Rejepokuaáramo umi mbaʼe iporãvare, rehupytýta heta mbaʼe porã
1. Mbaʼépepa reiporuvaʼerã ne tiémpo reñemoag̃uive hag̃ua Ñandejárare?
1 Rejevautisáramo guare, oiméne ijetuʼurakaʼe ndéve restudia hag̃ua nde Biblia, reho hag̃ua rreunionhápe, reñemboʼe ha resẽ hag̃ua predikasiónpe. Péro Jehová nepytyvõ rupi rejapo umi mbaʼe ha upéicha reñemoag̃uive ha rejerovia mbareteve hese. Arémaramo jepe rejevautisahague, rejepokuaápa gueteri rejapo umi mbaʼe porã koʼág̃a peve?
2. Mbaʼéichapa ñanepytyvõ jaleéramo la Biblia káda día?
2 Ehechákena mbaʼéichapa reiporureína ne tiémpo. Rejepokuaápa relee la Biblia michĩmi jepe káda día? Heta mbaʼe porã jahupyty jajapóramo upéicha (Jos. 1:8; Sal. 12, 3). Israélpe yma pe rréigui oñehaʼarõvaʼekue olee Ñandejára Léi “oikove aja pukukue”. Mbaʼépepa upéva oipytyvõ chupe? Oipytyvõ ani hag̃ua oñemombaʼeguasu, okyhyjekuaa hag̃ua Jehovágui ha iñeʼẽrendu hag̃ua Chupe opa mbaʼépe (Deu. 17:18-20). Upeichaitéta avei ñande jaleéramo Ñandejára Ñeʼẽ káda día. Ñanepytyvõta ani hag̃ua jajapo mbaʼeve ivaíva, jaikokuaa hag̃ua ko múndo añáme. Ha ñanembokatupyryvéta avei predikasionrã (Fili. 2:15; 2 Tim. 3:17).
3. Mbaʼépa jahupyty jaha meméramo rreunionhápe?
3 Jesús ojepokuaavaʼekue oho umi hudío ijatyhápe olee hag̃ua Ñandejára Ñeʼẽ (Luc. 4:16). Upéva omombarete chupe ikatu hag̃uáicha ombohovái opaichagua jehasa asy. Ñande avei jaha meméramo rreunionhápe ñahendu hag̃ua umi mbaʼe porãita oñemboʼéva Ñandejára Ñeʼẽgui, ñanembareteve ha “ñañomokyreʼỹ” (Rom. 1:12). Ñañembyatýramo ñane ermanokuéra ndive ikatúta jaropuʼaka opa mbaʼe ijetuʼúva koʼã ára pahápe (Heb. 10:24, 25). Ndépa rejepokuaa gueteri reho umi rreunionhápe?
4. Mbaʼéichapa ñanepytyvõ ñasẽramo predikasiónpe káda semána?
4 Ñandejára Ñeʼẽ omombeʼu Jesús remimboʼekuéra “opa árape, [témplope] ha ogaha rupi, oporomboʼe ha omoherakuã meme” hague pe marandu porã (Hech. 5:42, BNP). Ndaikatúiramo jepe japredika káda día, ñañehaʼãvaʼerã káda semána jajapo rrevisíta, estúdio térã ambue mbaʼe Ñandejára servísiope. Upéicha jajapóramo, ñandekatupyryvéta jaiporu hag̃ua Ñandejára Ñeʼẽ ha katuete jahasáta heta mbaʼe porã ñanemokyreʼỹva.
5. Mbaʼérepa tekotevẽ ñañemboʼe meme Jehovápe?
5 Jehová omeʼẽ Daniélpe heta mbaʼe porã ‘ojeroviágui hese’ oikove aja pukukue. Haʼe oñemboʼe pyʼỹi vaʼekue Ñandejárape (Dan. 6:10, 16, 20). Ñande avei ñañemboʼe meméramo Ñandejárape ñande pyʼaite guive, Haʼe ñanepytyvõta ijespíritu sánto rupive (Luc. 11:9-13). Oñemoag̃uíta ñanderehe ha jaikuaa porãvéta chupe (Sal. 25:14; Sant. 4:8). Ajépa iporãite! Ñañehaʼã memékena jajepokuaa umi mbaʼe iporãvare Ñandejára servísiope. Upéicha jajapóramo jahupytýta heta mbaʼe porã Ñandejáragui.