¿Ojoguápa ysapýpe ñane predikasión?

ÑANE predikasión ningo iñimportanteterei, péro heta oĩ ndohechakuaáiva upéva. Heta persóna oñeinteresáramo jepe la Bíbliare, noñemeʼẽi enkuénta iñimportanteha ostudia ñanendive.

Upéva oiko vaʼekue peteĩ kuimbaʼe héravare Gavin. Haʼe oho meme rreunionhápe, péro ndostudiaséi la Biblia. Gavin omombeʼu: “Che ningo mbaʼeveguasu ndaikuaái la Bíbliagui, ha ndaipotái avave ohechakuaa upéva, ni chejopy aike hag̃ua peteĩ rrelihiónpe, ni chembotavy”. ¿Mbaʼépa nde repensa vaʼerãmoʼã reikuaárire Gávinpe? ¿Erétapa hese núnka ndostudiamoʼãiha la Biblia? Epensamína: umi mbaʼe omboʼéva la Biblia ikatu hína okambia peteĩ persónape. Jehová heʼi vaʼekue ipuévlope: “Umi mbaʼe haʼéva, ysapýicha oguejýta peẽme; amarayvícha oguejýta pe kapiʼipe ári” (Deut. 31:19, 30; 32:2, NM). Jahechamína mbaʼépepa ojojogua pe predikasión ha pe ysapy. Upéva ñanepytyvõta japredika hag̃ua ‘opaichagua tapichápe’ (1 Tim. 2:3, 4).

¿MBAʼÉPEPA OJOJOGUA PE PREDIKASIÓN HA PE YSAPY?

Pe ysapy isuáve. Pe ysapy ningo omoheʼõ pe yvy ha umi plánta seréno jave. Umi mbaʼe Jehová heʼíva ojogua ‘ysapýpe’, pórke haʼe iñamávle, ipyʼaporã ha imbaʼerechakuaa ipuévlondi. Ñande ikatu jasegi iñehémplo jarrespetávo umi mbaʼe opensáva ñande rapichakuéra. Avei iporã ñamokyreʼỹ chupekuéra ontende ha odesidi hag̃ua ijeheguiete mbaʼépa oĩ porã ha mbaʼépa oĩ vai. Ñañeinteresáramo umi héntere, haʼekuéra oĩta dispuésto oaseptávo umi mbaʼe jaʼéva, ha pe mensáhe oĩva la Bíbliape opokovéta ikorasõrekuéra.

Pe ysapy ipiroʼy asy. Ñane predikasión ipiroʼy asýta avei ñapensáramo umi mbaʼe ointeresávare umi héntepe. Por ehémplo Chris, pe ermáno opredika ypy vaʼekue Gávinpe, ndojopýi kuri chupe oasepta hag̃ua peteĩ estúdio bíblico. Upéva rangue, oheka fórma ikatu hag̃uáicha Gavin oĩ trankílo oñemongeta jave hikuái Ñandejára Ñeʼẽre. Chris oexplika Gávinpe la Biblia orekoha peteĩ téma prinsipál, ha haʼe oikuaáramo upéva, ontende porãvetaha umi mbaʼe ojeʼéva rreunionhápe. Upéi omombeʼu Gávinpe mbaʼéichapa umi profesía oipytyvõ chupe oñekonvense hag̃ua siertoha la Biblia omboʼéva. Upéva katu ombokuriósoma Gávinpe, ha osegi rire oñemongeta hikuái upe témare unas kuánta vése, oaseptáma pe estúdio.

Pe ysapy ideprovécho jaikove hag̃ua. Israélpe, haku tiémpope ou jepi peteĩ séka puku, ha péicha jave mésere ndokyvéi. Umírupi ndoʼáiramo ysapy, umi plánta ipirupáta. Ñandejára heʼi vaʼekue ñane tiémpope oĩtaha peteĩ ‘ñembyahýi ha uhéi’, péro ndahaʼéi oikógui peteĩ séka puku, síno umi hénte oikotevẽ rupi ‘Ñandejára Ñeʼẽre’ (Amós 8:11). Péro Jehová opromete avei umi kristiáno unhído haʼetetaha “ysapy oúva Jehovágui”, pórke omombeʼúta hikuái opavavépe umi mbaʼe porãita ojapótava Ñandejára Rréino. Umi “ambue ovechakuéra” ombaʼapo meme hendivekuéra ko tembiapópe (Miq. 5:7, NM; Juan 10:16). Upeichaite ningo, umi notísia porã japredikáva, oipytyvõ umi hénte oikotevẽvape Ñandejára Ñeʼẽre. ¿Ñamombaʼépa hína ko mensáhe?

Pe ysapy haʼe peteĩ vendisión oúva Jehovágui (Deut. 33:13). Pe mensáhe japredikáva haʼe hína peteĩ vendisión opavave ohendúvape g̃uarã. Ñanemanduʼami jeýna Gávinre. Haʼe ostudia rupi la Biblia, odeskuvri heta mbaʼe ymave oikuaase vaʼekue, ha tiémpo riremi ojevautisa. Koʼág̃a haʼe ha hembireko Joyce, kyreʼỹme opredika pe marandu porã..

ÑAMOMBAʼÉKENA PE PREDIKASIÓN

Jajepyʼamongetárõ pe ysapýre, javaloravéta pe predikasión. Por ehémplo, una gótante pe ysapy ndaideprovechoguasúi, péro hetaitereírõ katu omoheʼõ porã pe yvy. Ikatu ñapensa sonseraitereiha la jajapóva predikasiónpe, péro ñamoirũrõ upéva umi ótro ermáno ojapóvare, jahecha pe marandu porã oñemog̃uahẽha “oparupiete ko yvy ape ári” (Mat. 24:14). Upéicharõ, ág̃a ñasẽ jey vove japredika, ñanemanduʼákena umi mbaʼe jaʼéva haʼeha peteĩ vendisión umi ñanerendúvape g̃uarã. Péicha ñane predikasión ojoguáta pe ysapýpe, isuáveta, ipiroʼýta ha ideprovéchota jaikove hag̃ua.