8 JOSÉ
Haʼe oñenegaite pono ojapo ivaíva
JOSÉ imitãrõ guare, itúa Jacob ohayhueterei vaʼekue chupe ha Ijára Jehová upéichante avei. Péro upéva ndeʼiséi José oiko hague trankiloite. Jacob ombojeroviave rupi Josépe, iñermanokuéra oñepyrũ iselosoiterei, ndochaʼéi hese ha otrata vai chupe. Peteĩ jey Jehová ohechauka Josépe iképe amo gotyove iñermanokuéra oñesũtaha henondépe. José ermanokuéra oikuaárõ guare upéva ndochaʼeivéntema hese.
Tiémpo rire, José orekópe 17 áñorupi, itúa heʼi chupe ohomi hag̃ua ohecha mbaʼéichapa oĩ iñermanokuéra ha upearã haʼe oviaha unos kuánto díare. Og̃uahẽrõ guare iñermanokuéra oĩháme, haʼekuéra ojagarra ha opoi chupe peteĩ póso hypa vaʼekuépe. Heta anga José ojerure sokórro pe póso guive, péro haʼekuéra ipyʼahatã ha ni nopenái hese. Okalkuláma voi kuri ojuka hag̃ua chupe. Upéicharõ jepe, amo ipahápe odesidi hikuái ovendetaha Josépe unos kuánto komersiánte ohasávape upérupi. Upéi José ermanokuéra ogueroviaka itúape peteĩ animál salváhe ojuka hague chupe. Péro jaikuaaháicha ndahaʼéi upéva la oiko vaʼekue. Josépe ojegueraha mombyry pe sur gotyo, Egíptope. Upépe oñevende chupe oservi hag̃ua esklávoramo Potifar rógape, haʼéva faraón guardiakuéra kapitán.
Upe situasiónpe José ikatu vaʼerãmoʼã oñedesanimaite, péro haʼe ohechauka ipyʼaguasuha ha ombaʼapo kyreʼỹ. La Biblia heʼi: “Jehová oĩ José ndive”. Jehová oipytyvõ Josépe ikatu hag̃uáicha osẽ porã chupe opa mbaʼe ojapóva. Potifar oheja voi kuri José kárgope hóga kompletoite.
Tiémpo rire oñepresenta jey Josépe hetave provléma. Oĩ aja Egíptope, ‘José okakuaa ha oiko chugui peteĩ mitãkariaʼy iporã ha imbaretéva’. Upévare Potifar rembireko ou iñakãvaiete hese. Haʼe hovaʼatã ha oikuaauka voi Josépe la opensáva. Peteĩ jey heʼi voi chupe: “Ejúna eñeno chendive”. ¿Mbaʼépa ojapóta José? Ihentekuéra oĩ mombyry, haʼe peteĩ esklávonte ha ipatronkuéra ikatu ojapo chugui ojaposéva. Haʼe orrechasárõ Potifar rembirekópe, upe kuña oreko la podér ombohasa asy hag̃ua chupe. ¿Ojapótapa José la oipotáva upe kuña? ¿Térãpa ipyʼaguasúta oñenega hag̃ua chugui?
José oikuaa vaʼekue ipatrón rembireko ikatuha ombohasa asyeterei chupe, ¿mbaʼépa la ombopyʼaguasu vaʼekue chupe oñenega hag̃ua chugui?
La Biblia heʼi ‘José nopenái hague hese’. José heʼi chupe ndaikatuiha otraisiona ipatrónpe pórke haʼe okonfiaiterei hese. Upéva ári heʼi avei chupe: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?”. José ohayhueterei rupi Itúa Jehovápe, ipyʼaguasu kuri oñenega hag̃ua pe kuñágui. Péro Potifar rembireko hovaʼatã ha ndohejái chupe, “káda día” oiko ombyapura Josépe. Peteĩ día ndaipóri jave ni peteĩ esklávo pe ógape, Potifar rembireko ojagarra Josépe ijaógui ha heʼi chupe: “¡Ejúna eñeno chendive!”. Upépe José ojetyvyro chugui, osẽ odipara ha oheja pe kuñakarai pópe la ijao. Upéi Potifar oúrõ guare, hembireko ohechauka chupe la José ao ha heʼi voi oviolasemoʼã hague chupe. Potifar ipochyeterei ha omondo Josépe kárselpe.
