Jahechauka jajepyʼapyha ñande rapicháre: jaguerohory rupive chupekuéra
1 Ñande rapichakuéra ikyreʼỹ ha ovyʼaiteve jaguerohorýramo chupekuéra ñande pyʼaite guive. Heta puvlikadór ohecha jepi ohendu porãveha hikuái pe predikasión jaguerohorýramo chupekuéra. Péro, mbaʼéichapa jaguerohorýta chupekuéra japredika jave?
2 Ñañatende porãkena. Jesucristo ohechavaʼekue umi mbaʼe porã ojejapóva umi siete kongregasión oĩvaʼekue Asia Menórpe (Rev. 2:2, 3, 13, 19; 3:8). Upéicha avei, jajepyʼapýramo ñande pyʼaite guive umi ñande territóriope oĩvare, jahecháta mbaʼépepa jaguerohorykuaa. Sapyʼánte jahecha peteĩ hardín oñeñatende porãva térã peteĩ túva omokunuʼũva itaʼýrape. Ikatu peteĩ tapicha torýpe osẽ ñane rendápe. Jaiporúpa koʼã mbaʼe jaguerohory hag̃ua chupekuéra?
3 Jajapysakákena hesekuéra. Japredikávo, ñaporanduvaʼerã umi mbaʼe omomýitava pe tapichápe oñeʼẽ hag̃ua, ha jarrespetavaʼerã ñahendu porãvo mbaʼépa heʼihína (Rom. 12:10). Katuete heʼíta peteĩ mbaʼe jaguerohorykuaáva ha jatopáta mbaʼépepa ñapensa joja.
4 Jahechakuaákena. Mbaʼépa jajapovaʼerã pe tapicha heʼíramo peteĩ mbaʼe noĩporãiva la Biblia ndive? Jaʼerangue chupe upepete voi oĩ vaiha upe heʼíva, jaagradesevaʼerã omombeʼuhaguére mbaʼépa opensa. Ikatu jaʼe chupe jahechakuaaha ojepyʼamongeta heta hague upe heʼívare (Col. 4:6). Pe tapicha odiskutiséramo jepe, ikatúnte avei jaguerohory chupe opensahaguére umi mbaʼére. Péicha japorotrata porãramo ikatu okambia pe tapicha nohenduséivakuri pe predikasión (Pro. 25:15).
5 Japoko hag̃ua ñande rapicha korasõre, jaguerohoryvaʼerã chupe ñande pyʼaite guive. Péicha jajapóramo, ñamombaʼeguasúta Jehovápe ha umi tapicha ikatu oikuaaseve Ñandejára Rréinogui.