Introduksión

Ko lívro nepytyvõta etopa pyaʼeve hag̃ua umi téxto ha rreláto bíblico ideprovéchotava embohovái porã hag̃ua umi mbaʼe ijetuʼúva oñepresentáva ndéve káda día. Nepytyvõta avei etopa hag̃ua umi téxto ikatútava eipuru eporomokyreʼỹ hag̃ua, térã eipytyvõ hag̃ua ótrope odesidi hag̃ua peteĩ mbaʼe ombovyʼátava Jehovápe. Ehekánte vaʼerã pe téma neinteresáva ha upéi eheja tandegia umi porandu ha umi explikasión orekóva káda rreláto bíblico (ehecha pe rrekuádro “Mbaʼéichapa ikatu reipuru ko puvlikasión”). Koʼág̃a ikatúta etopa pyaʼeve umi téxto bíblico nepytyvõ ha nekonsolátava. Etopáta avei heta óro kuʼi ikatútava ekomparti ótrondi, por ehémplo emokyreʼỹ ha eipytyvõ hag̃ua chupekuéra.

Mbaʼéichapa ikatu reipuru ko puvlikasión

Etopa hag̃ua pe téma neinteresáva, ikatu eheka pe vuskadórpe térã eheka por kategoría. Ko lívro oreko 7 kategoría: Umi mbaʼe ijetuʼúva, Komportamiénto, Kongregasión, Aiko lája káda día, Família, Che amista Jehovándi ha Che lája. Posívlemente eikérõ peteĩva koʼã kategoríape etopátama upe rehekáva hína. Eikéramo peteĩ kategoríape etopáta hetave téma, eiporavo pe ndegustavéva. Péro ndereikuaáirõ mbaʼe kategoríapepa oĩ pe téma nde rehekáva, ikatu eike heʼihápe Enterove ha osẽta peteĩ lísta oĩmbaitehápe enterovetéva umi téma. Káda téma guýpe etopáta unos kuánto subtítulo létra hũvévape. Koʼãva sapyʼánte haʼe peteĩ fráse térã peteĩ porandu. Elee rire umi téxto oĩva létra hũvévape, emboyke tiémpo epensa hag̃ua mbaʼéichapa pe téxto ojogueraha pe subtítulo heʼívandi. Sapyʼánte umi téma oreko jeýta diferénte seksión, péicha ifasilvéta ndéve etopa hag̃ua pe informasión. Oĩ párte heʼihápe “Ehecha avei”, upépe retopáta umi téxto ojogueraha avei pe téma oñeanalisávare. Heta vése etopáta avei peteĩ párte heʼíva hese “Ehémplo bíblico ikatúva nepytyvõ”. Pépe oñemoĩ unos kuánto téxto ha avei peteĩ explikasión ñantende porãve hag̃ua pe téxto. Koʼã explikasión nepytyvõta eikuaa hag̃ua mbaʼe rehepa epensa vaʼerã elee rire umi téxto.

Ko lívrope noñemoĩri entéro umi téxto oñeʼẽva peteĩ témare, péro ikatu nepytyvõ eñepyrũ hag̃ua einvestiga (Pr 2:1-6). Eikuaasevéramo, ikatu eipuru umi rreferénsia marhinál ha umi nóta de estúdio orekóva pe Traducción del Nuevo Mundo. Eipurukuaa avei pe Gía oipurúva testígo de Jehová otopa hag̃ua informasión, térã pe Índice de las publicaciones Watch Tower oĩva españólpe. Koʼãva nepytyvõta entende porãve hag̃ua mbaʼépa heʼise peteĩ téxto térã mbaʼéichapa ikatu reipuru. Elee umi informasión osẽ pyahuvéva, péicha eikuaa porãta mbaʼéichapa koʼág̃a oñentende upe reikuaaséva.

Roipotaite ningo ko lívro nepytyvõ la Biblia rupive, ikatu hag̃uáicha nearandu, neentendído ha eikuaa hag̃ua mbaʼépa iporã ha mbaʼépa ivai. Eipurúvo ko puvlikasión, reĩvéta konvensído ‘Ñandejára ñeʼẽ oikoveha ha orekoha podér’ (Heb 4:12).