Ndépa reñeporandúmava koʼã mbaʼe?

HETA mbaʼe ñañeporandu ha jaikuaase jepi. Umíva apytépe oĩ koʼãva:

• Ojepyʼapýpa Ñandejára ñanderehe?

• Opánepa ñorairõ ha jehasa asy?

• Mbaʼépa oiko ñandehegui ñamano rire?

• Ikatúnepa jahecha jey umi jahayhúva omanovaʼekuépe?

• Mbaʼeichagua ñemboʼépa ohendu Ñandejára?

• Mbaʼépa jajapovaʼerã javyʼa hag̃ua?

Mávapa ikatu okontesta ñandéve koʼã porandu? Oĩ atyraite lívro ojehaíva okontesta hag̃ua koʼã mbaʼe. Péro heta vése umi konsého ojoavypa ha osẽ jey ótro lívro heʼíva ótra kosaite.

Upéicharamo jepe, oĩ peteĩ lívro ombohováiva koʼã porandu. Ha ikatu jajerovia hese. Jesucristo heʼivaʼekue oñemboʼérõ guare Ñandejárape: “Ne ñeʼẽ niko añetegua” (Juan 17:​17, JMP). Koʼápe haʼe oñeʼẽvaʼekue la Bíbliare. Koʼág̃a jahechamíta mbaʼéichapa la Biblia omyesakã porã ñandéve koʼã porandu.

Ojepyʼapýpa Ñandejára ñanderehe?

MBAʼÉREPA JAIKUAASE KO MBAʼE: Ko múndo ningo henyhẽ inhustísia ha mbaʼe vai apógui. Ha hetaiterei rrelihión omboʼe koʼã mbaʼe vai oikoha Ñandejára oipota rupi.

MBAʼÉPA OMBOʼE LA BIBLIA: Umi mbaʼe vai ni mbaʼeveichavérõ ndoúi Ñandejáragui. Job 34:10 heʼi: ‘Ani peimoʼã Ñandejára, pe ipuʼakapáva, ojapoha ivaíva térã hekopeguaʼỹ!’. Ñandejára ningo oipota iporãva enterovépe g̃uarã. Upévare Jesús ñanemboʼevaʼekue jajerure hag̃ua: “Ore Ru reiméva yvágape [...]. Tou ne rréino, tojejapo ne rembipota Yvy ári yvagapeguáicha” (Mateo 6:​9, 10, BNP). Ñandejára ningo ojepyʼapy ñanderehe ha ojapóma heta sakrifísio okumpli hag̃ua hembipota (Juan 3:16).

Ehechami avei Génesis 1:​26-28; Santiago 1:13; ha 1 Pedro 5:​6, 7.

Opánepa ñorairõ ha jehasa asy?

MBAʼÉREPA JAIKUAASE KO MBAʼE: Umi gérra ningo ojukáma hetaiterei tapichápe. Ha avei enterovénte jahasa asy ko Yvy ape ári.

MBAʼÉPA OMBOʼE LA BIBLIA: Ñandejára opromete oĩtaha pyʼaguapy ko Yvy ape ári. Haʼe ogoverna vove yvyporakuéra “noñembosakoʼimoʼãvéi ñorairõrã”. Upéva rangue ‘ikyse pukúgui ojapóta arádo’ (Isaías 2:4). Ñandejára oipeʼapaitéta opaichagua inhustísia ha jehasa asy. La Biblia heʼi: “[Ñandejára] omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy; opa oĩvaʼekue yma [umíva apytépe inhustísia ha jehasa asy] ndaiporivéima” (Apocalipsis [Revelación] 21:​3, 4).

Ehechami avei Salmo 37:​10, 11; 46:9; ha Miqueas 4:​1-4.

Mbaʼépa oiko ñandehegui ñamano rire?

MBAʼÉREPA JAIKUAASE KO MBAʼE: Hetaiterei rrelihión omboʼe jarekoha peteĩ párte osegíva oikove ñamano rire. Oĩ heta ogueroviáva umi omanóva ikatuha ojapo ivaíva ñanderehe; térã Ñandejára okastigaha umi iñañávape tatarendýpe opa ára g̃uarã.

MBAʼÉPA OMBOʼE LA BIBLIA: Ñamano rire ndajaikovéima mamove hendápe. ‘Omanóva katu ndoikuaavéima mbaʼeve’ heʼi Eclesiastés 9:5. Umi omanóva noñanduvéima ha nopensavéima mbaʼeve. Upévare ndaikatúi ñanepytyvõ térã ojapo ivaíva ñanderehe (Salmo 146:​3, 4).

Ehechami avei Génesis 3:19 ha Eclesiastés 9:​6, 10.

Ikatúnepa jahecha jey umi jahayhúva omanovaʼekuépe?

MBAʼÉREPA JAIKUAASE KO MBAʼE: Maymáva ningo ñaimese ha javyʼase umi jahayhúva ndive. Upévare katuete jahechase jey umi jahayhúva omanovaʼekuépe.