Koʼág̃a José oĩ peteĩ kársel iñypytũvape. Ha peteĩ tiémpore oñeenkadena chupe ha oñeñapytĩ ipy ha ijajúragui (Sal. 105:17, 18). Upe situasiónpe José ikatu kuri oñedesanimaite ha opensa nomehoramoʼãveimaha isituasión. ¿Jehová piko oheja rei mbaʼe chupe? ¡Ni mbaʼevéicharõ! José osegi kuri ojerovia Ijárare, upévare Jehová ovendesi chupe. Tiémpo rire, pe ofisiál oĩva enkargádo pe kárselpe ohejáma voi José kárgope entéro mbaʼe. Haʼe iguápo ha ombaʼapo jejopy oĩ aja préso ha káda áño ohasáva osegi ohechauka ipyʼaguasuha.
Jehová ojevale vaʼekue Josére pórke haʼe osegi ojerovia ha ipyʼaguasu. Peteĩ jey, Ñandejára ohechauka faraónpe iképe mbaʼépa oikóta amo gotyove ha ombokatupyry Josépe oexplikakuaa hag̃ua mbaʼépa heʼise koʼã suéño. José omombeʼu pe rréipe ñepyrũrã 7 áñore oĩtaha hetaiterei hiʼupy, péro upéi 7 áño aja oĩta peteĩ ñembyahýi guasu. Faraón ijurujái opyta. Upémarõ oelehi Josépe omoakã hag̃ua umi traváho tekotevẽtava ojejapo ou mboyve pe ñembyahýi guasu. Heʼi voi José tuichaiterei omandataha Egíptope, faraón añoite omandavéta chugui. Péicha José ikatu kuri osalva umi egípciope ani hag̃ua omanomba vareʼágui, péro ndahaʼéi chupekuérante síno avei iparientekuérape. Iñermanokuéra oúrõ guare Egíptope hiʼupyreka, opillaʼỹetére oñesũ hikuái iñermáno menór renondépe. Péicha oñekumpli umi mbaʼe José ohecha vaʼekue iképe. Upérõ guare José ermanokuéra okambiáma kuri. Yma haʼekuéra ndochaʼeieterei Josére, péro koʼág̃a José la osalváva chupekuéra, ituakuérape ha ifamiliarépe. José ojapo entéro koʼã mbaʼe pórke siémpre ipyʼaguasu ha ojerovia Jehováre.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa José ipyʼaguasu hague?
Einvestigamína
1. ¿Mbaʼérepa jaʼekuaa siertoha umi mbaʼe la Biblia heʼíva Josére oĩ aja Egíptope? (g 11/10 15 párr. 2-wcgr).
2. ¿Mbaʼéichapa José oikuaa raʼe Ñandejárape g̃uarã peteĩ oporomoakãratĩva ojapoha peteĩ ‘mbaʼe ivaietereíva’? (Gén. 39:9; w22.08 26 párr. 2).
3. ¿Mbaʼérepa Jehová opermiti José omanda guasu Egíptope? (w96 1/5 11 párr. 4-wcgr). A
Taʼanga A
4. ¿Mbaʼépa ohechauka José ojerovia mbaretéiti hague Jehováre orekórõ guare 110 áño? (Gén. 50:25, 26; w07 1/6 29 párr. 10, 11-wcgr). B
Taʼanga B
Ejepyʼamongetamína ndejehe
Relee rire mbaʼéichapa José otrata vaʼekue iñermanokuérape, ¿mbaʼéichapa iñehémplo ikatu nepytyvõ ndetrata vaíramo peteĩ ermáno? (Gén. 45:4, 5; 50:19-21).
José ifiél vaʼekue Jehovápe oĩrõ jepe mombyry hógagui. ¿Mbaʼéichapa iñehémplo ikatu nepytyvõ...
... reĩ aja eskuéla térã koléhiope? C
Taʼanga C
... eviaha jave? D
Taʼanga D
... eipuru jave nde selulár térã nde távlet umíva? E
Taʼanga E
¿Mbaʼéichapa ikatu ndepyʼaguasu José ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Josépe Jehová omoingove jey vove chupe?
Reikuaave hag̃ua
Jehová opermitíramo jepe José ohasa asy, oipytyvõ avei chupe oaguanta hag̃ua. ¿Mbaʼéichapa Jehová ikatu nepytyvõ ndéve avei?
Jehová siémpre oĩta nde ykére ijetuʼu jave nendive (w23.01 14-19).
¿Mbaʼéichapa umi mitã ikatu ojogua Josépe otrata vai jave chupe ótro mitã?