Testigos de Jehová Aty Guasu, 2007 “Ñamoirũ Jesucrístope”
1, 2. a) Mbaʼépa heʼi Moisés umi isrraelítape pe ñembyaty rehe? b) Mbaʼe mbaʼépa jahechamavaʼerã koʼág̃a guive?
1 Moisés heʼivaʼekue opavave isrraelíta ha ambue tetãyguápe oñembyatyvaʼerãha káda 7 áño ohendu hag̃ua ojeleévo Ñandejára léi. Maʼerãpa upéva? Moisés heʼi ‘Ohendu ha ojepokuaa hag̃ua iñeʼẽrendu’ (Deu. 31:10-12). Jahechaháicha, Jehovápe g̃uarã iñimportanteterei isiervokuéra oĩ oñondivepa peteĩ aty guasúpe. Ha koʼẽrõitéma, Jehová siervokuéra ñañembyaty jeýtama hína ñane Asambléa de Distritorã “Ñamoirũ Jesucrístope”.
2 Reñembosakoʼimapareína upearã? Rejerurevaʼerãpa permíso ne mbaʼapohápe? Ikatútapa reraha nendive asambleahápe ne estudiánte térã ne hentekuéra ndahaʼéiva testígo? Oĩpa ne kongregasiónpe ermáno térã ermána tekotevẽva oñepytyvõ chupe oho hag̃ua? Umi informasión oñemoĩva koʼápe nepytyvõta rejepreparáma hag̃ua rehóvo koʼág̃a guive.
3. a) Mbaʼéichapa oñekumpli ko ñane tiémpope Isaías 25:6? b) Mbaʼépa ojehechakuaa pe asambléa viernesguáre, ha mbaʼépa tekotevẽ jajapo?
3 Aníkena ni peteĩ día rejavýtei. Jehová omeʼẽ hetaiterei mbaʼe omombaretéva isiervokuérape oservi meme hag̃ua chupe (Isa. 25:6). Umi mbaʼe porã apytépe oĩ ñande aty guasu. Ojehechakuaa saʼietereiveha ojeho vierneskue. Upévare poromokyreʼỹ peñehaʼãma hag̃ua koʼág̃a guive peime hag̃uáicha umi tres día pe aty guasu Jehová opreparávape ñandéve g̃uarã. Rejerurétaramo permíso ne patrónpe ikatu hag̃uáicha reho, iporãvaʼerã reñemboʼe meme Jehovápe upévare. Haʼe ‘nepytyvõta’ reñeʼẽ hag̃ua ne patrón ndive reikuaa vove mbaʼe féchapa otokáta ndéve pe asambléa (1 Tes. 2:2; Neh. 2:4, 5). Nepytyvõta remombeʼúramo ne patrónpe káda áño rehovaʼerãha asambleahápe readora hag̃ua Jehovápe. Ha voimi reheve reavisáramo chupe, haʼe ikatu ohecha mbaʼépa ojapo omeʼẽ hag̃ua ndéve permíso.
4. Mbaʼéichapa ikatu ñaipytyvõ ñane estudiántepe térã ñane hentekuéra ndahaʼéiva testígope, oho hag̃ua ñande aty guasúpe?
4 Mbaʼéichapa ikatu ñaipytyvõ ñane família ha ñane estudiantekuérape. Epensamíntena mbaʼéichapa reñeñandúta reimeramoreína asambleahápe ne estudiantekuéra ndive. Upe “aty guasúpe” ohecháta avei haʼekuéra mbaʼeichaitépa Jehová siervokuéra ojoayhu (Sal. 22:25). Voimi reheve remombeʼumavaʼerã chupekuéra arakaʼépa oikóta ikatu hag̃uáicha oñemohembýma hikuái upearã. Emombeʼu chupekuéra mbaʼérepa nde revyʼaite reho jave aty guasúpe. Ikatu rehechauka chupekuéra vidéo Unidos gracias a la enseñanza divina térã fóto, ikatu hag̃uáicha oikuaáma hikuái mbaʼéichatapa pe aty guasu. Reñeʼẽvaʼerã avei ne hentekuéra ndahaʼéiva testígo ndive pe aty guasúre. Rejapóramo upéicha ikatu oho nendive tahaʼe un díante jepe térã ohecha hag̃ua hikuái pe dráma.
