Testigos de Jehová Aty Guasu, 2009
1. a) Mbaʼépepa ñanepytyvõta jaháramo umi tres día ñande aty guasúpe? b) Mbaʼépa jajapokuaa koʼág̃ama voi?
1 Enterove ningo ñahaʼarõ joáma hína ñande aty guasu 2009. Upépe ikatúta ñaime ñane ermanokuéra ndive ñamombaʼeguasu hag̃ua Ñandejárape. Haʼekuéra ñandéicha avei ‘ohechakuaa oikotevẽha hese’ (Mat. 5:3). Iñimportanteterei ningo jaha jaikuaágui Jehová ára hiʼag̃uimbaitemaha. Ñaiméramo umi tres día ikatúta ñamombareteve ñande jerovia ha ñañomokyreʼỹ (Sof. 1:14). Ñane patrón térã ñande profesór eskuéla ha kolehiopegua, ohechakuaavaʼerã ñamombaʼeha ko aty guasu ha katuete ñaimeseha upépe ñamombaʼeguasu hag̃ua Ñandejárape. Haʼe ningo ñanepytyvõ ha ñanevendesíta jajepreparáramo koʼág̃ama voi (Isa. 50:10).
2. Mbaʼérepa jaʼekuaa oĩtaha oñeñandúva oĩramoguáicha peteĩ asambléa internasionálpe?
2 Asambléa internasionál. Ko aty guasu ojejapóta ambue tetãme, ha upépe ohóta umi osolisita ha oñemeʼẽvaʼekuépe añónte. Ñaneñeʼẽrendúkena ko mbaʼépe ikatu hag̃uáicha ijapa porã umi ermanokuéra pe lugár ojejapotahápe (1 Cor. 14:40; Heb. 13:17). Oĩtáramo jepe heta ndohomoʼãiva peteĩ asambléa internasionálpe, oñeñandúta oĩramoguáicha upépe. Pórke heta misionéro, betelíta ha siérvo internasionál ohóta hetãme ko aty guasurã.
3. Mbaʼéichapa ikatu jahechauka jahayhuha ñane ermanokuérape?
3 Ñaipytyvõkena ótrope oho hag̃ua avei. Oĩpa ñane kongregasiónpe oikotevẽva oñepytyvõ chupe oho hag̃ua asambléape? Ñaipytyvõramo umívape jahechaukáta ‘ndajahekaiha ñandéve ou porãvante, jahekaha guei ou porãva ñande rapichakuérape’ (Fili. 2:4).
4. Mbaʼépa jajapo raẽ vaʼerã ñahenói mboyve sukursálpe?
4 Jaikuaasevéramo ko aty guasúgui. Ñahenói mboyve sukursálpe jaikuaa hag̃ua arakaʼe ha moõtapa ñande aty guasu, iporãvéta jahekáramo La Atalaya del 1 de marzo de 2009-pe térã jajerure sekretáriope umi informasión ñaikotevẽva.
5. Mbaʼépa enterovéva ñañehaʼãvaʼerã jajapo?
5 Ñamombaʼeguasúkena Ñandejárape. Ñañeʼẽ ha jatratávo ñande rapichápe jahechaukavaʼerã umi mbaʼe porã oúva Ñandejára espíritugui. Péicha jajapóramo oñeñeʼẽ porãta Jehová puévlore ha ñamoĩta ehémplo porã ótrope (1 Cor. 10:31; 2 Cor. 6:3, 4). Enterovékena ñañehaʼãmbaite ñaime hag̃ua ñande aty guasu 2009-pe, ha jahechauka umi mbaʼe jajapóvare ñamombaʼeguasuha Ñandejárape (1 Ped. 2:12).
[Rrekuádro oĩva páhina 5-pe]
Mbaʼe órapa oikóta ñande aty guasu
Jueves (Asambléa internasionálpe g̃uarãnte)
Kaʼaru 1.20 guive 4.55 peve
Viernes ha sábado
Pyhareve 9.20 guive, kaʼaru 4.55 peve
Domingo
Pyhareve 9.20 guive, kaʼaru 4.00 peve
[Rrekuádro oĩva páhina 6-pe]
Marandukuéra Aty Guasu rehegua
◼ Moõpa jahejakuaa ñande veíkulo.
Oĩta peteĩ ermáno ohechaukátava moõpa ikatu jaheja ñande veíkulo ha oñeg̃uahẽháicha oñemohendáta ohóvo. Jarekovaʼerã ñande solápa jaikéta vove upépe. Sapyʼánte pe lugár ojehejatahápe umi veíkulo ndatuichái, upévare ñañehaʼãvaʼerã jaha ikatumíva peteĩ áutopente. Ha aníkena jahejátei ñande veíkulo óga ahéno renondépe térã upe rupi reínte.
◼ Jaguapy hag̃ua.
Ikatu ñañongatu lugár oguapy hag̃ua ñanendive ñande rogayguakuéra, térã umi ohóvape ñanendive áutope.
◼ Ñane rembiʼurã.
Jaguerahákena ñande rembiʼurã, anítei ñasẽ jajogua. Upéicha jajapóramo ndaiporimoʼãi ombaʼevendéva ñande aty guasu jajapoha jerére. Ikatu jagueraha peteĩ mbaʼyrúpe ñamoĩ hag̃uáicha ñane asiénto guýpe. Pe aty guasu oikohápe ndovaléi jagueraha mbaʼyru tuichaitereíva, votélla de vídrio térã vevída.
◼ Ojepaga hag̃ua umi mbaʼe ojeporúvare.
Ojejapo hag̃ua ko aty guasu heta ojegasta. Jahechauka hag̃ua ñamombaʼeha, ikatu ñameʼẽ pláta obra mundial-pe g̃uarã ñane Salón dél Rréinope térã pe aty guasu oikohápe. Oñemeʼẽtaramo cheque, ojejapovaʼerã Asociación Torre de Vigía rérape.
◼ Umi nohenduporãivape g̃uarã.
Ikatúta ojeporu rrádio FM oñehendu hag̃ua pe prográma. Oñepyrũvo pe asambléa oĩta peteĩ marandu. Upéva oiporútava oguerahavaʼerã peteĩ rrádio ha peteĩ aurikulár.
◼ Ojegrava hag̃ua.
Pe asambléa oikohápe ndaikatúi oñemoĩ mbaʼeveichagua gravadóra pe sistéma eléktrikore, ni pe sistéma de sonídore. Ha ndajaiporuivaʼerã omolestátaramo ótrope.
◼ Fóto.
Renohẽtaramo fóto, aníkena reiporu flash pe prográma aja.
◼ Selulár.
Umíva ñamoĩvaʼerã ani hag̃uáicha oporomolesta.