Aiporupaite che tiémpo Jehová servísiope

Oñepyrũ riremínte áño 1942, Estados Unidos oike pe Segunda Gérra Mundiálpe, upérõ ojapóma kuri 5 áño astudia hague universidápe ha ajerresivipotaitéma de arkitékto. Upe tiémpope aiko vaʼekue peteĩ apartaméntope mokõi che amígondi, upéi peteĩva heʼi chéve aha hag̃ua añemongeta peteĩ karai ndive, ovisitáva jepi umi ótro oikóvape avei upe edifísiope. Upépe aikuaa ypy vaʼekue peteĩ testígo de Jehová héravape John (Johnny) Brehmer. Aponderaiterei ahechávo mbaʼéichapa oiporu la Biblia ombohovái hag̃ua opa mbaʼe oñeporandúva chupe. Upéi añepyrũ astudia hendive la Biblia ha tiémpo rire asẽ jepi avei apredika hendive.

Johnny túva, Otto, oreko vaʼekue pe puésto iñimportantevéva peteĩ vánkope, oĩva Wálnutpe (Iowa), ha upe tiémpope oiko chugui testígo de Jehová. Péro oheja upe traváho, ikatu hag̃uáicha oiporuve itiémpo Ñandejára servísiope. Upe karai ha ifamiliakuéra ehémplo, tuicha chemokyreʼỹ adesidi hag̃ua ajapo peteĩ mbaʼe iñimportantetereíva.

ADESIDÍMA VAʼERÃ MBAʼÉPA AJAPÓTA

Peteĩ díape, pe direktór universidapegua heʼi chéve oguejyetereimaha che notakuéra ha ndajerresivimoʼãiha yma che nóta porã haguérente. Upémarõ añemboʼe Jehovápe che pyʼaite guive ha ajerure chupe tachepytyvõmi aikuaa hag̃ua mbaʼépa ajapóta. Upéi, ajerresivi riremi de inheniéro, che profesorkue cherenói ha heʼi chéve oñekuaveʼẽ hague traváho peteĩ inheniérope g̃uarã, ha haʼe heʼíma hague che ahataha. Aagradese che profesórpe, péro haʼe chupe che adesidíma hague aiporupaitetaha che tiémpo Jehová servísiope. Upéi, 17 de junio de 1942-pe ajevautisa, ha tiémpo riremi añepyrũma che prekursorádo (péicha ohenói umi testígo de Jehová oiporupaitévape itiémpo Ñandejára servísiope).

Upe áñope ojeʼe chéve añepresenta hag̃ua pe ofisína de reklutamiéntope. Che aha, péro amombeʼu porã chupekuéra che konsiénsia nopermitiriha chéve aha gerrahápe. Avei apresenta chupekuéra peteĩ dokuménto oprepara vaʼekue umi che profesór universidapegua, oñeʼẽ porãhápe cherehe ha heʼihápe che haʼeha peteĩ inheniéro katupyry. Péro umi profesór oñeʼẽ porãramo jepe cherehe, chemulta hikuái 10.000 dólar (ojapóva amo 45 millón de guaraníesrupi) ha osẽ chéve 5 áño de kársel Léavenworthpe (Kansas, Estados Unidos).

AIMÉRÕ GUARE KÁRSELPE

Pe kársel oreko peteĩ gránha, ha upépe rombaʼapo 230 rasa Testígo ha oĩ guárdia orevihiláva. Umi guárdia apytépe oĩ oikuaáva mbaʼérepa rojegueraha préso ha imbaʼerechakuaa orendive hikuái.

Oĩ voi guárdia orepytyvõ vaʼekue ikatu hag̃uáicha roñembyaty rostudia hag̃ua la Biblia ha rorresivi hag̃ua umi puvlikasión vívlika pe kárselpe. Pe direktór jepe oñeanota ojegueru hag̃ua chupe pe rrevísta Consolación (koʼág̃a hérava ¡Despertad!).

