Umi mbaʼe jaikuaaséva
◼ Oĩ porãpa peteĩ testigo de Jehová oho umi ospitál omoakãvape peteĩ organización religiosa?
Heta oĩ rrelihión omoakãva umi ospitál, ndahaʼéiramo jepe omotenonde hag̃ua irrelihión (Rev. 18:2, 4). Ikatu ningo umi organización religiosa oipytyvõnterakaʼe oñemopuʼã hag̃ua peteĩ ospitál. Koʼág̃a rupi oĩ heta ospitál héra rrelihiósonteva, ndahaʼéi katuete upe rrelihionpegua omotenondéva upe ospitál. Péro oĩ avei ospitál ombaʼapohápe gueteri umi saserdóte térã monhakuéra.
Káda testigo de Jehová odesidivaʼerã ohótapa peteĩ ospitál omoakãvape umi organización religiosa. Peteĩ ermáno ikatu odesidi ohotaha ha ambue katu nahániri (1 Tim. 1:5). Upévare ñañatende porã vaʼerã heta mbaʼére ikatu hag̃uáicha jadesidi jahátapa térãpa nahániri.
Ñamoĩ chupe peteĩ ospitál héra rrelihiósovamante oĩha nde reikoha rupi. Ikatu avei oĩ ótro péro upépe noñeñatendeporãi. Térã pe ospitál rrelihiósope añoite ojejapo umi tratamiénto nde reikotevẽva ha upépemante avei oñatende nde doktór. Ikatu ningo pe ospitál rrelihiósope oñeñatende porã ñanderehe jaʼéramo chupekuéra ñande nañamoĩukaiha tuguy ha umi ótro ospitálpe katu ndojejaposéi mbaʼe upéva. Koʼã mbaʼére ñapensa porã vaʼerã jadesidi hag̃ua mbaʼe ospitálpepa jaháta.
Peteĩ ermáno odesidíramo ohotaha peteĩ ospitál omoakãvape umi organización religiosa, ikatu heʼi ambue ospitalchanteha avei upépe, japaga ha oñeñatendehápe ñanderehe. Ikatu opensa ndahaʼeiha katuete japagahaguére ñaipytyvõmavañaína umi rrelihión japúpe. Síno japaganteha oñeñatendehaguére ñanderehe.
Péro jadesidíramo péicha, jahecha porã vaʼerã nañamoirũmoʼãipañaína ambue mbaʼépe umi rrelihión japúpe. Ha nañahenoimoʼãi “Padre” térã “Ermána” umi ombaʼapóvape upépe térã ovisitávape pe lugár (Mat. 23:9). Jahecha porã vaʼerã avei añetehápepa ambue ospitálchante avei upépe: Oñeñatende ñanderehe, japaga ha upévantema.
Peteĩ ermáno ohóramo oñeinterna hag̃ua peichagua ospitálpe, ikatu omombeʼu haʼeha testigo de Jehová ha oipotaha umi ansiáno uperupigua ovisita chupe. Upéicharõmante ermanokuéra oipytyvõta avei chupe oĩ aja upépe (1 Tes. 5:14).
Ñapensa porã vaʼerã koʼã mbaʼe jahechavaʼekuére ha upéi ñandete jadesidi hag̃ua mbaʼeichagua ospitálpepa jaháta (Gál. 6:5).