Naimoʼãi vaʼekue peichaite peve Jehová chevendesitaha

Upéi hasypeve añepyrũ ajapo che prekursorádo, ha naimoʼãi kuri peichaite peve okambiaitetaha la che rekove (Efes. 3:20). Péro oiméne peẽ peñeporandu mbaʼéichapa oiko rakaʼe upéva. Vuéno amombeʼúta peẽme la oiko vaʼekue.

Che anase vaʼekue 1939-pe Berlínpe, opytáva Alemániape, unos kuánto mése oñepyrũ rire pe segunda gérra mundiál. Ha opa potávo pe gérra áño 1945-pe, heta vése ohasa umi avión Berlín ári ha ovombardea upe siuda. Peteĩ jey umi vómba hoʼa ore róga kállepe, péro che ha che família roho rokañy peteĩ lugár ojejapóva voi ojeprotehe hag̃ua la héntepe umi vómbagui. Upéi ani hag̃ua ojehu oréve mbaʼeve, roho pe lugár héravape Erfurt, upe lugár che sy onase haguépe.

Che sy ningo oikuaaseterei vaʼekue mávapa pe rrelihión verdadéra, upévare olee umi lívro oskrivi vaʼekue umi filósofo ha oho heta rrelihiónpe, péro ni peteĩva nokonvenséi chupe. Amo 1948 rupi, mokõi testígo de Jehová og̃uahẽ ógape, ha che sy omog̃uahẽ chupekuéra ha oporandu hetaiterei mbaʼe. Upéi una óra mboyve, che sy heʼíma chéve ha che ermána menórpe: “¡Atopáma katu la rrelihión verdadéra!”. Upe riremínte, che sy, che ermána ha che roñepyrũma roho rreunionhápe Érfurtpe.

Áño 1950-pe rova jey Berlínpe, ha roho rreunionhápe pe kongregasión héravape Berlín-Kreuzberg. Upéi rova jey ótro lugárpe Berlínpe, ha roñerreuni pe kongregasión héravape Berlín-Tempelhof. Tiémpo rire, che sy ojevautisa, péro che apensa naimeitiha preparádo ajevautisa hag̃ua, ¿mbaʼérepa?

¿MBAʼÉPA CHEPYTYVÕ VAʼEKUE ANIVE HAG̃UA CHEOTĨETEREI NI ADUDA?

Chéve ningo ijetuʼueterei vaʼekue ajapo hag̃ua hetave mbaʼe Jehová servísiope, pórke cheotĩeterei. Aha vaʼekue predikasiónpe 2 áño aja, péro upéicharõ jepe ndapredikái avavépe. Péro upéi aikuaa heta ermáno ha ermána ohechauka vaʼekuépe ipyʼaguasuha ha ifielha Jehovápe. Umíva apytépe oĩ umi ojegueraha vaʼekue umi kámpo de konsentrasión názipe térã oĩ vaʼekue préso Alemania Orientálpe. Ótro katu omoinge vaʼekue ñemiháme umi puvlikasionkuéra Alemania Orientálpe, hiʼarive upévare ikatu kuri ojejagarra ha ojegueraha chupekuéra préso. Tuichaiterei chepytyvõ vaʼekue iñehemplokuéra. Haʼekuéra ningo oapeligra vaʼekue hekove ha iliverta, Jehová ha umi ermanokuéra rehehápe. Upévare che apensa vaʼekue añehaʼãmante vaʼerãha anive hag̃ua cheotĩeterei.

Che añepyrũ vaʼekue saʼive cheotĩ apartisipárõ guare peteĩ kampáña espesiál ojejapo vaʼekuépe 1955-pe. Peteĩ kárta oñeguenohẽ vaʼekuépe, osẽva pe puvlikasión héravape Informador,a ermáno Nathan Knorr oanunsia upéva haʼéta hague peteĩva umi kampáña tuichavéva ojapótava Jehová organisasión. Haʼe heʼi enterove puvlikadór opartisipárõ “ojeguerekotaha pe mes iporãvéva ko yvy ape ári predikasiónpe”. ¡Ha siertoite la heʼi vaʼekue! Upe riremínte che añemboʼe añemeʼẽ hag̃ua Jehovápe ha ajevautisa áño 1956-pe, che túa ha che ermána ndive. Péro ensegidamínte adesidíma vaʼerã kuri ótra kósa iñimportantetereíva.

