Umi mbaʼe jaikuaaséva

◼ Ikatúpa jajepopete káda párte rire Eskuéla dél Ministério Teokrátiko ha Rreunión de Servísiope?

Jehová ojapórõ guare ko Yvy, umi anhelkuéra ‘opurahéijoa vyʼápe’ (Job 38:7). Umi ánhel ningo omombaʼeguasuse Jehovápe hembiapokue porãitáre. Umi mbaʼére ningo ojekuaa Ñandejára iñarandu, ipoderóso ha imbaʼeporãitereiha.

Ñande avei jaagradesevaʼerã ñane ermanokuérape oñehaʼãmbaite haguére ñanerekomboʼe. Ñande aty guasuhápe ningo jajepopetejoa jepi káda ermáno ojapopa rire ipárte. Umi ermáno ningo heta ombaʼapo oprepara hag̃ua upéva asamblearã. Ha jajepopete rupi, jahechauka jaagradeseha chupekuéra upévare ha Jehovápe avei. Haʼe ningo ñanerekomboʼehína Iñeʼẽ ha iñorganisasión rupive (Isa. 48:17; Mat. 24:45- 47).

Upéicharõ, ikatúpa jajepopete káda párte rire Eskuéla dél Ministério Teokrátiko ha Rreunión de Servísiope? Ndaikatúi ningo jaʼe ndovaleiha. Ikatu ningo ojejepopete ojeagradeseségui upe párte omeʼẽvaʼekuépe. Ñamoĩ chupe peteĩ estudiánte ojapo jave iprimér diskúrso. Péro káda párte rire ojejepopetéramo ikatu ojejapóntema ojejepokuaágui rei ha ndahaʼéi katuete ojeagradese hag̃ua. Upévare ndajajepopetéi jepi káda párte rire.

Ndajajepopetéiramo jepe káda párte rire Eskuéla dél Ministério Teokrátiko térã Rreunión de Servísiope, ikatu hína jaagradese ñane ermanokuérape. Mbaʼéichapa? Ñañatende porã vaʼerã hesekuéra ojapo jave ipárte. Ha rreunión opa rire katu jahakuaa jaʼe ñane ermáno térã ermánape iporãiterei hague ipárte (Efe. 1:15, 16).