Che apensa vaʼekue avyʼaha

CHE REMBIASAKUE:

Anase vaʼekue Polóniape, peteĩ puévlo opytávape Alemania ypýpe. Upépe trankílo aiko vaʼekue, oĩ heta gránha ha kaʼaguy. Che tuvakuéra ivuenoiterei vaʼekue ha siémpre heʼími avei chéve chevuéno hag̃ua, chenóta porã hag̃ua ha kon el tiémpo astudia hag̃ua universidápe.

Upéi aha vaʼekue astudia derécho peteĩ siuda héravape Wroclaw. Upépe añepyrũ añembyai pórke chejúnta vai vaʼekue. Chéve ymaite guivénte voi chegusta vaʼekue la fútbol, péro che amigokuéra káusare añepyrũ chefanatikoiterei. Chegusta vaʼekue peteĩ club Varsoviagua, ha fin de semanakue katuete voi ahámi kánchape aapoja hag̃ua la che ekípo, tohuga ohugahápe. Umi viáhepe rokaʼúmi, rojedroga, ha avése roñorairõ umi fanátiko pe ótro ekipopeguándi. Che apensa vaʼekue upéicha ikatuha añembyesarái umi provlémagui, aikuaáramo jepe umi polisía chepilla sapyʼárõ ahundietetaha che karréra.

Ahámi che amigokuérandi umi club nocturno ha diskotekaháre, ha umícha jave pyʼỹinte roñorairõ umi patotérondi kállere. Heta vése aha préso, péro siémpre aheka ládo asẽ porã jey hag̃ua, avése aporosovorna voi upearã. Che apensa vaʼekue péicha avyʼaha, péro aikuaa avei ivaiha la ajapóva. Ha ani hag̃ua che konsiénsia chemolesta, káda domingo ahámi tupaópe.

LA BIBLIA CHEPYTYVÕ AKAMBIA HAG̃UA:

Áño 2004-pe, mokõi testígo de Jehová og̃uahẽ che rógape, ha upe guive chevisita meme hikuái roñemongeta hag̃ua la Bíbliare. Amáske aaprende mbaʼéicha vaʼerãpa umi oserviséva Ñandejárape, che konsiénsia chemolestave. Aikuaa porã vaʼekue ndovaleiha akaʼu, ajedroga ha ajeheʼa umi hénte ndojaposéivare la Biblia heʼíva. Ha ahechakuaa avei akambia vaʼerãha che lája, anive hag̃ua cheviolénto. Péro aikuaárõ jepe koʼã mbaʼe, asegi ajapo umi mbaʼe noĩporãiva.

Upéinte peteĩ pyharépe oiko álgo okambiaitéva che rekove. Upérõ añorairõ 8 kuimbaʼéndi. Chejapete hikuái yvýre, ha osegi chenupã ha opyvoi che akãre. Apensa voi amanotaha, ha upémarõ añemboʼe ha haʼe: “Jehová, cheperdonamína ndajagarrái haguére ensério la Biblia heʼíva. Namanóiramo, apromete astudiataha umi testígo de Jehovándi ha akambiataha che rekove”. Aipoʼo vaipaitéramo jepe, namanói. Upémarõ akumpli la apromete vaʼekue ha añepyrũ astudia la Biblia.

Áño 2006-pe aha Inglatérrape ambaʼapo ha aganave hag̃ua pláta, upéi aha jeýta kuri Polóniape ikatu hag̃uáicha astudia jey universidápe ha akonsegi peteĩ título ijyvatevéva. Péro asegívo astudia la Biblia ajuhu peteĩ versíkulo opokoitereíva cherehe. Apóstol Pablo heʼi vaʼekue: “Añetehápe chéve g̃uarã koʼã mbaʼe ndovaléi mbaʼeverã aikuaa rupi che Ruvicha Cristo Jesúspe, ha upéva chéve g̃uarã ndaijojahái. Hesehápe ahejapaite opa mbaʼe areko vaʼekue ha ahecha umíva ytýramo, ikatu hag̃uáicha agana hetave mbaʼe asegívo Crístope” (Filipenses 3:8). Apóstol Pablo ha che ningo heta mbaʼépe rojojogua, mokõivéva avogádo vaʼekue ha avei oreviolénto (Hechos 8:3). Péro kon el tiémpo haʼe ohechakuaa iporãiteveha oservi Ñandejárape ha osegi Jesús ehémplo. Ha che ajepyʼamongetávo upévare ahechakuaa mbaʼeve nanohẽmoʼãiha asegíramo cheviolénto ha aiko pláta rapykuéri. Añekonvense avei ikatuha akambia Pablo okambia haguéicha. Upévare adesidi apytatanteha Inglatérrape ha ndahamoʼãveimaha universidápe.

Amáske aikuaa Jehovápe añemoag̃uive ahávo hese. Ahecharamoiterei aaprendévo mbaʼéichapa haʼe operdona umi oñehaʼãmbaitévape okambia (Hechos 2:38). La Biblia ningo heʼi avei ‘Ñandejára haʼeha mborayhu’, ha che ajepyʼamongetávo upévare ahechakuaa mbaʼérepa Ñandejára ndochaʼéi pe violénsiare (1 Juan 4:16).

Ahecharamoiterei avei mbaʼéichapa umi testígo de Jehová oñehaʼãmbaite oiko la Biblia heʼiháicha. Haʼekuéra ningo ovyʼa oñondive ha ojoayhu voi oñoermáno teéicha, upévare che aimese avei hendivekuéra. Heta añehaʼã rire ha ajapo rire umi kámbio tekotevẽva, ajevautisa áño 2008-pe ha oiko chehegui testígo de Jehová.

UMI MBAʼE PORÃ AHUPYTÝVA:

Che ningo aiko vaʼekue pláta rapykuéri, cheviolénto, ajedroga, chekaʼu ha chefanatikoiterei vaʼekue la fútbol rehe. Péro koʼág̃a aservi Ñandejárape ha avyʼaiterei ikatu haguére amboʼe la Biblia umi héntepe. Koʼag̃aite peve ahecha mimi jepi la partído, péro nachefanatikovéima.

Amenda peteĩ kuña iporãitereívare, hérava Esther ha oservíva avei Jehovápe, ha rovyʼaiterei oñondive. Ore roiko noroéste de Inglatérrape, upépe roipytyvõ umi hénte oñeʼẽvape polaco oaprende hag̃ua la Biblia omboʼéva, ha rovyʼaiterei avei upévare. Koʼág̃a chekonsiénsia potĩ ha aaprovecha porã che rekove. Núnka napensáiva peichaite peve ikatutaha avyʼa.