ASẼ KÁRSELGUI HA ASERVI MISIONÉRORAMO

Chéve ningo osẽ kuri 5 áño de kársel, péro amo ipahápe 3 áñonte apyta. El 16 de febrero de 1946 asẽma, opa riremi pe Segunda Gérra Mundiál. Asẽre ajapo jeýma che prekursorádo ha cheasigna hikuái Léavenworthpe. Añetehápe akyhyje, pórke upépe ndojechaʼéi vaʼekue upe tiémpope umi testígo de Jehováre. Upérõ ijetuʼueterei chéve akonsegi hag̃ua traváho, ha koʼýte ijetuʼu chéve atopa peteĩ lugár aiko hag̃ua.

Chemanduʼa peteĩ díape apredika jave, ag̃uahẽ hague peteĩ guárdia oñangareko vaʼekue orerehe rógape. Haʼe ipochyeterei ha heʼi chéve: “¡Tereho chéve koʼágui!”, ha ahechávo orekoha peteĩ garróte joguaha ipópe, pyaʼeterei asẽ upégui. Ótro ógape katu peteĩ kuñakarai heʼi chéve: “Cheraʼarõmi sapyʼaite”, ha omboty la hokẽ. Ahaʼarõ aja upépe, ahecha sapyʼa pe kuñakarai oavri iventána yvategua ha oñohẽ cherehe un válde y kyʼa. Ahasáramo jepe koʼã mbaʼe ijetuʼúva, heta mbaʼe porã avei ahupyty predikasiónpe. Por ehémplo, tiémpo rire aikuaa heta umi oheja vaʼekue chehegui puvlikasión vívlika oiko hague chuguikuéra testígo de Jehová.

Áño 1943-pe oñepyrũ ojejapo peteĩ kúrso misionerokuérape g̃uarã Nueva Yórkpe oñehenóiva Escuela Bíblica de Galaad de la Watchtower. Ha ojejapótarõ guare pe kláse 10, cheinvita hikuái aha hag̃ua, ha 8 de febrero de 1948-pe atermina pe kapasitasión. Upégui chemondo hikuái Costa de Órope, koʼág̃a haʼéva Ghana.

Ag̃uahẽ rire upépe, apredika umi européope ha umi ofisiál upepeguápe. Fin de semanakue aipytyvõ peteĩ kongregasión oĩvape upe lugárpe ha apredika hendivekuéra ogahárupi. Avei avisita umi testígo de Jehová oikóvape mombyry pe siudágui ha aipytyvõ chupekuéra ikatupyry hag̃ua predikasiónpe. Ha aservi avei superintendénte viahánteramo Costa de Marfílpe.

Aservírõ guare upe lugárpe, aaprende heta mbaʼe umi natívo afrikánogui, aiko haʼekuéra oikoháicha, ake umi ogaʼi de adóvepe ha akaru che pópe. Ha aha hag̃ua váñope, asẽ vaʼerã okápe, ojapo haguéicha umi isrraelíta oikórõ guare pe desiértore (Deuteronomio 23:12-14). Che ha umi ótro misionéro roiko rupi haʼekuéra oikoháicha, umi hénte orerayhu ha ojepokuaave orerehe. Péro oĩ avei ndochaʼéiva orerehe ha oñehaʼãva oanula ore dokumentokuéra ani hag̃ua ropyta upe lugárpe. Péro heta funsionário rembireko oñepyrũ ostudia la Biblia orendive, ha haʼekuéra okonvense iménape ani hag̃ua opermiti oiko upéva.

Áfricape, heta misionérope ojagarra akãnunduroʼy (paludismo), ha chéve avei cherupyty upéva. Peteĩ jey aryrýi asũsũ ha adevariapa akãnundúgui, pe cherañykã oryrýi opopo ha ndaikatúi ajoko. Upéicharõ jepe, avyʼa ha añeñandu porãiterei aipytyvõ haguére umi héntepe oikuaa hag̃ua Ñandejárape.