Heta áñore ningo che aikuaa vaʼekue añepyrũ vaʼerãha ajapo che prekursorádo, péro asegínte apensa ahaʼarõmie vaʼerãha añepyrũ hag̃ua. Primerorã che adesidi astudiataha Berlínpe oiko hag̃ua chehegui komersiánte ovendéva umi prodúkto ótro paíspe. Upéi ambaʼaposéma sapyʼami jepe ikatu hag̃uáicha chevaleve che profesiónpe añepyrũ mboyve che prekursorádo. Upévare, áño 1961-pe aasepta peteĩ traváho Hambúrgope, pe siuda orekóva pe puérto tuichavéva oĩva Alemániape. Ko traváho ningo chegustaiterei ha upévare aheja jey amo gotyove g̃uarã la che prekursorádo. ¿Mbaʼépa ikatu vaʼekue ajapo?

Aagradeseterei Jehovápe ojevale haguére heta ermáno imbaʼeporãvare chepytyvõ hag̃ua, ikatu hag̃uáicha ahechakuaa iñimportanteveha amotenonde Jehová servísio. Heta che amigokuéra ningo oñepyrũ ojapo iprekursorádo ha omoĩ chéve ehémplo porã. Avei, ermáno Erich Mundt, ymave oĩ vaʼekue kámpo de konsentrasiónpe, chemokyreʼỹ ajerovia hag̃ua Jehováre. Haʼe heʼi pe kámpo de konsentrasiónpe umi ermáno ojeroviáva ijehénte upéi ou hague ikangy. Péro umi ojerovia vaʼekue ipyʼaite guive Jehováre, osegi ifiél ha upéi tuichaiterei oipytyvõ vaʼekue Jehová organisasiónpe.

Avei ermáno Martin Poetzinger, upe rire oĩ vaʼekue pe Kuérpo Governántepe, osegi omokyreʼỹ umi ermanokuérape heʼívo: “¡Pehechaukákena pendepyʼaguasuha, upéva hína pe mbaʼe iñimportantevéva ikatúva pejapo!”. Ajepyʼamongeta rire upe heʼi vaʼekuére, aheja che traváho ha añepyrũ che prekursorádo junio de 1963-pe. ¡Upéva hína pe mbaʼe iporãvéva adesidi vaʼekue! Upéi 2 mése haguépe, añepyrũ mboyve aheka che travahorã, añeinvita oiko hag̃ua chehegui prekursór espesiál. Upe rire unos kuánto áño haguépe, añeinvita aha hag̃ua Eskuéla de Galaádpe kláse 44-pe. ¡Che ningo naimoʼãi vaʼekue Jehová peichaite peve chevendesitaha!

AAPRENDE PETEĨ MBAʼE IJOJAHAʼỸVA GALAÁDPE

“Aníkena peñentrega ha pejapura peheja hag̃ua pene asignasión”, upéva hína peteĩva umi mbaʼe ijojahaʼỹva aaprende vaʼekue, prinsipálmente ermáno Nathan Knorr ha Lyman Swingle heʼi vaʼekuégui. Haʼekuéra oremokyreʼỹ vaʼekue rosegi hag̃ua ore asignasiónpe ijetuʼúramo jepe. Ermáno Knorr heʼi: “¿Mbaʼe rehepa pejesarekóta? ¿Oĩha heta mbaʼe kyʼa, vichoʼi, hetaha umi imboriahúva ha ivaietereiha la situasión? ¿Térãpa pejesarekóta umi yvyramáta, yvoty ha umi hénte ovyʼávare? ¡Pehayhúkena umi héntepe!”. Peteĩ jey, ermáno Swingle omombeʼu jave mbaʼérepa umi ermáno ojapura jepi oñentrega hag̃ua, oñepyrũ hesay pororopa ha ojejokopaite pono hasẽ. Haʼe okirirĩ sapyʼaitemi pórke ndaikatuvéi oñeʼẽ ha upéi ae osegi jey la idiskúrso. Upéva opokoiterei cherehe ha ajerresolve ani hag̃ua amotĩ ni amoñeñandu vai Crístope ni umi iñermanokuéra ifiélvape (Mat. 25:40).

