Péicha ningo javyʼa!
1. Mbaʼérepa iporã ñapensa jajapo hag̃ua precursorado regular?
1 Hiʼãpa ndéve revyʼave? Revyʼápa reipytyvõramo nde rapichakuérape? Rembaʼaposevépa Jehovápe g̃uarã? Rejaposéramo koʼã mbaʼe, repensantemavaʼerã rejapo hag̃ua precursorado regular. Péro upearã ñapensavaʼerã umi rresponsavilida jarekóvare ñande rogapýpe térã ambue mbaʼépe. Ñapensavaʼerã avei ñaneresãi porãpa jajapo hag̃ua ko mbaʼe.
2. Emombeʼu umi mbaʼe porã ohupytýva prekursorkuéra.
2 Salomón heʼivaʼekue Jehová ovendesi rupi chupe orekoha heta mbaʼe repy (Pro. 10:22). Koʼág̃a katu Jehová ñanevendesi omeʼẽvo ñandéve heta mbaʼe jaikuaave hag̃ua chupe. Ha umi prekursórpe ningo tuichaiterei oipytyvõ upéva. Haʼekuéra ningo ‘oiporu porã’ itiémpo ha omboyke heta mbaʼe oipytyvõ hag̃ua hapichakuérape. Ha upéva ningo ombovyʼaiterei chupekuéra (Col. 4:5; Hech. 20:35). Jehová ohecha mbaʼéichapa mborayhúpe ojapo hikuái hembiapo ha omombaʼeterei upéva. Upéicha rupi ombyaty hikuái umi “mbaʼeta yvágape” noñehundimoʼãiva arakaʼeve (Mat. 6:20; Heb. 6:10). Umi prekursór ningo ndoipotái heta mbaʼe. Ojerovia uvei Jehová omeʼẽtaha chupekuéra opa oikotevẽmíva. Upéicha rupi oñemoag̃uive avei hikuái Jehováre (Mat. 6:22, 25, 32; Heb. 13:5, 6).
3. Mbaʼeichagua mbaʼe porãpa jahupyty Ñandejáragui ha mbaʼépa oikóta ñanderehe ñambaʼapoitereíramo jaipotágui heta mbaʼe?
3 Ñambaʼapoitereíramo jareko hag̃ua heta mbaʼe, ikatu ‘jajepyʼaraʼã ha jaʼa pyʼatarova ha ñehundípe’ (1 Tim. 6:9, 10; Sant. 5:1-3). Péro umi mbaʼe porãita Jehová omeʼẽva ñandéve nañandereitymoʼãi koʼã mbaʼépe. Umi prekursór ningo oiporu heta itiémpo predikasiónpe. Upéva oipytyvõ chupekuéra omotenonde meme hag̃ua Ñandejára rembipota, ha umi mbaʼe iñimportantevéva (Fili. 1:10). Peteĩ ermáno ningo ingeniero ha ombaʼapoiterei rupi nahembyvéima chupe tiémpo mbaʼeverã. Upémarõ oheja itraváho ha ojapo iprekursorádo. Upe rire heʼi: “Che traváho ningo chejopyetereivaʼekue ha ko che prekursorádo katu nahániri. Koʼág̃a aipytyvõ umi che rapichápe ha amboʼe chupekuéra Ñandejáragui. Kóva ningo igustoiterei ha chembovyʼa avei”.
4. Mbaʼépa ohasa umi precursor regular oipytyvõ haguére hapichakuérape?
4 Ñaipytyvõ ñande rapichápe. Koʼág̃a rupi enterovénte ‘ohasa asy’ (2 Tim. 3:1). Opavavénte ningo tekotevẽ oikuaa umi mbaʼe porã ñaneraʼarõva. Ñande ningo javyʼaiterei jahechávo mbaʼéichapa umi ñande rapicha oñembyasymi vaʼekue, hova rory asy ohendu rire pe marandu porã. Koʼýte ovyʼavéne umi precursor regular. Haʼekuéra ningo oiporuhína ochocientos cuarenta óra rupi káda áño omombeʼu hag̃ua pe marandu oporosalvátava (1 Tim. 4:16).
5, 6. Mbaʼépa ñanepytyvõta jajapo hag̃ua precursorado regular?
5 Rejaposépa avei precursorado regular? Ikatu ‘reiporukuaánte ne tiémpo’. Ha upearã remboykevaʼerã umi mbaʼe naiñimportánteiva (Efe. 5:15, 16). Heta ermáno ningo ojapo upéicha. Omboyke umi mbaʼeta orekóva ha ombaʼapo médio díante osẽve hag̃ua predikasiónpe. Ikatúpa nde avei rejapo upéicha ha remoirũ chupekuéra?
6 Ejerure Jehovápe tanepytyvõ remohenda porã hag̃ua ne rembiapokuéra ikatu hag̃uáicha hembyve ndéve tiémpo (Sant. 1:5). Mbaʼépa rehupytýta rejapóramo upéicha? Heta mbaʼe porã! Ha Jehová omeʼẽta avei ndéve opa reikotevẽmíva reikove hag̃ua (Mat. 6:33). Rejeroviáramo upéicha Jehováre, Haʼe ‘oñohẽta nde ári ipytyvõ hembypa peve’ (Mal. 3:10).