‘Ñamombeʼu opárupi ha kyhyjeʼỹre Ñandejára Ñeʼẽ’

¹ Rekyhyjépa sapyʼánte reñeʼẽ hag̃ua umi mbaʼe regueroviávare, ne kompañéro de traváho térã eskuelapegua ndive? Hasýpa ndéve reñeʼẽnte hag̃ua Ñandejárare ne hentekuéra, ne vesíno térã ambue nde rapichándi? Mbaʼépa nepytyvõta remombeʼu ‘hag̃ua opárupi ha kyhyjeʼỹre Ñandejára Ñeʼẽ’? (Fili. 1:14., JMP)

² Ani rekyhyjétei. Rekyhyjénepa redefende hag̃ua peteĩ ne amigoitépe térã peteĩ ne famíliape oñeñeʼẽ vaíramo hese? Jehová ningo ñane amigoite ha ymaiterei guivéma oĩ nomombaʼéiva chupe ha oñeʼẽ vaíva hese. Ha ñande añoite ikatu ñañeʼẽ porã Ñandejára ijojahaʼỹvare (Isa. 43:10-12). Jahayhu añetéramo Jehovápe ndajakyhyjemoʼãi ñañeʼẽ hag̃ua. Ñande pyʼaguasúta katu ñamombeʼu meme hag̃ua Iñeʼẽ heʼíva (Hech. 4:26, 29, 31).

³ Aníkena nderesaráitei jaguerahahañaína marandu porã. Umi ñanerendúva ohupytýta heta mbaʼe porã opa ára g̃uarã. Nañapensaivaʼerã ñandejehénte térã umi oñemoĩvare ñanderehe. Jahechakuaáramo iñimportantetereiha japredika ndajakyhyjemoʼãi ñamombeʼu hag̃ua pe marandu porã.

⁴ Ehémplo porã oĩva. Ñanemokyreʼỹ avei jahecháramo heta oĩhague iñeʼẽrendúva Ñandejárape ha omosarambíva Iñeʼẽ kyhyjeʼỹre. Ñanemanduʼa Enoc rehe, haʼe pyʼaguasúpe omomaranduvaʼekue Jehová ohunditaha umi naiñeʼẽrendúivape chupe ha hembiapo vaívape (Judas 14, 15). Noé ojapovaʼekue Ñandejára heʼihaichaite, oĩramo jepe nohendúiva chupe (Mat. 24:37-39). Umi kristiáno ypykue ‘ndahaʼéiramo jepe iñaranduetereíva’ opredika meme hikuái oĩramo jepe oñemoĩva hesekuéra (Hech. 4:13, 18-20). La Atalaya ha ¡Despertad!-pe avei heta vése osẽ umi mbaʼe ohasavaʼekue ñane ermanokuéra. Ojeroviágui Jehováre ndokyhyjéi ha kyreʼỹme opredika meme hikuái.

⁵ Tuichaite ningo ñanemombarete jaleéramo mbaʼéichapa Ñandejára siervokuéra ymaguare iñeʼẽrendu chupe ohasa asýramo jepe (1 Rey. 19:2, 3; Mar. 14:66-71). Ñandejára oipytyvõ chupekuéra omombeʼu hag̃ua hembipota pyʼaguasúpe. Ñande avei ikatu jajapo haʼekuéra ojapohaguéicha (1 Tes. 2:2).