Kárta omboúva Cuerpo Gobernante
Ore maitei enterove ermanokuérape:
Apóstol Pablo ningo pyʼỹinte omokyreʼỹvaʼekue ambue ermanokuérape. Upévare ohai umi Romayguápe: ‘Tenondete, Jesucristo rupi ameʼẽ che aguyje Ñandejárape, peteĩteĩ penderehe, opárupi niko heta imanduʼáva pende jeroviáre’ (Rom. 1:8). Upe síglo primérope, Roma tuichakue javeve ojekuaavaʼekue umi ermánope ojerovia mbarete ha opredika kyreʼỹ rupi hikuái (1 Tes. 1:8). Ndareíriningo Pablo ohayhueterei chupekuéra.
Pablo oñeñanduhaguéicha, ore rovyʼaiterei avei pendereheve ha roagradese Jehovápe upévare. Ermanokuéra, ore ningo pohayhueterei. Ha peikuaa porã Jehová penderayhuha avei. Oĩramo jepe oñemoĩva penderehe, peẽ pesegi pepredika. Oiméne Jehová ovyʼaite ohechávo mbaʼeichaitépa pendeguápo! (Pro. 27:11.)
Opokóta katuete pene korasõre ha penemokyreʼỹta pelee vove pe Anuario. Pejepyʼamongetákena peleévo pe párte heʼíva: “Hechos de los testigos de Jehová de tiempos modernos”. Upépe pehechakuaáta añetehápe Jesús ‘osẽmaha ipuʼaka hag̃ua’ opaite oñemoĩvare hese; ha ndaiporiha avave ikatútava ñanerundi (Rev. 6:2; Isa. 54:17).
Pablo ohai avei umi ermáno Filípospe oĩvape: ‘Ameʼẽ che aguyje Ñandejárape chemanduʼa jave penderehe ndaikatúi cheresarái heta chepytyvõhague amoherakuã ypy guive Ñandejára marandu porã’ (Fili. 1:3-5, JMP). Ore peichaite avei roʼe penderehe. Ko áño de servísio ohasavaʼekuépe, 6.691.790 puvlikadór opredika 1.431.761.554 óra 236 tetãme. Mbaʼeichaitépa peipytyvõpeína oñemombeʼu hag̃ua opárupi pe marandu porã! Pepensamíntena mboy ñande rapichápa oikuaáma Ñandejárape ñañomoirũ mbarete rupi ñamombaʼeguasu hag̃ua Jehovápe.
Pablo ojepyʼapy umi ermáno Tesalonicayguáre, upévare omondo chupekuéra peteĩ kárta heʼíva: ‘Oremanduʼa tapia mbaʼéichapa peropuʼaka opa mbaʼe pe esperánsa perekóva rupi Jesucristo rehe’ (1 Tes. 1:2, 3, BNP). Ñande avei jagueropuʼakavaʼerã heta provléma. Mbaʼeichagua provlémapa rembohovaireína? Reñembyasyetereípa ndaikatuihaguére reservi Jehovápe ymaguaréicha, nderasykatu rupi? Omanópa ndehegui ne ména térã ne rembireko? (Pro. 30:15, 16.) Nderejuhúipa Jehová organisasiónpe ne ména térã ne rembirekorã ha upéicharamo jepe neremendái peteĩ ojeroviaʼỹvare Jehováre? (1 Cor. 7:39.) Reñehaʼãpareína reñangareko ne família rehe ijetuʼúramo jepe ñane situasión? Ore ermanokuéra, toiko oikóva ani penderesarái pemotenondérõ Jehová rembipota haʼe “ndahesaraichéne pene rembiapógui ha mborayhu pehechaukavaʼekue héra rehe”. Upévare “nañanekaneʼõivaʼerã jajapo hag̃ua iporãva” (Heb. 6:10 JMP; Gál. 6:9).
Péro, mbaʼépa ikatu penepytyvõ peropuʼaka hag̃ua? Pe ‘esperánsa perekóva Jesucristo rehe’, upéva oipytyvõvaʼekue avei umi Tesalonicayguápe. Ndareíri Pablo upe rire ombojoja ko esperánsa peteĩ kásko térã yelmo rehe. Pe esperánsa oñangareko ñanderehe ani hag̃ua ñapensa umi mbaʼe ñanemokangýtavare (1 Tes. 5:8).
Vyʼápe pegueropuʼakáramo opa mbaʼe pehechaukapeína Satanáspe Jehová añoite orekoha derécho ñanesãmbyhývo. Satanás ningo heʼi jaserviha Jehovápe omeʼẽhaguére ñandéve heta mbaʼénte. Ha heʼi avei ñamboyketaha Jehovápe jahasa asýramo térã nohundipyaʼéiramo ko múndo. Koʼág̃a peẽ ikatu pehechauka Satanás ijapuetereiha! Koʼýte jaikuaágui oñekumplitamaha umi mbaʼe porã ñahaʼarõva.
Pablo ningo omokyreʼỹ meme vaʼekue iñermanokuérape. Ohechakuaa ogueropuʼakaha heta provléma, ijerovia mbarete ha opredika memeha. Péicha avei ore rovyʼa pendereheve ha roguerohoryeterei opa mbaʼe porã pejapóva. Pesegíkena péicha!
Tapenderovasa avei Jehová ko áño de servísiope. Romog̃uahẽ peẽme ore maitei ha mborayhu.
Pene ermanokuéra,
Cuerpo Gobernante de los Testigos de Jehová