Konsého 5

Jaikuaa porãve Ñandejárape

MBAʼÉPA HEʼI LA BIBLIA: ‘Ovyʼa umi ohechakuaáva oikotevẽha Ñandejárare’ (Mateo 5:3, NM).

PROVLÉMA: Oĩ hetaiterei rrelihión ha ojoavypa hikuái upe omboʼévape. Péro mbaʼéichapa jaikuaáta mavaitévapa oguerohory Ñandejára? Oĩ tapicha ifamósova heʼíva umi ivýrovante ojeroviaha Ñandejárare ha omombaʼeguasu chupe. Haʼekuéra heʼi upéva ombyaiha yvypórape. Peteĩ rrevísta hérava Macleanʼs omombeʼu mbaʼépa heʼi peteĩ karai ndogueroviáiva oĩha Ñandejára: “Umi kristiáno omboʼe heta mbaʼe umi sientífiko jepe ndaikatúiva ohechauka, ha ndaikatúiva jahecha ni ñahendu. [...] Upéva ogueraha vaipa yvyporakuéra ha ikáusare oiko heta ñorairõ”.

MBAʼÉPA IKATU JAJAPO: Ñañehaʼã jaikuaa porãve Ñandejárape (Romanos 1:20; Hebreos 3:4). Aníkena avave ñandejoko ñambohovái hag̃ua koʼã porandu iñimportantetéva: “Mbaʼérepa jaikove? Mbaʼépa oiko ñamano rire? Mbaʼérepa jahasa asyete ko yvy ape ári? Mbaʼépa jajapovaʼerã Ñandejára ñandeguerohory hag̃ua?”. Jaikuaa raẽmante vaʼerã koʼã mbaʼe ikatu hag̃uáicha javyʼa.

Upéva ndeʼiséi jaikotaha jaguerovia opa mbaʼe ojeʼéva ñandéve. La Biblia heʼi Ñandejára oipotaha ñapensa ha jajepyʼamongeta jaikuaa hag̃ua mbaʼépa Haʼe oguerohory (Romanos 12:1, 2). Ikatu hasy ñandéve ñahesaʼỹijo Ñandejára Ñeʼẽ ha jajapo heʼíva ipype, péro upéva ojapo porãta katuete ñanderehe. Jajehekýita heta akãrasýgui, saʼive jajepyʼapýta ha koʼýte javyʼavéta. Kóva ndahaʼéi ñeʼẽ reínte. Hetaiterei tapicha oparupigua oiko porã ha ovyʼaiterei oikuaa rupi mbaʼépa heʼi la Biblia Ñandejárare.

Jahechávo mbaʼéichapa ñasẽ porã ñaneñeʼẽrendúramo Ñandejárape, katuete jahayhuvéta chupe. Mbaʼérepa nderejeruréi peteĩ testígo de Jehovápe tanemboʼe la Biblia heʼíva? Rejapóramo upéva repensáta apóstol Pablo opensa haguéicha. Haʼe heʼi: ‘Pe jerovia añeteguáva tuicha mbaʼe umi oñemomirĩvape g̃uarã; umíva ovyʼa oguerekóva reheve’ (1 Timoteo 6:6, ÑÑB).

[Nóta oĩva taʼanga ndive páhina 8]

Ndete rehechavaʼerã mbaʼépa oguerohory Ñandejára