Rorresivírõ guare ore asignasionkuéra, mbohapy betelita oikuaaségui oporandu oréve moõpa roñemondóta. Haʼekuéra oñeʼẽ porã kuri káda asignasión roʼévare hína, ha upéi che asẽ haʼe che asignasión: “Congo (Kinsasa)”. Upépe haʼekuéra okirirĩ ha heʼínte: “¿Eʼa, Congo? ¡Hiʼãite Jehová oĩ nendive!”. Upe tiémpope ningo República del Congo osẽ heta notísiape, pórke upépe oĩ heta hénte oñorairõva ha ojojukáva. Péro che asegi chemanduʼa upe aaprende vaʼekuére Galaádpe. Pe graduasión riremi, septiembre de 1967-pe, che ha che kompañerokuéra Heinrich Dehnbostel ha Claude Lindsay rosẽ roho Kinsásape, haʼéva Congo kapitál.

ORE MISIONÉRO ROAPRENDE HETA MBAʼE KO ASIGNASIÓNPE

Rog̃uahẽ rire Kinsásape, roaprende francés 3 mése aja. Upéi roho aviónpe Lubumbáshipe, ymave oñehenói vaʼekue Elisabethville, opytáva sur gotyo Cóngope ha ag̃uieténte Zambia frontéragui. Ore ropyta roiko peteĩ kása misionálpe oĩva pe siudápe.

Haimete kompletoite pe território oĩva Lubumbáshipe ndojepredikáiva gueteri, upévare ore rovyʼaiterei ropredikáta haguére primera ves umi hénte oikóvape upépe. Sapyʼaitérõ g̃uarã rorekóma hetaiterei estúdio bíblico ha naoretiempovéima roñatendepa hag̃ua hesekuéra. Ropredika avei umi ombaʼapóvape pe goviérnope g̃uarã ha umi polisíape. Heta oĩ ijapytepekuéra orrespetáva la Biblia ha ñane predikasión. La majoría umi hénte upepegua oñeʼẽ suajili, upévare Claude Lindsay ha che roaprende avei upe idióma. Upe riremínte, roñeasigna peteĩ kongregasión suajílipe.

Hetaiterei mbaʼe porã ningo rohasa upépe, péro rombohovái avei umi mbaʼe ijetuʼúva. Sapyʼánte oĩ umi soldádo armádo okaʼúva térã umi polisía ivioléntova oreakusa reíva. Peteĩ vuéltape, peteĩ grúpo de polisía armádo oike pe kása misionálpe rojapo jave rreunión ha oregueraha komisaríape. Upépe haʼekuéra oremboguapy pe yvýpe amo las 10 de la nócherupi peve, ha upéi opoi orehegui.

Áño 1969-pe, añenombra superintendénte de sirkuíto. Pe sirkuítope oĩ vaʼekue avei umi ñu guasu oĩva Áfricape, upépe ningo heta aguata vaʼerã umi pásto ijyvatévare ha umi tape tuju memetévare. Peteĩ puevloʼípe, peteĩ ryguasu imembykuéra reheve opytami vaʼekue oke pyharekue che rupa guýpe. Ndacheresaraimoʼãi voi mbaʼéichapa koʼẽ mboyve hatã porã okokore jepi oanunsia hag̃ua oñepyrũmaha ótro día. Chemanduʼa avei mbaʼeichaitépa avyʼámi vaʼekue ermanokuérandi añeʼẽvo la Bíbliare roguapy aja rojepeʼe kaʼarupytũ.

Peteĩva umi situasión ambohovái vaʼerã ijetuʼueterei vaʼekue chéve, pórke oĩ vaʼekue umi ermáno guaʼu oapojáva pe grúpo Kitawálape.b Umíva apytépe oĩ vaʼekue umi oikéva ñemiháme kongregasiónpe, haʼekuéra ojevautisa ha oiko jepe chuguikuéra ansiáno. Ojogua vaʼekue hikuái umi ‘ita okañývape y guýpe’, péro nombotavýi vaʼekue umi ermáno ha ermanakuéra ifiélvape (Jud. 12). Tiémpo rire, Jehová omopotĩ pe kongregasión, ha upe rire heta hetave hénte oñepyrũ oservi Jehovápe.

Áño 1971-pe, añeasigna sukursál de Kinsásape, upépe che añenkarga umi kartakuérare, umi puvlikasión ojejerurévare ha aipytyvõ avei departaménto de servísiope. Betélpe che aaprende aorganisa hag̃ua ñane rembiapo peteĩ país tuichaitereívape ha ndaiporiguasuihápe kolektívo, rrúta ni elektrisida. Sapyʼánte umi kartakuéra ojegueraháva aviónpe otarda heta mése og̃uahẽ hag̃ua umi kongregasiónpe. Umi kárta oñemboguejy rire pe avióngui oñemoĩ jepi kanóape, ha upépe opyta heta semánare, pórke umi aguapepuruʼatýpe opaʼã jepi umi kanóa. Péro pe tembiapo lomímonte osegi rombohováiramo jepe koʼãichagua situasión ha avei hetave mbaʼe ijetuʼúva.

