JAHECHAUKÁKENA JASERVIHA JEHOVÁPE
Epredikákena kyreʼỹme umi notísia porã
¿Ijetuʼúpa ndéve sapyʼánte resẽ hag̃ua repredika? Sapyʼánte oiko ñanderehe upéva umi hénte noñatendeséigui ñanderehe predikasiónpe térã ijetuʼu rupi ñandéve ñañemongeta hag̃ua umi hénte ndajaikuaáivandi. Umíva ikatu ñanedesanima, péro Jehová ningo peteĩ Dios ovyʼáva ha upévare oipota ñande jaservi chupe vyʼápe (Sl 100:2; 1Ti 1:11). Jahechamína mbohapy mbaʼe ñanemomýitava kyreʼỹme ñasẽ hag̃ua japredika.
Primero, ñande jaraha peteĩ mensáhe omeʼẽva esperánsa umi héntepe. Koʼág̃arupi ningo la hénte nohaʼarõvéima voi mbaʼeve iporãva, péro ñande ikatu ñamokyreʼỹ chupekuéra umi notísia porã rupive (Is 52:7). Ñandéve avei ñanemokyreʼỹ ha ñanembovyʼa umi notísia porã oñeʼẽva Ñandejára Rréinore. Upévare ñasẽ mboyve japredika, ñañemotiémpo vaʼerã jajepyʼamongeta hag̃ua umi mbaʼe porã ojapótavare pe Rréino ko yvy ape ári.
Segundo, pe mensáhe jaraháva oipytyvõ umi héntepe oheja hag̃ua umi mbaʼe vai ojapóva ha oñemoag̃ui hag̃ua Ñandejárare. Upéicha rupi oĩma ohejáva umi vísio vai oreko vaʼekue ha koʼág̃a orekóma oportunida oikovévo opa árare (Is 48:17, 18; Ro 1:16). Pe traváho ñande jajapóva ningo iñimportanteterei pórke ikatu oipytyvõ umi héntepe ojesalva hag̃ua. Upévare, oĩramo jepe nohenduséiva pe mensáhe, ñande jasegíta jaheka umi hénte ojesalvasévape (Mt 10:11-14).
Tercero, la iñimportantevéva hína pe predikasión rupive ñamombaʼeguasu Jehovápe. Haʼe omombaʼeterei upéva (Is 43:10; Heb 6:10). Jehová omeʼẽ voi ñandéve ijespíritu sánto jajapo porã hag̃ua ko tembiapo. Upévare jajerure vaʼerã chupe tomeʼẽ ñandéve pe vyʼa oúva ijespíritu sántogui (Gál 5:22). Jehová oĩramo ñande ykére mbaʼeve nañandejokomoʼãi ha ikatúta pyʼaguasúpe japredika (Hch 4:31). Upévare, oĩramo jepe nañanerenduséiva, ñande lomímonte javyʼa jajapóvo Jehová ohaʼarõva ñandehegui (Eze 3:3).
¿Mbaʼe aktitúpa nde reguerekose resẽ jave repredika? ¿Mbaʼéichapa ikatu rehechauka revyʼaha predikasiónpe?
EHECHA PE VIDÉO RESTUDIA HA REJEPYʼAMONGETÁRAMO NEKYREʼỸ JEÝTA HA UPÉI ERRESPONDE KOʼÃ PREGÚNTA:
¿Mbaʼérepa iñimportánte jastudia ha jajepyʼamongeta meme japredikáramo jepe heta óra káda mes?
¿Mbaʼéichapa ikatu jasegi María ehémplo?
¿Mbaʼe órapa nde reñemotiémpo jepi rejepyʼamongeta hag̃ua la Biblia heʼívare?
¿Mbaʼépa ndéve ndegustave pe predikasiónre?