Umi mbaʼe jaikuaaséva
◼ Mbaʼépa heʼi “pe tembiguái jeroviaha ha iñarandúva” oĩramo testigos de Jehová ijehegui reínte oñembyatýva oñemongeta térã ohesaʼỹijo hag̃ua Ñandejára Ñeʼẽ rehegua? (Mat. 24:45, 47.)
Heʼi noĩporãiha, ndeʼíri ojejapo hag̃ua upéicha. Upéicharõ jepe, opárupi oĩ ermáno ijeheguínte oñembyatýva ohesaʼỹijo hag̃ua umi mbaʼe heʼíva Ñandejára Ñeʼẽ. Oĩ umi ostudiáva evréo ha griégo yma guare ohecha hag̃ua oĩ porãpa pe Traducción del Nuevo Mundo. Oĩ avei umi ombojojáva Ñandejára Ñeʼẽ umi sientífiko heʼíva rehe. Omoĩ avei hikuái Internétpe oñeñemongeta hag̃ua umi mbaʼére, ha oñembyaty hikuái oñeʼẽ hag̃ua umívare. Oguenohẽ hikuái puvlikasión omombeʼu hag̃ua oikuaáva ha omyesakãve hag̃ua umi rreunionhápe oñehendúva ha ñane puvlikasionkuéra heʼíva.
Opárupi ko Yvy ape ári, Jehová rembiguaikuéra oñehekomboʼe porã ha oñemokyreʼỹ chupekuéra rreunionhápe, asambléa tuicháva ha michĩvape ha umi puvlikasión rupive. Ijespíritu ha Iñeʼẽ rupive, Jehová omeʼẽ oikotevẽva hembiguaikuérape. Ha upéicha ‘ani hag̃ua ojoavy hikuái, oiko porã oñondive, ojepyʼamongeta ha oñeñandu hag̃ua peteĩcha’. Avei ‘oñemopyenda hatã hag̃ua hikuái ijeroviáre’ (1 Cor. 1:10; Col. 2:6, 7). Katuete ñamombaʼeñaína opa mbaʼe Jehová omeʼẽva ñandéve ñanerekomboʼe hag̃ua. Upéicharõ, noĩporãi umi puvlikasión, rreunión térã umi lugár oñemoĩva internétpe, ndahaʼéiva ‘pe tembiguái jeroviaha ha iñarandúva’ rembiapokue (Mat. 24:45-47).
Jaguerohoryeténingo umi oiporúvape iñarandu omosarambi hag̃ua marandu porã. Upéicharõ jepe, avave nombyairivaʼerã Jesucristo ojapovahína ikongregasión rupive. Apóstol Pablo heʼivaʼekue yma umi kristianokuérape ani hag̃ua ombaʼapoiterei umi mbaʼe oipeʼaitereítavape chuguikuéra itiémpo. Heʼi chupekuéra: ‘Umi ñeʼẽ rei opaʼỹva ñande ypykue rehegua. Umi mbaʼe umíva oporomoingo vai rei ha noporopytyvõi ojekuaa hag̃ua [Ñandejára] rembipota, ojekuaáva jajeroviáramo hese mante’ (1 Tim. 1:3-7). Tekotevẽ enterove kristiáno oñehaʼã ‘ojehekýi umi vyrorei ñande ypykue reheguágui, ñeʼẽ joapi ha ñeʼẽ ñorairõ pe léi reheguágui, koʼã mbaʼe ningo vyrorei ha naiporãi mbaʼeverã’ (Tito 3:9, JMP).
Umi ostudiasevéva ha ohesaʼỹijoséva Ñandejára Ñeʼẽ, ikatu oiporu Perspicacia para comprender las Escrituras ha “Toda Escritura es inspirada de Dios y provechosa”. Upéicha avei umi puvlikasionkuéra oñeʼẽva profesíare, umíva apytépe lívro de Daniel, Isaías ha Revelación. Koʼãvape petopáta heta mbaʼe pehesaʼỹijo hag̃ua Ñandejára Ñeʼẽ ha pejepyʼamongeta hag̃ua hese. Upéicharõ, ‘Ñandejára oikuaauka porãta peẽme hembipota ha omeʼẽta peẽme opaichagua arandu ha kuaapy Espíritu Sántogui oúva. Ikatu hag̃ua peiko umi Ñandejára mbaʼéva oikovaʼerãháicha, ha pejapo meme hag̃ua upe chupe ombovyʼáva, pene rembiapo porã heta hetavevaʼerã ha peikuaa porãve Ñandejárape’ (Col. 1:9, 10, BNP).