Jajapókena haʼekuéra ojapoháicha
1 Áño 1937-pe oñepyrũ pe precursorado especial. Heta kuña ha kuimbaʼe ikatupyrýva predikasiónpe, vyʼápe oho oservi ojeʼehápe chupekuéra. Koʼág̃a peve, ymaguaréicha avei umi precursor especial omeʼẽ ñandéve peteĩ ehémplo iporãva ikatúva jasegi (Heb. 6:12).
2 Omoñepyrũ hikuái predikasión. Umi precursor especial oĩ ypy vaʼekue, oñepyrũ opredika ogaha rupi pe fonógrafo portátil rupive. Oiporu avei hikuái gravasionkuéra ojapo hag̃ua rrevisíta. Ñepyrũrã opredika hikuái umi siuda tuichaháre, oĩháme kongregasión. Uperire oñemondo chupekuéra ótro hendápe, oñekotevẽhápe ojepredika. Oipytyvõ hikuái umi oikuaasevévape ha ostudia hendivekuéra. Oñehaʼã meme rupi hikuái, oñepyrũ heta kongregasión, ha upéichape hetaitereive ohóvo umi oservíva Ñandejárape (Isa. 60:22). Koʼag̃aite peve umi precursor especial tuicha oipytyvõ oñemosarambi hag̃ua pe marandu porã “opaite henda rupi ko yvy ári” (Col. 1:23,).
3 Iporã jajapo haʼekuéraicha. Oĩ heta precursor especial aréma oservíva upéicha. Ha heta mbaʼéma ohasa hikuái omombaretéva ijerovia Jehováre (1 Ped. 1:6, 7). Omboyke hikuái heta mbaʼe ikatu hag̃uáicha oservi oñekotevẽhápe. Oĩ avei hasy ha ijedámava térã orekóva ótro provléma (2 Cor. 4:16, 17). Upéicharõ jepe, ‘ituja rire jepe hiʼa hikuái ha akóinte imbarete ha hovyũ asy’ (Sal. 92:15). Ojerovia hikuái Jehováre ha haʼe oipytyvõ chupekuéra (Sal. 34:8; Pro. 10:22).
4 Eguerohorýkena chupekuéra. Oiméramo oĩ ne kongregasiónpe, rejeheʼavaʼerã hesekuéra, katuete nemokyreʼỹ ha nepytyvõta hikuái. Ehechauka remombaʼeha pe ojapóva hikuái Ñandejára servísiope. Nembaretevéta rehechávo mbaʼéichapa ombaʼapo meme hikuái. Umi ojapóva haʼekuéraicha ohupytýta heta mbaʼe porã Ñandejáragui, pórke haʼe “oguerohory” upeichaguápe (Pro. 12:22).