Aníke rekyhyje
1. Mbaʼéicha javépa tekotevẽ ndepyʼaguasu, ha mbaʼérepa?
1 Oĩ ningo ndopredikáiva ijeskuélape okyhyjégui oñembohorýrõ g̃uarã hese hapichakuéra. Oikómavapa nderehe upéicha? Rejapo hag̃ua upéva ningo ndepyʼaguasuvaʼerã, koʼýte oiméramo neotĩ. Jahechamína mbaʼépa ikatu nepytyvõ.
2. Mbaʼéichapa rehechaukáta nembaʼerechakuaaha repredikávo eskuélape?
2 Nembaʼerechakuaavaʼerã. Ikatúramo jepe repredika nde eskuélape, nemanduʼavaʼerã natekotevẽiha reñeʼẽ la Bíbliare enterovépe, repredikaramoguáicha ogahárupi. Nembaʼerechakuaavaʼerã reikuaa hag̃ua mbaʼéicha javépa repredikáta (Ecl. 3:1, 7). Ikatu ningo oñemeʼẽ jave peteĩ kláse térã tembiapo, opyta porã ndéve reñeʼẽ hag̃ua nde jeroviáre. Térã ne kompañéro oporandu ndéve mbaʼérepa nderejapói peteĩ mbaʼe haʼekuéra ojapóva. Oĩ avei ermáno omombeʼúva imboʼeharakuérape haʼeha testígo de Jehová oñepyrũrema voi umi kláse, ha omeʼẽ chupekuéra umi puvlikasión omyesakãvéva ñande jagueroviáva. Ambue katu oheja umi puvlikasión ijapyka ári ikatu hag̃uáicha ikompañéro ohecha ha upéi oporandu chupe umívare.
3. Mbaʼéichapa ikatu reñembosakoʼi repredika hag̃ua eskuélape?
3 Eñembosakoʼivaʼerã. Rejeprepara porãramo, ndepyʼaguasuvéta repredika hag̃ua (1 Ped. 3:15). Iporãta repensáramo mbaʼépa ikatu oñeporandu ndéve ha mbaʼéichapa rembohováine chupekuéra (Pro. 15:28). Ijáramo ndéve, reguerahavaʼerã peteĩ Biblia, lívro Los jóvenes preguntan térã Razonamiento ha ambue puvlikasión omombeʼúva Ñandejára haʼeha opa mbaʼe Apohare, ikatu hag̃uáicha reiporu reikotevẽ vove. Avei rejerurekuaa nde tuvakuérape peñensaja hag̃ua pestudia vove oñondivepa.
4. Mbaʼérepa reñehaʼãvaʼerã repredika eskuélape?
4 Repensavaʼerã osẽ porãtaha ndéve. Ani repensa ne kompañerokuéra oñembohorytaha katuete nderehe repredika vove chupekuéra. Ikatu oĩ nemombaʼéva ndepyʼaguasu haguére ha upéicha rupi nerendu. Péro peichahágui nopenáiramo nderehe hikuái ani nekangy, nemanduʼavaʼerã Jehová ovyʼaitereiha ndereheve reñehaʼã haguére (Heb. 13:15, 16). Ha rejerurevaʼerã Chupe tanepytyvõ ‘akóinte remombeʼu hag̃ua Iñeʼẽ kyhyjeʼỹme’ (Hech. 4:29; 2 Tim. 1:7, 8). Epensamína mbaʼeichaitépa revyʼáta peteĩ jepe nerendúramo ha oservi Jehovápe!