Mbaʼépa rejapóta oúramo yvytu atã, ama guasu térã ambue mbaʼe vai?
1. Mbaʼérepa iporã ñañembosakoʼi oúrõ g̃uarã peteĩ mbaʼe vai?
1 Káda áño hetaiterei tapicha, ha umíva apytépe ñane ermanokuéra avei, ohasa asy oikóramo yvyryrýi ha oúramo tsunami, yvytu atã, urakán, tornádo térã ojagarrapárõ y oky guasu rire. Koʼã mbaʼe oiko ñahaʼarõʼỹve jave ha oimeraẽvape ikatu ohupyty. Upévare iporã ñañembosakoʼi (Pro. 21:5).
2. Mbaʼérepa iñimportánte ñamombeʼu umi ansiánope ñane direksión ha ñane teléfono número ipyahuvéva?
2 Oiko mboyve peteĩ mbaʼe vai. Sapyʼánte umi mburuvicha omomarandu oikotaha peteĩ mbaʼe vai. Umícha jave tekotevẽ ñaneñeʼẽrendu chupekuéra (Pro. 22:3). Oñemeʼẽvo umichagua marandu umi ansiáno oñehaʼã oipytyvõ opavavete ermanokuérape oñembosakoʼi hag̃ua. Ha oiko rire peteĩ mbaʼe vai haʼekuéra ohecha oĩ porãmbápa opavave ermanokuéra ha mbaʼépa oikotevẽ hikuái. Upéva hasyvéta chupekuéra ndorekóiramo ne direksión ha ne teléfono número ipyahuvéva. Upévare ñakambiáramo koʼãva iporã ñamombeʼu sekretário kongregasionpeguápe ha ñande estúdio de lívro omoakãvape.
3. Jaikóramo umi mbaʼe vai oiko pyʼỹiha rupi, mbaʼépa jajapovaʼerã ñaipytyvõ hag̃ua ansianokuérape?
3 Peteĩ kongregasión oĩramo oiko pyʼỹiha rupi umi mbaʼe vai, umi ansiáno ikatu ojerure puvlikadorkuérape ihénte térã iñamígo ndoikóiva upe rupi teléfono número ha direksión, ikatu hag̃uáicha oñehenói chupekuéra oñekotevẽ jave. Upéicharõmante umi ansiáno oikuaáta moõpa oporohekáta oĩramo ohejavaʼekue hóga. Ikatu avei ohecha hikuái mbaʼépa ojapóta oikórõ g̃uarã umi mbaʼe vai. Ikatu omoĩ hikuái peteĩ lístape mbaʼe mbaʼépa ojerekovaʼerã, ikatu hag̃uáicha ojerahántema oñesẽmbátaramo oikótagui sarambi ha oñepytyvõ hag̃ua umi oĩ vaívape. Iñimportanteterei opavave ñaipytyvõ chupekuéra umi mbaʼépe (Heb. 13:17).
4. Mbaʼépa ikatu rejapo oikóramo peteĩ mbaʼe vai pe reikohápe?
4 Oiko rire peteĩ mbaʼe vai. Mbaʼépa rejapovaʼerã oikóramo mbaʼe vai nde reikoha rupi? Ne familiakuéra raẽvete rehechavaʼerã oĩ porãmbápa ha ikatútaramo reipytyvõvaʼerã umi ótro ohasa vai vaʼekuépe avei. Reime porã ha nereikotevẽiramo jepe pyaʼemínte voi reñeʼẽvaʼerã nde estúdio de lívro omoakãvandi térã ambue ansiáno ndive. Ha reikotevẽramo, reikuaa porã vaʼerã ne ermanokuéra ojapohahína ikatúva guive nepytyvõ hag̃ua (1 Cor. 13:4, 7). Nemanduʼákena Jehová oikuaaha pe rehasavareína. Rejeroviavaʼerã Haʼe nepytyvõtaha (Sal. 37:39; 62:8). Rehechakuaavaʼerã avei nde rapicha oikotevẽramo ha reipytyvõ chupe oñeñandu porãve hag̃ua (2 Cor. 1:3, 4). Ani rehaʼarõiterei resẽ jey hag̃ua predikasiónpe ha reho jey hag̃ua rreunionhápe (Mat. 6:33).
5. Mbaʼépa ojapo kristianokuéra oikuaa rupi ikatuha oiko mbaʼe vai?
5 Opavavépe ñandepyʼapy umi mbaʼe vai ikatúva oiko, péro ñande jajerovia koʼẽrõitéma opataha umi mbaʼe (Rev. 21:4). Og̃uahẽ mboyve upéva jajapovaʼerã oñekotevẽva guive jagueropuʼaka hag̃ua opaichagua jehasa asy, ha avei ñamombeʼu kyreʼỹme pe marandu porã.