Opavave ikatu ñaipytyvõ ñande rapichápe oservi hag̃ua Ñandejárape
1 Ndaikatúi oikóvo ñandehegui Jesús remimboʼe peteĩ ñande rapicha ñanepytyvõ rupínte. Jehová oiporu opavave umi ‘oipytyvõvape chupe hembiapópe’ ikatu hag̃uáicha umi ostudiavahína oikuaa porãve chupe ohóvo (1 Cor. 3:6-9). Káda uno ikatu ñaipytyvõ umi oikuaaramóvape Ñandejárape. Ndahaʼéi ñane komentário rupínte ñaipytyvõkuaa chupekuéra, jahechaukavaʼerã avei ñande reko potĩha. Upéicha ojehecháta jaikohañaína Ñandejára heʼihaichaite (Juan 13:35; Gál. 5:22, 23; Efe. 4:22, 23). Mbaʼépa ikatu jajapove ñaipytyvõ hag̃ua umi oikuaaramóvape Jehovápe?
2 Kongregasiónpe. Opavave jahechaukakuaa jaguerohoryha umi ohoramóvape rreunionhápe. Upéva jajapokuaa ñanderory, jasaluda ha ñañemongeta rupi hendivekuéra oñepyrũ mboyve ha opa rire ñane rreunión. Imanduʼávo oho ñepyrũrõ guare rreunionhápe, peteĩ karai heʼi: “Sapyʼaitépe hetaiteve tapichápe aikuaa umi che iglésiape aikuaávagui. Haʼekuéra ohechauka chéve cherayhu añeteha. Upéicha ahechakuaa haʼeha rrelihión añetegua”. Siete mése haguépe ko karai ojevautisáma.
3 Reguerohoryvaʼerã ne estudiántepe ojapohaguére ohóvo Ñandejára rembipota. Ohasa asýpa raʼe oĩ rupi oñemoĩva hese? Oho memépa rreunionhápe? Oñehaʼãpa okomenta? Omeʼẽmapa ipárte Eskuéla dél Ministério Teokrátikope térã osẽmapa opredika? Eguerohorýkena chupe umi ojapóvare, upéva omokyreʼỹ ha omombaretéta chupe (Pro. 25:11).
4 Umi omboʼéva Ñandejára Ñeʼẽ hapichápe. Oĩ oinvitáva ótro puvlikadórpe oho hag̃ua hendive ijestúdiope. Upéva oipytyvõ umi estudiántepe ojepokuaa hag̃ua ohóvo hetave ermánore. Voimi reheve ñainvitamavaʼerã ñane estudiántepe oho hag̃ua rreunionhápe. Ha oho vove katu ñapresentavaʼerã ermanokuérape. Oñehaʼãpahína oheja hag̃ua peteĩ vísio vai, tahaʼe jepita térã ambue mbaʼe? Oĩpa oñemoĩva hese hogapýpe ostudiahaguére? Ikatu oipytyvõ chupe oñemongetáramo umi ermáno ombohovaivaʼekue ndive peichagua provléma (1 Ped. 5:9).
5 Umi ostudiaramóva ningo oikotevẽ oñepytyvõ chupekuéra kongregasiónpe. Opavavénte ikatu ñaipytyvõ chupekuéra oikuaave hag̃ua ohóvo Jehovápe. Upéicha jahechaukáta avei ñamombaʼeha chupekuéra.