Mbaʼérepa jarrespeta vaʼerã umi Jehová omoĩvape ñandedirihi hag̃ua

JASERVI hag̃ua Jehovápe iñorganisasiónpe, tekotevẽterei ñañemoĩ ipoguýpe, haʼe ningo pe Dios ogovernáva opa mbaʼe. Avei ñarrekonose vaʼerã Ñandejára Raʼy odirihiha pe kongregasión kristiána, ha entéro mbaʼe jajapóvape jahechauka vaʼerã jarrespetaha umi ñanemoakãvape. Tuichaiterei ideprovécho ñandéve jarekóramo enkuénta koʼã mbaʼe.

² Pe hardín de Edénpe ojehechaukáma vaʼekue enterovéva orekotaha omoakãva chupe. Upéva jaʼekuaa jaleévo umi léi omeʼẽ vaʼekue Ñandejára Génesis 1:28 ha 2:16, 17-pe. Entéro umi animál oĩta kuri umi hénte poguýpe ha umi hénte oĩ vaʼerã Ñandejára poguýpe. Ojesegírire Ñandejára omandáva ojeikóta kuri pyʼaguapýpe ha ojejapo porãta entéro mbaʼe. Tiémpo rire ojeʼe jey vaʼekue mávapa ñanemoakã. Apóstol Pablo oskrivi vaʼekue: “Aipota peikuaa Cristo omoakãha entéro kuimbaʼépe. Pe kuimbaʼe katu omoakã kuñáme, ha Ñandejára omoakã hína Crístope” (1 Cor. 11:3). Ko enseñánsa ohechauka enterovéva jarekoha ñanemoakãva, Jehová añoite natekotevẽi oñemoĩ avave poguýpe.

³ Hetaiterei persóna ko tiémpope noñemoĩséi avave poguýpe. Ko provléma oñepyrũ hardín de Edénpe. Upérõ ñande tuakuéra ypykue odesidi ijeheguiete ojei Ñandejára poguýgui ha norrekonoséi hikuái pe derécho haʼe orekóva ñanegoverna hag̃ua (Gén. 3:4, 5). Upéicharõ jepe, Adán ha Eva nokonsegíri pe liverta, upéva rangue, haʼekuéra oñemoĩ Satanás poguýpe, haʼéva hína pe ánhel iñañaitéva. Péicha yvyporakuéra oñemomombyry Ñandejáragui (Col. 1:21). Upévare la majoría umi hénte osegi “oĩ pe aña poguýpe” (1 Juan 5:19).

⁴ Ñaaprende rupi la Biblia omboʼéva ha jajapo la heʼíva pype, jajei Satanás poguýgui. Ñande ningo ñañemeʼẽ Jehovápe ha jajevautisa, péicha ñarrekonose Jehová haʼeha ñane governánte. Ñande ñapensa avei rréi David opensa haguéicha, haʼe heʼi vaʼekue Jehová haʼeha pe “Omoakãva opa mbaʼe” (1 Crón. 29:11). Ñande ningo kyreʼỹme jaʼe: “Perrekonose Jehová haʼeha Ñandejára. Haʼe ñandeapo vaʼekue, upévare ñande imbaʼe hína. Ñande ningo ijovecha mimi ha haʼe oñangareko ñanderehe, ñande hína ipuévlo” (Sal. 100:3). Jehová ipoderosoiterei ha okrea entéro mbaʼe, upévare omerese ñañemoĩ ipoguýpe (Apoc. 4:11). Enterove jaadoráva Jehovápe jasegi vaʼerã Jesús ehémplo, haʼe oñemoĩ vaʼekue Ñandejára poguýpe.

⁵ Hebreos 5:8 heʼi Jesús rehe: “Haʼéramo jepe Ñandejára Raʼy, haʼe oaprende mbaʼépa heʼise ñaneñeʼẽrendu umi mbaʼe osufri vaʼekuére”. Jesús oñemoĩ vaʼekue Itúa poguýpe ohasa asýramo jepe. Haʼe ndojapói ni ndeʼíri mbaʼevete ijehegui reínte. Jesús ndoipotái vaʼekue avave ombotuicha chupe umi mbaʼe ojapóvare (Juan 5:19, 30; 6:38; 7:16-18). Oĩrõ guare ko yvy ape ári, Jesús ovyʼa vaʼekue ojapóvo Itúa oipotáva, umi hénte oñemoĩ ha opersegíramo jepe chupe (Juan 15:20). Haʼe siémpre ohechauka oñemoĩha Itúa poguýpe. Jesús “oñeumilla” ha upéi “omano peteĩ yvyráre”. Heta mbaʼe porã ojehupyty Jesús oñemoĩgui Itúa poguýpe. Por ehémplo, jareko pe esperánsa jaikovévo pára siémpre, oñembotuicha Jehovápe, ha Ñandejára omeʼẽ Jesúspe peteĩ puésto ijyvatéva (Filip. 2:5-11; Heb. 5:9).

¿MÁVA POGUÝPEPA ÑAÑEMOĨ VAʼERÃ?

