Ikatúnepa resẽ repredika domingokue?

1. Mbaʼépa ñanemboʼe Pablo ha iñirũnguéra ojapovaʼekue Filípospe?

¹ Peteĩ jey umi hudío Filipospegua opytuʼu aja sabadokue, Pablo ha iñirũnguéra oho opredika upépe. Avave ndeʼirivaʼerãmoʼã chupekuéra mbaʼeve opytárire opytuʼu avei upe árape. Péro haʼekuéra oikuaa namombyrýi upégui umi hudío oñembyatyha jepi oñemboʼe hag̃ua, upévare oaprovecha ha oho opredika chupekuéra. Upéicha rupi Lidia ha hogayguakuéra ojevautisa. Oiméne piko ovyʼaitéraʼe hikuái opredika haguére upe díape! (Hech. 16:13-15.) Koʼág̃a rupi heta hénte opytuʼu jepi avei domingokue. Ajépa iporãitéta ñañemotiémporamo ñasẽ hag̃ua japredika domingokue!

2. Mbaʼe mbaʼépa ohasáraʼe ñane ermanokuéra ojepredika hag̃ua pyʼaguapýpe domingokue?

² Umi mbaʼe ojehasavaʼekue ojepredika hag̃ua domingokue. Áño 1927 guive oñemokyreʼỹ Jehová siervokuérape omboykeʼimi hag̃ua itiémpo ha opredika domingokue. Péro oñepyrũmírente, oñepuʼãma hesekuéra. Estados Unídospe heta ermánope ojegueraha kárselpe, ojeʼe hesekuéra nokumpliriha pe léi heʼíva ojepytuʼuvaʼerãha domingokue, oporomyangekoiha ha avei ombaʼevendeha permisoʼỹre. Upéicharõ jepe ndojejokói chupekuéra osegi hag̃ua opredika. Ha áño 1930 rupi oñembyaty umi kongregasión ag̃ui oĩva ojuehegui ha ojapo pe “campañas de las divisiones” opredika hag̃ua peteĩ território oñemeʼẽvape chupekuéra. Sapyʼánte hetaiterei oĩ hikuái ha ojejúramo ojeguaraha hag̃ua chupekuéra kárselpe, ndaipuʼakái hesekuéra. Ha ñande, ñamombaʼépa ojapovaʼekue ñane ermanokuéra ikatu hag̃uáicha koʼág̃a rupi japredika pyʼaguapýpe domingokue?

3. Mbaʼérepa opyta porãiterei japredika hag̃ua domingokue?

³ Opyta porãiterei japredika hag̃ua domingokue. Heta hénte ningo nombaʼapói domingokue ha opytánte opytuʼu. Umi hénte ipyʼaporãva katuete itiempovéta oñemongeta hag̃ua ñanendive Ñandejárare. Ha ñane rreuniónramo domingokue ñañemondétama voi japredika hag̃uáicha. Upéicharõ, ikatúnepa ñañemotiémpo ñasẽ hag̃ua japredika oñepyrũ mboyve térã opa rire ñane rreunión? Ha jaipotáramo, jaguerahakuaa avei michĩmi jaʼumivaʼerã.

4. Mbaʼépa ikatu oiko ñañemotiémporamo japredika hag̃ua domingokue?

⁴ Ñañemotiémporamo japredika hag̃ua domingokue, hembýta gueteri ñandéve tiémpo japytuʼumi hag̃ua. Ha iporãveha, javyʼáta ñasẽ haguére ñamombaʼeguasu Jehovápe japredikávo (Pro. 19:23). Ha ikatu voi jatopañaína peteĩ oserviséva Ñandejárape Lídiaicha!