Ñamombaʼeguasuñaína Ñandejárape ñanepotĩramo opa mbaʼépe
1. Mbaʼérepa iñimportantevaʼekue ipotĩ umi oservíva Ñandejárape?
1 Léi mosáikape oĩvaʼekue heta mbaʼe ojapovaʼerã umi isrraelíta ipotĩ hag̃ua. Upéicha rupi haʼekuéra ndojoguaivaʼekue umi ótro tetãyguápe. Umi Israelgua oñemopotĩvaʼerã ha noñemongyʼaivaʼerã avei umi ótro rrelihiónre (Lev. 11:35, 36; 15:1-11; Isa. 52:11). Ipotĩ rupi omombaʼe Jehovápe ha hesãive avei hikuái.
2. Mbaʼéichapa ikatu jahechauka ñamombaʼeha umi mbaʼe Ñandejára oipotáva jajapo?
2 Koʼag̃aite peve Jehová puévlo rehe ojehechakuaa ipotĩha. Jehová siervokuéra ningo ipotĩ. Upévare, ñandépa ñañehaʼã avei ñanepotĩ? Ñañehaʼãramo ñañemonde porã ha ñanepotĩ, jahechaukañaína ñamombaʼeha umi mbaʼe Jehová oipotáva jajapo.
3. Mbaʼéichapa ojekuaatahína ñande rógare ñanepotĩha ha mbaʼérepa iñimportánte upéva?
3 Mbaʼépa jaʼekuaa ñande rógare? Omongyʼapahína ñane marandu porã? Oiméramo ñande róga jere ha ñane hardín iñanandypa, ndojeʼemoʼãi piko ñanderehe ñañeʼẽmbareinteha jaʼévo ko Yvýgui oikotaha peteĩ hardín neporãmbajepéva? Oiméramo ñande róga ikyʼa ha hyakuã vai, ojeʼéta piko ñanderehe jajepokuaamaha ñanepotĩ, ojeikotaháicha Ñandejára múndo pyahúpe? (od-S páh. 137 guive 139 peve.)
4. a) Mbaʼépa jaʼekuaa ñane mbaʼyru ha umi mbaʼe jaiporúvare predikasionrã? b) Mbaʼépa oñehaʼarõ avei ñandehegui?
4 Ha ñane mbaʼyru jaiporúva predikasionrã? Ipotĩpahína ani hag̃ua oñeñeʼẽ vai pe ñane rembiapóre? Mbaʼépa jahechakuaa ñande ao ha ñande kartérare? Ipotĩpahína térãpa oĩ oñeñeʼẽ hag̃ua hese? Ñañakãkarãi ha ñañemonde porãpa ñasẽ hag̃ua? Ñanepotĩvaʼerã, jajahu pyʼỹi ha ñande ao umíva jajoheimante vaʼerã (w89-S 1/6, 16-19).
5. Mbaʼéichapa ojehecha kongregasiónpe nañanepotĩriramo ha koʼýte umi kongregasión omoakãvare?
5 Mbaʼépa jajapovaʼerã peteĩ ermáno noñatendéigui ijehe ha hógare omotĩramo kongregasiónpe? Ikatu niko oime itujáma térã hasykatu ha oikotevẽnte oñepytyvõʼimi chupe. Oiméramo upéicha, iporãvaʼerã ñaipytyvõ chupe. Oĩ katu ndohechakuaáinteva ipotĩvaʼerãha. Upéicha jave ikatu ñañembojánte hendápe ha jaʼe chupe mbaʼépa ikatu ojapo. Peteĩ ermáno nomeʼẽiramo ehémplo porã koʼã mbaʼépe, noñemeʼẽmoʼãi chupe hembiaporã kongregasiónpe. Ha umi ansiáno ndaikatúi avei ijeheguínte heʼívo ñandéve mbaʼéichapa ñanepotĩvaʼerã.
6. Mbaʼépa umi ohoramóva ikatu ohechakuaa ñane Salón rehe?
6 Umi oikuaasevévape Ñandejára Ñeʼẽgui ñainvita jepi oho hag̃ua Salón del Réinope, ha upéicha ohendu umi mbaʼe porã oñemboʼéva Ñandejáragui. Ñane Salón ningo iporã ha ipotĩ, upévare ñainvitase voi ñande rapichakuérape oho hag̃ua. Péro heta vése hasy ñañangareko hag̃ua ñane Salón rehe ha ñamopotĩ meme hag̃ua. Emañamíntena ne Salón rehe. Ipotĩpahína umi sílla, pare ha píso? Pyʼỹintepa oñemopotĩ umi váño? Sapyʼánte jajepokuaáma jahecha pe píso ojeka mimi térã pe pare ojeʼopa, ha ndaivaivéima voi ñandéve. Péro umi ohoramóva ohechakuaaitereíta umi mbaʼe ha katuete heʼíta ivaitereiha. Ñañehaʼãvaʼerãniko ñamoporã ñane Salón, jajapo ikatumíva ñamopotĩ ha ñamyatyrõ hag̃ua tekotevẽhápe.
7. Mbaʼépa jajapoñaína ñañehaʼãramo ñanepotĩ?
7 Ñañatendéramo ñandejehe ha ñamopotĩramo ñande róga, ñane mbaʼyru ha Salón del Reino, ñamombaʼeguasúta Ñandejárape. Ha upéicha nañamongyʼamoʼãi avei pe marandu porã. Jahechaukáta uvei ñanepotĩha jaservi rupi Ñandejárape (1 Cor. 10:31, 32; Sant. 1:27).