MBAʼÉPA OMBOʼE LA BIBLIA: Hetaiterei tapicha omanovaʼekue oikove jeýta. Jesús heʼivaʼekue ‘umi omanóva osẽtaha oñeñotỹhaguégui’ (Juan 5:​28, 29, BNP). Ñandejára oipotahaguéicha iñepyrũme, koʼã tapicha ikatúta oiko peteĩ vyʼa rendápe ko Yvy ape ári (Lucas 23:43). Ñandejára opromete avei entéro yvypóra iñeʼẽrendúva hesãitaha ha oikotaha opa ára g̃uarã. La Biblia heʼi: “Heko potĩvape opytapáne ko yvy, ha upépe haʼekuéra oikóne opa árape” (Salmo 37:29).

Ehechami avei Job 14:​14, 15; Lucas 7:​11-17; ha Hechos 24:15.

Mbaʼeichagua ñemboʼépa ohendu Ñandejára?

MBAʼÉREPA JAIKUAASE KO MBAʼE: Umi hénte enterove rrelihionpegua oñemboʼe jepi. Péro oĩ heta heʼíva noñekontestaiha chupekuéra iñemboʼe.

MBAʼÉPA OMBOʼE LA BIBLIA: Jesús heʼivaʼekue naiporãiha jaʼe jey jey peteĩ mbaʼe meménte ñañemboʼe jave. Haʼe heʼi: ‘Peñemboʼe jave ani peje peteĩ mbaʼe meménte’ (Mateo 6:​7, NM). Ñandejára ñanerendu hag̃ua, ñañemboʼevaʼerã Haʼe oipotaháicha. Upearã tekotevẽ jaikuaa raẽ Haʼe oipotáva. Primera de Juan 5:​14, [JMP] heʼi: ‘Jajerovia niko Ñandejára ñanerendutaha, jajeruréramo chupe haʼe oipotaháicha’.

Ehechami avei Salmo 65:2; Juan 14:​6, 14; ha 1 Juan 3:22.

Mbaʼépa jajapovaʼerã javyʼa hag̃ua?

MBAʼÉREPA JAIKUAASE KO MBAʼE: Heta hénte oimoʼã ovyʼataha ipláta hetáramo, ifamóso térã iporãramo. Upévare oiko koʼã mbaʼe rapykuéri, péro ndovyʼái jeýnte avei.

MBAʼÉPA OMBOʼE LA BIBLIA: Jesús ohechauka mbaʼépa jajapovaʼerã javyʼa hag̃ua. Haʼe heʼi: ‘Ovyʼavaʼerã umi ohechakuaáva oikotevẽha Ñandejárare’ (Mateo 5:3). La Biblia ñanepytyvõ jaikuaa hag̃ua mbaʼépa pe iñimportantevéva yvyporakuérape g̃uarã. Upéva hína jaikuaa Ñandejárape ha avei mbaʼépa oipota ñandéve g̃uarã. Jahechakuaáramo koʼã mbaʼe iñimportanteha, katuete ñañehaʼãta jahecha mbaʼépa heʼi la Biblia jadesidi mboyve oimeraẽ mbaʼe. Upéicharõ añoite ikatúta javyʼa añetehápe (Lucas 11:28).

Ehechami avei Proverbios 3:​5, 6, 13-18 ha 1 Timoteo 6:​9, 10.

Jahecháma mbaʼépa heʼi la Biblia koʼã seis porandúre. Reikuaasevépa koʼã mbaʼégui? Rehechakuaáramo ‘reikotevẽha Ñandejárare’, katuete reikuaasevéta. Ikatu avei oĩ ambue mbaʼe reikuaaséva, pór ehémplo: “Ñandejára ojepyʼapýramo ñanderehe, mbaʼérepa oheja ymaite guivéma oĩ jehasa asy ha ñaña? Mbaʼéichapa ikatu jajogueraha porãve ñane família ndive?” La Biblia omyesakã porã koʼã porandu ha hetaiteve mbaʼe.

Upéicharõ jepe, koʼág̃a rupi saʼi oĩ oikuaaséva la Biblia heʼíva. Umíva oimoʼã ko lívro ipukueterei ha hasy oñentende hag̃ua. Ha nde, reipotánepa peteĩ tapicha nepytyvõ rentende hag̃ua la Biblia? Testigos de Jehová ikatu nepytyvõ ko mbaʼépe.

Upearã oiporu hikuái pe lívro Mbaʼépa añetehápe omboʼe la Biblia? Ko lívro nepytyvõta rehecha hag̃ua mbaʼépa heʼi la Biblia umi porandu iñimportantevévare. Ha avei peteĩ testígo ikatu oho nde rógape térã ndéve opyta porãvetahápe, ostudia hag̃ua nendive la Biblia. Káda semána pehesaʼỹijóta mbykymi Ñandejára Ñeʼẽ ha natekotevẽmoʼãi repaga mbaʼeve. Hetaiterei tapicha oparupigua ostudiáma péicha. Ha oĩma heta ovyʼáva ontendehaguére la Biblia heʼíva.

Ndaipóri mbaʼeve iporãvéva upévagui. La Biblia ningo omyesakã ñandéve umi mbaʼe nañantendéiva, ha ñanepytyvõ ñamboyke hag̃ua heta japu ñanemongyhyjéva. Avei omeʼẽ ñandéve esperánsa ha ñanembovyʼa. Jesús ningo heʼi voi: “Peikuaáta pe añetegua, ha upe añetegua penemosãsóta” (Juan 8:​32, JMP).