Hiʼag̃uíma pe Jehová ára
1 Kristianokuéra oipotaitereíma og̃uahẽ pe Jehová ára. Upépe haʼe ohundíta ko sistéma jaikoha ha omoñepyrũta peteĩ múndo pyahu oĩtaháme teko joja (2 Ped. 3:12, 13, nóta). Ndajaikuaái arakaʼetépa og̃uahẽta pe ára. Upévare ñañatende porã vaʼerã jaikóvo ha ñaipytyvõvaʼerã ñande rapichakuérape ojapo hag̃ua upéicha avei (Eze. 33:7-9; Mat. 24:42-44). Jajepyʼamongetáramo umi profesía Ñandejára Ñeʼẽme oĩvare jajerovia mbaretevéta ‘Jehová ára guasu hiʼag̃uimaha’(Sof. 1:14).
2 Umi Poténsia Mundiál ohasáva. Oĩháicha Revelación 17:9-11-pe, pe apóstol Juan oñeʼẽ ‘siete mburuvicha guasúgui’ ohechauka hag̃ua ohasataha siete poténsia mundiál. Juan heʼi avei oĩha ‘mburuvicha guasu ochoha’. Upéva koʼág̃a haʼe pe “Naciones Unidas”. Ñahaʼarõvaʼerãpa oĩvetaha ótro poténsia mundiál upéva rire? Nahániri. Pe profesía heʼi pe mburuvicha guasu ochoha ‘oñehunditaha’, ha upéva rire ndeʼíri oĩvetaha ótro mburuvicha guasu ko Yvy ape ári. Nepytyvõpa ko profesía rehecha hag̃ua moõpa ñaimeñaína ko tiémpo ohasávape?
3 Daniel 2:31-45 ñanepytyvõ avei jahecha hag̃ua og̃uahẽtamaha Jehová ára. Upe profesíape, Nabucodonosor ohecha iképe peteĩ taʼanga tuichaitereíva, ohechaukáva umi poténsia mundiál ohasáva ohóvo. Umi poténsia mundiál osẽmbaitéma. Moõpa ñaimeñaína ko tiémpo ohasávape? Ñaime pe tiémpope oñerrepresentavaʼekue pe taʼanga pykue rehe. Ha pe profesía ohechauka porã mbaʼépa oikóta upe rire. Yvypóra goviernokuéra oñehundipaitéta, ha opytáta ‘peteĩ rréino noñehundimoʼãiva arakaʼeve’. Rehechápa nde mbaʼéichapa ko profesía ohechauka hiʼag̃uimaha pe Jehová ára?
4 Mbaʼépa ohechaukave Jehová ára hiʼag̃uimaha. Ñande jahechañaína oĩveha umi mbaʼe ohechaukáva Jehová ára hiʼag̃uimaha. Jahecha oikohahína pe apóstol Pablo heʼivaʼekue, omombeʼúvo mbaʼéichatapa yvyporakuéra rekove ‘koʼã ára pahápe’ (2 Tim. 3:1-5). Oñemeʼẽvaʼerã avei testimónio oparupiete ko yvy ape ári ou mboyve pe fín, ha ñande upévape ñambaʼapoñaína (Mat. 24:14). Tohechaukákena pe ñane predikasión tekotevẽtereiha ñahendu pe ánhel marandu heʼíva: “Pekyhyjéke Ñandejáragui ha pemeʼẽ chupe glória, pórke og̃uahẽma pe óra haʼe oporohusga hag̃ua”(Rev. 14:6, 7).