5. Mbaʼéichapa ikatu jahechauka jajaposeha iporãva, heʼiháicha 1 Tim. 6:18-pe?
5 Ermanokuérape g̃uarã. Umi kristiáno ipláta hetávape, Pablo heʼivaʼekue ‘ojapo hag̃ua pe iporãva ha imbaʼeta hag̃ua tembiapo porãme’ (1 Tim. 6:17, 18). Ñande jahechaukáta Pábloicha avei jajepyʼapyha ñande rapicháre, ñanemanduʼáramo umi ermáno ijedávare, nahesãirivare, umi mitã ndaʼisýi térã ndaʼitúvaivare, precursor térã ambue ermáno oikotevẽva ñanderehe oho hag̃ua pe aty guasúpe. Jaikuaáningo koʼãvape oipytyvõvaʼerãha ihentekuéra, upéicharõ jepe ñanembaʼerechakuaavaʼerã ha ñaipytyvõ chupekuéra oikotevẽ jave (Gál. 6:10; 1 Tim. 5:4).
6, 7. a) Mbaʼe mbaʼémapa ojapo ermanokuéra pe asambléa mboyve? b) Mbaʼéichapa jahechaukáta jaagradese ha ñamombaʼeha ojejapóva ñande rehehápe? (Elee Hebreos 13:17.)
6 Ñanembaʼerechakuaákena. Ñag̃uahẽvo asambléa oikohápe jahechakuaa heta oñembaʼapohague upearã. Torýpe umi akomodadór ñanemomaitei, omeʼẽ pe prográma ha ohechauka ñandéve moõpa ikatu jaguapy. Oĩ heta ermáno ha ermána omopotĩvaʼekue asambléa oikotahápe ha oprepara porã hikuái pe platafórma. Heta avei oñembaʼapo ikatu hag̃uáicha ojejapo umi diskúrso ha oñemoĩ hag̃ua opa mbaʼe tekotevẽva.
7 Are oiko mboyve pe asambléa heta ermáno oĩ ombaʼapómava upearã. Ifamiliakuéra oipytyvõ avei upévape, omeʼẽvo chupekuéra tiémpo ikatu hag̃uáicha haʼekuéra ombaʼapove asamblearã. Ajépa jaagradesete koʼã mbaʼe ojejapohaguére ñande rehehápe. Jahechaukáta upéva ñaneñeʼẽrendúramo koʼápe ojeʼévape ha oimeraẽ informasión oñemeʼẽvape asambléa rehegua (Heb. 13:17). Jajapóramo oñehaʼarõva ñandehegui ñaipytyvõta oiko hag̃ua ‘hekopete ha hendápe porã opa mbaʼe’ (1 Cor. 14:40).
8. a) Mbaʼérepa iñimportantete umi aty ojapóva Jehová siervokuéra? b) Mbaʼépa ñande jajapovaʼerã?
8 ‘Hiʼag̃uivévo ohóvo Ñandejára ára guasu’, ñamombaʼevevaʼerã ñande aty (Heb. 10:25). Pe tembiguái jeroviaha ha iñarandúva ñande aty guasu rupive ñanehekomboʼe jajapo hag̃ua opa mbaʼe Ñandejára oipotáva jajapo (Deu. 31:12). Upévare poromokyreʼỹ pejepreparáma hag̃ua koʼág̃a guive peime hag̃ua mbohapyve día ko ñande Aty Guasu “Ñamoirũ Jesucrístope”. Jajapóramo upéicha jaikuaavéta heta mbaʼe Ñandejáragui ha javyʼáta ñane ermanokuéra ndive.
[Rrekuádro oĩva páhina 3-pe]
Prográma
Viernes ha sábado
Oñepyrũta pyhareve 9.20 guive kaʼaru 5.05 peve
Domingo
Pyhareve 9.20 guive kaʼaru 4.10 peve