Asẽ mboyvemi Estados Unídosgui, aikuaa kuri peteĩ kuñataĩ héravape Eva Hallquist, ha umi cuatro áño che aiko aja Áfricape, siémpre roñekomunika por kárta. Haʼe oho kuri pe kláse 21-pe, Escuela Bíblica de Galaádpe, ha aikuaárõ guare haʼe omohuʼãtaha ikúrso 19 de julio de 1953, aha pe asambléa internasionál ojapóvape umi testígo de Jehová Estadio de los Yánkeespe (Nueva York). Upérõ chesogue ha ndarekói che pasaherã, upémarõ ajerure pe kapitánpe ndaikatuichénepa chegueraha hikuái ivárkope Estados Unídospe ha ambaʼapotaha pe viáhe aja akuvri hag̃ua che pasáhe, ha upéicha aha hendivekuéra.

Heta mbaʼe rohasa rohokuévo pe mar rehe, ha 22 día haguépe rog̃uahẽ sapyʼa. Che ag̃uahẽre voi aháma Eva rendápe Betel de Brooklynpe, oĩháme pe ofisína sentrál orekóva umi testígo de Jehová. Upéi, romaña jave pe rrío ha umi paisáhe neporãmba jepéva ojekuaávare pe terrása ári guive, haʼe Évape amendaseha hese. Ha romenda rire, roho roservi oñondive Costa de Órope.

AÑANGAREKO CHE TUVAKUÉRARE

Heta áño aservi rire Eva ndive Áfricape, che sy cheavisa papa oguerekoha kánser ha oĩ vaieteha. Upémarõ ajerure permíso ha roho jey Eva ndive Estados Unídospe. A mas día papa oempeorave ohóvo ha upe riremínte omanóma.

Upéi roho jey Ghánape ha cuatro áño haguérupi, mama avei oñepyrũma hasykatu ha oĩ vaiete voi. Ore amigokuéra heʼi oréve iporãvetaha roho roñangareko hag̃ua hese. Upérõ 15 áñoma che aservi misionéroramo ha umívagui 11 áño ahasa Eva ndive upe servísiope, ha ijetuʼúramo jepe oréve, rodesidi roheja ore servísio roho hag̃ua Estados Unídospe.

Heta áñore roñoturna roñangareko hag̃ua mama rehe, ha oĩ porãmi jave roipytyvõ jepi chupe oho hag̃ua rreunionhápe. Upéi 17 de junio de 1976, omano orekópe 86 áño. Ha ivaiveha katu nueve áño haguépe, peteĩ doktór heʼi Évape orekoha kánser. ¡Ambyasyeterei ningo! Heta anga oiko ogueropuʼaka hag̃ua imbaʼasy, péro amo ipahápe, ndaikatuvéima rojapo mbaʼeve, ha 4 de junio de 1985, orekópe 70 áño omano.

HETA MBAʼE GUETERI CHERAʼARÕ CHE SERVÍSIOPE

Upe tiémpope, oñembotuichave kuri pe Betel oĩva Ghánape ha 1988-pe cheinvita hikuái aha hag̃ua ojededikárõ guare upe lugár. ¡Avyʼaiterei ningo! Chemanduʼa, yma aju ypýrõ guare aservi hag̃ua Ghánape, oĩ vaʼekue 735 Testígonte, péro cuarenta áño haguépe, 1988-pe oĩma 34.000 Testígo. ¡Koʼág̃a katu haimetéma ohupyty 114.000!

Dos áño aha jey rire Ghánape, 6 de agosto de 1990, amenda Betty Miller rehe, haʼe ningo Eva amigaite vaʼekue. Oñondive rosegi rombaʼapo kyreʼỹ Jehová servísiope. Hiʼãitereíma ningo oréve og̃uahẽ pe ára oñemoingove jey hag̃ua umi rohayhuetéva omano vaʼekuépe, umíva apytépe ore avuélo, ore tuvakuéra ha Eva (Hechos 24:15).

Cheresay pororopa ningo apensávo 70 áño rasáma aserviha Jehovápe. Pyʼỹinte aagradese chupe chepytyvõ haguére adesidi porã hag̃ua. Avyʼaiterei aiporupaite haguére che tiémpo iservísiope. Koʼág̃a arekómarõ jepe 90 áño rasa, ñande Apohare, pe Inheniéro Ijojahaʼỹva, siémpre chemombarete ha chembopyʼaguasu asegi hag̃ua aservi chupe.