Che ningo ahecharamoiterei mbaʼéichapa umi ermanokuéra ojapo umi asambléa tuichaitereíva ndorekóiramo jepe hikuái heta pláta. Haʼekuéra ojapo pe platafórma umi takuru ári, oipuru umi pásto elefánte ojapo hag̃ua umi pare, ha avei omboapuʼa umíva ojeguapy hag̃ua hiʼári. Oipuru hikuái umi takuára pósteramo, ha umi takuarílla katu oñapytĩmba ojuehe ojapo hag̃ua umi técho ha mesa. Ha umi klávo rekovia oipuru hikuái umi yvyramáta pirekue ombosaʼi ha ombohakua vaʼekue. Che siémpre ahecharamoiterei vaʼekue mbaʼéichapa koʼã ermáno ha ermanakuéra iñaguánte ha ivale osolusiona hag̃ua umi mbaʼe oñepresentáva. Ahayhueterei ningo chupekuéra che pyʼaite guive. Ha ahechagaʼueterei chupekuéra avárõ guare peteĩ asignasión pyahúpe.

ASERVI KÉNIAPE

Áño 1974-pe, ava pe sukursál oĩvape Nairóbipe, opytáva Kéniape. Upépe ningo hetaiterei la tembiapo, pórke pe sukursál de Kenia oñenkarga pe predikasiónre 10 paíspe oĩva ijypýpe, umíva apytépe oĩ umi ojeproivihápe ñane rembiapo. Heta vése añemondo vaʼekue avisita hag̃ua koʼã país, espesiálmente Etiopía. Upe tiémpope, upe lugárpe ñane ermanokuéra ojepersegi vaʼekue ha ombohovái vaʼerã heta mbaʼe ijetuʼuetereíva. Heta ermánope oñemaltrata vaipa térã ojegueraha kárselpe, ha oĩ voi umi ojejuka vaʼekue. Péro haʼekuéra ifiél ha ogueropuʼaka umi mbaʼe pórke oreko hikuái peteĩ amista imbaretéva Jehovándi ha avei oñondive.

Áño 1980-pe, oiko peteĩ mbaʼe iporãitereíva okambiáva che rekove: Amenda Gail Matheson rehe. Haʼe ningo Canadagua ha roime vaʼekue la mísma klásepe Galaádpe. Ore rosegi roñekomunika kárta rupive heta tiémpore. Gail ningo oservi vaʼekue de misionéra Bolíviape. Upéi 12 áño haguépe rojotopa jey Nueva Yórkpe, ha tiémpo riremínte romenda Kéniape. Chéngo aagradeseterei Gáilpe siémpre opensa haguére Jehová opensaháicha ha avei oñekontenta haguére la orekomíva reheve. Haʼe koʼág̃a peve chemoirũ ha cheapoja mborayhúpe.

Áño 1986-pe, añepyrũ aservi superintendénte de distrítoramo ha avei aime pe Komite de Sukursálpe. Gail ha che rovisita umi kongregasión oĩvape umi país oñenkargávare pe sukursál de Kenia.

Heta mbaʼe porã chemanduʼa rohasa hague 1992-pe ropreparárõ guare peteĩ asambléa Asmárape (oĩva Eritréape). Upe tiémpope ningo ndojeproivíri vaʼekue upépe ñane rembiapo. Rombyasýramo jepe, sólamente rotopa peteĩ galpón ipínta vaietereíva okáguio ládo ha hyepýpe katu ivaivéntema. Péro og̃uahẽvo pe asambléa día, añesorprende ahechávo mbaʼéichapa umi ermanokuéra otransforma ha omoporã upe lugár ikatu hag̃uáicha ojeadora Jehovápe upépe. Heta família ningo ogueraha umi téla iporã porãva, ha ivaleterei hikuái odekora hag̃ua ha omoʼãmbaite umi párte ivaiha. Upérõ roreko peteĩ asambléa iporã ha igustoitereíva, roime voi 1.279 persóna.

