“Mitãnguéra oreko derécho oikuaávo Ñandejárape”
PÉICHA oñembohéra peteĩ aty omotenondevaʼekue Academia Sueca de Derechos del Niño. Upe aty ojejapo 9 de diciembre de 2008, ha upépe oho heta omoakãva pe Iglesia de Suecia ha ambue rrelihión kristiána, oho avei islam ha movimiento humanista omoakãva.
Peteĩ rrelihión omoakãva heʼi: “Ndaikatúi voi jaʼepa mbaʼeichaitépa umi istória oĩva la Bíbliape oipytyvõ mitãnguérape oikuaa hag̃ua Ñandejárape”. Ha mbaʼéichapa umi istória oipytyvõ mitãnguérape oikuaa hag̃ua Ñandejárape?
Upe karai heʼi: “Umi istória oĩva la Bíbliape ikatu oipytyvõ mitãnguérape opensa ha ojepyʼamongeta hag̃ua”. Haʼe heʼi avei: “Umi istória oñeʼẽva Adán ha Eva rehe, Caín ha Abel, David ha Goliat rehe, niño Jesús, Zaqueo pe impuésto kovraha, pe hijo pródigo térã pe kariaʼy oikovaʼekue iñakãre ha pe Samaritáno ipyʼaporãva rehe ohekomboʼe chupekuéra ohechakuaa hag̃ua mbaʼépa iporã ha ivai. Pór ehémplo oĩ umi istória ohechaukáva ivaiha ñaporotraisiona, ndajachaʼéi ñande rapicháre ha ñanderekovai. Ha oĩ avei umi ohechaukáva iporãha ñaporoperdona, japorohayhu, ñamyengovia porã ñande rapichápe ojapóva ñanderehe, jaiko porã jey oñondive ha jaiko oñoermánoicha”. Ha upéi heʼive: “Omoĩ avei chupekuéra ehémplo osegi hag̃ua”.
Jaikuaa ningo iporãitereiha jalee la Biblia. Péro umi mitã piko ijehegui reínte ikatu ontende la oleéva ‘opensa ha ojepyʼamongetápente’ hese?
La Biblia ningo ohechauka umi kakuaa jepe oikotevẽha oñepytyvõ chupekuéra ontende hag̃ua. Oñeʼẽ pór ehémplo peteĩ etíope rehe, haʼe ningo nontendeivaʼekue Ñandejára Ñeʼẽ “opensa ha ojepyʼamongetápente” hese. La Biblia omombeʼu upe etíope olee hague peteĩ profesía ohaivaʼekue Isaías ha nontendéi mbaʼépa heʼise. Upévare oagradese Felipe oipytyvõ haguére chupe ontende hag̃ua (Hech. 8:26-40). Ha ndaheseañói ningo oiko upéicha. Enterovénte voi ñaikotevẽ oñemyesakã ñandéve Ñandejára Ñeʼẽ ha koʼýte umi imitãvéva oikotevẽta upéva.
La Biblia heʼi: ‘Pe vyroreko ojoaju voi mitãrusu pyʼapýre’ (Pro. 22:15, ÑÑB). Upévare iñimportánte oñepytyvõ mitãnguérape ojerovia hag̃ua Ñandejárare ha hekoporã hag̃ua. Ha mávapa oipytyvõvaʼerã chupekuéra? Ituvakuéra, ha upearã ikatu oiporu la Biblia ha kongregasiónpe oñemboʼéva. Umi mitã ningo oreko voi derécho oñehekomboʼévo chupekuéra upéicha. Michĩmi guive oñehekomboʼemavaʼerã chupekuéra la Biblia heʼiháicha ikatu hag̃uáicha ojerovia Ñandejárare. Upéicharõmante oikóta chuguikuéra ‘kakuaa ikatúmava ohechakuaa mbaʼépa iporã ha ivai’ (Heb. 5:14, BNP).