapo upéva? Apóstol Pablo oexplika vaʼekue 1 Timoteo 5:3-21-pe mbaʼépa ojereko vaʼerã enkuénta oñepytyvõ hag̃ua umi oikotevẽvape. Primeroite voi káda kristiáno oreko pe rresponsavilida oñangarekóvo hogayguáre. Oĩramo ijedáva térã hasykatúva, oñatende vaʼerã hese ifamília, iniéto, térã ótro ihénte ag̃uietéva. Heta paíspe oĩ jepi ajúda omeʼẽva pe goviérno ha ajúda sosiál oipytyvõva la héntepe, upévare oĩramo peteĩ ermáno oikotevẽva, ihénte térã ótra persóna ikatu oipytyvõ chupe okonsegi hag̃ua umi ajúda. Péro sapyʼánte ikatu oñepresenta peteĩ situasión tekotevẽtahápe pe kongregasión kompletoite oipytyvõ umi ermáno ha ermána heta áñorema oservíva Jehovápe ha oikotevẽva hína ajúda. Haʼekuéra ndorekóiramo ifamília térã ótro ihénte ikatúva oipytyvõ chupe, ha pe goviérno nomeʼẽiramo mbaʼeveichagua ajúda, péicharõ pe kuérpo de ansiáno ohecháta mbaʼépa ikatu ojejapo hesehapekuéra. Ñande ningo javyʼa ikatu haguére ñaipytyvõ umi oikotevẽvape.

¹⁵ Sapyʼánte heta ermáno ha ermána oikotevẽ ajúda pórke ojepersegi chupekuéra, oĩ gérra, terremóto, inundasión, ñembyahýi térã ótra kósa oikóva ñaime rupi umi ára pahápe (Mat. 24:7-9). Heta vése pe kongregasión ndaikatúi oipytyvõ chupekuéra. Péicha jave pe Kuérpo Governánte oorganisa ikatu hag̃uáicha umi ermáno oparupigua oipytyvõ. Péicha ojapo vaʼekue yma umi ermáno Asia Menorpegua. Haʼekuéra oipytyvõ oñemeʼẽ hag̃ua tembiʼu umi ermáno oĩvape Judéape oĩrõ guare upépe peteĩ ñembyahýi (1 Cor. 16:1-4; 2 Cor. 9:1-5). Jasegívo iñehemplokuéra jahechauka jahayhuha ñane ermanokuérape ha ñande haʼeha Jesucristo disípulo (Juan 13:35).

MBAʼÉICHAPA OJERREPARTI UMI PUVLIKASIÓN

¹⁶ Oñemog̃uahẽ hag̃ua opárupi pe mensáhe oñeʼẽva pe Rréinore, oñekotevẽ Biblia ha umi puvlikasión bíblica. Normálmente pe kuérpo de ansiáno oasigna peteĩ siérvo ministeriálpe oñatende hag̃ua literatúrare. Umi ermáno oñenkargáva koʼã mbaʼére ojagarra ensério iñasignasión. Haʼekuéra oreko umi rrehístro ikatu hag̃uáicha siémpre oĩ umi puvlikasión oikotevẽva pe kongregasión.

¹⁷ Ñande ningo ñañemeʼẽma Jehovápe, ha ñarrekonose entéro mbaʼe jarekóva haʼeha peteĩ rregálo oúva Jehovágui. Por ehémplo ñande rekove, ñane tiémpo, umi mbaʼe jaikuaáva ha jajapokuaáva, ha jaipuruse koʼã mbaʼe iservísiope (Luc. 17:10; 1 Cor. 4:7). Jaipuru porãvo koʼã mbaʼe jahechauka hína mbaʼeichaitépa jahayhu Jehovápe. Ñande ningo jaadora Jehovápe ha ñamombaʼeguasuse chupe umi mbaʼe iporãvéva jarekóva reheve, ha ñaime segúro haʼe oguerohoryha umi mbaʼe jajapóva hesehápe (Prov. 3:9; Mar. 14:3-9; Luc. 21:1-4; Col. 3:23, 24). Jesús heʼi vaʼekue: “Grátis oñemeʼẽ kuri peẽme, ha peẽ grátinte pemeʼẽ vaʼerã avei” (Mat. 10:8). Ñande ñameʼẽ ñande rekove ha umi mbaʼe jarekóva jaservi hag̃ua Jehovápe, ha upéva añetehápe ñanembovyʼa (Hech. 20:35).