Rovisitárõ guare umi kongregasionkuéra, rojadapta vaʼerã heta situasiónre, pórke umi lugár ropytaha jepi idiferentete voi káda semána. Peteĩ vuéltape ropyta peteĩ óga tuicha ha iporãitereívape oĩva pe mar oríllape, ha ótrope katu ropyta peteĩ ogaʼi de chápape, ha umi váño oĩ jepi 100 metrohápe umi ógagui. Péro tahaʼe haʼéva pe lugár roservi haguépe, orepyʼarory oremanduʼávo umi día rohasa vaʼekuére predikasiónpe umi prekursór ha puvlikadór iguapoitereívandi. Ha og̃uahẽrõ guare oréve peteĩ asignasión pyahu, roheja vaʼerã umi ore amígo rohayhuetéva ha rohechagaʼuetétava.

RORRESIVI HETA VENDISIÓN ETIOPÍAPE

Áño 1987 guive 1992 peve, umi goviérno olegalisáma ñane rembiapo heta país oĩvape sukursál de Kenia kárgope. Upéicha rupi, ojeavri heta sukursál ha ofisína del país. Áño 1993-pe roñeasigna roservi hag̃ua pe ofisína del país oĩvape Adís Abébape, Etiopíape. Upépe ningo heta áñore ojejapo vaʼekue ñane rembiapo ñemiháme, péro koʼág̃a ojelegalisáma.

Jehová ningo ovendesi pe predikasión Etiopíape. Heta ermáno ha ermána ojapo iprekursorádo. Mas de 20 por ciento umi puvlikadór ojapo iprekursorádo rregulár káda áño, 2012 guive. Avei umi eskuéla ojapóva Jehová organisasión oprepara porã umi ermanokuérape, ha oñemopuʼãma mas de 120 Salón del Reino. Áño 2004-pe, pe família Betel ova peteĩ sukursál pyahúpe, ha peteĩ Salón de Asambléa oñemopuʼã avei upe korapýpe, upéva ningo peteĩ vendisión entéro ermánope g̃uarã.

Umi áño ohasa vaʼekuépe, Gail ha che roreko peteĩ amista imbaretéva umi ermáno ha ermanakuéra Etiopiaguándi. Ore rohayhueterei chupekuéra pórke imbaʼeporãiterei ha iñamorosoiterei hikuái. Ramoite guive roñepyrũ orerasykatu, ha upévare tekotevẽ kuri rojeguerova pe sukursál oĩva Europa Centrálpe. Upépe ningo oñeñangareko porãiterei orerehe, péro lomímonte rohechagaʼueterei ore amigokuéra oĩvape Etiopíape.

JEHOVÁ HÍNA PE OMONGAKUAA VAʼEKUE

Ore ningo rohecháma mbaʼéichapa Jehová ovendesi ha omongakuaa entéro mbaʼe ojejapóva iservísiope (1 Cor. 3:6, 9). Por ehémplo, añepyrũrõ guare apredika umi Ruandaguápe ohóva ombaʼapo Cóngope umi mína de kóvrepe, Ruándape ndaipóri vaʼekue ni peteĩ puvlikadór. Koʼág̃a g̃uarã oĩma mas de 30.000 ermáno ha ermána upe paíspe. Áño 1967-pe, Cóngope oĩ vaʼekue 6.000 puvlikadór rupi, péro koʼág̃a g̃uarã oĩma 230.000 rupi, ha mas de 1 millón oho kuri Konmemorasionhápe 2018-pe. Entéro umi país oĩ vaʼekuépe sukursál de Kenia kárgope ningo heta hetave umi puvlikadór, ha en totál oĩma voi mas de 100.000.

Ojapóma mas de 50 áño Jehová ojevale hague heta ermánore ikatu hag̃uáicha chepytyvõ añepyrũ hag̃ua pe servísio de tiémpo kompléto. Ha asegíramo jepe cheotĩ, aaprendéma ajerovia vaʼerãha che pyʼaite guive Jehováre. Umi mbaʼe ahasa vaʼekue Áfricape chepytyvõ chepasiénsia ha añekontenta hag̃ua la arekomíva reheve. Gail ha che ningo rohecharamoiterei umi ermáno ha ermána orerresivi porãiterei vaʼekuépe, haʼekuéra ningo iñaguánte ha ojerovia Jehováre. Aagradeseterei Ñandejárape imbaʼeporãite haguére chendive. Che ningo núnka naimoʼãiva peichaite peve Jehová chevendesíta hague (Sal. 37:4).