Jasegíkena ñañeʼẽ kyhyjeʼỹre Ñandejára Ñeʼẽgui

¹ Peteĩ kristiáno opredikáva Ñandejára Ñeʼẽ oikuaa porã oĩtaha umi ndoguerohorýiva pe predikasión (Mat. 10:14). Upéicharõ jepe, ndajahejái umi nohenduséiva ñandejoko ani hag̃ua ñañeʼẽ pe marandu porãgui (Pro. 29:25). Mbaʼépa ñanepytyvõta jasegi hag̃ua ñamosarambi Ñandejára Ñeʼẽ jakyhyjeʼỹre?

² Pe apóstol Pablo oguerohorými ‘umi mbaʼe porãite oikuaavaʼekue Jesucrístogui’. Upéva omomýi chupe oñeʼẽ hag̃ua ‘tuicha jerovia reheve’ (Fili. 3:8; 1 Tes. 1:5). Oĩramo jepe umi heʼíva vyroreiha pe opredikáva, Pablo oikuaa upéva ‘haʼehague Ñandejára podér, ojesalva hag̃ua opavave ogueroviáva’ (Rom. 1:16). Upévare, otopáramo jepe umi oñemoĩva ipredikasión rehe, haʼe ‘oñeʼẽ kyhyjeʼỹre, Jehová heʼihaguére chupe opredika hag̃ua’ (Hech. 14:1-7; 20:18-21, 24).

³ Mbaʼépa ikatu ñanemombarete. Ndahaʼéi Pablo opredikáva kyhyjeʼỹre ojeroviágui ijehénte. Oñeʼẽvo ijehe ha Silas rehe, Pablo heʼi: “Heta rohasa asy rire ha rojerereko asy rire [...] Filípospe, roñembopyʼaguasu Ñandejára rupive roñeʼẽ hag̃ua peẽme Ñandejára marandu porã heta ñorairõ paʼũme” (1 Tes. 2:2; Hech. 16:12, 37). Avei, oĩ aja préso Rómape, Pablo ojerure iñermanokuérape oñemboʼe hag̃ua hese, ikatu hag̃uáicha osegi oñeʼẽ pe marandu porãgui ‘okyhyjeʼỹre, pórke upéicha oñeʼẽvaʼerã kuri’ (Efe. 6:18-20). Ojeroviágui Jehováre, ojeroviarangue ijehe, Pablo ikatu osegi oñeʼẽ Ñandejára ñeʼẽgui okyhyjeʼỹre (2 Cor. 4:7; Fili. 4:13).

⁴ Koʼág̃a upéicha avei. Peteĩ ermáno, otopavaʼekue hasyetereiha chupe omombeʼu hag̃ua imbaʼapohápe haʼeha peteĩ Testigo de Jehová, ha opredika hag̃ua, ojerure Jehovápe oipytyvõ hag̃ua chupe, ha oñepyrũ oñeʼẽ. Peteĩ iñirũ ñepyrurã nohenduséi, péro omombeʼu rire chupe oñemoingove jeytaha umi omanovaʼekue ipahápe oñepyrũ ostudia. Upe rire pe ermáno oñemoĩ opredika ija vovéntema chupe. Ova rire ótro imbaʼapohápe, 14 áñope oipytyvõ 34 iñirũnguérape ojevautisa hag̃ua. Ñande avei ikatu jajerovia Jehová ñanemombaretetaha ‘ñañeʼẽ meme hag̃ua iñeʼẽgui jakyhyjeʼỹetére’ (Hech. 4:29).