⁶ Jajapóvo Jehová volunta ñañemoĩ hína ipoguýpe, péicha jajehekýi heta mbaʼégui. Por ehémplo umi omboykéva Ñandejárape oiko ojepyʼapyeterei ha ndovyʼái. Ñane enemígo pe Diablo siémpre oiko oñehaʼã omokõ oimeraẽvape. ¿Mbaʼéichapa ikatu jajeprotehe chugui? Tekotevẽ ñañemoĩ mbarete ikóntrape, ñañemomirĩ Jehová renondépe ha ñaneñeʼẽrendu chupe (Mat. 6:10, 13; 1 Ped. 5:6-9).

⁷ Ñande jaikuaa porã Jesús omoakãha pe kongregasión ha omeʼẽ hague autorida pe ‘esklávo de konfiánsa ha iñarandúvape’. Jarekóvo enkuénta upéva, ñanepytyvõ ñañekomporta porã hag̃ua ha jatrata porã hag̃ua ótrope. Ñañemoĩramo Ñandejára poguýpe, ñaneñeʼẽrendúta entéro mbaʼe jajapóvape jaadora hag̃ua chupe. Por ehémplo, japredikáta, jaha meméta rreunionhápe ha japartisipáta upépe. Avei jaapojáta umi ansiánope ha umi mbaʼe ojejapóva Jehová organisasiónpe (Mat. 24:45-47; 28:19, 20; Heb. 10:24, 25; 13:7, 17).

⁸ Ñañemoĩramo Ñandejára poguýpe pe kongregasiónpe oĩta pyʼaguapy, ñañeñandúta segúro ha entéro mbaʼe ojejapóta en órden. Umi siérvo ifiélva ohechauka umi kualida porã Jehová orekóva (1 Cor. 14:33, 40). Rréi David ningo ohechakuaa vaʼekue mbaʼéichapa idiferénte Jehová siervokuéra ha umi hénte iñañáva, upévare haʼe heʼi vaʼekue: “¡Ovyʼa pe puévlo oadoráva Ñandejára Jehovápe!” (Sal. 144:15). Añetehápe ñande upeichaite avei ñañeñandu ñaĩ rupi Jehová organisasiónpe.

⁹ Ñañeʼẽmína koʼág̃a pe famíliare. Apóstol Pablo heʼi vaʼekue: ‘Pe kuimbaʼe omoakã kuñáme’. Haʼe heʼi avei Cristo omoakãha entéro kuimbaʼépe, ha Ñandejára omoakãha Crístope (1 Cor. 11:3). Umi tembireko oñemoĩ vaʼerã iména poguýpe, ha umi mitã ituakuéra poguýpe (Efes. 5:22-24; 6:1). Káda uno pe famíliape ojapóramo ipárte, oikóta hikuái pyʼaguapýpe.

¹⁰ Pe ména osegi vaʼerã Jesús ehémplo ha mborayhúpe oipuru vaʼerã pe autorida oñemeʼẽva chupe (Efes. 5:25-29). Haʼe ndorrechasamoʼãi ijautorida kómo kavésa, péro avei ndohasamoʼãi la rrája. Péicha hembireko ha ifamiliakuéra vyʼápe oñemoĩta ipoguýpe. Pe tembireko katu iména ajudánte, pe omoirũva chupe (Gén. 2:18). Pe tembireko ipasiénsia vaʼerã ha oapoja ha orrespeta vaʼerã iménape. Péicha iména oguerohorýta chupe ha iñimportanteveha katu, ojapóvo upéicha, pe tembireko ombotuicháta Ñandejárape (1 Ped. 3:1-4). Ména ha tembireko osegíramo koʼã konsého oĩva la Bíbliape, oipytyvõta ifamiliakuérape oñemoĩ hag̃ua avei Ñandejára poguýpe.

¹¹ Ñañemoĩramo Ñandejára poguýpe, jajapóta avei “umi autorida omandáva, pórke Ñandejára omeʼẽ chupekuéra pe podér” (Rom. 13:1-7). Ñande jarrespeta umi léi ha japaga umi impuésto, péicha ‘ñameʼẽ Césarpe la okorrespondéva chupe, péro Ñandejárape la okorrespondéva chupe’ (Mat. 22:21). Upéicha avei ojejapo jave umi arréglo ojepredika hag̃ua umi território, ojereko enkuénta heʼíva umi léi de proteksión de dáto oiméramo oaplika umi lugárpe. Ñande ningo jajapo umi autorida omandáva, noĩrima guive Ñandejára léi kóntrape, ha péicha rupi ikatu ñañemeʼẽmbaite pe predikasiónpe (Mar. 13:10; Hech. 5:29).

¹² Ñande ñañemoĩ vaʼerã Ñandejára poguýpe entéro mbaʼe jajapóvape. Jajerovia rupi, ñaime segúro og̃uahẽtaha pe tiémpo enterove hénte oñemoĩtahápe Jehová poguýpe (1 Cor. 15:27, 28). Jehová ovendesíta enterove persóna orrekonosévape haʼe añoite ikatuha ñanegoverna ha osegíva iñeʼẽrendu chupe pára siémpre.