Jajapo estúdio vívliko oñakãrapuʼãva Párte 9:
Japrepara ñane estudiántepe opredika hag̃ua oimehápe
1 Ohechávo Jesús haʼeha pe Mesías oñehaʼarõva, Andrés ha Felipe ndaikatúi ojejoko omombeʼu hag̃ua hapichakuérape pe marandu ombopyʼaroryetereíva chupekuéra (Juan 1:40-45). Upéicha avei koʼág̃a, umi estudiánte vívliko oñepyrũramo ojerovia pe oikuaa pyahúvare, oñeʼẽséta katuete umi mbaʼégui (2 Cor. 4:13). Mbaʼéichapa ikatu ñamokyreʼỹ chupekuéra oñeʼẽse hag̃ua oimehápe Ñandejára Ñeʼẽgui, ha mbaʼéicha ikatu ñaipytyvõ ojapo porã hag̃ua hikuái upéva?
2 Ñaporandukuaa pe estudiántepe jahecha oñeʼẽmapa hapichakuéra ndive umi mbaʼe oikuaa pyahúvagui. Ikatu oinvita iñangirũnguéra térã hogayguakuérape ou hag̃ua ohendu pe estúdio. Eporandu chupe oĩpa iñirũnguéra apytépe imbaʼapohápe, eskuélape, térã ótro hendápe umi ohenduséva Ñandejára Ñeʼẽgui. Upéicha ikatu oñepyrũ opredika. Eipytyvõ chupe ohecha hag̃ua tekotevẽha jaiporavo pe jaʼétava ha mbaʼeichahápepa ñañeʼẽta, iporãha jarrespeta ñande rapichápe ha ñanderory hendivekuéra ñañeʼẽ jave Ñandejára Jehová ha ipropósitogui (Col. 4:6; 2 Tim. 2:24, 25).
3 Pe estudiánte okomparti hag̃ua pe ogueroviáva. Iñimportanteterei ñamboʼe ñane estudiántepe oiporu hag̃ua Ñandejára Ñeʼẽ okomparti hag̃ua pe ogueroviáva. Pe estúdio jave, opyta porãvehápe, eporandu chupe: “Mbaʼéichapa reiporúne la Biblia reñeʼẽ hag̃ua ne família ndive ko mbaʼe reaprendévagui?” térã “Mbaʼe téysto vívlikopa reiporúne rehechauka hag̃ua peteĩ ne irũme upeichaha?” Eñatende pe heʼívare ha ehechauka chupe mbaʼéichapa pe omboʼéva osẽvaʼerã Ñandejára Ñeʼẽgui (2 Tim. 2:15). Rejapóvo upéicha reipytyvõreína ne estudiántepe opredika hag̃ua oimehápe ha, ikatúma vove, opredika hag̃ua kongregasión ndive.
4 Ñaipytyvõvaʼerã ñane estudiántepe ombohovaikuaa hag̃ua oposisión (Mat. 10:36; Luc 8:13; 2 Tim. 3:12). Oĩramo umi oporandúva térã oñeʼẽva Testigo de Jehová rehe, pe estudiánte ikatu oiporu upéva opredika hag̃ua. Pe folléto Los testigos de Jehová: ¿quiénes son y qué creen? ikatu oipytyvõ chupe ‘oñedefende hag̃uáicha opa árape’ (1 Ped. 3:15). Oguereko informasión iporãva pe estudiánte pyahu ikatúva oiporu oipytyvõ hag̃ua iñangirũnguérape térã hogayguakuérape ontende hag̃ua pe jagueroviáva la Bíbliagui ha pe tembiapo jajapóva.